MWAHA WOOPACERYA: ITTHU XEENI SINIIXUTTA AHU SA MOISE?

Moise Aari Ti Pani?

Etthu xeeni enuupuwela anyu okathi oniiwa anyu nsina nowi Moise? Niireke munimuupuwela . . .

◼ mwaana yoole aasukiwe ni ameya awe munivukuni, omuro Nilo?

◼ mwaana annuwale opuro wooreera wEgitu ntoko mwaana a mwaana mwaamuthiyana a Farawo—masi ahaatonko oliyala wira owo aari mwIsarayeli?

◼ mulopwana yoole aakhanle oMidiani ntoko mukukhula, iyaakha 40?

◼ mulopwana aalavunle ni Yehovaa okathi mwiri mukhaani waavarela aya mooro?

◼ mulopwana yoowo eemenle ohoolo wa mwene a wEgitu, nto moolipa murima, khiyaveka wira aIsarayeli ahiye okhala ipottha?

◼ mulopwana, aarummwale ni Muluku, nto khulaleya Ihukhumu 10 saakhumelenle wEgitu okathi Farawo aamunyohola awe Muluku?

◼ mulopwana aaweettiha aIsarayeli yaari muttitthi muulupale akhumaka wEgitu?

◼ mulopwana aarummwale ni Muluku wira okawanye maasi a Ephareya Yooxeerya?

◼ mulopwana aavanhe aIsarayeli Sooruma Muloko, sa Muluku?

MOISE aahipaka itthu iyo ni sikina. Tivonto Moise oryaawe oovuwa wa ale otheene ari maKristau, aYuda ni Amaka!

Aayo, Moise aari mprofeta yoowo ‘apanke mirirya ni miteko sowoopiha’. (Otumererya 34:10-12) Owo aheemya orummwa ni Muluku wira ovare miteko suulupale. Hata vaari siiso, Moise aari mutthu ntoko hiyo. Ntoko mprofeta Eliya, yoowo aakhumenle ni Moise, mwa yowoonihiwa yiiranen’ye okathi Yesu arya awe valaponi, Moise aari “mutthu ntoko hiyo”. (Yakobo 5:17; Matheyo 17:1-9) Moise aahikumanana mixankiho sinikumana ahu, masi owo aahivikana mwa enamuna yoolokexa.

Munniphavela osuwela moota Moise saawenrya awe okhumela saana? Ninveka wira muthokorerye mikhalelo miraru sooreera, sooniheriwe ni Moise, ni etthu ekhanle ahu oowiixutta.

[Enoota]

[Elatarato epaaxina 3]