Mulevelelaneke Ni Murima Wotheene

‘Nvilelaneke, mulevelelaneke imara sothene’.​—AKOL. 3:13

MWAAROWA WAAKHULA SAI?

Xeeni vaniloka aya okhala oolevelela?

Yesu oonihenrye sai otthuneya waya olevelela?

Mareeliho xeeni anaakhela ahu mwaha wa olevelelanaka?

1, 2. Xeeni vanitthuneya aya othokorerya ophavela wanyu olevelela?

NUULUMO na Yehova, Biibiliya ninnooniherya moota Yehova onoonela awe yoottheka ni etthu enipaka awe okathi onittheka ahu. Nave nuulumo nawe ninnihimya olevelela wawe wuulupale. Yoosoma evinre noothokorerya moota Davidi ni Manasé yaleveleliwe aya. Oxanka waya ni wiikhupanyiha waya mwaha wa soottheka saya waahiwiiriha ohimya itampi saya, ohiya miteko sootakhala ni wiittaruxa wekeekhai. Nto Yehova aahitthikela wataana naawo.

² Nrowe nithokorerye olevelela mwa inamuna khamosa-kamosa. Mwaarowa woonela sai vakhanle wira itthu sootakhala Manasé aapaka awe, aahimwiirela mmusi anyu? Mwanwerya omulevelela Manasé? Nla nikoho na efaita yuulupale, okhala wira nri olumwenku ohiniiweleliwa nlamulo, wootakhala ni wa nrima. Nto xeeni vanitthuneya aya muKristau wiimananiha okhala oolevelela? Ankhi wakhala wira nyuwo wala mmusi anyu, onnihaaxiwa moohixariya mwaarowa opaka exeeni wira mukhapelele muupuwelo anyu moovarihana ni moonelo wa Yehova wira mulevelele?

NTHOWA NAYA NINTTHUNEYA AYU OLEVELELANA

3-5. (a) Ntakiheryo xeeni Yesu aalavunle awe wira aakhaliherye atthu ovaha efaita olevelela? (b) Etthu xeeni eniixutta ahu wa masu a Yesu ari mMatheyo 18:21-35?

³ Ti vooloka waalevelela ale anintthekela; pooti okhala maKristau akhwiihu a mmulokoni, aahiiso atthu akina, wira nikhalane murettele ni emusi ahu, apatthani ahu, apinaatamu akhwiihu ni Yehova. Biibiliya onnihimya wira maKristau yaaleveleleke akhwaaya moohikontari ikwaha sene sintthekeliwa aya. Aphavelaka otakiherya oreerela waya olevelela Yesu aahirumeela nlikanyiho na murumeyi mmosa aakomphe.

⁴ Murumeyi ole aahimukophela pwiya awe musurukhu oniphiyerya oliviwa namuteko mahiku 60.000.000, hata vari siiso pwiya awe ole aahileva musurukhu ole aakopheliwe awe. Nuumala-vo, aahimphwanya murumeyi mukhwaawe aamukophenle musurukhu omphiyerya oliviwa namuteko mahiku 100 paahi. Mulipa ookopha aahivekela wira ampixerye murima, masi murumeyi ole aaleveleliwe musurukhu munceene aahimukuxa mukhwaawe amutthukiha mukhatteya. Etthu ele yaahimunanara pwiya awe. Khumukoha wira: “Nyuwo murumeyi . . . khimwakhanle ommorela ikharari mukhw’inyu, ntoko miyo komorenlyakani nyuwo”? ‘Mwené owo anviruwenlene siso murumeyi ole’, khoruma oriheliwa mukhatteya wira ohaawe mpakha oliva sothene’.​—Math. 18:21-34.

⁵ Exeeni Yesu aaphavela awe ohimya ni ntakiheryo nla? Masu oomaliherya aalavunle so: ‘Ti siso Atithi aka ari wirimu sinrowaya owirihani, mwahaleveleleke akhw’inyu ni murim’anyu wothene’. (Math. 18:35) Masu ala a Yesu towiiwanyeya. Soottheka nipanke ahu okhuma khalai sinnooniherya wira khanniwerya waakhwaniherya moomalela malamulo a Yehova. Masi owo onninlevelela moomalela. Khuta mutthu oniphavela wataana ni Yehova, ohaana waalevelelaka akhwaawe. Ntoko Yesu saalavunle awe vamwaako ariki: ‘Vekekhai, mwalevelelaka akhw’inyu sottheka saya, nave Atith’inyu ari wirimu animolevelelani nyuwo. Nto nyuwo mwahaleveleleke akhw’inyu, nave Atith’inyu khanolevelelani sottheka sanyu’.​—Math. 6:14, 15.

6. Xeeni vahinikhweya aya khula okathi olevelela?

⁶ Waaniheryasa nyuwo pooti ohimya so, ‘salavuliwaka sotheene iyo oreera; okhweya olavula ovikana opaka’. Mwaha woowi etthu yiireliwe ahu enniwereiha murima. Mutthu iireliwe yoohiloka, onniphavela ottikiherya yoonanara wala ophavela exariya. Tthiri akina anihimya wira khanwerya omulevelela mutthu aatthekenle. Akhala wira nyuwo munuupuwela siiso, munrowa omutakiha sai Yehova wira muleveleleke?

MUKASOOPEKE MUUPUWELO ANYU

7, 8. Exeeni enrowa wookhaliheryani okhala oolevelela akhala wira atthu akina ahoonyoonyihani?

⁷ Waakuvela oxankiheya mmurimani mwahu mwaha wa etthu niireliwe ahu wala niiwale ahu, pooti okumiherya muxankiho muulupale. Nkahaya moone yowiiraneya emosa ya mmiravo oonanariwa: “Moowaakuveya . . . Kinanariwe ene, kaahikhumela vate kihimyaka wira nkaatthika-tho. Nne naari nihiku nooreeraloka elimwe, kaheetta kittharaka erampha yooloka, masi, vakhaani vakhaani, kaahipacerya ophwanya omaaleleya, nto kaahitthikela owaani murima aka okhurununwe ene”. Ntoko sinooniherya aya yowiiraneya ela, wiivaha okathi wira mutthu aimaalihe, onnikhaliherya osyaka opaka etthu enooniherya ohilevelela nto khiyamwiiriha mutthu oriipiwa murima.​—Esal. 4:4; Mir. 14:29; Yak. 1:19, 20.

⁸ Sai akhala wira ninnivikaniha okhalana muupuwelo wooxankiheya? Mweererye osuwela etthu ene eniwiirihani oxankiheya. Niireke mwaha woohithokoreriwa moophwanelela ni moohixariya? Wala mwaha woowi ohaavo mutthu oonyoonyihaleni moolakelela? Niireke tthiri etthu ele mutthu owiirinhaaweni ti yootepa otakhala? Otokosa saana etthu eniwiirihani onyoonyiwa, onimookhaliheryani opaka itthu moovarihana ni Biibiliya. (Musome Miruku 15:28; 17:27.) Opaka eyo enoowiirihani okhala mutthu oolevelela. Okhala moovarihana ni malakiheryo awo, nnaamwi vaxankihaka, munoowerya wiiriha nuulumo na Muluku ‘okela mpakha nipuro ninkumanela aya murima ni eroho’, wira mukhaleke oolevelela ntoko Yehova.​—aHéb. 4:12.

NIHIIVAHEKE EFAITA HIYO PAAHI OKATHI WOOPHUKA MIXANKIHO!

9, 10. (a) Nyuwo mukhaleke sai akhala wira munimwaaniherya paahi wira muhiireliwa etthu yoohiloka ni ukhwiinyu? (b) Okhalana muupuwelo wooloka onrowa wookhaliheryani sai mookumini mwanyu?

⁹ Sowiiraneya sinceene mookumini sinnikumiherya mweettelo woohiloka. Aakhanle wira muneetta ni ekaaro anyu wala moota, nto ekaaro ekina ekhumulana ni ekaaro anyu, mwaarowa okhala sai? Waaniheryasa mootoko wiiwa wira atthu akina aneettiha ikaaro anninyemelana mustaraatani enawana. Nto, hiyo ntoko maKristau khanimphavela opaka itthu iyo.

¹⁰ Ti vooloka mutthu wiimaaliha khiyatokosa ele ekhumelenle. Pooti wira nyuwo-tho mwaahikhalana nthowa mwa ele yiirane’ ye, woonasa wene mwaha woohivaha ephoole saana. Wala nakaaro ole mukina pooti ekaaro awe wala moota awe aarina muxankiho. Ntakiheryo nla, nimphavela onikhaliherya wira nihaana ovukulaka onanariwa, oxankiheya, ni miyuupuwelo sikina soohiloka, wira nihuleke murima ahu niphavelaka olevelela. Musuweli 7:9 onihimya so: ‘Mphaveleke opixa mirima: òwakuva onanariwa muloló’. Muhiivaheke efaita nyuwo paahi. Ikwaha sinceene, itthu soohiloka siniireliwa ahu, atthu awo khahiyo anoolakela. Annipaka itthu iyo mwaha wa ohimalela, ni ohiiwexexa saana etthu yiiranen’ ye. Muhicaleke masu wala sowiira sinikhala wira ti soohiphwanelela sa atthu akina; masi mooniheryeke niphento ni olevelela. Munoophwanya ohakalala, akhala wira munimwiimananiha opaka eyo.​—Mmusome 1 Pedru 4:8.

‘MURETTELE ANYU WOTTHIKELENI’

11. Moonelo wa atthu voohimya sa ihapari sooreera onnivaha muritti xeeni hiyo ntoko anamalaleerya a Omwene?

¹¹ Munrowa wooniherya sai opixa murima akhala wira mulaleeryaka momphwanya mutthu oowali? Okathi Yesu aarumme awe awiixutti 70 orowa olaleerya khula empa, aahaaleela wira khula etthoko enirowa aya, ephaveleke okhala vaavo murettele. Yesu aalavunle so: ‘Akhalá weiwo mutthu omphwanela murettele, mwa yowo onokhala murettele anyu: ahikhalé mutthu sisa, murettele onimohokolowelani’. (Luka 10:1, 5, 6) Ninnihakalala okathi atthu aneemereryaaya masu a Muluku, nto awo annittottela mureerelo mihupi iyo. Ikwaha sikina, ninnaaphwanya ale ahiniphavela saana masu awo. Nto niireke sai? Yesu oriye nto murettele ahu onihokoloweleke. Nihikhala-khale nihiyaka murettele ahu, pooti atthu akina ehinicalelaka. Akhala wira nimpaka etthu enooniherya onanariwa, eyo yaamuniiriha ohikhalana murettele.

12. Moovarihana ni masu a Paulo ari mwa aÉfeso 4:31, 32 nikhaleke moota xeeni?

¹² Mwiimananiheke okhalana murettele mmyaha sotheene, ohiya mmuteko weeKristau paahi. Masi okhala oolevelela khontaphulela weemererya soottheka sa atthu akina wala oyeveiha mixankiho annikumiherya aya. Olevelela onitaphulela ohihela vamurimani itthu soohiloka mutthu wiireliwe awe, nto khiyavikaniha okhalana murettele. Atthu akina yaale anikhalana muupuwelo wooxankiheya mwaha wa moota athokoreriwe aya, eyo enniwiiriha ohikhalana murettele. Muhihiye mixankiho iyo soolamulelakani. Musuweleke wira khamunihakalala akhala wira vamurimani vanyu moosuka onanariwa. Nto, muleveleleke!​—Mmusome aÉfeso 4:31, 32.

MPHUKEKE MIXANKIHO MOOVARIHANA NI MOONELO WA YEHOVA

13. (a) Moota xeeni muKristau ‘onukela awe makhala a moro’ vamuru va awanani awe? (b) Mureerelo xeeni onikhumela naapixaka murima okathi onipaciwa ahu?

¹³ Ikwaha sikina nyuwo ntoko muKristau onttittimiha malamulo eeKristau pooti woonaka oloka omukhaliherya mutthu opanke yoohiloka. Murummwa Paulo aahilepa wira: ‘Mwamphanyá nwanani anyu onvoliwa etala, munvahe yolya; avoliwa ntthona, munvahe màsi. Mwiraka siso, munùkela makhala a moro vamuru vawe. Muhìhiyé muxintiwaka ni sotakhala, masi muxintte sotakhala mwiraka sorera. (aRom. 12:20, 21) Oreera wanyu murima, okathi onipaciwa anyu, onoovukula mikhalelo soohiloka mwawiirelaka sooloka akhwiinyu. Okhala owiiwexexa, ni waareerela murima akina, wala owoonela othunku ale aniirenle yoohiloka, pooti owiiriha wiixutta masu ekeekhai a Biibiliya. Moohicikha etthu eniiraneya, naapixaka murima, nnoowooniherya atthu mweettelo ahu wooloka.​—1 Ped. 2:12; 3:16.

14. Hata nipaciwe ene vanceene ni onyoonyihiwa, nthowa xeeni vahinloka aya osuka vamurimani onyoonyiheya?

¹⁴ Mwa inamuna sikina vanniloka ohaataana ni atthu akina. Awo anihela muhina atthu yaari mmulokoni masi akumihiwe mwaha woohittharuwa. Akhala wira awosa yahootthekelani, pooti oxankiha waalevelela hata ettharunwe ene itampi, onoovira okathi wira oxankiheya wanyu omala-male. Nto munrowa osuwela sai ele eri vamurimani va mukwiinyu? Yehova onnisuwela. Owo onnisuwela itthu sotheene siri muhina mwa murima wa khula namattheka; nave owo onnaapixerya murima. (Esal. 7:9; Mir. 17:3) Ti nthowa naya Biibiliya onihimya awe so: ‘Muhilivé yotakhala enìreliwanyu ni yotakhala ekina. Muhaaweleke wira sorera oholo wa atthu othene. Vaweryaneyaka, mphaveleke n’ikuru sanyu sothene wiwanana n’atthu othene. Axinn’aka, muhiwunlelé ikuhu akhw’inyu: mmuhiyeke Muluku àhukhumeke, mana volempwa wira: ohukhumu muteko aka ti miyo kinlivela sotakhala’. (aRom. 12:17-19) Niireke pinaatamu onniwerya omphukela mukhwaawe ni exariya? Nnaari. (Math. 7:1, 2) Nto nikupaliki wira Muluku torina exariya.

15. Moonelo xeeni onireerela ahu okhalana wa ale annitthekela?

¹⁵ Akhala wira nyuwo muhiireliwa etthu yoohiloka yooxankihani, ti vooloka osuwela-tho wira ole ootthekenleni nave oxanka. Owo nave onnixankiheya mwaha wa ohimalela. (aRom. 3:23) Yehova onniwoonela othunku apinaatamu otheene, okhala wira awo anamattheka. Nto ti vooreera onvekelela ole ontthekenle. Khivanweryaneya ovikaniha onanariwa ni mutthu yoole oninvekelela ahu. Nisyakeke opweha vamurimani vahu onyoonyiheya ni mutthu onnilupattha, maana masu a Yesu anihimya wira: ‘Mwaaphenteke awanan’inyu. Mwavekeleleke ale anolupatthani’.​—Math. 5:44

16, 17. Nooneleke sai okathi axitokweene maKristau aniphuka aya mwaha wa namattheka ottharunwe?

¹⁶ Evarihanaka ni yootthuna ya Yehova, axitokweene maKristau, aavahiwa muritti wa ophuka myaha sa atthu anttheka mmulokoni. Anna ala kharina ankhili ootheene ntoko Muluku, masi awo anniimananiha opaka soothanla sinivarihana ni Nuulumo na Muluku, moovarihana ni munepa wootteela. Vaavo anipaka aya yoothanla nuumala ophavelasa nikhaliheryo na Yehova ni nivekelo, nto mwaha owo onniphukiwa ni moonelo wa Yehova.​—Math. 18:18.

¹⁷ Mwaha onkela osuwanyeiha ororomeleya wahu tuula: Niireke munoowerya omphenta mutthu yoole oonihenrye ottharuwa etampi awe? (2 aKor. 2:5-8) Eyo khenikhweya; vanceenexa akhala wira ole aapake etampi ootthekenleni yeenyu. Nnaamwi vari siiso, mwamuroromela Yehova, ni malakiheryo awe orweela mwa ophuka myaha mmulokoni, munrowa okhalana ankhili. Mwiira siiso munimooniherya wira tthiri munnilevelela ni murima wotheene.​—Mir. 3:5, 6.

18. Mareeliho xeeni ankela anyu waakela mwakhala mutthu oolevelela?

¹⁸ Okhala mutthu oolevelela onniphwanyiha mureerelo ni okumi wooloka mmuupuweleloni. Osyaka onanariwa onnimaliha oretta, ovaha ohakalala ni opatthani. Masi ohiphavela olevelela, onnihonona okumi, opatthani, okumiherya oxanka, ni ovila ovaanela naatthu. Muhoolo ninrowa waakhela mareeliho manceene mwaha wa okhala oolevelela wira naataane ni Tiithi ahu a wiirimu Yehova.​—Mmusome aKolosi 3:12-14.

[Elatarato epaaxina 29]

Yootakiherya ela ya Yesu enitaphulela exeeni?

[Elatarato epaaxina 32]

Okhala oolevelela ni murima wotheene eri yooruma ya eKristau.