‘Mutthike Mwaalipihe Anninyu’

PEDRU aahinla vanceene nuumala omukhootta Yesu. Masi nuumala murummwa ole otthikela okhala oolipa omunepani, Yesu aaphavela wira owo orowe aakhaliherye anna akina. Tivonto Yesu aamuhimeeryale awe so: “Mwahokolowela wa miyo, mwalipihe axinn’inyu”. (Luka 22:32, 54-62) Tthiri Pedru aahirowa vahoolo khukhala mapotto wala maripu a muloko wa eKristau wa eseekulu yoopacerya. (aGal. 2:9) Vamosaru, munna yoole aatoko okhala mutokweene khalai pooti otthikela okhala mutokweene ni okhala oohakalala mwaha wa waakhaliheryaka anna omunepani.

Atthu yaale khalai yaatonko okhala axitokweene ahiya, waaniheryasa anoona wira khaniphwanela-tho. Julio,a yoowo aatonko okhala mutokweene a mpantta onikela epheyo ya wAmerica iyaakha 20 sivinre aahimmye so: “Olokiherya myaha, waaxekurya anna, waakukhula atthu a mmulokoni saari itthu khaamakela aka ovara okathi munceene wa ekumi aka! Masi nuumala oyeleela eparakha aka ya okhala mutokweene itthu iyo sotheene saahikipweteya. Tthiri ole waari okathi wooxankiha”. Olelo-va Julio ootthikela okhala mutokweene.

MUHAKALALEKE MWA SOTHEENE

Murummwa Yakobo aalempe so: ‘muhakalaleke mwa sotheene okathi oneehereriwa anyu wa khula enamuna’. (Yak. 1:2, Tradução do Novo Mundo) Yakobo aahimya weehereriwa onikhumelela mwaha wa olupatthiwa ni oohimalela wahu. Owo aahiromola sootthuna sa erutthu ohela muhina nthalo ni itthu sikina. (Yek. 1:14; 2:1; 4:1, 2, 11) Okathi onilakiwa ahu ni Yehova hiyo pooti woonaka owereya. (aHéb. 12:11) Masi niheemye wira mixankiho iyo sivukule ohakalala wahu.

Hata hiyo nihiihiwe ene miritti saarina ahu mmulokoni, nlelo ninnitthuneya ovikaniha ovarerya makhalelo a nroromelo nahu ni wooniherya wira ninnimphenta Yehova nlelo. Hiyo nihaana ovikaniha wuupuwela ele yaaniiriha ophavela orumeela. Niireke naaphavela mureerelo ahu, wala waari omphenta Muluku waaniirinhe ophavela okhalana eparakha eyo ni osuwela wira muloko ti wa Muluku ni onitthuneya okhapeleliwa moopixa murima? (Mit. 20:28-30) Atthu yaale khalai yaatonko orumeela ntoko mutokweene masi anavikaniha onvarela muteko Muluku, anniwerya owooniherya atthu otheene omuhela muhina Satana wira omphenta waya Yehova ti wa ekeekhai.

Okathi yoole Mwene  Davidi aapwapweliwe awe mwaha woopaka itampi suulupale, owo aaheemererya nttharuxo ni aahileveleliwa. Davidi aahiipa oriki: “Òreriwa t’ale aleveleliwe itampi saya, òreriwa t’ale sottheka saya sittipihiwe. Òreriwa t’ale Apwiya ahiniwonanaya yottheka, murohoni mwaya muhikhanle-mo wotha”. (Esal. 32:1, 2) Yoolaka ele yaahilokiherya makhalelo a Davidi ni yaahimukhaliha mukukhuli ooloka a atthu a Muluku.

Ikwaha sinceene, anna yaale khalai yaahiiye nto khutthikela okhala mutokweene, annikhala axitokweene ooloka ovikana khalai. Mutokweene mmosa aatonko ohiya orumeela, aahimmye so: “Vano kinnisuwela waakhapelela saana atthu akina anivonya”. Mutokweene mukina onihimya so: “Vano kinnivaha efaita yuulupale muritti aka wa waarumeela anna”.

NIIREKE MUNOOWERYA OTTHIKELA?

Nasalimo mmosa aalempe so: “[Yehova] khannyesererya owulumela atthu”. (Esal. 103:9) Tivonto vahikhanle ahu oowuupuwelaka wira Yehova khonikhalakhala waaroromelaka atthu yaale yaapanke etampi yuulupale khalai. Ricardo, yoowo aayelenle miritti sawe sa otokweene iyaakha sinceene sivinre aahimmye so: “Miyo kaahinyoonyiwa vanceene mwaha wa etthu ele yoohiloka yaapanke aka. Mwa okathi munceene muupuwelo woohiixoonaka ophwanelela waanikooceliha otthikela waarumeela anna ntoko mutokweene. Miyo nkairoromela wira kaamutthikela okhala mutthu oororomeleya. Masi kaahipacerya waakhaliherya atthu akina, wiiriha soosoma sa Biibiliya, waalipiha anna mmithukumano sa Empa ya Omwene, ni ovara hoothe muteko woolaleerya. Eyo, yaahikikhaliherya otthikela wiixoona okhala ooreerela, olelo-va kootthikela-tho okhala mutokweene”.

Waanyokha anna mwaha wa ohiihiwa miritti, onomwiiriha munna owo woceela okhala mutokweene. Tthiri ti voohakalaliha omutakiha Davidi murumeyi a Yehova, yoowo aatthyawa mwaha woolupatthiwa ni Mwene Sawuli yoowo aamukhalela nrima! Davidi aahikhootta omwiiriha etthu yootakhala Sawuli, hata aakhumelenle okathi wooreerela omwiiriha etthu yootakhala. (1 Sam. 24:4-7; 26:8-12) Okathi Sawuli aakhwiiye awe okhottoni, Davidi aahimunlela, omuhimyaka owo ni mwanawe Yonatani okhala “atthu òphenteya ni òrerexa”. (2 Sam. 1:21-23) Eyo enooniherya wira Davidi khaamunyokha Sawuli ni Yonatani.

Vakhala wira nyuwo munoona wira khamuthokoreriwe saana wala muhiireliwa etthu yoohixariya, muheemye wira wunlaseya ohonone makhalelo anyu ooloka. Mwa ntakiheryo, nuumala William oruliwa muritti wa otokweene aarina awe mwa iyaakha 30 oGra-Bretanha, owo aahivenyerya waanyokha axitokweene akina. Masi aawenrye sai omala-maliha muupuwelo owo? Owo onihimya so: “Osoma eliivuru ya Yobi waahikilipiha. Nuumala osoma kuupuwenle so, akhala wira Yehova aahimutumererya Yobi otthikela wataana ni apatthani awe ale araru, tthiri Yehova oniphavela wira miyo kitthikele wataana ni axitokweene ale a eKristau”!​—Yobi 42:7-9.

MULUKU ONNAREELIHA ALE ANITTHIKELA ORUMEELA NTOKO AXITOKWEENE

Akhala wira munithanla ohiya okukhula nikoto na Muluku, vaamureera wiikohaka etthu ene eniwiirihani opaka eyo. Niireke mwaarina mixankiho sootepexa sawiirihani ohiwerya orumeela? Niireke ehaavo etthu yaatepexa anyu ovaha efaita? Niireke mwarokhumuwa ni soovonya sa atthu akina? Wa khula etthu yiiranen’ye, muupuwele wira khalai nyuwo mwanaakhaliherya atthu akina mwa inamuna sinceene murumeelaka ntoko mutokweene. Myaha saalavula anyu sanaalipiha anna, ntakiheryo nanyu nanaakhaliherya, ni okathi waaxekurya anyu mwaanaakhaliherya ovikana mixankiho saya. Muteko anyu ntoko mutokweene oororomeleya waanihakalaliha murima wa Yehova.​—Mir. 27:11.

Yehova ohaakhaliherya anna anceene otthikela okhala oohakalala vaavo vanihoolela aya muloko. Vakhala wira mwaaroolakelela ohiya okhala mutokweene wala mwaarohiihiwa, nyuwo munoowerya otthikela okhala ‘mutokwene’. (1 Tim. 3:1) Paulo ‘khahiya walompela’ aKolosi wira asareye osuwela weekeekhai ni wira ‘yetteke ntoko simphwanelaya atthu a Yehova, asivelihaka Apwiya mwa itthu sothene’. (aKol. 1:9, 10) Akhala wira mootthikela waakhela miritti sa orumeela ntoko mutokweene, munvekele Yehova wira oolipiheni, oovaheni opixa murima ni ohakalala. Mahiku ala ookiserya atthu a Muluku anitthuneya okhaliheriwa ni akukhuli oophenta a omunepani. Niireke nyuwo munniwerya ni munnitthuna waalipiha anninyu?

[Enoota]