Alipa-ookhwa Annilipelela Ohihimuxiwa
Nyuwo munnikupali yooleiherya ya Biibiliya ya ohihimuxiwa wa alipa-ookhwa?a Tthiri, ti voohakalaliha osuwela wira ale anaaphenta ahu akhwiiye anirowa ohihimuwa. Masi, niireke nlipelelo nno ti neekeekhai? Wira niphwanye waakhuliwa waya, nrowe niwehe ntakiheryo na arummwa a Yesu Kristu.
Arummwa yaanikupali tthiri wira alipa-ookhwa anoohihimuxiwa. Mwaha wa xeeni? Mwaha wa mathowa manli. Nthowa noopacerya: Yesu mmansawe aahihihimuxiwa. ‘Okathi omosá, arummwa ni atthu òwamini yavikanne 500 yaahimoona Yesu ohihimuxiwe ene’. (1 aKorinto 15:6) Ohiya-vo, ohihimuxiwa wa Yesu waahisuweliwa saana ni okupaliwa, ntoko sinooniherya aya Ihapari xexe silempwale ni Matheyo, Marko, Luka, ni Yohani.—Matheyo 27:62–28:20; Marko 16:1-8; Luka 24:1-53; Yohani 20:1–21:25.
Nthowa na nenli: Arummwa yaahimoona Yesu aahihimuxaka atthu ikwaha 3: oNayini, oKafarnawu, ni oBethania. (Luka 7:11-17; 8:49-56; Yohani 11:1-44) Mutthu ookiserya ohihimuxiwa ni Yesu, yoole ohimmwale wanipacerya wa erevista ela, aari a emusi yaapatthanne ni Yesu. Vano nrowe niwehe ele yaakhumelenle.
“MIYO KI OHIHIMUWA”
Yesu aahimuleela Martha yoowo aari munnawe Laazaro, aakhwiiye khuviriha mahiku 4 wira: “Murokor’inyu onohihimuwa mokhwani”. Wanipacerya, Martha khaiwale saana ele Yesu aaphavela awe ohimya. Owo aahimyale so: “Miyo kosuwela wira onohihimuwa”. Masi owo uupuwela wira eyo yaarowa wiiraneya muhoolo. Nkahaya muupuwelele ohakalala aarina awe vaavo aamwiiwale awe Yesu oriki: “Miyo ki ohihimuwa n’ikumi”, nto onamoona Yesu omuhihimuxaka murokora awe mookhwaani!—Yohani 11:23-25.
Laazaro, aari opuro xeeni vaavo aavirinhe awe mahiku maxexe okhwiiye ene? Nto, Laazaro khaahimmye etthu enooniherya wira yena ari mukumi opuro mukina mahiku ale maxexe. Nnaari. Laazaro khaarina erooho ehinikhwa yaaronwe wiirimu. Vaavo Yesu aamuhihimunxe awe Laazaro mookhwaani, khaamuhiihale ohakalala wiirimu opuhaka vamosa ni Muluku. Nto, Laazaro aari woowi mahiku ale maxexe? Veekeekhai, owo aamurupa mmahiye.—Musuweli 9:5, 10.
Muupuweleke wira Yesu aahilikanyiha okhwa ntoko orupa. Nto ale akhwiiye anrowa ohihimuxiwa. Biibiliya onihimya so: “‘Mpatthan’ihu Lázaro, onorupa: vano kinrowa onvenxa’. Awixutti awe yahimuhimerya wira: ‘Pwiya! Akhalá wira onorupa, onovona!’ Yesu ahimya okhwa wa Lázaro: nto awixutti yanyiherya wira ahimya orupa wa ikhove. Vano Yesu ahahimerya orattene wira: ‘Lázaro ohòkhwa’”. (Yohani 11:11-14) Vaavo Yesu aamuhihimunxe awe Laazaro, owo ahimuttikiherya okumi ni onakhala vamosa ni emusi awe. Tthiri, Yesu aahipaka etthu yaahakalalinhe emusi ele!
Okathi Yesu aari awe valaponi ahaahihimuxa atthu. Eyo yooniherya ele enirowa awe opaka muhoolo ntoko Mwene a Omwene wa Muluku.b Vano Yesu ori wiirimu. Nto okathi onirowa awe olamulelaka valaponi, onimwaattikiherya okumi atthu anirupa mmahiye. Ti yeeyo Yesu aahimyale awe oriki: “Miyo ki ohihimuwa”. Nkahaya muupuwele ohakalala onrowa anyu okhalana nuumala otthikela waaweha ale yaaphenta anyu akhwiiye! Muupuwele-tho moota sinrowa aya ohakalala ale anirowa ohihimuxiwa!—Luka 8:56.
WAAMINI ONNIPHWANYIHA OKUMI WOOHIMALA
Yesu aahimuhimeerya Martha oriki: “Ole onikamini, hatá anakhwaru, onokhala-tho mukumi. Vano ole onetta ekumi, onikamini miyo, khankhwa-tho”. (Yohani 11:25, 26) Ale Yesu onirowa awe waahihimuxa okathi wa olamulelo awe wa iyaakha ekonto emosa, anookhalana yoolipelela ya okhala mahiku otheene, akhala wira anoovikaniha omwaamini.
Nuumala olavula sa ohihimuxiwa, Yesu aahimukoha Martha nikoho nna noovara murima, oriki: “Nyuwo munnamini etthu ila?” Martha aahaakhula wira: “Ayo, Pwiya! Miyo kinnamini wira nyuwo Kristú, Mwana a Muluku”. (Yohani 11:26, 27) Ankhi nyuwo? Moolikanasa ni Martha, niireke munniphavela okhalana waamini onoororomelihani wira alipa-ookhwa anoohihimuxiwa? Etthu yoopacerya, ori osuwela yoolakela ya Muluku wa apinaatamu. (Yohani 17:3; 1 Timótheyo 2:4) Osuwela iwo onnilipiha waamini. Xontte, mwaavekele Anamoona a Yehova wira awooniheryeni ele Biibiliya oniixuttiha awe voohimya sa mwaha ola. Awo anoosiveliwa ovaanela ni nyuwo voohimya sa yoolipelela yoohakalaliha ya ohihimuxiwa wa alipa-ookhwa.
[Inoota]
a Moone muru oni: “Okhwa Khahiyo Omala wa Itthu Sotheene!”, epaaxina 6 ya erevista yeela.
b Wira musuwele itthu sikina voohimya sa yooleiherya ya Biibiliya ya ohihimuxiwa wa muhoolo, moone eliivuru Biibiliya Oniixuttiha Exeeni? muru 7, yoolaleiwa ni Anamoona a Yehova. Nave-tho pooti obaxari va www.jw.org.
[Eponto yuulupale epaaxina 15]
“Ole onikamini, hatá anakhwaru, onokhala-tho mukumi”.—Yohani 11:25