Nvaheke Efaita Ovaha wa Yehova ni Oreera Wawe Murima
Yehova ‘onnarerela murima atthu othene, onnamorela ikharari atthu othene apattunxawe’.—ESAL. 145:9.
MWAAROWA OTTHOKIHERYA SAI?
Mikhalelo xeeni miili sa Yehova sinrowa wunnuuherya onvaha wahu efaita?
Ninrowa otakiha sai ovaha wa Yehova?
Inamuna xeeni ninrowa ahu otakiha oreerela murima wa Yehova?
1, 2. Eparakha xeeni erina aya apatthani a Yehova?
MUROKORA mmosa oniitthaniwa Monika onihimya so: “Nniiriha iyaakha 35 nithelanne ene. Miyo ni iyaka ninnisuwelana saana. Masi hata vari siiso, nlelo khula mmosa onnisuwela etthu yahatonko awe osuwela”. Tthiri ela enniiraneya ni ikasamento sinceene ni opatthani.
2 Ninnoona oreera okathi onaasuwela ahu saana ale anaaphenta ahu. Mwa ompatthani wotheene oniwerya ahu okhalana, ompatthani wootepexa oreera tuule orina ahu ni Yehova. Khaninwerya osuwela itthu sotheene voohimya sa Yehova. (aRom. 11:33) Okathi onrowa ahu okhalana okumi ohinimala, tonkela ahu wunnuuheryaka osuwela wahu saana mikhalelo sa Yehova.—Mus. 3:11.
3. Exeeni enrowa ahu othokorerya mwa yoosoma ela?
3 Mwaha woopacerya, woonikhaliherya ovaha efaita mikhalelo sooreera sa Yehova: opatthaneya ni ohaathanla wawe atthu. Nkahaya vano, nthokorerye-tho mikhalelo miili soreera sa Yehova: ovaha wawe ni oreerela wawe murima. Opaka eyo, enooniiriha osuwela saana wira Yehova ‘onnarerela murima atthu othene, ni wamorela ikharari atthu othene apattunxawe’.—Esal. 145:9.
YEHOVA TOOVAHA
4. Masu oowi ovaha antaphulelani?
4 Masi ontaphulelani okhala mutthu oovaha? Ninniphwanya waakhuliwa ni masu a Yesu ari mMiteko 20:35 ani: ‘Mulipa ovaha [onnihakalala vanci] onvikana mulipa-òwakhela’. Ni moolumo ala oohaatta, Yesu aahilavula ele enitaphulela aya okhala oovaha. Mutthu oovaha onniivahererya orumeela okathi awe, ikuru sawe, ni mihakhu sawe mmureerelo wa akina; nto onniira sotheene moohakalala. Nto wiiriwa mutthu owo toovaha, khahiyo mwaha wa wuunnuwa wa etthu ene enivaha awe, masi etthu enimwiiriha ovaha etthu eyo. (Mmusome 2 aKorinto 9:7.) Nto khuuvo ori ootepa ovaha onvikana Yehova ‘Muluku’ oohakalala.—1 Tim. 1:11.
5. Moota xeeni Yehova onooniherya awe okhala oovaha?
5 Yehova onooniherya sai okhala mutthu oovaha? Owo onnaavaha apinaatamu soophavela saya, ohela muhina yaale ahinimukokhorela. Tthiri Yehova “toorerela murima wa atthu otheene”. Owo, ‘onnakumiherya nsuwa atthu òtakhala murima n’ale orera murima’. (Math. 5:45) Tivonto okathi murummwa Paulo aalavula awe ni atthu oohaamini, aahimyale awe so: Muluku ‘ìraka sorera osulu oryawe, onnorupihelani epula, onnovahani sohepha okathi aya, onnoruwerihani solya, onnosarihani otteliwa murima’. (Mit. 14:17) Nto ninniweha tthiri wira Yehova onnaavaha itthu sinceene apinaatamu.—Luka 6:35.
6, 7. (a) Atthu xeeni Yehova onitepa awe waavaha nikhaliheryo? (b) Muhimye ntakiheryo nnooniherya moota Muluku onaakhaliherya awe arumeyi awe.
6 Yehova onnihakalala waavaha itthu siniphavela aya arumeyi awe oororomeleya. Mwene Davidi aahilavula ariki: ‘Okhuma omiravo aka mpakha vano kùluvanlyaka, nkinamone naxariya onyanyaliwe ni Muluku, nkinawone amusi awe elolaka yolya’. (Esal. 37:25) Arumeyi maKristau anceene oororomeleya, ahoona moota Yehova onikhapelela awe. Muthokorerye ntakiheryo nimosa.
7 Iyaakha sivinre ottuli, murokora mmosa onivara muteko wa Muluku okathi wotheene oniihaniwa Nancy, waahimphwanya muxankiho mmosa. Owo onihimya so: “Kahaana oliva etthu, musurukhu woowiraka idoolare 66. Nto nkaasuwela moota woophwanya musurukhu ole. Vano, kaahivekela kimuleelaka Yehova, nuumala vo kinarowa omutekoni kaavara aka ntoko servente orestaurante. Okathi kaaronwe aka omutekoni, miyo nkaawehererya ovahiwa etthu yootthuveliwa, okhala wira esumana ele khiyantte muteko. Mootikiniheya, kahaaweha erwaaka alipa oothuma yoolya anceene ohiyu ole. Okathi kaamalinhe aka muteko aka ni oweha musurukhu kaavahiwe aka, waari idoolare 66”. Nto Nancy aahikupaleela wira Yehova aahinvaha saana etthu yaamuthonwe.—Math. 6:33.
8. Yoovaha xeeni yuulupale Yehova onnivaha awe?
8 Yoovaha yuulupale ya Yehova, enniphwanyaneya wa atthu otheene. Yoovaha eyo ti xeeni? Ti yowoopola ya Mwanawe. Yesu aahilavula ariki: ‘Vekekhai, Muluku ahaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala’. (Yoh. 3 :16) Vannooneya saana wira va, anihimmwa apinaatamu. Tthiri Yehova oovaha etthu yootepa okhalana efaita wa ale otheene aneemererya. Vano ale animwaamini Yesu anrowa waakhela okumi munceene ni woohimala! (Yoh. 10:10) Tthiri ela ethoonyeryo yuulupale yoowi Yehova toovaha!
MUTAKIHEKE OVAHA WA YEHOVA
9. Ninrowa otakiha sai ovaha wa Yehova?
9 Ninrowa otakiha sai ovaha wa Yehova? Okhala wira Yehova ‘onnivaha sorera sothene vowatta’, wira nihakalaleke, nto owo oniphavela wira ‘navaheke’ akina wira ehakalaleke-tho. (1 Tim. 6:17-19) Moohakalala, ninnirumeela mihakhu sahu wira naavaheke etthu ale anaaphenta ahu, ni waakhaliherya ale anihaawa. (Mmusome Otumererya 15:7.) Nto etthu xeeni enrowa onikhaliherya okhala atthu oovaha? MaKristau makina aakhalana yoolema ela: Okathi anivahiwa aya etthu, awo annaavya enamuna yowaavaha akina. Muloko wa eKristau, woreeliheya mwaha wa anna ni arokora anceene anooniherya munepa wa ovaha.
10. Enamuna xeeni emosa yootepexa oloka ya okhala oovaha?
10 Enamuna emosa yootepexa oloka wooniherya ovaha wahu, ori wiivahererya ni moolomu ahu vamosa ni miteko sahu. Ninrowa opaka sai eyo? Orweela mwa orumeela ikuru ni okathi ahu wira naakhaliherye ni waalipiha akina. (aGal. 6:10) Wira noone moota onipaka ahu eyo, nihaana wiikohaka so: ‘Kiireke akina annoona wira kinnaavya okathi wira kiiwe mixankiho saya’? Akhala wira koovekeliwa okhaliherya etthu, kiireke kinnimananiha waakhulela okhaliherya? Nihiku xeeni nitonko aka omuttottopela mmusi aka wala muKristau mukhwaaka?’ Akhala wira ninniimananiha okhala ‘ovaha’, nnimwaataana ni Yehova ni apatthani ahu.—Luka 6:38; Mir. 19:17.
11. Inamuna xeeni ninrowa ahu okhala atthu aninvaha etthu Yehova?
11 Vanniweryaneya-tho okhala atthu oovaha wa Yehova. Soolempwa sinihimya so: ‘Mmuxukhuru [Yehova] munvahaka sorera sanyu’. (Mir. 3:9) Nuulumo noowi itthu sanyu “sorera”, ninhela muhina okathi ahu, ikuru sahu, ni mihakhu sahu wira nimurumeeleke saana Yehova. Hata anamwane anniwerya wiixutta onvaha etthu Yehova. Tiithi mmosa oniihaniwa Jason, onihimya so: “Okathi emusi ahu enivaha aya musurukhu mukaaxani Osalau ya Omwene, ninnaavaha anamwane musurukhu wira awo-tho eheleke mukaaxani mmo. Awo annisiveliwa mwaha woowi ‘anninvaha etthu Yehova’”. Tthiri anamwane yaale anoona oreera onvaha etthu Yehova, woonasawene okathi aninnuwa aya anrowa ovikanihaka okhala atthu oovaha.—Mir. 22:6.
OREERELA MURIMA WA YEHOVA
12. Ontaphulela exeeni waareerela murima akina?
12 Mukhalelo mukina wooloka wa Yehova ori oreerela wawe murima. Ontaphulelani waareerela murima akina? Nuulumo nenle Tradução do Novo Mundo otaphulenle awe ‘oreerela murima’ nimmuhimya mutthu ‘owaakuva oleva’. (Tito 3:1, 2, enota.) Mutthu ooreerela murima, khoninyeserera etthu elempwale paahi, khonikhanyerera ele eniphavela awe paahi, khonikhala ookhoma, oowuuma murima, wala ooxankiha. Moovirikana nivo, owo onnaareerela murima akina, uupuwelelaka saana makhalelo aya. Onnaawiriyana akina, nto vaaweryaneyaka onnipaka ele akina aniphavela aya, khiyaleva soophavela sawe.
13, 14. (a) Yehova oonihenrye sai okhala ooreerela murima? (b) Exeeni eniixutta ahu voohimya sa moota Yehova aamuthokorenrye awe Lothi?
13 Yehova onooniherya sai oreerela murima? Moopatthaneya onnithokorerya muupuwelo wa arumeyi awe, nto ikwaha sinceene owo onneemererya soovekela saya. Mwa ntakiheryo, moone moota Yehova aamuthokorenrye awe naxariya Lothi. Okathi Yehova aalakenle awe onyaanya isidade sa oSodoma ni oGomora, owo aahimulopola saana Lothi wira aahaana otthyawela omwaako. Masi, Lothi aahivekela wira atthyawele muttetthe mukina. Nkahaya muupuwele, Lothi aahinvekela Yehova wira arukunuxe ele yaahimmyawe!—Musome Maphattuwelo 19:17-20.
14 Ti vookhweya wuupuwela wira Lothi aari mutthu ootteettheya wala oohiiwelela. Ohiya-vo, Yehova anwerya omukhapelela Lothi amuroihaka khula opuro oona awe wira ahipweteye, tivonto khivaareerela Lothi okhala owoova. Nnaamwi vari siiso, Lothi anoova, nto woova wa Lothi wahimwiiriha Yehova waakhulela sooveka sa Lothi. Yehova aahimuhiya Lothi atthyawelaka esidade yeele yaaphavenle awe opwetexa. (Musome Maphattuwelo 19:21, 22.) Ninniweha nto wira Yehova khonikhanyerera ele eniphavela awe paahi, ni khonikhala oowuuma murima. Owo tooleva ni tooreerela murima.
15, 16. Moota xeeni Nlamulo na Moise nooniherya aya oreerela murima wa Yehova? (Nwehe elatarato wanipacerya wa yoosoma)
15 Muthokorerye ntakiheryo nikina na oreerela murima wa Yehova, ntoko nnooniherya aya nlamulo na Moise. Akhala wira mwIsarayeli aahitepa othoiwa, ahinawerya ovaha epwittipwitthi wala epuri ntoko mukuttho, owo aarowa ovaha masiya manli wala ipomba piili mihoro. Ankhi akhala wira owo aahitepa osikhini ahinawerya ophwanya ipomba piili? Nto mwaha wa othoiwa iwo wuulupale, Yehova aanimweemererya mwIsarayeli ovaha ephepa vakhaani. Masi nkahaya moone masu ala ootthuneya: Ephepa eyo yaahaana okhala ya ‘etrigu’; yooreera yaavahiwa aletto oophwanelela. (Maph. 18:6) Xeeni vaarya aya vootthuneya?—Mmusome Onamukuttho 5:7, 11.
16 Nkahaya muupuwele vaari wira nyuwo mwIsarayeli oothoiwa. Nto okathi oniphiya anyu otabernaakulu wira nvahe ephepa anyu vakhaani ntoko mukuttho, khiyawoona anaIsarayeli oothaaciri aruuhaka inama saya sinceene ntoko mukuttho, mwaarowa woonela sai? Waaniheryasa mwamuuliwa muru muupuwelaka wira mukuttho anyu wa ephepa khorina efaita. Masi nyuwo khiyuupuwela wira Yehova onnivaha efaita mukuttho anyu. Mwaha wa xeeni? Mwaha wookupali wira Yehova aavekela wira ephepa ekhaleke yoolokexa. Mwa masu makina, Yehova aamuleela mwIsarayeli ohaawa wira: ‘Koosuwela wira nyuwo khamunwerya okivaha sinceene ntoko akina, masi kinnisuwela-tho wira nyuwo mookivaha itthu sa faita sirina anyu’. Tthiri Yehova onnooniherya oreerela murima ottharihelaka othoiwa ni makhalelo a arumeyi awe.—Esal. 103:14.
17. Enamuna xeeni ya muteko ekhanle ahu ookupali wira Yehova onneemya?
17 Hiyo ninnilipa mwaha woosuwela wira oreerela murima wa Yehova, onnimwiiriha weemya muteko oninvarela ahu ni murima wotheene. (aKol. 3:23) Murokora mmosa owunnuwela a wItalia oniihaniwa Constância, onihimya so: “Waalaleerya akina voohimya sa Mpattuxa aka, teri etthu enikisivela vanceene. Eyo tenikiiriha ovikaniha olaleerya ni wiiriha soosoma sa Biibiliya. Ikwaha sikina kinniikhupanyerya mwaha woohivaraka vanceene muteko owo nthowa na owereiwa waka. Masi kinnisuwela wira Yehova onnoona wira nkiniwerya opaka sotheene, nave onnikiphenta ni oxukhurela ele eniwerya aka opaka”.
MUTAKIHEKE OREERELA MURIMA WA YEHOVA
18. Inamuna xeeni anamuyari anrowa aya omutakiha Yehova?
18 Ninrowa otakiha sai oreerela murima wa Yehova? Nkahaya muupuwele-tho moota Yehova aamuthokorenrye awe Lothi. Mmwaha ole, Yehova taari mukhulupale aaruma, masi owo mooreerela murima aahinwiriyana Lothi alavulaka moonelo awe. Nto Muluku aaheemererya yoovekela ya Lothi. Akhala wira nyuwo mwa namuyari, niireke munnimutakiha Yehova? Munniwerya waawiriyana aniinyu, nto akhala wira vanniphwanelela khiyeemya soovekela ni soophavela saya? Voohimya sa mwaha ola, erevista A Sentinela 1 de Setembro 2007, yaahilavula wira anamuyari akina annivaanela ni anamwane voohimya sa malakiheryo a vatthokoni. Mwa ntakiheryo, anamuyari pooti ohimya okathi wootthikela owaani nuumala anamwane othweela. Nave ekeekhai wira anamuyari ahaana edireito ya othanla okathi onoona aya oreerela anamwane ophiya vate. Hata vari siiso, anamuyari ari maKristau ahaana ophavelaka wiiwa moonelo wa anaaya mmwaha owo. Ikwaha sikina, anamuyari pooti orukunuxaka ele yaahimmya aya, akhala wira eyo khenihonona sooruma sa Biibiliya. Anamuyari anoowerya woona wira ophavela wiiwa moonelo wa anaaya sa malamulo a vatthokoni, onniwiiriha anamwane ophavelaka waakhulela ni weettela malakiheryo awo.
19. Moota xeeni axitokweene anrowa aya wiilipiha omutakiha Yehova?
19 Mmulokoni, axitokweene annitakiha oreerela murima wa Yehova vaavo anithokorerya aya makhalelo a maKristau akhwaaya. Muhiliyale wira Yehova aanivaha efaita mukuttho waavahiwa ni anaIsarayeli oothoiwa. Mmukhalelo mmosaru, anna akina ni arokora, khaniwerya ovara muteko woolaleerya vanceene waaniheryasa mwaha wa oretta wala wuuluvala. Nto ankhi akhala wira munna mmulokoni onnixankiheya mwaha wa ele ehiniwerya awe opaka? Axitokweene ahaana omuttottopela ni omulipiherya wira Yehova onnivaha efaita ele munna wala murokora owo eniwerya awe ovara.—Mar. 12:41-44.
20. Niireke mutthu oreerela murima ontaphulela ohiilipiha ovara miteko sa Muluku? Mutthokiherye.
20 Masi, nihuupuweleke wira oreerela murima ontaphulela mutthu ohiimananiha ovara muteko wa Muluku, mwaha woophavela okhala ooloka paahi. (Math. 16:22) Hiyo khanimphavela onyoonyeriwa opaka itthu nihimyaka wira nimphavela okhala ooreerela murima. Masi, otheene ahu ninnitumereriwa ‘wíkhanyererya’ vanceene wira nikhaliherye soophavela sa Omwene. (Luka 13:24) Tthiri nimphavela weettela sooruma iya piili suulupale. Hiyo ninniilipiha wira nihitthikele ottuli ni muteko ahu. Nave-tho, ninnisuwela wira Yehova khonnivekela etthu ehiniwerya ahu onvaha. Nto akhala wira ninninvaha etthu yooloka erina ahu, owo tthiri onnihakalala. Nto nyuwo khamunisiveliwa onvarela muteko Pwiya mmoota ola? Yoosoma enittharelana, ninrowa wiixutta-tho mikhalelo sikina sooloka sa Yehova.—Esal. 73:28.
[Elatarato epaaxina 12]
[Elatarato epaaxina 13]
AnaIsarayeli yaahitumereriwa otakiha ovaha wa Yehova (Moone ettima 9)
[Elatarato epaaxina 14]
“Mmuttittimihe Yehova ‘ni sorera sanyu’.—Mir. 3:9 (Moone ettima 11)
‘Muteko ti muteko onivaranyu, nvareke ni murima’ wotheene.—aKol. 3:23 (Moone ettima 17)