Nyuwo Munoowerya Okhoottela Soweeha!

A TTHU akina annoona onamuttompe ntoko etthu yooreera. Masi, akina annoonela yoweeha eyo ntoko etthu yoohiloka aniphavela aya oxintta. Ankhi nyuwo? Okathi munikumana anyu ni yoweeha, niireke muhaana weemererya wala okhoottela?

Ekeekhai wira soweeha sotheene khasinikumiherya mixankiho suulupale. Mwa ntakiheryo, okhuura ebulaxa mutthu ohivahiwe khonikumiherya muxankiho muulupale. Masi, weemererya soweeha sikina ntoko iye sinikumiherya orupihana moohiloka, pooti woophwanyihani mixankiho suulupale. Biibiliya onilopola so: ‘Ole oniraruwa, muloló: ìraka siso, onnipwetexa ekumi awe’.​—Miruku 6:32, 33.

Akhala wira muneehereriwa orupihana moohiloka, exeeni munitthuneya anyu opaka? Biibiliya onaakhula so: “Sintthunawe Muluku t’iya: mukhale òrera murima ntoko atthu awe, mutthyaweke onamuttompe”. (1 aTesalonika 4:3) Munrowa okhalana sai ikuru wira mukhoottele soweeha iyo? Muthokorerye mavalo mararu anirowa wookhaliheryani.

Nivalo 1: Mukhapelele Maitho Anyu

Oweha ilatarato sinitumererya orupihana, pooti oniiriha opaka itthu soohiloka. Yesu aahilavula sa ovarihana okhanle eriyari ya oweha ni ophavela opaka etthu iiraka: “Ole oninweha muthiyana anwereihaka murima, òraruwana muthiyan’owo ni murima”. Orumeelaka masu a nthoonyeryo, owo aahimmye so: “Nitho nanyu nolopwana notthekihani, musyole, murihé”. (Matheyo 5:28, 29) Exeeni eniixutta ahu? Wira nikhoottele soweeha, nihaana olipiha murima ni ohiweha ilatarato sinitumererya orupihana.

Nilikanyihe wira mootutuxerya munniweha mooro onikumiheriwa ni etthu enitotoxiwa. Niireke mwanvikaniha oweha mooro owo okathi munceene? Nnaari! Nyuwo mwaamurukunuwela mpantta mukina wala okhuneela maitho anyu. Moolikanasa, moona ilatarato sintumererya orupihana siri muliivuruni, komputadore wala selulari, aahiiso mutthu ohiwanre saana, mowaakuveya nwehe epantte ekina. Mukhapelele muupuwelo anyu wira ohihapuxiwe. João, yoowo khalai aasiveliwa epornografia, onihimya so: “Okathi kininweha aka muthiyana ooreera, kinniphavela-tho onweha ekwaha ya nenli ni ekwaha ya neeraru. Nto kinnikhanyererya maitho aka oweha epantte ekina, ni kinailavulela kiriki: ‘Muhaana onvekela Yehova niinano-va!’ Nuumala ovekela, yoophavela eyo ennivukuwa”.​—Matheyo 6:9, 13; 1 aKorinto 10:13.

Muthokorerye ele aahimmya awe mulopwana oororomeleya Yobi iiraka: ‘Miyo kolehana ni maitho aka wira kihinwehé mwali n’umphavela’. (Yobi 31:1) Tthiri, vannireerela omutakiha Yobi.

Mweererye ela: Akhala wira mootutuxerya munimoona elatarato yoohiirya, mowaakuveya muhuluxe maitho anyu. Mmutakihe nasalimo aavekenle so: “Muhuluxe maitho aka, wira kihòneké ithiru”.—Esalimo 119:37.

Nivalo 2: Mukhapelele Miyuupuwelo Sanyu

Mwaha woowi naatthu oohimalela, ikwaha sikina ninniwanana ni soophavela soohiloka. Biibiliya onihimya so: “Khula mutthu onnehereriwa ni wunlela wawe sotakhala, weiwo onimototha, onamukuxa. Vano wunlela iwo sotakhala wavahiwa ikuru, onnikumiherya etampi”. (Yakobo 1:14, 15) Munrowa osyaka sai oxinttiwa ni yoophavela eyo?

Vaavo munikumana anyu ni soophavela soohiloka, muupuweleke wira nyuwo pooti othanla waakhulela aahiiso okhoottela. Muheemye soophavela iyo; mukumihe mmuupuweloni mwanyu. Mukhootte otthokelela itthu sinitumererya orupihana woohiloka. Mulopwana oniitthaniwa Troy aarina yoolema ya oweha epornografia, onihimya so: “Kaaniimananiha okumiha miyuupuwelelo soohiloka kuupuwelelaka itthu sooloka. Khivaakhweyale. Ikwaha sinci kaanitteettheya. Masi, kaahiixutta okhapelela muupuwelo aka”. Elsa, yoowo aawanana ni muupuwelo wa orupihana woohiloka oryeene mwali, onihimya so: “Ovara miteko sinci ni onvekela Yehova, waahikikhaliherya osyaka miyuupuwelelo soohiloka”.

Mweererye ela: Vaavo munuupuwela anyu orupihana woohiloka, moohipisa muhiye wuupuwelela itthu iyo ni nvekele. Muxintte miyuupuwelo soohiloka, muupuwelelaka itthu “sikhanle s’ekekhai ni sottittimiheya; sothene sikhanle sa xariya ni soloka; sothene sikhanle sophenteya ni sophwanelela; sothene sikhanle sa nlema ni sottottopeleya”.​—aFilipi 4:8.

Nivalo 3: Mukhapelele Mweettelo Anyu

Vaavo enniphwanya aya yoweeha ni yoophavela yoohiloka okathi omosaru, ehasara pooti onikhumelela. (Miruku 7:6-23) Munrowa osyaka sai ehasara eyo?

Biibiliya onnilopola iiraka: “Mulipa-ànkhili onnona yowopiha, anahuluwa: mulolo onnikumana vohupuwela, khutakhaliwa”. (Miruku 22:3) Tivonto, mukhapelele mweettelo anyu. Muupuweleleke vahinatthi itthu sinirowa okumiherya mixankiho ni musyake. (Miruku 7:25) Filipe, yoowo oxinttale yoolema ya oweha epornografia, onihimya so: “Kompweha komputadore ahu opuro atthu otheene animoona aya, ni koohela eprograma enikhoottiha okhumela itthu soohiirya. Kinnoona itthu munternet akhala wira atthu akina aari vakhiviru”. Troy, oromoliwe wanipacerya, onihimya so: “Miyo kinnisyaka oweha ifilme sinikiiriha wuupuwelela itthu soohiloka ni opatthana naatthu anilavula sa orupihana woohiloka. Nkiniphavela wiikumiherya maxakha”.

Mweererye ela: Mutokose saana sootteettheya sanyu, ni muupuwelele moota woosyaka itthu saarowa owiirihani okumana yoweeha.​—Matheyo 6:13.

MUHOOCEYE!

Sai akhala wira muhiimananiha vanci osyaka soweeha, masi khuhiwerya? Muhooceye! Biibiliya onihimya so: “Tthiri naxariya, amorá imara tthanu na pili, onnivenya”. (Miruku 24:16) Tthiri, Tiithi ahu a wiirimu onnintumererya ‘ovenya’. Niireke munimweemya nikhaliheryo nlo noophenta? Tivonto, nvikanihe onvekela. Mulipihe waamini wanyu, mmusomaka Biibiliya. Muhicompeleke mithukumano sa eKristau. Muupuwelele yooleiherya ya Muluku eni: ‘Miyo kinimolipihani: Ayo, kinimokhaliheryani’.​—Yesaya 41:10.

Cody, oromoliwe wanipacerya, onihimya so: “Kaahiimananiha vanceene wira kixintte yoolema ya oweha epornografia. Ikwaha sikina kaanittettheya, masi wanikisa waya kixintta”. Dylan, oromoliwe wanipacerya, onihimya so: “Miyo kanwerya orupana muthiyana ole aavaranaka muteko. Masi, mowiilipiha kaahikhootta kimuleela wira: ‘Nkiniphavela!’ Ti vooreera okhalana yowuupuxerya ya murima yooloka. Tthiri, Yehova oohakalala mwaha wa mweettelo aka”.

Moohaaniherya, Muluku onoohakalala vanceene, akhala wira munimwiilipiha ni osyaka soweeha!​—Miruku 27:11.