MUWIIXUTTIHE ANIINYU
Muluku Onniiripiwa Murima—Nto Ninrowa Omuhakalaliha Sai?
Nyuwo mootoko wiireliwa etthu yoohiloka mpakha wunla?—a Otheene ahu pooti nitonko ene wiireliwa. Ikwaha sikina, hiyo pooti wunla mwaha wooriipiwa murima. Mutthu mukina pooti onootherya etthu yoohiloka. Eyo pooti oniriipiha murima, kiira?— Moolikanasa, Muluku onniriipiwa murima vaavo onootheriwa awe. Nrowe nilavule mwaha ola, ni noone moota nikhanle ahu oomuhakalaliha Muluku ohiya omuriipiha murima.
Biibiliya onihimya wira atthu akina yaahimyale wira yaanimphenta Muluku, “yaahimuriipiha murima” vanceene! Ekeekhai wira Yehova Muluku khoniriipiwa murima ntoko hiyo. Owo ti Muluku Oowerya sotheene. Nrowe noone xeeni Yehova oniriipiwa awe murima vaavo hiyo nihinivara ahu ele enihimya awe.
Atthu oopacerya anli Yehova apattunxe awe valaponi yaahimwiiriha oriipiwa murima vanceene. Atthu awo anli yaapwehiwe oParayiisu valaponi-va yiihaniwa “ejardim ya wEdeni”. Nyuwo moosuwela masina a atthu awo?— Aayo, Adamu ni nuumala-vo, muhoolo mwaya, Eva. Nto nrowe niwehe etthu xeeni yaapanke aya yaamwiirinhe Yehova oriipiwa murima.
Nuumala Yehova waapweha ojardim, owo aahaahimeerya wira yahaana okhapelelaka. Nave-tho, Muluku ahaalela wira yahaana okhalana anamwane ni okhala hoothe ojardim voohilipelela okhwa. Masi ahinatthi Adamu ni Eva okhalana anamwane, etthu yootakhala yaahiiraneya. Nyuwo moosuwela exeeni yaakhumelenle?— Nlaikha nimosa naahimwiiriha Eva ni nuumala-vo Adamu, wira aahimwiiwelele Yehova. Nkahaya noone moota eyo yaakhumelenle aya.
Nlaikha naahiiriha enowa okhalaka wira yaamulavula. Eva yaahimusivela ele aaleeliwe awe ni enowa, wira aarowa okhala “ntoko Muluku”. Nto Eva aahiiwelela enowa. Nyuwo munnisuwela etthu xeeni aapanke awe?—
Eva aahilya muhokorokho wa mwiri Yehova aamulenle awe Adamu wira ahilye. Muluku ohinatthi ompattuxa Eva, owo aahimuhimeerya Adamu wira: “Munowerya olva mihokorokho sothene siri mmatta-mu: muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”.
Eva aahisuwela nlamulo nno. Masi owo aahivikaniha owehexexa mihokorokho sa mwiri ole ni oweha wira “sanirèrela olya: awehexexaka sanimukumiha murima, saniphwanela otthukula muru. T’arukunlyawe muhokorokho mmosá, khulya: ahinvaha-tho iy’awe arinawe, n’uwo-tho khulyaka”. Nyuwo muunoonela sai, exeeni yaamwiirinhe Adamu opaka eyo?— Mwaha woowi Adamu aanimphenta vanceene Eva ovikana omphenta Yehova. Adamu aahithanla omuhakalaliha Eva ohiya omuhakalaliha Muluku. Masi omwiiwelela Yehova etthu yuulupalexa ohiya omwiiwelela mutthu mukina!
Nyuwo munnuupuwelela enowa yaalavunle ni Eva? Ntoko mutthu okhanle awe oomwiiriha boneko okhalaka wira onoolavula, nto ohaavo mutthu iirinhe enowa eyo okhalaka wira yaalavula. Niireke masu awo yaakhuma mwaano mwa enowa?— Nlo naari nsu na ‘enowa yele ya khalai, enìhaniwa Nwanani walá Satana’.
Nyuwo munnisuwela moota mukhanle anyu oomuhakalaliha Yehova?— Nyuwo munoowerya opaka eyo mwiimananihaka okathi wotheene ophavela omwiiwelela. Satana onihimya wira onoowerya owiiriha atthu otheene opaka ele eniphavela awe. Vano Yehova onnintumererya iiraka: “Mwan’aka, nwetteleke ankhili: siso miyo kinotteliwa murima, kinowerya omwakhula onikiveha”. Satana onnimunyohola wala onveeha Yehova. Owo onihimya wira onoowerya waahapuxa atthu otheene wira amurumeeleke Satana. Tivonto, mmuhakalalihe Yehova vaavo vanimwiiwelela anyu ni omurumeela! Nyuwo muniwiimananiha opaka eyo?—
Musome Mbiibiliyani Mwanyu
Maphattuwelo 1:26-28; 2:15-17; 3:1-6
[Enoota]
a Akhala wira munisoma muri ene ni mwaana, trasu oniwuupuxeryani wira muhaana weemela, nto khiyanvekela mwaana owo wira ohimye etthu enisuwela awe.
[Elatarato epaaxina 14]
[Elatarato epaaxina 15]