3 Nivekeleke moota xeeni?

SOOLEMA sinceene sa itiini sinnittittimiherya opaka mavekelo mwa enamuna ya vameekhaaya ntoko weemela, okokhora, wuurama, orumeela moolumo oolempwa ni soolema sikina. Masi Biibiliya onninikhaliherya ohiya ottuli itthu iyo ni owehexexa mpantta wootepa otthuneya wa nikoho: “Nivekeleke moota xeeni?”

Biibiliya onnaalavula arumeyi oororomeleya a Muluku yaavekele mapuro oovirikana ni mikhalelo soovirikana. Akina yaavekela mowiiwanyeya akina woohiwanyeya moovarihana ni makhalelo aya. Akina yaahivekela awehaka wiirimu akina yuuramme ene. Ohiya orumeela ilatarato, mapuro aniheliwa ifilori ni iliivuru sa mavekelo, awo yaanivekela ni murima wotheene ahimyaka moonelo aya. Etthu xeeni yiirinhe mavekelo aya owiriyaniwa?

Ntoko niwenhe ahu mwaha ovinre, awo yanvekela Muluku mmosa paahi, Yehova. Yookhala etthu ekina yuulupale. 1 Yohani 5:​14 nimmusoma so: “Hiyo ninniroromela wira Muluku onooniwiriyana wa khula etthu eninvekela ahu, enivarihana ni ele oniphavela awe”. Mavekelo ahu ahaana ovarihana ni ele Muluku oniphavela awe. Eyo enitaphulela exeeni?

Wira niwerye ovekela moovarihana ni ele Muluku oniphavela awe, nihaana osuwela toko ele Muluku oniphavela awe. Nto, omusoma Biibiliya onoonikhaliherya vanceene. Niireke eyo enooniherya wira Muluku onrowa owiriyana mavekelo ahu akhala wira ninnimusuwela Biibiliya oratteene? Naari. Masi hata vari siiso, Muluku oniphavela wira nisuwele ele oniphavela awe ni opaka itthu oniphavela awe. (Matheyo 7:21-23) Nihaana ovekela moovarihana ni ele ninsoma ahu.

Vaavo nniixutta ahu voohimya sa Yehova ni ele oniphavela awe, waamini wahu onnilipa. Nto eyo etthu yuulupale voohimya sa ovekela. “Nave, sotheene sinrowa anyu ovekela, ni waamini, munoovahiwa”. (Matheyo 21:22) Waamini khonitaphulela okupali khula etthu. Ohiya-vo, waamini onitaphulela okupali itthu sekeekhai hata itthu iyo sihooneyaka. (aHeeberi 11:1) MBiibiliyani sookhala itthu sinceene sinooniherya wira Yehova yoowo nihinwerya ahu onweha, teekeekhai, toororomeleya ni onniwiriyana mavekelo anipakiwa ni atthu anaamini. Nave hiyo pooti onvekela Yehova wira incererye waamini wahu, nto owo onoonivaha ele nimphavela ahu.—Luka 17:5; Yakobo 1:​17.

Nave yookhala etthu ekina ya faita voohimya sa moota woovekela. Yesu aahimmye so: “Khuuvo onwerya orowa wa Tiithi, ohikhanle mwa miyo”. (Yohani 14:6) Yesu tonnikhaliherya omwaattamela Tiithi ahu, Yehova. Nto Yesu aahaaleela awiixutti awe ovekela arumeelaka nsina nawe. (Yohani 14:13; 15:16) Masi eyo khentaphulela wira nihaana onvekela Yesu. Hata vari siiso, nihaana ovekela mwa nsina na Yesu, nihiliyalaka wira Yesu tonnikhaliherya omwaattamela Tiithi ahu oomalela ni oowaarya.

Okathi omosa, atthareli akina a Yesu yaahinvekela wira: “Pwiya, muniixuttihe ovekela”. (Luka 11:1) Ekeekhai wira awo khiyaaphavela osuwela itthu nithokorenrye ahu mwaha ola. Maana etthu yaaphavela aya osuwela yaari enamuna yaakhanle aya oovekela.