YOOSOMA 20
Muloko Otthokihiwe Sai?
Yehova Muluku tootthokiheya. (1 aKorinto 14:33, 40) Tivonto arumeyi awe ari aya ootthokiheya. Masi muloko otthokihiwe sai? Ninrowa okhaliherya sai muloko okhala wootthokiheya?
1. Ti pani ori muhooleli a muloko?
“Kristu . . . [tori] muru wa muloko”. (aEefeso 5:23) Ori ene wiirimu, Yesu onnihoolela miteko sinivariwa ni atthu a Yehova olumwenku wotheene. Nave Yesu oomuthanla “murumeyi oororomeleya ni a ankhili”, ekrupu yaamukhaani ya axitokweene arina waamini woolipa, yaawo-tho anisuweliwa okhala Nikhuuru Noolamulela. (Mmusome Matheyo 24:45-47.) Khalai arummwa ni axitokweene a oYerusalemu ti yaavaha malakiheryo miloko sotheene sa okathi ole. Mwa enamuna emosaru, olelo-va Nikhuuru Noolamulela ti ninvaha malakiheryo miloko sotheene sa Anamoona a Yehova olumwenku wotheene. (Miteko 15:2) Masi alopwana awo khahiyo ahooleli a mutthenkeso ahu. Awo annimusoma Biibiliya wira asuwele ele Yehova oniphavela awe wira apakeke ni annitthara ohoolela wa Yesu Kristu.
2. Ti pani ari axitokweene a mmulokoni ni anivara exeeni?
Axitokweene a mmulokoni alopwana arina waamini woolipa ni annimurumeela Biibiliya wira awiixuttihe atthu a Yehova. Nave awo annaakhaliherya ni waalipiha atthu a Muluku wira ahihiye omurumeela Yehova. Awo khaniliviwa mwaha wa muteko anivara aya. Ohiya-vo annivara ‘ni murima wotheene, ntoko Muluku oniphavela awe. Annikhapelela ni nthiti, ohiya mwaha woophavela ophwanya etthu’. (1 Pedru 5:1, 2) Nave axitokweene annikhaliheriwa ni arumeyi ookhaliherya, yaawo-tho muhoolo mwaya anithanliwa okhala axitokweene akhala wira annikhalana mikhalelo sinivekeliwa mBiibiliyani.
Nikhuuru Noolamulela ninnaathanla axitokweene akina wira akhale axitokweene a esirkwiitu. Alopwana awo annixukurya miloko soovirikana wira avahe malakiheryo ni waalipiha anna. Nave axitokweene a esirkwiitu annaathanla axitokweene ni arumeyi ookhaliherya yaawo arina mikhalelo sinivekeliwa mBiibiliyani.—1 Timootheyo 3:1-10, 12; Tito 1:5-9.
3. Muteko xeeni khula Namoona a Yehova orina awe?
Atthu otheene a mmulokoni ‘annittottopela nsina n’Apwiya’ Yehova, okathi wa mithukumano ni vaavo anilaleya aya ihapari sooreera moovarihana ni makhalelo aya.—Musome Esalimo 148:12, 13.
MWIIXUTTE ITTHU SIKINA
Nwehe moota Yesu ori awe muhooleli ooloka ni moota axitokweene aniimananiha aya otthara ntakiheryo nawe. Nave nwehe moota otheene ahu nikhanle ahu oomwiiwelela Yesu ni waakhaliherya axitokweene.
4. Yesu muhooleli ooreera murima
Yesu onninivaha nlattulo noovara murima. Mmusome Matheyo 11:28-30, nuumala-vo mwaakhule makoho anittharelana:
Yesu muhooleli a enamuna xeeni? Oniphavela wira nooneleke sai ohoolela wawe?
Axitokweene anitthara sai ntakiheryo na Yesu? Nwehe EVIIDIYU.
Biibiliya onnihimya oratteene moota axitokweene akhanle aya oovara muteko aya.
Mmusome Yesaya 32:2 ni 1 Pedru 5:1-3, nuumala-vo mwaakhule makoho anittharelana:
Munoonela sai osuwela wira axitokweene anniimananiha okhala ooreera murima ntoko Yesu?
Mwa inamuna xeeni sikina axitokweene akhanle aya oomutakiha Yesu?
5. Axitokweene anniniixuttiha anivahaka ntakiheryo nooloka
Yesu oniphavela wira axitokweene yooneleke sai muteko anivara aya? Nwehe EVIIDIYU.
Yesu ohaavaha ntakiheryo nooloka atthu otheene anikhapelela muloko. Mmusome Matheyo 23:8-12, nuumala-vo mwaakhule makoho anittharelana:
Biibiliya onihimya wira axitokweene athokoreriweke sai? Niireke nyuwo munoona wira ahooleli a itiini annipaka eyo?
Axitokweene annilipiha waataana waya ni Yehova ni annaakhaliherya atthu a vatthokoni vaya opaka etthu emosaru
Axitokweene annikhapelela muloko
Axitokweene anniluttuweliwa olaleerya
Axitokweene anniixuttiha. Nave annikhaliherya orattela Empa ya Omwene ni annivara miteko sikina
6. Nihaana waakhaliherya axitokweene
Biibiliya onninivaha mathowa ooloka wira naakhaliheryeke axitokweene. Mmusome aHeeberi 13:17, nuumala-vo mwaakhule makoho anittharelana:
Xeeni Biibiliya onihimya awe wira nihaana owiiwelela axitokweene ni murima wotheene? Nyuwo munoonela sai?
Mmusome Luka 16:10, nuumala-vo mwaakhule nikoho ninttharelana:
Xeeni vari aya vooloka owiiwelela axitokweene hata noonaka wira mwaha owo mwaamukhaani?
ATTHU AKINA ANIHIMYA WIRA: “Khivanitthuneya okhalana etiini wira mmukokhorele Muluku”.
Xeeni munoona anyu wira ti vooloka omukokhorela Muluku vamosa ni atthu akina animukokhorela?
IPONTO SUULUPALE
Yesu tori muhooleli a muloko ni axitokweene annitthara malakiheryo awe. Hiyo ninnihakalala waakhaliherya axitokweene mwaha woowi, awo tooreera murima ni anniniixuttiha anivahaka ntakiheryo nooloka.
Wuuluula
Ti pani ori muhooleli a muloko?
Axitokweene a mmulokoni annikhaliherya sai?
Tuuvi ori muteko wa khula mutthu a mmulokoni?
NWEHE ITTHU SIKINA
Nwehe itthu sinooniherya wira Nikhuuru Noolamulela ni axitokweene akina annaathokorerya makristau.
Nwehe muteko axitokweene a esirkwiitu anivara aya.
Muteko wa Mutokweene a Esirkwiitu Mapuro Oottaivela Opooma (4:51)
Musome muteko wa faita athiyana anivara aya mmulokoni.
“Niireke Athiyana Anamoona a Yehova Annikhala Ahooleli?” (Owehaweha, 1 a Setembro, 2012)
Nwehe moota axitokweene aniimananiha aya waalipiha anna ni arokora.
“Axitokwene MaKristau—‘Annivara Muteko ni Hiyo Wira Nihakalaleke’” (Owehaweha, 15 a Janero, 2013)