Nihaana Okhala Oowaarya Mweettelo Ahu Wotheene

“Mukhaleke [oowaarya] ni mwettelo anyu wothene”.​—1 PED. 1:15.

MWAAROWA WAAKHULA SAI?

Xeeni maKristau a ekeekhai anitumereriwa aya ohipahula mweettelo aya wooloka?

Ovarihana xeeni okhanle eriyari ya okhulupale wa Yehova ni maKristau ohiirela waya mpantta epoliitika?

Moovarihana ni aHéberi 5:7, 11-14, nitokoseke sai Nuulumo na Muluku?

1, 2. (a) Mweettelo xeeni anitumereriwa aya okhalana atthu a Muluku? (b) Makoho xeeni anrowa waakhuliwa muru ola?

YEHOVA aahimuupuxerya murummwa Pedru wira ohimye ovarihana okhanle; waarya onittittimiheriwa ni eliivuru ya Onamukuttho vamosa ni otthuneya waya maKristau okhala oowaarya mweettelo aya wotheene. (Mmusome 1 Pedru 1:14-16.) Yehova, yoowo ori Muluku Oowaarya, oniphavela wira alipa-oowoottihiwa ni “ipwittipwitthi sikina” apakeke sotheene siniwerya aya wira akhalane mweettelo wowaarya, ohiya mwa itthu vakhaani masi mwa itthu sotheene.​—Yoh. 10:16.

² Othokorerya saana ele eniixutta ahu muliivuruni ya Onamukuttho ni ovarihela muteko ele enirowa ahu wiixutta onrowa onikhaliherya okhala oowaarya mmweettelo ahu wotheene. Vano ninrowa othokorerya makoho ntoko ala: Nooneleke sai opahula makhalelo ahu ooloka? Exeeni enniixuttiha aya eliivuru ya Onamukuttho voohimya sa okhaliherya okhulupale wa Yehova? Exeeni ekhanle ahu oowiixutta voohimya sa mikuttho saavahiwa khalai?

MUHIPAHULE MWEETTELO ANYU WOOLOKA

3, 4. (a) Xeeni maKristau anitumereriwa aya osyaka itthu sikhanle oopahula malamulo ni miruku sa mBiibiliyani? (b) Xeeni vahinitthuneya ahu owunlela ikuhu wala osukaka vamurimani vahu itthu sootakhala siireliwa ahu?

³ Naaphavelaka omuhakalaliha Yehova, nihaana ottharihela saana malamulo ni miruku sawe ni oheemererya opaka etthu yaarowa opahula mweettelo ahu wooloka. Nnaamwi nihittharihelaka Nlamulo na Moise, itthu saavekeliwa ni nlamulo nlo sinoonivaha miruku wira nisuwele othanla ele enimunanara ni enimusivela Muluku. Mwa ntakiheryo aIsarayeli yaarummwale so: ‘Muhiwunlelé ikuhu atthu a nloko nanyu, nnákhala ehowereiheni murima. Vano mumphente mukhw’inyu ntoko sinìphentanyu. Miyo ka Yehova’.​—Onam. 19:18.

⁴ Yehova oniphavela wira nihiwunleleke ikuhu atthu akina, ni khoniphavela wira nisukeke vamurimani vahu itthu sootakhala siireliwe ahu. (aRom. 12:19) Satana onnihakalala vakhala wira hiyo khannicalela malamulo ni sooruma sa Muluku, nto mweettelo owo onnimunyohola Yehova. Hata mutthu mukina olakelaka oninyoonyiha, hiyo nihipakeye mwaapu onisukiwa itthu soohiloka voohimya sa mutthu owo. Muluku oonivaha eparakha ya okhala ‘myapu sa oloko’ sinisukiwa miteko sininvarela ahu yoowo. (2 aKor. 4:1, 7) Tthiri hiyo nihiheleke itthu sikhanle oohonona mwaapu owo!

5. Exeeni ekhanle ahu oowiixutta voohimya sa Aroni ni okhwa wa anaawe? (Nwehe elatarato yoopacerya.)

⁵ Yookhala yowiiraneya yooriipiha murima yaakhumelenle vatthokoni va Aroni elempwale ni eliivuru ya Onamukuttho 10:1-11. Tthiri awo waahaawereya murima vaavo waakhumme awe mooro wiirimu khwaapaha anaawe Aroni Nadabi ni Abihu mpaani mwa Muluku. Nto yowiiraneya ele yaaheehererya nroromelo na Aroni ni emusi awe mwaha woowi yaahikhoottiheriwa owunlela amusi aya ale yaiviwe! Niireke nyuwo mwaaneene munnooniherya wira nlelo muri oowaarya mukhoottaka wataana ni amusi wala atthu akina ari ookumihiwa mmulokoni?​—Mmusome 1 aKorinto 5:11.

6, 7. (a) Okathi onipaka ahu yoothanla vakhala wira nnoorowa wala ohirowa ekasamento ya mmusi enirowa opakiwa okerexa, itthu xeeni sinitthuneya ahu othokorerya saana? (Nwehe enoota.) (b) Ninrowa waatthokiherya sai amusi ahu ahikhanle Anamoona yoothanla ahu voohimya sa ekasamento enipakiwa okerexa waya?

⁶ Woonasa wene hiyo khenirowa onikhumelela yoweeha yoolikana ni ele yaamukhumelenle Aroni ni emusi awe. Masi, ankhi vakhala wira hiyo ninnilattuliwa wira nirowe okasamentoni okerexa ya mmusi ohikhanle Namoona a Yehova? Nnaamwi ehikhanle yoolepa mBiibiliyani enikhoottiha mooluluwanya orowa mapuro awo, niireke sihaavo miruku sikhanle oonikhaliherya opaka yoothanla yooloka voohimya sa mwaha ola?a

⁷ Yoothanla ahu ya okhala oowaarya vamaithoni va Yehova okathi ntoko owo, pooti waanyoonya amusi ahu ahikhanle Anamoona a Yehova. (1 Ped. 4:3, 4) Ekeekhai wira hiyo khanniphavela waaveiha amusi awo, enamuna yookhalela waatthokiherya moopatthaneya ni moowiiwanyeya saana. Vaamureerela opaka eyo nihinatthi ophiya nihiku na niira nlo. Hiyo pooti waaxukhurela ni waahimeerya wira vaanisivela olattuliwa orowa woona ekasamento eyo. Nuumala-vo pooti ohimya wira mwaha wa itthu sinirowa opakiwaka sinivarihana ni etiini, khivaarowa okhala vooreerela orowa mapuro awo okhala wira eyo yaamuhonona ohakalala waya ni yaarowa waananara anamalattuliwa akina. Ela tekhanle enamuna emosa ya ohihonona sookupali ni nroromelo nahu.

MUKHALIHERYEKE OKHULUPALE WA YEHOVA

8. Moota xeeni eliivuru ya Onamukuttho enittittimiherya aya olamulelo wa Yehova?

⁸ Eliivuru ya Onamukuttho ennittittimiherya oratteene okhulupale wa Yehova. Mwa ikwaha sinivikana 30, malamulo aniphwanyaneya eliivuru ya Onamukuttho annihimmwa okhala a Yehova. Moise aanisuwela eyo, tivonto aapanke awe khula etthu aarummwale awe opaka. (Onam. 8:4, 5) Vamosaru hiyo nihaana opaka khula etthu Namalamulela ahu Yehova ennivekela awe opaka. Ninniwerya eyo nikhaliheriwaka ni nikhuuru na Muluku. Masi pooti onikhumelela yoweeha okathi onikhala ahu mekhihu, ntoko saamwiiraneelale aya Yesu onari woothakoni. (Luka 4:1-13) Vakhala wira hiyo ninrowa okhaliherya olamulelo wa Muluku ni omuroromela yena, khuuvo onrowa owerya onihapuxa wira nimutthekele Muluku mwaha wa woopopihiwa.​—Mir. 29:25.

9. Xeeni atthu a Muluku aninyokhiwa aya ni maloko otheene?

⁹ Atthareli a Kristu ni Anamoona a Yehova, annilupatthiwa ni maloko a olumwenku wotheene. Eyo khennitutuxa, okhala wira Yesu aahaahimeerya arumeyi awe wira: “Atthu animolupatthani, anowivani. Maloko othene animonyokhani mwaha wa nsina naka”. (Math. 24:9) Hata nihaaxiwaka mwa enamuna eyo, hiyo ninnivilela nivaraka muteko woolaleya Omwene, ni nivikanihaka okhala oowaarya ohoolo wa Yehova. Xeeni vanihasuliwa ahu nnaamwi niryeene atthu ooloka ni oowiiwelela malamulo a mulaponi? (aRom. 13:1-7) Mwaha woowi hiyo ninkhaliherya Omwene wa Muluku! Hiyo nimmukokhorela Yehova ‘paahi’, ni khanniphavela ovonyola malamulo, ni miruku sawe.​—Math. 4:10.

10. Exeeni yaakhumelenle okathi omosa vaavo munna ahaawenrye awe wiiwelela nlamulo na ohiirela mpantta ni elapo?

¹⁰ Ohiya-vo, hiyo ‘khannirela mpantta elapo’. Tivonto, vahiniikeliha ahu mukhottoni ni epoliitika ya elapo ela. (Mmusome Yohani 15:18-21; Yesaya 2:4.) Aakhala atthu yaatonko wooceela ottharihela malamulo ala a ohiirela mpantta elapo. Anamunceene a atthu awo, nuuvira okathi yaahoona wira ele yaapanke aya khiyaalonke ni yaahiphavelasa otthikela wataana waya ni Tiithi ahu a wiirimu oomoriwa ikharari. (Esal. 51:19) Atthu vakhaani paahi tiyahaatthikenle wa Yehova. Mwa ntakiheryo, elapo ya Húngria, okathi wa Ekhotto ya Nenli ya Olumwenku Wotheene, atoropa yahaathukumanya mukhatteya anna 160, yahaaphiyerinhe iyaakha 45. Awo yahaakhanyererya anna ale okela etoropa. Anna oororomeleya khiyeemerenrye, masi yaahikhumelela ekrupu ya atthu 9 yeemerenrye okela ni owara ikuwo sa etoropa. Nuuvira iyaakha piili, mmosa wa yaale yeemerenrye okela etoropa, aahirummwa wiirela mpantta nikhuuru na atoropa naarummwale owiiva Anamoona oororomeleya. Ekrupu ele ya atthu yaarowa wiiviwa, aahikhala muhima awe a erukulu emosa! Masi palano ole aahiturukiwa nto anna ale khiyaiviwe.

MUNVAHEKE YEHOVA YOOLOKEXA ERINA ANYU

11, 12. Moota xeeni enamuna saapakiwa aya mikuttho sa Yehova wIsarayeli khalai, orina aya yootaphulela wa maKristau olelo-va?

¹¹ Moovarihana ni Nlamulo na Moise, aIsarayeli yaahaana ovaha mikuttho. (Onam. 9:1-4, 15-21) Khula etthu yaavahiwa mukuttho, yaahaana okhala yooloka, okhala wira yaathoonyerya mukuttho woomalela waarowa ovahiwa ni Yesu. Ohiya-vo, khula yoovaha yaahikhalana inamuna saya saatthariheliwa okathi waavahiwa aya. Mwa ntakiheryo, muthokorerye ele yaavekeliwa awe muthiyana nuumala oyara. Onamukuttho 12:6 onihimya so: “Waphiya okathi w’orerihiwa wawe, mwaha wa mwana mwamulopwana walá mwamuthiyana, ohana orowa okumana ni mulipa a mukuttho, oholo w’ehema y’okumana, amuroihelaka mwapwittipwitthi èyakha emosa, wira aheliwe mukuttho wopahiwa, amuroihele-tho epomba emosa nlelo muhoro walá nsiya, wira eheliwe mukuttho w’otaphula mwikho”. Soovekela sa Muluku saari sooluluwanya, masi saanooniherya ophenta ni oreera wawe murima. Akhala wira maama ole khaawerya ovaha epwittipwitthi, aaneemereriwa ovaha ipomba piili wala masiya manli mihoro. (Onam. 12:8) Eyo ennooniherya wira, hata arumeyi a Muluku ale yaari oohaawa, yaanivahiwa efaita moolikana ni ale yaavaha mukuttho wa esisapo yoowalamela. Exeeni ekhanle ahu oowiixutta mmasu ala?

¹² Murummwa Paulo aahaatumererya annawe wira anvaheke Muluku “mukuttho w’otthapela”. (aHéb. 13:15) Iyano sahu, sihaana olaleyaka moowiiwanyeya nsina noowaarya na Yehova. Anna ni arokora ahiniiwa, annirumeela nttaava ninlavuliwa ni matata wira anvuwihe Muluku. Ale oowereyasiwa ahiniwerya orowa olaleerya, annirumeela ipaphelo, telefone wira alaleerye, annaalaleerya atthu anaakhapelela ni anaxekurya. Mikuttho sahu sa onvuwiha Yehova, eyo piiyo, olaleya wahu nsina nawe, ni ihapari sooreera, sihaana okhala moovarihana ni makhalelo a okumi ahu, ni owerya wahu. Tthiri nihaana opaka sotheene siniwerya ahu.​—aRom. 12:1; 2 Tim. 2:15.

13. Xeeni vanitthuneya ahu ovahererya iwoora sahu sa muteko woolaleerya khula mweeri?

¹³ Mikuttho sahu sa onvuwiha ti soovaha sahu soohikhanyereriwa wa Muluku okhala wira ninnimphenta. (Math. 22:37, 38) Masi hiyo ninnivekeliwa ovahererya erelatoorio ya muteko ahu woolaleerya. Vano nikhalaneke moonelo xeeni voohimya sa mwaha ola? Erelatoorio enivahererya ahu khula mweeri enooniherya muteko oninvarela ahu Yehova. (2 Ped. 1:7) Tivonto ohikhanle awe ookhanyereriwa wira mutthu oviriheke iwoora sinceene olaleeryaka wira ovahererye iwoora sinceeene wuumalani wa mweeri. Eyo tiyiirinhe oweryaneyaka anna anikhala empa enikhapeleliwa atthu owuuluvala wala aniwereyasiwa ahiniwerya ovara miteko saya, wira pooti ovahererya okhuma minutu 15 orowaka ohoolo. Minutu iyo sinnimusivela Yehova okhala wira eyo ti etthu yuulupalexa namalaleerya owo owenrye awe opaka ni eyo ennooniherya wira owo onnimphenta ni onnisiveliwa eparakha erina awe, ya okhala Namoona a Yehova. Moolikana ni aIsarayeli ale makhalelo aya yahaaweemererya ovaha etthu yoowalamela, Yehova onnisiveliwa ni anna ale aniira arineene muxankiho nlelo anaveleela iwoora saya. Erelatoorio ahu enniirela mpantta mwaattelo wa erelatoorio ya olumwenku wotheene, ni ennikhaliherya nikhuuru nahu osuwela ompaka palano a muteko woolaleerya muhoolo. Nto niireke etthu yoovila tthiri ovekeliwa wira nivahereryeke iwoora siniviriha ahu nivaraka muteko woolaleerya?

OTOKOSA WAHU MYAHA NI MIKUTTHO SININVUWIHA MULUKU

14. Mutthokiherye etthu eniiriha otthuneyaka ovarerya isomelo sahu nuulumo na Muluku.

¹⁴ Nuumala othokorerya ikeekhai suulupale siniphwanyaneya eliivuru ya Onamukuttho, woonasa wene nyuwo pooti opaceryaka wuupuwela so: ‘Kiireke miyo kinniiwexexa etthu yiirinhe eliivuru ela oheliwa muhina mwa Nuulumo Noolempwa na Muluku?’ (2 Tim. 3:16) Nyuwo mpake okhala yoolakela anyu ovikaniha okhala oowaarya, ohiya mwaha wa Yehova ovekelaka eyo, masi, mwaha woowi owo onniphwanelela ovahiwa ele eri yooloka erina ahu. Tthiri itthu sixuntte anyu eliivuru ela ya Onamukuttho mmiru iya miili sisomme ahu, sihinnuuherya yoolakela anyu ya otokosa oratteene soolepa sotheene siri mBiibiliyani. (Musome Miruku 2:1-5.) Muhaana ovarerya moota sinitokosa anyu Nuulumo na Muluku. Tthiri munniphavela wira mikuttho sanyu saakheliwe saana ni Yehova. Nto niireke nyuwo munneemererya iprograma sa televisau, axooku, wala itthu soothweeliha siwiiyeryakani okathi waarina anyu wira musome Nuulumo na Muluku ni munnuwe omunepani? Vakhala wira ti siiso, munimoona okhala vooreerela othokorerya masu yaalavuliwe ni murummwa Paulo alempwale eliivuru ya aHeeberi.

15, 16. Exeeni yaamwiirinhe Paulo waalepela aHeeberi voohivitha etthu?

¹⁵ Paulo khaavithenrye etthu annawe aHeeberi okathi aalepela awe epaphelo. (Mmusome aHéberi 5:7, 11-14.) Paulo khaavithale etthu! Owo aahaahimeerya wira yaari “òpisa wiwa”. Xeeni moolumo a Paulo yaakhala aya ntoko toowereya? Owo ooniherya niphento na Yehova ni waamorela wawe ikharari maKristau ale yaamananiha okhalana nroromelo awuryaka eleeti ya omunepani paahi. Ekeekhai wira wiixutta itthu soopacerya sa eKristau etthu yooloka. Masi “yolya yolipa” ennitthuneya-tho okhala wira tenikumiherya munnuwelo wa omunepani wa muKristau.

¹⁶ Ohiya okhala oowunnuwa omunepani vaaphiyerya aya owiixuttiha atthu akina, aHeeberi ale yaatthuneya wiixuttihiwa ni mutthu mukina. Nthowa xeeni? Okhala wira awo yaamusyaka “yolya yolipa”. Nto mwiikoheke so: ‘Kiireke miyo kookhalana moonelo wooloka voohimya sa yoolya yoolipa ya omunepani? Kiireke kinnimananiha olya yoolya siiso? Kiireke miyo kinoosyaka opaka mavekelo ni oviriha okathi kitokosaka itthu soovila sa mBiibiliyani? Vakhala ti siiso kiireke isomelo saka ti sinkumiherya muxankiho owo?’ Muteko ahu khahiyo waalaleerya atthu paahi, masi nihaana wiixuttiha ni waapaka awiixutti.​—Math. 28:19, 20.

17, 18. (a) Xeeni vanitthuneya ahu okhalela nthiti olya yoolya yoolipa yomunepani? (b) Nooneleke sai soowurya soohapala okathi onirowa ahu omuthukumanoni sa eKristau?

¹⁷ Omusoma Biibiliya khahiyo etthu yoowakhweyerya atthu otheene. Tthiri, Yehova khoniphavela wira atthu asomeke Nuulumo nawe mwaha wa woonaka wira anrowa okhalana nthowa yaahipake eyo. Hata vari siiso, pooti nibatiziwe naanano wala khalai, hiyo nihaana ovikaniha ophavelasa olya yoolya yoolipa ya omunepani. Wiira siiso onoonikhaliherya ophwanya ni weettela ephiro yoowaarya.

¹⁸ Wira nikhale oowaarya, nihaana osoma oratteene ni otokosa wira nisuwele ele ennivekela awe Muluku wira nipake. Nkahaya nwuupuwele anaawe Aroni Nadabi ni Abihu, yaawo yaiviwe mwaha wa orumeela “moro w’oveha”, woonasa wene ahapaliwe ene. (Onamu. 10:1, 2) Moone ele Muluku yaamuhimeeryale awe Aroni. (Mmusome Onamukuttho 10:8-11.) Niireke masu ala anitaphulela wira hiyo nihiwuryeke etthu yoohapala nihinatthi orowa omuthukumanoni sa eKristau? Nkawehani eponto ela eni: Hiyo khanneettela Nlamulo na Moise. (aRom. 10:4) Mapuro manceene annihu aalimalela owurya eviinyu moohitepana okathi onilya aya ahinatthi orowa omuthukumanoni. Saahikhala ikoopho xexe sa eviinyu okathi waapakiwa Paasikha. Okathi waapacerinhe awe Niira na Wuupuwelela, arummwa a Yesu yaahiwurya eviinyu yaathoonyerya ephome awe. (Math. 26:27) Biibiliya onnikhoottiha owurya woovikaniha mphimo ni ohapaliwa. (1 aKor. 6:10; 1 Tim. 3:8) Nave maKristau makina yowuupuxerya aya ya murima pooti waatumereryaka othanya moomalela soowurya soohapala ahinatthi orowa ovara miteko sa Muluku. Nnaamwi makhalelo avirikanaka khula elapo, etthu yootthuneya wa maKristau ori “osuwela ovirikana wa ele ekhanle yooloka ni ele ehikanle yooloka” wira awerye weetta voowaarya onimusivela Muluku.

19. (a) Exeeni ekhanle ahu oowuupuwelaka voohimya sa okathi woomulompa Muluku vatthokoni ni onimusoma ahu Biibiliya? (b) Yoolakela xeeni erina anyu voohimya sa ovikaniha okhala oowaarya?

¹⁹ Sihaavo ikeekhai sinceene mBiibiliyani sikhanle ahu oophwanya naphavelasa. Murumeele ikaruma sikhanle sa otokosa myaha wira mwiixutte itthu sinceene okathi wa omulompa Muluku vatthokoni wala okathi onisoma anyu Nuulumo na Muluku. Munnuuherye omusuwela wanyu Yehova ni soolakela sawe. Mmwaattamele Muluku. (Yak. 4:8) Munvekeleke Muluku ntoko siirale awe nasaalimo yoowo iipale so: “Mutthukule maitho aka, kòneke orattene ikano sanyu sothamaleya”. (Esal. 119:18) Muhipahuleke malamulo ni miruku sa mBiibiliyani. Mmwiiweleleke ni murima anyu wotheene Muluku “Oowaarya” Yehova, ni okhalela nthiti ‘olaleya ehapari yorera ya Muluku’. (1 Ped. 1:15; aRom. 15:16) Nvikanihe okhala oowaarya mahiku ala ookiserya ni ootakhala. Vano nrowe otheene ahu nikhale oowaarya mmweetteloni ni nikhaliheryeke Omwene wa Muluku ahu Yehova.

[Enoota]