APENDISE C
Moota Woowaasomiha Atthu Biibiliya Nirumeelaka Eliivuru Okumi Woohimala!
Anna yaahivekela vanceene ni yaahitokosa saana wiira awehe itthu saareerela olempwa eliivuru Okumi Woohimala! Nto wiira murumeele saana eliivuru ela okathi munaasomiha anyu atthu Biibiliya, mutthareke malakiheryo ala:
Muhinatthi omusomiha mutthu
1. Mwiilokiheryeke oratteene. Okathi muniilokiherya anyu, muupuweleke makhalelo a naxikola anyu, etthu enireerela awe opaka wiira okelele ohoolo ni itthu onikupali awe. Mweereryeke wuupuwela itthu sikhanle onvila wiiwexexa aahiiso weettela. Nave nvarerye moota mpantta oni “Nwehe Itthu Sikina”, onrowa aya omukhaliherya naxikola anyu. Nto vaareerelaka, murumeele mpantta owo okathi munimusomiha anyu Biibiliya.
Okathi munimusomiha anyu
2. Vakhala wiira naxikola owo onneemererya, mpaceryeke ni mmaliheke yoosoma eyo ni nivekelo.
3. Xontte, muhaatteke soohimya. Mulavuleke myaha sa yoosoma eyo, ni mmuhiyeke naxikola anyu olavuleke.
4. Okathi munipacerya anyu khula mpantta wa ipantta iye xexe, musomeke mpantta oni: “Ele ninrowa ahu wiixutta”. Nuumala-vo, muromole soosoma kamosa-kamosa sa mpantta owo.
5. Mwamaliha soosoma sa mpantta owo, muuluuleke wiira mmukhaliherye naxikola anyu wuupuwelela itthu iixuntte awe.
6. Okathi munisoma anyu khula muru ni naxikola anyu, mpakeke itthu iya:
Musomeke moolumo ene.
Musomeke soolepa sootheene siiriwe: “Musome”.
Vaareerelaka, musomeke soolepa sikina.
Murumiheke iviidiyu sootheene silempwale: “Nwehe”. (Akhala wiira mookhalana.)
Mmukoheke naxikola anyu makoho ootheene.
Murumeele itesenyo siri mpantta oni: “Mwiixutte Itthu Sikina”. Nave mmukoheke naxikola anyu wiira ohimye etthu oniixutta awe ni itesenyo iyo.
Murumeele mpantta oni “Yoolakela Aka”, wiira mmukhaliherye naxikola anyu oweha moota onikelela awe ohoolo. Nyuwo pooti omutumererya naxikola owo okhalana yoolukama elempwale mpantta owo, aahiiso okhalana yawawe wala soopiili.
Mmukohe naxikola anyu akhala wiira wookhala mwaha aahiiso yookhala eviidiyu etempe omusivela eri mpantta oni “Nwehe Itthu Sikina”, yeeyo owenhe awe okathi aalokiherya awe muru owo.
Mweereryeke omaliha khula yoosoma ekwaha emosa.
Mwamaliha omusomiha
7. Mmuupuweleke naxikola anyu. Munvekeleke Yehova wiira omureeliheke naxikola anyu wiira okeleleke ohoolo. Nave munvekeleke ankhili Yehova wiira musuweleke moota woomukhaliherya naxikola anyu.