Nvaheke Efaita Yuulupale Mikhalelo sa Yehova

‘Mutthareke mwettelo wa Muluku, okhala wira mwá an’awe òphentiwa’.​—AÉF. 5:1.

MUNAAKHULA SAI?

Ninrowa wunnuuherya sai ovaha efaita mikhalelo sa Yehova?

Exeeni enimwiiriha mutthu okhala oopatthaneya?

Ninrowa omutakiha sai Yehova ohaathanla wawe atthu?

1. (a) Mikhalelo xeeni sa Yehova muKristau onitthuneya awe othokorerya? (b) Ninrowa ottottela sai mureerelo otokosa mikhalelo sa Muluku?

OKATHI onuupuwela anyu omutthu wa Yehova, mikhalelo xeeni sinitthokelela anyu? Anamunceene a hiyo anuupuwela ophenta, exariya, miruku ni ikuru. Masi, hiyo noosuwela wira Yehova ookhalana mikhalelo sikina sooloka. Tthiri ophavela ohimya mikhalelo sotheene sa Yehova, sanvikana 40, nave sikina sooromoliwa muliivuruni mwahu. Nkahaya muupuwele mikhalelo sinceene sooreera sa Yehova siniwerya ahu osuwela orweela mwa yoosoma ya hiyo aneene wala ni emusi ahu! Ninrowa ottottela sai mureerelo yoosoma mmoota owo? Maana eyo enoowerya wunnuuherya omoonela wahu efaita Tiithi ahu a wiirimu. Vano, akhala wira omoonela wahu efaita Yehova ti wuulupale, nto ophavela wahu wataana ni omutakiha onrowa otepaka olipa.​—Yox. 23:8; Esal. 73:28.

2. (a) Nvahe ntakiheryo sa moota okhanle ahu oowunnuuherya ovaha wahu efaita mikhalelo sa Yehova. (b) Etthu xeeni enirowa ahu othokorerya?

² Ontaphulelani “ovaha efaita” etthu? Moovarihana ni moota sinrowa ahu orumeela nuulumo nla, ontaphulela osuwelexa otthuneya waya etthu eyo. Ovaha efaita etthu onninnuwa vakhaani-vakhaani. Mwa ntakiheryo: Ovaha wahu efaita yoolya, onnincerereya vaavo vanitepa ahu woona wunkhela, nuumala-vo khiyalawiha vakhaani, nto wanikisa waya khiyalokiherya yawihu wira nilye. Etthu emosaru enniiraneya vaavo vaninnuuherya ahu, woonela wahu efaita mikhalelo sa Yehova, niixuttaka, wuupuwelela ni otakiha mikhalelo iyo. (aÉf. 5:1) Yoosoma ela, ni soosoma piili sinittharelana, sinrowa wunnuuherya ovaha wahu efaita mikhalelo sikina sa Muluku sihinaattela oromoliwa ntoko sikina sootepa osuweliwa. Nto wa khula mukhalelo ninrowa othokorerya nikoho nla: Mukhalelo owo ontaphulelani? Yehova onooniherya sai mukhalelo owo? Nto ninrowa omutakiha sai Yehova wira nooniheryeke mukhalelo owo?

YEHOVA TOOPATTHANEYA

3, 4. (a) Nkatthokiheryani: Mutthu oopatthaneya onikhala sai? (b) Moota xeeni Yehova onnooniherya awe okhala oopatthaneya?

³ Nkahaya noone mukhalelo ola wa opatthaneya. Munoonela sai, mutthu oopatthaneya onikhala sai? Nyuwo pooti ohimya wira ohaana okhala mutthu ooreera murima, oolikanela wira okhaliherye, ni ookhweya olavulana. Nyuwo munoowerya osuwela wira mutthu owo onnipatthaneya wala nnaari mwaha wa wiiwa itthu sinilavula awe, ni moota erutthu awe enikhala aya okathi onilavula awe, nihimye so: othoonyasa wawe, moota onikhala awe owiitho wawe, ni inamuna sikina sinooneya.

⁴ Nto Yehova onooniherya sai wira owo toopatthaneya? Nnaamwi owo arweene Mpattuxa muulupale a olumwenku ahu wotheene, Yehova onninlipiherya wira owo onnisiveliwa owiriyana ni waakhula mavekelo ahu. (Musome Esalimo 145:18; Yesaya 30:18, 19.) Hiyo pooti ovaanelaka ni Muluku khula okathi ni opuro oniphavela ahu. Hiyo pooti omwaattamela owo mootaphuwa nisuwelaka wira khanrowa onipwapwela. (Esal. 65:3; Yak. 1:5) Biibiliya, onnimulavula Muluku mwa mikhalelo soopinaatamu, aphavelaka onooniherya wira owo oniphavela wataana ni hiyo. Mwa ntakiheryo, nasalimo Davidi aahilepa wira ‘maitho a Yehova anniniweha’, nave ‘ntata nawe ninninlipiha’. (Esal. 34:15, Tradução do Novo Mundo; 63:9) Profeta Yesaya aahimulikanyiha Yehova ni makampusi ariki: ‘Onnithukumanya ipwittipwitthi simwareíye, onnakuxa axinama mmatatani mwawe’. (Yes. 40:11) Nkahaya muupuwele! Yehova oniphavela wira nimwaattameleke owo ntoko epwittipwitthi yaamukhaani yuupaariwe mmatatani mwa mukukhuli oophenta. Tthiri Tiithi ahu toopatthaneya vanceene! Nto ninrowa omutakiha sai Yehova mwa enamuna ela?

MUKHALELO WOOTEPEXA OVAHIWA EFAITA

5. Xeeni varyaaya vootthuneya axitokweene okhala oopatthaneya?

⁵ Okathi ovinre vakhaani, Anamoona ooluttuweliwa anikhala ilapo soovirikana, yaahikohiwa wira ehimye “mukhalelo ontepa aya ovaha efaita wa mutokweene”. Anamunceene yaahihimya wira mukhalelo onivahexa aya efaita wa mutokweene ti “Okhala oopatthaneya”. Ekeekhai wira khuta muKristau onnitthuneya wooniherya mukhalelo owo, masi ti vootepexa otthuneya axitokweene okhala oopatthaneya. (Yes. 32:1, 2) Murokora mmosa alavulaka otthuneya waya mukhalelo ola aahimmye so: “Akhala wira mutokweene toopatthaneya vanoonikhweelaka ottottela muraarelo mikhalelo sawe sikina sooreera”. Niireke khamunikupali masu ala? Masi exeeni enimwiiriha mutthu okhala oopatthaneya?

6. Etthu xeeni eniiriha okhala oopatthaneya?

⁶ Etthu enikhaliherya okhala oopatthaneya, ori waathokorerya saana akina. Akhala wira mutokweene onnaakhapelela akina ni analeva okumi awe mmureerelo wa anna ni arokora, vamosa ni amiravo, owo onoowerya okhala oopatthaneya. (Mar. 10:13-16) Carlos yoowo orina iyaakha 12, oolavula ariki: “Okisivela waaweha axitokweene aryeene musalau etheyaka ni wooniherya oreera murima”. Nto khivaniphiyerya mutokweene olavula wira owo toopatthaneya, masi miteko sawe sihaana wooniheryaka mukhalelo owo. (1 Yoh. 3:18) Nto mutokweene owo onrowa wooniherya sai?

7. Xeeni owara ekaraxa onikumiherya aya ovaanela, nto eyo enniixuttiha exeeni?

⁷ Nkahaya moone nlikanyiho nla. Okathi ovinre vakhaani, munna mmosa aahiwara ekaraxa awe ya okongresuni okathi aarowa awe owaani awenle ene eviyau nuumala omwiira kongresu ole. Okathi namakhaliherya a nviyauni onne awe ekaraxa yaalempwe wira “Omwene wa Muluku Orwe!” nto owo aahilavula wira, “Aayo, orwe, nto nihaana ovaanela voohimya sa mwaha ola”. Nuuvira okathi awo yaahivaanela, nto namakhaliherya ole a nviyauni ahaakhela irevista moohakalala. Anamunceene a hiyo yootoko oniiraneela etthu enlikana ni eyo. Nto nthowa xeeni ekaraxa ya kongresu enikumiherya aya ovaanela? Mwaha woowi eyo enikhala wira enaalattula atthu ntoko so: “Mukaattameleke muhoove etthu. Mukikohe onirowa aka”. Ekaraxa eri ethonyeryo eniwiiriha atthu osuwela wira hiyo ninniphavela waaleela atthu sookupali sahu. Mwa enamuna emosaru, axitokweene maKristau anniphavela ovaha ethoonyeryo enaaleela maKristau akhwaaya wira: “Muhoove etthu, mukaattameleke tu”. Nto ithoonyeryo xeeni?

8. Moota xeeni axitokweene anooniherya aya ophavela waathokorerya akina, nto eyo enikhaliherya sai muloko?

⁸ Hata soolema sivirikanaka khula elapo, masi akhala wira iikwaha sinceene, ninnitheya ni annihu ni arokora, ni waavaha matata mooreerela, ni waakhomasa moohakalala, eri ethoonyeryo yoowi ninnaathokorerya tthiri. Nto ti pani oniphwanela opaceriha? Moone ntakiheryo Yesu ovanhe awe. Matheyo oolepa wira okathi Yesu aaryaawe vamuthukumanoni ni awiixutti awe, ‘Yesu ahiwattamela’ khulavulana. (Math. 28:18) Ntoko Yesu, axitokweene olelo-va, annipaceriha wooniherya opatthaneya ni axinnaya vaavo anilavula aya naawo. Nto eyo enikhaliherya sai muloko? Murokora owunnuwela orina iyaakha 88 ori pioneero, onihimya so: “Otheya moohakalala ni okittottopela waya axitokweene okathi onikela aka muSalau ya Omwene, onnikihakalaliha”. Murokora mukina onihimya-tho so: “Hata vakhalaka wira etthu yaamukhaani, masi okathi mutokweene onikaakhela awe moohakalala omuthukumanoni, eyo etthu ya faita wa miyo”.

MMANANIHEKE OPHWANYA OKATHI WOOLAVULA NI ANNA

9, 10. (a) Ntakiheryo xeeni nooloka Yehova ovanhe awe? (b) Moota xeeni axitokwene akhanle aya oophwanya okathi woolavula ni atthu otheene?

⁹ Ekeekhai wira khivaniweryaneya opatthaneya mutthu yoole ohirina okathi woolavulana akina. Yehova oovaha ntakiheryo nooloka mmwaha owo. ‘Tthiri Muluku khankhala ottaiwene ni hiyo’. (Mit. 17:27) Enamuna emosa axitokweene akhanle aya oomananiha ophwanya okathi woovaanela ni akina, ori ovirihaka okathi nuumala mithukumano evaanelaka ni anna ni arokora, amiravo ni atthu owunnuwela. Munna mmosa ori pioneero oolavula wira: “Okathi mutokweene onikikoha awe ihaali, aneemela wira awiriyane waakhula waka, miyo kinnoona wira owo onnikivaha efaita”. Murokora mmosa onimurumeela Yehova iyaakha sinitthimakela 50, oolavula wira: “Mutokweene oniviriha okathi awe alavulaka ni miyo nuumala muthukumano, miyo kinoona wira onnikivaha efaita”.

¹⁰ Ekeekhai wira maKristau ari alipa-ookukhula mmulokoni, aakhalana-tho miteko sikina. Masi okathi onirowa aya mmuthukumanoni, ahaana opaka okhalana yoolukama aya opacerya waathokorerya anna otheene.

YEHOVA KHONAATHANLA ATTHU

11, 12. (a) Ohikhalana nthalu ontaphulelani? (b) Moota xeeni Yehova oryaawe ntakiheryo nahu na ohaathanla atthu?

¹¹ Ohikhalana nthalu, ti mukhalelo mukina wooreera wa Yehova. Ohikhala nthalu ontaphulelani? Ontaphulela okhalana exariya, ohaathanla atthu, wala ohiwiirela sooreera atthu annisiveliha paahi. Ohikhalana nthalu onnooneya mwa inamuna piili: mweettelo ni sowiira sa mutthu owo. Xeeni itthu iya piili sinitthuneya aya? Mwaha woowi akhala wira mutthu owo tthiri kharina nthalu, ophavela wawe onoomwiiriha opaka etthu wira aakhapelele atthu othene mohaathanla. Moovarihana ni Soolempwa sa eGregu, masu oowi: “ohathanla atthu”, antaphulela ‘ohithanla owitho’, wala ovaha efaita owiitho wa mukina onvikana mukwaawe. (Mit. 10:34; Kingdom Interlinear) Mutthu ohirina nthalu, onnaathokorerya atthu voohittharihela makhalelo a erutthu wala mihakhu sa mutthu owo, masi mwaha woophavela omukhapelela mutthu owo ntoko pinaatamu.

¹² Yehova tori ntakiheryo nuulupalexa na ohaathanla atthu. Nuulumo nawe ninnilavula wira owo ‘khonimuthanla mutthu’ nave owo onnaakhapelela otheene ‘ohimuthanlaka mutthu’. (Musome Miteko 10:34, 35; Otumererya 10:17.) Etthu yaakhumelenle okathi wa Moise ennooniherya eyo.

13, 14. (a) Muxankiho xeeni yaarina aya anamwane 5 athiyana a Selofehadi? (b) Nto Yehova oonihenrye sai ohikhalana wawe nthalu?

¹³ Ehinatthi anaIsarayeli okela Elapo Yoolaiheriwa, axithiyana athanu oohitheliwa yayariwe erukulu emosa yaahikhalana muxankiho woovila ophuka. Waari muxankiho xeeni? Awosa yaahisuwela wira emusi aya, moolikana ni aIsarayeli akina yaarowa waakhela epantta emosa ya etthaya yaakaweliwe tiithi aya. (Moth. 26:52-55) Masi tiithi aya iihaniwa Selofehadi a nihimo na Manase, aahikhwa. Moovarihana ni yoolema, aana aaxilopwana a Selofehadi ti yaarina edireito ya okuxa etthaya ele, masi Selofehadi aayanre aana aaxithiyana paahi. (Moth. 26:33) Niireke mwaha woohikhalana aana aaxilopwana, emusi ele yaarowa waakhiwa etthaya ele wira evahiwe amusi akina, nto aana aaxithiyana ale ahihalane etthu yoohiyeriwa?

¹⁴ Aana aaxithiyana ale athanu yaahirowa omukoha Moise yiiraka: ‘Vano nsina n’atithi’ihu nihana ottipihiwa momusini mwaya mwaha w’ohikhalana àna axilopwana?’ Nto yaahinvekela yiiraka: ‘Nanso, munivahe yohiyeriwa ntoko savahalyanyu axinna àtith’ihu’. Niireke Moise aakhunle so: ‘Nyuwo khamurina-tho etthu-va, maana eyo kheniiriwa’? Nnaari, ‘Moise ahimuroihela mwaha ola [Yehova]’. (Moth. 27:2-5) Yehova aakhunle sai? Owo aahimuleela Moise ariki: “Àna axithiyana a Selofehadi annivekela sinaphwanela. Mwavahe yohiyeriwa ntoko savahalyanyu axinna a atithi aya: yohiyeriwa y’atithi aya ekhale yawaya”. Yehova ahincererya-tho etthu ekina. Malakiheryo ale yaahipakeya okhala nlamulo nto khumulakiherya Moise ariki: “Mulopwana mmosá akhwa ahirina mwana mwamulopwana, mwan’awe mwamuthiyana àkhele sohiyeriwa sawe”. (Moth. 27:6-8; Yox. 17:1-6) Nto okhuma vaavale, khula muthiyana mwIsarayeli, yaarowa omwiiraneela ehasara ntoko ele, nlamulo nle naarowa omukhapelela.

15. (a) Moota xeeni Yehova onaakhapelela awe atthu awe, vanceenexa ale ahirina yoolipana? (b) Sowiiraneya xeeni sikina sa mBiibiliyani sinimooniherya Yehova ohaathanla wawe atthu?

¹⁵ Tthiri vannooneya wira mwaha ole waahiphukiwa voohikhala nthalu! Yehova ahaakhapelela athiyana ala yahaarina etthu yoolipana; mwa enamuna yoottittimiheya moolikana ni aIsarayeli akina yaarina makhalelo ooloka. (Esal. 68:6) Ela yowiiraneya emosa paahi ya mBiibiliyani, enooniherya ekeekhai yoohakalaliha eni: Yehova onnaathokorerya saana arumeyi awe otheene voohimuthanla mutthu.​—1 Sam. 16:1-13; Mit. 10:30-35, 44-48.

VANNIWERYANEYA OMUTAKIHA YEHOVA

16. Ninrowa olipiha sai yoolakela ahu ya ohimuthanla mutthu?

¹⁶ Ninrowa omutakiha sai Yehova ohaathanla atthu? Muhiliyale wira ohikhalana nthalu, wookhalana mikhalelo miili. Akhala wira khanirina nthalu, tivanrowa ahu waakhapelela akina mohaathanla. Ekeekhai wira otheene ahu vanninsivela wuupuwela okhala muthtu oohixankiha ni ohinaathanla atthu. Masi nihaana weemya wira khivanikhweya olokiherya murima ahu. Nto nipake exeeni akhala wira nihoona wira khinnaathokorerya saana akina? Okathi Yesu aphavela awe osuwela moota atthu yamoonela aya, owo ahaakoha apatthani awe oororomeleya oriki: “Atthu anihimya wira Mwana a Mutthu t’ani?” (Mat. 16:13, 14) Xeeni ohimutakihaka Yesu mmwaha ola? Nyuwo pooti waakoha apatthani anyu wira ehimye ekeekhai akhala wira khamurina nthalu. Nto akhala wira owo onnihimya wira ehaavo etthu vakhaani enooniherya wira waathokorerya wanyu atthu muntthara nikhuli na mutthu, makhalelo, wala mihakhu saya, munrowa opaka exeeni? Muhaana onvekela Yehova voohimya sa mwaha owo, ni omuxonttelela wira ookhaliheryeni olokiherya murima anyu wira mmutakiheke Muluku ohaathanla atthu mwa inamuna sootheene.​—Math. 7:7; aKol. 3:10, 11.

17. Inamuna xeeni sikhanle ahu owaathokorerya akina vohimuthanla mutthu?

¹⁷ Mmulokoni wa eKristau, ninnooniherya ophavela wahu omutakiha Yehova, naakhapelelaka anna ni arokora otheene moophenta, mwa nttittimiho ni mooreerela murima. Mwa ntakiheryo, naphavela wooniherya owaakhela saana aletto, nihaana waalattulaka anna a mikhalelo sotheene waahela muhina ale makhalelo aya anivirikana ni awihu ni ale ari oothoiwa, ikwaasuni ni anaamukhweli. (Mmusome aGalasia 2:10; Yakobo 1:27.) Wuncererya eyo, mmuteko ahu woolaleerya Omwene, ninnilaleerya ihapari sooreera mohaathanla atthu, ohela muhina ale anikhuma ilapo sikina. Tthiri ninnihakalala osuwela wira ninniwerya osoma iliivuru sinimutthokiherya Biibiliya, etthu yowiiraka mattaava 600. Tthiri eyo ethoonyeryo enooneya ya ohaathanla atthu!

18. Nyuwo munrowa wooniherya sai otakiha opatthaneya wa Yehova ni ohaathanla wawe atthu?

¹⁸ Nto, vaavo ninviriha ahu okathi nuupuwelelaka opatthaneya wa Yehova, ni ohaathanla wawe atthu, onvaha wahu efaita Yehova onnitepa wunnuwa. Nto wunnuuherya ovaha wahu efaita mikhalelo sa Yehova, ohaana oniirihaka otakiha saana mikhalelo sa Yehova; nto niwooniheryaka mikhalelo iyo sooloka, annihu eekristau ni ale anaalaleerya ahu.

[Elatarato epaaxina 7]

[Elatarato epaaxina 8]

‘[Yehova] onniwattamela othene ale aninvekela’​—Esal. 145:18 (Moone ettima 9)

Yehova ‘Muluku anyu . . . khonathanla atthu’.​—Otum. 10:17 (Moone ettima 17)

[Elatarato epaaxina 10]

Anamwane axithiyana a Selofehadi, yaahittottela mureerelo ohikhalana nthalu wa Muluku (Moone ettima 13, 14)