Opixa Murima

Yoolepa: “Ole oniphenta, toopixa murima”. — 1 aKor. 13:4.

Etthu Yesu Aapanke Awe

Yesu onnimwaattamela muhima awe Yakobo opuro onivara awe muteko. Yakobo onnitikinihiwa onweha Yesu.

EVIIDIYU: Yesu Aahipixa Murima Okathi Aamukhaliherya Awe Muhima Awe

1. Nwehe EVIIDIYU, aahiiso mmusome Yohani 7:3-5 ni 1 aKorinto 15:3, 4, 7. Nuumala-vo, mwaakhule makoho anittharelana:

Woopaceryani, axihima awe Yesu yoonela sai ihapari aalaleerya awe?
Exeeni enooniherya wiira Yesu khaahiyale omukhaliherya muhima awe, Yakobo?

Etthu Yesu Onniixuttiha Awe

2. Nihaana opixa murima, mwaha woowi atthu akina annipisa weemererya ihapari sooreera.

Mmutakiheke Yesu

3. Mweereryeke moota mukina. Akhala wiira mutthu owo khoneemererya osomihiwa Biibiliya niinaano-ru, muhimukhanyererye. Vaareerelaka, mmooniheryeke iviidiyu aahiiso myaha sinrowa omukhaliherya woona moota onisommwa awe Biibiliya, ni mireerelo onrowa awe ophwanya.

4. Muhaalikanyiheke atthu. Atthu khanlikana. Vakhala wiira mmusi anyu aahiiso mutthu munimuxukurya anyu onnoovelela omusoma Biibiliya wala okupali itthu Biibiliya oniixuttiha awe, mphaveleke osuwela nthowa naya onoovelela awe. Niireke yookhala etthu enitepa omusivela, yeeyo eniixuttihiwa ni etiini awe? Niireke oniwoova amusi awe aahiiso atthu aattamanne awe? Munvahe okathi wiira uupuwelele itthu mulavunle anyu ni oone mureerelo orina aya itthu Biibiliya oniixuttiha awe.

5. Munvekeleleke mutthu owo oniphavela wiixutta ekeekhai. Munvekeleke Yehova wiira ookhaliheryeni ohikhulumuwa ni omuttittimiha mutthu owo. Nave munvekeleke Yehova ankhili wiira musuwele okathi munireerela anyu ohiya omuxukurya mutthu ole ohiniphavela. — 1 aKor. 9:26.

NWEHE-THO SOOLEPA IYA:

Mar. 4:26-28; 1 aKor. 3:5-9; 2 Ped. 3:9.