Mulipihe Ekasamento Anyu Nvaanelaka Saana
“Molumo òrera ahimmwe okathi worera anlikana n’iwero ehotthiwe mmukalani motutha”.—MIR. 25:11.
MWAAROWA WAAKHULA SAI?
Moota xeeni okhalana ankhili onikhaliherya aya ovaanela saana vatthokoni?
Xeeni anamathelana anitthuneya aya ottittimihanaka vatthokoni?
Okhala oowiiyeviha onilokiherya sai etthoko?
1. Ovaanela wooloka onikhaliherya sai ikasamento?
MUUNNA mmosa a oKanada, onihimya so: “Vannikisivela oviriha okathi munceene ni amwaaraka ovikana ni mutthu mukina. Ohakalala waka onnincerereya, nave mixankiho saka sinnivukuwa akhala wira kinnivaanela ni mwaaraka”. Mulopwana mmosa oothela wAustralia oolepa wira: “Vano nniiriha ahu iyaakha 11 nithelanne ene, khinnavire nihiku nimosa nihilavulihanne. Miyo ni amwaaraka, khannihoverya olipa wa ekasamento ahu. Ovaanela khula okathi ni mooreerela, onnikumiherya mireerelo”. Murokora mmosa a oCosta Rica onihimya so: “Ovaanela wooloka khahiyo paahi onireeliha ekasamento ahu; masi-tho, wooniiriha wataana ni Yehova, onikhapelela wa soweeha, ni onaataaniha ntoko atthu athelanne ni wunnuuherya ophentana wahu”.
2. Itthu xeeni siniiriha oxankiha ovaanela wooloka?
2 Niireke nyuwo ni ole othelanne anyu munnihakalala ni ovaanela wooloka? Wala munoona oxankiha ovaanela moophwanelela? Ekeekhai wira mixankiho sikina pooti okhumelelaka, okhala wira ekasamento ti ya atthu anli oohimalela ni a mikhalelo soovirikana, okhala wira mahuweliwo aya ni soolema saya ti soovirikana. (aRom. 3:23) Nto, anamathelana pooti okhalana inamuna soovirikana moota anivaanela aya. Ti nthowa naya alipa ootokosa ikasamento aniihaniwa John M. Gottman ni Nan Silver anihimya aya wira ekasamento “etthu yootepa oxankiha . . . Vanitthuneya olipa murima, wiilipiherya, ni ororomeleya wira wataana iwo ovikaniheke”.
3. Exeeni enaakhaliherya anamathelana olipiha ekasamento aya?
3 Wira ekasamento ekhumeleke saana, vanitthuneya muteko muulupale. Opaka eyo onookumiherya mireerelo suulupale soohakalaliha. Anamathelana aniphentana, pooti molumwenkuni-mu mootakhala, anoowerya ohakalala hoothe. (Mus. 9:9) Nkahaya muupuwele ekasamento ya Isakhi ni Rebeka. Hata yaavirinhe okathi munceene hoothe ethelanne ene, khinimphwanya wira waataana waya waanivukuwa. (Maph. 24:67) Emosamosa, pooti wiiraneyaka ni anamathelana a mahiku ala. Esiiri aya tiivi? Isakhi ni Rebeka, yaahiixutta olavulihana saana khuta mutthu ahimyaka etthu enimwiira; yaanipaka eyo mwa miruku, ophenta, nttittimiho nuulupale ni wiiyeviha. Ntoko ninrowa ahu oweha, vannikhweya ovaanela vaavo mikhalelo iyo sinoonihereya aya mukasamentoni.
MOONIHERYE OKHALANA ANKHILI
4, 5. Moota xeeni okhalana ankhili onaakhaliherya aya anamathelana osuwelana saana ni wiiwanana? Nvahe ntakiheryo.
4 Miruku 16:20 onihimya wira “Òreriwa t’ale anupuwela miruku sixuttihiwaya”. Nto eyo tthiri, ennivarihana ni ohakalala wa ekasamento ni emusi yotheene. (Musome Miruku 24:3.) Ephiro ya ankhili ni miruku, ti Nuulumo na Muluku. Maphattuwelo 2:18 onninleela wira Muluku ompaka muthiyana wira ammalelihe mulopwana, ohiya ntoko ekoopiya ya mulopwana. Muteko wa muthiyana onniweheya moota owo onilavula awe. Ekeekhai wira atthu annivirikana, masi athiyana ikwaha sinceene waasivela olavula siniwiiraneela, waalavula atthu ni olavula voohimya sa ompatthani. Athiyana waasivela ophentiwa, ovaanela myaha sawiiphiini, nto eyo tenaakupaliha wira anniphentiwa. Masi moovirikana, alopwana khanaattela olavula miyuupuwelo saya, nto etthu enaasivela vanceene ori olavula miteko saya, mixankiho saya ni moota woophuka. Masi mulopwana omusivela ottittimihiwa.
5 Murokora mmosa a oGrã-Bretanha onnuupuwela ariki: “Aiyaka aniphavela ophuka mixankiho mowaakuveya ohiya okiwiriyana moonelo aka. Eyo khenimaliha muxankiho aka, maana etthu eniphavela aka ori ovahiwa exa ni ophentiwa”. Mulopwana mmosa oothela onihimya so: “Miyo ni amwaaraka nuumala othelana, muupuwelo aka waari ophavela ophuka khula muxankiho amwaaraka yaakhalana aya. Hata vari siiso, kahiixutta wira etthu amwaaraka yaaphavela aya waari waawiriyana, ni waathokorerya”. (Mir. 18:13; Yak. 1:19) Mulopwana oothela a miruku, onnithokorerya miyuupuwelo sa amwaarawe ni onniilipiha wira akhaleke moovarihana naawo ni wataana saana. Okathi omosaru, mulopwana ohaana owooniherya amwaarawe wira miyuupuwelo saya sihaana efaita wa yena. (1 Ped. 3:7) Nave, muthiyana aimananiheke weemererya moonelo wa aiyawe. Vaavo mulopwana ni muthiyana anivahana aya efaita, ni khula mmosa waakhwaniherya muteko awe attharihaka Soolempwa, wataana waya onnitepa oreera. Nto awo anoowerya wiiwananaka vaavo anipaka aya soothanla sooloka mwa miruku.
6, 7. (a) Moota xeeni malakiheryo a yoolepa ya Musuweli 3:7 onaavaha aya ankhili anamathelana? (b) Moota xeeni muthiyana onooniherya awe ankhili, nto mulopwana aimananiheke opaka exeeni?
6 Anamathelana a miruku annisuwela wira wookhala ‘okathi w’omála n’ukathi w’olavula’. (Mus. 3:1, 7) Murokora mmosa oniiriha iyaakha 10 atheliwe ene, onihimya so: “Vano kinnisuwela wira wookhala okathi ohinireerela aya olavula mwaha mmosa. Akhala wira aiyaka aatepa waatteliwa miteko wala kharina okathi, miyo kinnihiya oviraka okathi nuumala kinalavula mwaha oniphavela aka. Nto mwaha wa owehererya okathi onireerela, ovaanela wahu onikhala wooloka”. Athiyana arina miruku, annisuwela wira masu oothanliwa saana yaawo ‘ahimmwe okathi worera’, annivara murima ni ta faita vanceene.—Musome Miruku 25:11.
7 Mulopwana oothela muKristau ohaana waakhwaniheryaka epantta awe ohiya paahi onwiriyana mwaarawe aalavulaka, masi-tho ohaana olavulaka oratteene moonelo awe. Mutokweene mmosa oniiriha iyaakha 27 athelanne ene onihimya so: “Kihaana wiilipiherya vanceene wira kaaleeleke amwaaraka miyuupuwelo suulupale sa vamurimani vaka”. Munna mmosa oniiriha iyaakha 24 athelanne ene onihimya so: “Miyo kinniwerya olokiherya itthu mwaha wa wuupuwelela paahi, ‘nto akhala wira nkinlavula mwaha owo, owo onnivira’. Hata vari siiso, kooweha wira khahiyo olosowa mutthu olavula mixankiho ni miyuupuwelo sawe. Okathi oniimananiha aka olavula myaha saka, kinnivekela wira kilavuleke ni masu ooloka. Nuumala-vo, kinniittha iphumu vanceene nto kinapacerya olavula”. Nave vannikhaliherya ophavela okathi wooreerela ovaanela, pooti okhala okathi woothokorerya yoolepa ya nihiku wala omusoma Biibiliya hoothe.
8. Wira ekasamento aya ekhumele saana, exeeni anamathelana akina anipaka aya?
8 Etthu ya efaita wa alopwana oothela ni athiyana, ori ovekela ni ophavela olokiherya olavulihana waya saana. Ekeekhai wira pooti ovila orukunuxa makhalelo aya a khalai. Masi, okathi anamathelana animphenta aya Yehova, ovekela munepa awe, ni othokorerya othelana waya ntoko etthu ekumiheriwe ni Muluku, awo annikhalana mikhalelo sooreera seiyo anamunceene ahirina aya. Muthiyana mmosa ootheliwa ovirinhe iyaakha 26 oolepa wira: “Miyo ni aiyaka, ninnivaha efaita yuulupale moota Yehova onoonela awe ekasamento, nto hiyo khannikhalakhala nuupuwelelaka ovalaana. Nto eyo enniniiriha ophuka mixankiho sahu hoothe oratteene”. Nto ororomeleya ni omoova Muluku mmoota owo, onnimusivela Muluku, ni onnikumiherya mareeliho manceene.—Esal. 127:1.
MUNNUUHERYEKE OPHENTA WANYU
9, 10. Inamuna xeeni anamathelana anrowa aya olipiha ophentana waya?
9 Ophenta, “tonimaleliha” waataana wa efaita yuulupale mukasamentoni. (aKol. 3:14) Ophenta wekeekhai onninnuwa vaavo anamathelana oororomela anikhala aya hoothe okathi woohakalala ni wa mixankiho. Awo annaataana ni olimalelana ntoko apatthani. Nto ikasamento mmoota ola sinnikhumela saana mwaha wa wiimananiha, ohiya paahi ni miteko suulupale, ntoko sinooniheriwa aya ni iprograma sa mulaponi; masi vanitthuneya wooniheryaka itthu ntoko omukhupaarela mwaarinyu, oreerelana murima, wooniheryana makhalelo ooreera, ovaanela mootheya, ni okohana ihaali moothokorerya ntoko so: “mweettale sai olelo-va”? Itthu iya saamukhaani sinnikhaliherya vanceene ekasamento. Mulopwana oniiriha iyaakha 19 othenle ene, onihimya wira annilepelana mensage ni oligarelana khula nihiku wira “esuwele moota aryaaya”.
10 Nave ophenta onniwiiriha anamathelana ovikaniha osuwelana mukina ni mukhwaawe. (aFil. 2:4) Nto osuwela iwo onniiriha ophenta waya wunnuwa ni olipa nnaamwi eryeene atthu oohimalela. Ekasamento yookhumela saana khahiyo enlipa mekhaya, masi enninnuwa ni olipa khula okathi. Nto akhala wira nyuwo moothelana, mwiikoheke so: ‘Kiireke kinnimusuwela saana ole othelanne aka? Kiireke kinnisuwela saana miyoonelo sawe ni itthu sinuupuwela awe? Ikwaha kavi kinuupuwelela aka mikhalelo sooreera sikivanre murima sa mwaaraka wala iyaka?’
MUNNUUHERYEKE NTTITTIMIHO
11. Ottittimihana onikhaliherya sai ekasamento? Mutakiherye.
11 Hata ikasamento soohakalala khahiyo ti soomalela, ni anamathelana oophentana khahiyo wira okathi wotheene animwaakhulelihana sotheene. Abrahamu ni Sara khahiyo wira okathi ti okathi yamwakhulelihana moonelo aya. (Maph. 21:9-11) Masi ovirikana wa mikhalelo khiwawiiriha awosa waakhulana. Mwaha wa xeeni? Awo yaanithokoreryana mukina ni mukhwaaya ni nttittimiho. Mwa ntakiheryo, Abrahamu ootoko omwiirela “xontte” Sara. (Maph. 12:11, 13) Nto Sara, aanimwiiwelela Abrahamu anamuthokorerya mwa enamuna yoottittimiheya. (Maph. 18:12) Vaavo anamathelana ahinittittimihana aya, eyo ennisuwanyeya moota anilavulihana aya, wala moota anilavula aya. (Mir. 12:18) Akhala wira olavula waya mixankiho khoniphwanelela, nto pooti ekasamento aya okhumelela ehasara.—Mmusome Yakobo 3:7-10, 17, 18.
12. Xeeni atthu athelanne niinano anitthuneya aya wunnuuherya nttittimiho okathi woolavulihana?
12 Atthu athelanne niinano, ahaana olavulihana mooreeralana murima, ni ottittimihana mukina ni mukhwaawe; eyo enniiriha okhala ootaphuwa ni ovaanela wekeekhai. Mulopwana mmosa oothela onnuupuwela ariki: “Iyaakha soopacerya othelana, nnaamwi sikhalaka sootteeliha murima, masi ikwaha sikina onnikhumelela oxankiheya. Okathi onipacerya anyu oweha miyuupuwelelo, miyoonelo, soolema, ni sootthuna sa amwaarinyu, nave awo anasuwela mikhalelo sanyu, nto eyo pooti oxenkereiha vakhaani etthoko! Masi nyuwo pooti okhala oolipa, akhala wira munnipatthana saana, otheihana, wooniherya wiiyeviha, opixa murima, ni omuroromela Yehova”. Eyo tthiri etthu yekeekhai!
MOONIHERYE WIIYEVIHA WEKEEKHAI
13. Xeeni wiiyeviha orina aya efaita yuulupale wira etthoko ekhaleke yoohakalala ni yooloka?
13 Ovaanela wooloka eriyari ya atthu athelanne onlikana ni muro mwaamukhaani onivira maasi oninaaniha oratteene ejardim. Okhala oowiiyeviha mmuupuweleloni, onnikhaliherya saana wira nikhaleke ntoko maasi a muro aniriiriha. (1 Ped. 3:8) Munna mmosa oniiriha iyaakha 11 athelanne ene, onihimya so: “Wiiyeviha ti etthu yooloka ohipiserya wooniherya wira niphuke mixankiho; maana ti etthu enniiriha olavula wira: ‘Xontte mukiswaamihe’”. Mutokweene mmosa ovirinhe iyaakha 20 athenle ene moohakalala oni: “Ikwaha sinceene moolumo oowi ‘xontte mukilevelele’, tarina efaita ovikana olavula wira ‘kinnoophentani’”. Owo onnivikaniha ariki: “Etthu enikhaliherya okhalana wiiyeviha ori ovekela. Okathi miyo ni amwaaraka nninvekela ahu Yehova, ninnitthokelela ohimalela wahu ni ikharari sahaaniphwanela Muluku onnooniherya awe. Nto wuupuwela moota owo, onnikikhaliherya otthokiherya itthu mookhalela”.
14. Moota xeeni wiixinnuuha onihonona aya eKasamento?
14 Wiixinnuuha onnikumiherya mixankiho wa mulopwana ni muthiyana. Wiixinnuuha onnaakanyerya olavulihana saana, okhala wira onnimwiiriha mutthu ohiphavelaka oveka muswammaha. Mutthu oowiixinnuuha khoniira: “Koovara metto, xontte mukilevelele”, masi onimoothererya paahi. Owo khaneemererya etthu yoohiloka opanke awe, masi onaavaha nthowa atthu akina. Vaavo oniveehiwa awe, khaniphavela okumiherya murettele. Onilavula moopwapwa, aahiiso onnikhootta olavula ni mutthu owo. (Mus. 7:9) Tthiri, wiixinnuuha pooti ohonona ekasamento. Ti vooloka wuupuwela wira “Muluku onnakhotta ale anisona, anarerela murima ale òwiyèviha”.—Yak. 4:6.
15. Mutthokiherye moota otthara malakiheryo a aÉfeso 4:26, 27 aniwerya aya waakhaliherya anamathelana ophuka mixankiho saya.
15 Tthiri vaarowa okhala othoiwa miruku wuupuwela wira wiixinnuuha khonihonona ekasamento ahu. Vanitthuneya osuwela moota wowiikasoopa napacerya wiixinnuuha. Paulo aahaaleela maKristau akhwaawe wira: “Onanariwa wanyu omaleke vahinatthi wila. Muhinvahe opuro Satana”. (aÉf. 4:26, 27) Ohiiwelela Masu a Muluku onnikumiherya mixankiho. Murokora mmosa ohiikhupanyerya ariki: “Okathi omosa, miyo ni aiyaka naahihiya wiiwelela masu a aÉfeso 4:26, 27. Nto eyo yaahiniiriha, oviriha ohiyu munceene ikhove sihirwaaka, ni oxanka ohitonko aka okhalana!” Etthu ya faita ovaanelaka myaha wira nivikaniheke otthikela wataana! Tthiri anamathelana ahaana ovirihaka okathi wira ehakalalihaneke. Vannitthuneya-tho, onvekelaka Yehova wira aakhaliheryeke okhalana muupuwelo wooloka. Eyo enihela muhina wiiyeviha, wira mphaveleke ophuka muxankiho ohiya wiithokorerya nyuwo paahi, okhala wira opaka eyo yaarowa otepiha muxankiho owo.—Mmusome aKolosi 3:12, 13.
16. Xeeni wiiyeviha onaakhaliherya aya anamathelana okhalana moonelo wooloka voohimya sa itthu sinisuwela aya?
16 Wiiyeviha, ni osuwela mutthu mukano awe, onnaakhaliherya anamathelana ovaha efaita mikhalelo sa mukhwaawe. Wira nlikanyiherye: Muthiyana otheliwe pooti osuwela saana ovara itthu sinikhaliherya etthoko. Akhala wira iyawe towiiyeviha ni okupali wira khaniwerya opaka itthu sotheene, owo khanrowa woonaka wira onooxinttiwa ni mwaarawe mwaha wa orumeela osuwela wawe opaka itthu, masi mulopwana owo onrowa onvahaka efaita. (Mir. 31:10, 28; aÉf. 5:28, 29) Nave-tho muthiyana oowiiyeviha ni onisuwela mukano awe, khanrowa orumeela osuwela wawe opaka itthu wira aanyoholeke aiyawe wala ohaavaha efaita. Ahaana wuupuwelaka wira otheene aya “ari mutthu mmosa pahi”, nto ele enoowereyani nave enninwereya ole othelanne anyu.—Math. 19:4, 5.
17. Exeeni enrowa okhaliherya ikasamento sa vano okhala soohakalala ni onvuwiha Muluku?
17 Moohaaniherya, nyuwo munniphavela wira ekasamento anyu elikaneke ni Abrahamu ni Sara, Isakhi ni Rebeka; ekasamento yoohakalaliha, yoopisa, eninvuwiha Yehova. Akhala wira ti siiso, muttittimiheke ekasamento ntoko siniira awe Yehova. Musomeke Nuulumo nawe wira mukhalane miruku ni ankhili. Munnuuheryeke ophenta wekeekhai, ori ntoko “moro onkhuma wa [Yehova]”, orweela mwa omuxukhuru ni onvaha efaita ole othelanne anyu. (Nsipo. 8:6) Mwiilipiheryeke wooniherya wiiyeviha. Mwapaka itthu iya, ekasamento anyu enimoovahani ohakalala, nave Tiithi anyu a wiirimu onoohakalala. (Mir. 27:11) Nto muupuwelo anyu pooti olikanaka ni mulopwana oothela orina iyaakha 27 olempe so: “Nkiniwerya okhala kihikhanle ni amwaaraka. Ekasamento ahu ennivikaniha olipa khula nihiku. Etthu eniiriha ori omphenta wahu Yehova ni ovaanelaka moohicompela ntoko anamathelana”.
[Elatarato epaaxina 14]
[Elatarato epaaxina 16]
Hata itthu saamukhaani sinnikhaliherya ekasamento
[Elatarato epaaxina 17]
Nvikaniheke ovaanela saana vatthokoni vanyu