Nwuupuweleke Ale Anivara Muteko wa Orummwa wa Okathi Wotheene
“Ninnupuwela vohihiyererya wira munnittharihela wamini wanyu ni miteko sorera, ni wira munniphentana”.—1 ATES. 1:3.
MWAAROWA WAAKHULA SAI?
Inamuna xeeni sa muteko wa orummwa wa okathi wotheene saakhanle eseekulu yoopacerya ni anna awo yaakhaliheriwe sai ovara miteko saya okathi ole?
Inamuna xeeni sa muteko wa orummwa wa okathi wotheene sa mahiku ala sinoosivelani?
Munrowa waakhaliherya sai anna anivara muteko wa orummwa wa okathi wotheene?
1. Paulo aawoonela sai atthu yaamurumeela Yehova mwa nthiti?
MURUMMWA Paulo aaniwuupuwela ale yaimananiha ovara muteko woolaleerya. Owo aalempe so: “Vekekhai, oholo wa Muluku Tith’ihu ninnupuwela vohihiyererya wira munnittharihela wamini wanyu ni miteko sorera, ni wira munniphentana muhawelanaka ni wira munnikhalela nthiti omuroromela Yesu Kristu Pwiy’ahu”. (1 aTes. 1:3) Mwekeekhai Yehova mwaneene onniwuupuwela atthu otheene yaale moophenta aniimananiha omurumeela, hata yaale makhalelo aya ahiniweemererya opaka itthu sinceene.—aHéb. 6:10.
2. Ninrowa othokorerya exeeni muru ola?
2 Arumeyi akhwiihu anceene, a khalai ni a mahiku ala aaleva itthu sinceene wira amurumeele Yehova mmuteko wa orummwa wa okathi wotheene. Nrowe vano noone moota atthu akina yaawenrye aya orumeela mwa enamuna eyo eseekulu yoopacerya. Nuumala-vo ninrowa othokorerya inamuna sa muteko wa okathi wotheene sikhanle mahiku ala ni wiixutta moota wa owuupuwela anna ala anaaphenta ahu yiivaherenrye orumeela mwa inamuna iyo sa vameekha aya.
MAKRISTAU A ESEEKULU YOOPACERYA
3, 4. (a) Moota xeeni anna eseekulu yoopacerya yaarumenle aya? (b) Nto yaaphwanya sai itthu saathowa sa werutthuni?
3 Voohipisa nuumala obatiziwa, Yesu aahipaceriha muteko yoowo muhoolo mwaya waarowa wuulaana elapo yotheene. (Luka 3:21-23; 4:14, 15, 43) Nuumala Yesu okhwa, arummwa awe yaahihoolela muteko wa olaleerya. (Mit. 5:42; 6:7) MaKristau akina, ntoko Filipi yaanisuweliwa okhala anamalaleerya ni mamisionaario oPalestina. (Mit. 8:5, 40; 21:8) Paulo ni axaapara awe yaahirowa mapuro manceene wira yalaleerye. (Mit. 13:2-4; 14:26; 2 aKor. 1:19) Mwa ntakiheryo Silvano (Silas), Marko ni Luka, yaari atthu yaakopiyari wala olepa iliivuru. (1 Ped. 5:12) Arokora akina, yaanivara muteko ni anna awo. (Mit. 18:26; aRom. 16:1, 2) Eparakha yaavahiwe aya ya okhaliherya olepa Soolempwa sa eKristau sa eKriki, seiyo sininvara murima mutthu waasomaka, etthu enooniherya wira Yehova aanaavaha efaita atthu ale.
4 Atthu ale yaari arummwa a okathi wotheene khalai, yaaphwanya sai itthu saathowa sa werutthuni? Okathi mukina awo yaakhala mmaitthokoni mwa anna ni yaanikhaliheriwa mwa inamuna sikina ni anna, masi awo khiyaveka-veka wira akhaliheriwe. (1 aKor. 9:11-15) Awo yaanikhaliheriwa ni anna, ni miloko sinceene. (Musome Miteko 16:14, 15; aFilipi 4:15-18.) Paulo ni axaapara awe yeettana awe yaanivara muteko okathi mukina wira aphwanye musurukhu woowiikhaliheryana.
ARUMEYI ANIVARA MUTEKO WA ORUMMWA WA OKATHI WOTHEENE A MAHIKU ALA
5. Moonelo xeeni arina aya anamathelana ala voohimya sa muteko wa orummwa wa okathi wotheene?
5 Olelo-va, nave, aakhala atthu aniimananiha ovara miteko soovirikana sa orummwa wa okathi wotheene. (Nwehe ekaaxa eni “Inamuna sa Muteko wa Orummwa wa Okathi Wotheene”.) Awo anoonela sai muteko owo athanlale aya? Nla nikoho nyuwo munitthuneya anyu waakoha anna awo, okhala wira opaka eyo onimoophwanyihani mureerelo muulupale. Muthokorerye ntakiheryo nla: Munna mmosa yoowo aatonko orumeela ntoko pioneero ookilaatheya, pioneero a vameekhaaya, missionaario ni aatonko wiirela mpantta emusi emosa ya oBetheli ya elapo ekina onihimya so: “Miyo kinoona wira okela muteko wa orummwa wa okathi wotheene ti yoothanla yaatepexa oloka epanke aka mweekumini mwaka. Okathi waarina aka iyaakha 18 kaahaana opaka yoothanla akhala wira kaarowa okela wuniversidade, ovara muteko wa mulaponi aahiiso okela epioneero. Sookhumelela sookooniherya wira Yehova khoniliyala khula etthu enileva ahu wira nimurumeele yena mwa okathi wotheene. Eyo yookikhaliherya ovarihela muteko khula etthu enisuwela aka mwa enamuna yahaarowa aka orumeela vaakhanle wira kaathanlale okela muteko wa mulaponi”. Amwaarawe anihimya so: “Khula muteko naavahiwa ahu waanikikhaliherya wunnuwa omunepani. Hiyo nanoona nikhapeleliwaka ni olakiheriwa ni Yehova ikwaha sinceene, kinoona wira itthu iyo khisaarowa onikhumelela vakhanle wira hiyo nikilaathale owaani paahi. Kinnimuxukhurela Yehova khula nihiku mwaha wa ekumi yaarina ahu okathi waavara ahu muteko wa orummwa wa okathi wotheene”. Niireke nyuwo vaamoosivelani ohimya itthu moota ola muhoolo?
6. Etthu xeeni nikhanle ahu oororomela voohimya sa enamuna Yehova onoonela awe muteko ahu?
6 Ekeekhai wira akina kharina makhalelo aniweemererya okela muteko wa orummwa wa okathi wotheene nenna-va. Hiyo nihaana waaminiki wira Yehova onnavaha efaita arumeyi awe awo ni ele eniwerya aya opaka. Nkahaya nwuupuwele ale anaaromola awe Paulo ari epaphelo ya Filémoni 1-3, waahela muhina ale yiirela mpantta muloko wa aKolosi. (Mmusome.) Paulo anaaxukhurela anna ale ni Yehova aawoonela siiso. Mwa enamuna emosaru Tiithi ahu onnisiveliwa ni muteko oninvarela anyu. Vano munrowa owerya sai waakhaliherya ale aniwerya ni akenle muteko wa orummwa wa okathi wotheene?
WAAKHALIHERYA MAPIONEERO
7, 8. Exeeni eniheliwa muhina mwa muteko wa opioneero, ni moota xeeni anna akina a mmulokoni akhanle aya oowaakhaliherya?
7 Moolikana ni anamalaleerya a eseekulu yoopacerya, mapioneero a nthiti annitepa waalipiha anna mmulokoni. Anamunceene anniimananiha ovahererya iwoora 70 khula mweeri sa muteko woolaleerya. Nyuwo munrowa waakhaliherya sai anna awo?
8 Murokora mmosa pioneera oniitthaniwa Shari onihimya so: “Mapioneero anooniwa okhala atthu oolipa okhala wira khula nihiku annirowa muteko woolaleerya. Hata vari siiso awo anitthuneya olipihiwa”. (aRom. 1:11, 12) Murokora mukina yoowo aatonko ovara muteko wa opioneero khalai olavunle so voohimya sa mapioneero a muloko awe: “Awo annivara muteko moohikhulumuwa. Vaavo anna akina anaapakhira aya wira arowe omutekoni waya, waalattula wira arowe yalye, waavaha musurukhu wa gasolina wala waakhaliherya mwa enamuna ekina, awo annixukhurela vanceene. Eyo enniwooniherya awo wira nyuwo munnaaphenta”.
9, 10. Etthu xeeni atthu akina apanke aya wira yaakhaliherye mapioneero a mmulokoni mwaya?
9 Niireke nyuwo mwaaniphavela waakhaliherya mapioneero okathi woolaleerya? Murokora mmosa pioneera oniireliwa Bobbi aahimyale so: “Hiyo ninniphavela okhaliheriwa eriyari ya esumana”. Murokora mukina nave pioneera a muloko mmosaru aahimyale so: “Emakaaripi othowa atthu oorowana olaleerya”. Murokora mmosa yoowo nenna-va onirumeela eBetheli ya oBrooklyn, onnuupuwela moohakalala okathi waari awe pioneera oriki: “Murokora mmosa yoowo aarina ekaaro aakihimeeryale so: ‘Khula okathi onoothowaaweni mutthu oorowana olaleerya, mukiligareleke, nto miyo kinimoorwa wira koohooleni’. Tthiri murokora ole taakikhalihenrye okhala pioneera”. Ni Shari onnihimya moonelo awe oriki: “Wuukiseryani wa nihiku mapioneero ale oohithela wala oohitheliwa annihaawa mwaha wa omeekha. Nyuwo pooti waalattula anna oohithela ni arokora oohitheliwa wira nvirihe hoothe okathi wa omulompa Muluku vatthokoni. Waalattula awo wira nvirihe okathi hoothe onnaakhaliherya anna awo okhala oolipa”.
10 Wuupuwelaka okathi aavara awe muteko ni mapioneera makina oohitheliwa, murokora mmosa yoowo aavanre muteko owo mwa iyaakha 50 onihimya so: “Axitokweene a muloko ahu yaanaaxekurya mapioneera ale khula myeeri miili. Awo yaaninikoha makhalelo ahu ni moota weetta awe muteko ahu ni vakhala wira naahikhalana muxankiho. Tthiri anna ale yaaninikhaliherya. Awo yaaninixekurya wira yoone vakhala wira naanitthuneya okhaliheriwa khula etthu”. Eyo enninuupuxerya moota Paulo aamuxukhurenle awe munna mmosa ni emusi awe wÉfeso khalai.—2 Tim. 1:18.
11. Exeeni eniheliwa muhina mwa muteko wa opioneero wa vameekhaaya?
11 Miloko sikina sookhalana eparakha ya owaakhela mapioneero a vameekhaaya. Anna ni arokora awo ahaana oviriha iwoora 130 alaleeryaka khula mweeri. Mwaha wa okathi aniviriha aya alaleeryaka ni akhaliheryaka mwa inamuna sinceene, awo kharina okathi wa ovara muteko mukina wa mulaponi. Efiliyaali ennaavaha nikhaliheryo naamukhaani wira athumeke itthu sinaathowa okathi onivara aya muteko woolaleerya.
12. Moota xeeni axitokweene ni anna akina akhanle aya oowaakhaliherya mapioneero a vameekhaaya?
12 Ninrowa waakhaliherya sai mapioneero a vameekhaaya? Mutokweene onivara muteko ofiliyaali wa waakhapelela mapioneero awo onihimya so: “axitokweene anitthuneya olavulanaka awo, wira asuwele makhalelo aya ni yoone moota akhanle aya oowaakhaliherya. Anamoona anceene anoona wira mapioneero awo khiivo enaathowa okhala wira annikhaliheriwa ni eFiliyaali, masi anna a muloko aya pooti waakhaliherya mwa inamuna sinceene”. Ntoko siniira aya mapioneero ookilaatheya, mapioneero a vameekhaaya vannaasivela orowa olaleerya ni anna a mmulokoni. Niireke nyuwo munoowerya okhaliherya mwa enamuna eyo?
INAMUNA SA WAAKHALIHERYA AXITOKWEENE OOWEETTEETTA
13, 14. (a) Etthu xeeni ekhanle ahu owuupuwelaka voohimya sa axitokweene a esirkwitu? (b) Exeeni enuupuwela anyu opaka wira mwaakhaliherye anna ari axitokweene a esirkwitu ni axaaraya?
13 Axitokweene a esirkwitu ni axaaraya ikwaha sinceene annooniwa okhala anna oolipa ni oovilela. Eyo ekeekhai, hata vari siiso, awo annitthuneya olipihiwa, ohooliwa muteko woolaleerya ni waalattula wira atthekule vakhaani. Ankhi vakhala wira anniwereiwa ni khuroihiwa oxipitaali, woonasa wene arowaka wooperariwa wala olooliwa mwa enamuna ekina? Tthiri anniphwanya olipa vakhala wira anna ni arokora a mapuro ale annaakhaliherya ni waakhapelela anna awo. Nkahaya muupuwele othunku waarina awe meediku “oophentiwa” Luka, yoowo-tho olempe eliivuru ya Miteko, okathi aawereiwa awe Paulo ni axaapara awe eettana awe.—aKol. 4:14; Mit 20:5–21:18.
14 Axitokweene a esirkwitu ni axaaraya annisiveliwa okhalana apatthani anaaphenta vanceene khula muloko. Mutokweene mmosa a esirkwitu aalempe so: “Axipatthani aka anikhala ntoko anoosuwela okathi onitthuneya aka olipihiwa. Awo annipaka makoho vakhaani ni eyo ennikikhaliherya waahimeerya ele enkixankiha. Mwaha wa okhala waya oowiriyana saana eyo ennikikhaliherya”. Axitokweene a esirkwitu ni axaaraya annisiveliwa ni anna ni arokora anaakhaliherya mwa inamuna sinceene.
WAAKHALIHERYA ANNA NI AROKORA ANIRUMEELA OBETHELI
15, 16. Muteko xeeni onivara aya ale anirumeela oBetheli ni Ipa sa Asembeleya, nto hiyo ninrowa waakhaliherya sai anna awo?
15 Olumwenku wotheene, ale anivara muteko oBetheli ni Ipa sa Asembeleya, annikhaliherya miteko sa Omwene mmuttettheni muniweheriwa ni efiliyaali aya. Vakhala wira mmulokoni mwanyu wala esirkwitu anyu aakhala anna anirumeela oBetheli munrowa wooniherya sai wira munniwuupuwela?
16 Ale anamphiyaru oBetheli, pooti opaceryaka wuunkheliwa owaani, okhala wira ahaahiya amusi ni apatthani aya. Awo annixukhurela vakhala wira ale anivarana aya muteko oBetheli ni anna a mmulokoni mwaya annipatthana ni awo! (Mar. 10:29, 30) Muteko aya wa khula esumana onniweemererya orowa omuthukumanoni ni okhaliherya muteko woolaleerya khula esumana. Masi okathi mukina awo annaatteliwa muteko. Vaavo anna a mmulokoni vanisuwela aya makhalelo awo ni wooniherya oxukhurela miteko sinivariwa ni anna oBetheli, eyo ennikumiherya mireerelo sinceene.—Mmusome 1 aTesalonika 2:9.
WAAKHALIHERYA ARUMEYI ANIVARA MUTEKO WA OKATHI WOTHEENE A ELAPO EKINA
17, 18. Inamuna xeeni sa muteko sinihela muhina orowa elapo ekina?
17 Anna ale aneemererya orwa ovara muteko elapo ekina, annikhalana muxankiho wa olimalela yoolya, nttaava, makhaleliwo, okhala wira itthu iyo ti soovirikana ni iye sa elapo aya. Xeeni awo aneemererya aya muteko owo asuwelaka wira sookhala mixankiho iyo?
18 Akina tiyaale ari mamisionaario, yaawo okhala wene anivara muteko woolaleerya okhala wira ahiinihiwa nikuruta na vameekhaya na muteko woolaleerya. Efiliyaali ennaavaha mamisionaario nikhaliheryo na ophwanya nipuro nookhala, yoolya ni sootthuneya sikina sa khula nihiku. Mamisionaario makina aniroihiwa ilapo sikina, okathi mukina annivara muteko oBetheli, okhaliherya muteko wooteka ipa sa ofiliyaali, mapuro anivariwa muteko wootaphulela, Ipa sa Omwene ni Ipa sa Asembeleya. Awo annivahiwa yoolya, nipuro nookhala noohaattiheriwa itthu, ni mireerelo sikina sinaakhaliherya ovara miteko saya. Ntoko atthu anirumeela oBetheli akina, awo annirowa omuthukumanoni sotheene ni annikhaliherya muteko woolaleerya muttetthe aryaaya, ni annikumiherya mareeliho mwa inamuna sinceene.
19. Exeeni ekhanle ahu owuupuwelaka voohimya sa anna ale anirumeela elapo ekina?
19 Nyuwo muniwuupuwela sai anna awo anivara muteko wa orummwa wa okathi wotheene? Muupuweleke wira etthu yoopacerya waaxankiha olimalela yoolya enilyiwa mapuro awo. Muupuweleke eyo okathi onaaalattula anyu wira arwe alye; nyuwo pooti opacerya waakoha voohimya sa yoolya yaarowa waasivela olya wala olawiha. Mukhaleke oopixa murima wira mwaakhaliheryeke wiixutta nttaava na mapuro awo. Pooti oviraka okathi munceene wira awo apacerye wiiwexexa khula etthu enihimmwa, mooreerela murima nyuwo mwaakhaliheryeke wiixutta oromola oratteene khula nuulumo. Tthiri awo aniphavela wiixutta!
20. Mwa enamuna xeeni yooloka ekhanle ahu oowuupuwela anna anivara muteko wa orummwa wa okathi wotheene ni anamuyari aya?
20 Ale anivara muteko wa orummwa wa okathi wotheene annuuluvala ni anamuyari aya annuluvala nave. Vakhala wira anamuyari aya awo Anamoona, tthiri vannaasivela wira anaaya awo avikanihe orumeela. (3 Yoh. 4) Ekeekhai wira ale anivara muteko wa orummwa wa okathi wotheene annipaka sotheene aniwerya aya wira yaakhaliherye anamuyari aya ni annimananiha waaxekurya khula okathi vaniwerya aya. Masi ale anikhalana anamuyari awo arina anaaya anivara muteko wa orummwa wa okathi wotheene, ahaana wiimananiha waakhaliherya anamuyari awo okathi anitthuneya aya okhaliheriwa mootutuxerya. Muupuweleke wira anna awo anivara muteko wa orummwa wa okathi wotheene aakhalana muritti wa ovara muteko muulupale ohinavariwe olumwenku ola. (Math. 28:19, 20) Niireke nyuwo, wala muloko ori anna arina anaaya anivara muteko wa orummwa wa okathi wotheene munoowerya waakhaliherya anna awo?
21. Anoonela sai anna ale anivara muteko wa orummwa wa okathi wotheene vakhala wira annivahiwa nikhaliheryo ni olipihiwa ni anna a mmulokoni?
21 Anna ale anikela muteko wa orummwa wa okathi wotheene, khanikela mwaha wa ophavelaka ophwanya musurukhu, masi annipaka eyo mwaha wa omphenta Yehova ni atthu akina. Awo annixukhurela vanceene khula etthu enipaka anyu wira mwaakhaliherye. Masu a murokora mmosa yoowo onirumeela elapo ekina annoniherya moonelo wa anna anceene oriki: “Hata mwaaxukhurelaka moohiiwanyeya, anna awo annoona wira nyuwo munnivaha efaita ele enipaka aya”.
22. Munoonela sai muteko wa orummwa wa okathi wotheene?
22 Omurumeela Yehova mmutekoni wa orummwa wa okathi wotheene eri enamuna ya ekumi eniphwanyiha mureerelo munceene. Ola muteko wooxankiha, wowiixuttiha itthu ni woohakalaliha vanceene. Ni eyo ti enamuna ya wiilokiherya wira nawerye ovara muteko munceene onrowa okhumelela, ni oniwaalitta arumeyi a Yehova oororomeleya okathi Omwene wa Muluku onrowa awe olamulelaka valaponi. Tthiri otheene ahu ‘nivikanihe owuupuwela anna ale moororomeleya ni moophenta ‘anivara muteko wa orummwa wa okathi wotheene.—1 aTes. 1:3.
[Ekaaxa epaaxina 30]
Inamuna sa Muteko wa Orummwa wa Okathi Wotheene
Mapioneero Okilaatheya: Okhala wene aniviriha iwoora 70 alaleeryaka khula mweeri, anirumeela mmulokoni mwaya wala mapuro yaale oothowa anamalaleerya.
Mapioneero a Vameekhaaya: Okhala wene aniviriha iwoora 130 alaleeryaka khula mweeri, ikwaha sinceene annirummwa orowa ovara muteko mapuro yaale oothowa anamalaleerya.
Axitokweene a Esirkwitu: Annirumeela miloko sinceene, tanihoolela muteko woolaleerya ni tanikhaliherya miloko mwa inamuna sikina.
Atthu a Emusi ya oBetheli: Tiyaale anirumeela ofiliyaali, nipuro nintaphuleliwa iliivuru sinirumeeliwa muttetthe oniweheriwa ni efiliyaali aya.
Mamisionaario: Okhala wene ti anna ale anirummwa orowa orumeela elapo ekina. Mamisionaario manceene anniviriha iwoora 130 alaleeryaka khula mweeri.
Arummwa a ilapo sikina ni ale owiivahererya: Tiyaale anirowa okhaliherya muteko wa otekiwa ifiliyaali, Ipa sinivariwa muteko wootaphulela, Ipa sa Asembeleya ni Ipa sa Omwene.
Arummwa aniteka Ipa sa Omwene: Tiyaale yiinihiwe nikuruta na oteka Ipa sa Omwene ni okhaliherya muteko wooteka ilapo soothowa musurukhu.