WAAKHULIWA WA MAKOHO A MBIIBILIYANI

Xeeni murettele onithowa aya mulaponi?

Biibiliya onnihimya mathowa manli maalupale. Nthowa noopacerya: Nnaamwi apinaatamu aweryaka opaka itthu sootikiniha, awo khapattuxiwe wira yeettiheke mavalo aya. Na nenli: Apinaatamu khanikhumela saana mwaha woowi ‘elapo yothene eniweriwa ni Mutakhali”, Satana Diabo. Tivonto wiimananiha wa apinaatamu ohinikumiherya aya murettele mulaponi.​—Mmusome Yeremiya 10:23; 1 Yohani 5:19.

Nave-tho, wiixinnuuha ni nrima na apinaatamu onnixankiha murettele mulaponi. Paahi eguvernu ya mulaponi eniwerya owiixuttiha atthu ophenta ele eri yooloka ni othokoreryana, tenrowa oruuha murettele mulaponi motheene.​—Mmusome Yesaya 32:17; 48:18, 22.

Ti pani onirowa oruuha murettele mulaponi?

Muluku Oowerya Sotheene ooleiherya oruuha eguvernu awe enrowa waalamulela apinaatamu. Eguvernu eyo enrowa oranttela iguvernu sa apinaatamu. (Daniyeli 2:44) Mwaana a Muluku, Yesu, onirowa olamulela ntoko Mwene a Murettele. Owo onoomaliha otakhala wotheene ni onoowiixuttiha atthu moota woopaka murettele.​—Mmusome Yesaya 9:5, 6; 11:4, 9.

Olelo-va moohooleliwa ni Yesu, atthu imilyau sene elapo yotheene annirumeela Nuulumo na Muluku, Biibiliya, wira awiixuttihe akina moota wowaathokorerya akina ni murettele. Nto moohipisa, onookhala murettele mulaponi motheene.​—Mmusome Yesaya 2:3, 4; 54:13.

Wira musuwele soohimya sikina, nwehe muru 3 wa eliivuru ela, Biibiliya Oniixuttiha Exeeni Tthiri?, yoolaleiwa ni Anamoona a Yehova.

[Elatarato epaaxina 16]

Paahi eguvernu enirowa ovara mirima sa atthu tenirowa oruuha murettele mulaponi

[Masu a elatarato]

Fatmir Boshnjaku