BIIBILIYA ONNIRUKUNUXA MIRIMA SA ATTHU

Ekeekhai ya Biibiliya yookikhaliherya ophwanya waakhuliwa wa makoho aka

Elavuliwe Ni Mayli Gündel

MWAAKHA OYARIWE AWE: 1987

ELAPO OYARIWE AWE: AZERBAIJÃO

MWAHA ENE: TIITHI AWE AARI MMAKA, MASI MAAMAWE MUYUDA

MWEETTELO AKA WA KHALAI: Miyo kiyariwe oBaku, Azerbaijão. Kaari mwaana ookiserya wa anamwane anli. Apaapa yaari mmaka, masi amaama, muYuda. Awo yaaniphentana ni yaaneemya ovirikana waya wa itiini. Amaama yaanaakhaliherya apaapa okathi wa Ramadani, nave apaapa yaanaakhaliherya amaama okathi wa Paasikha. Owaani, naahikhalana eKurani, Torá, ni Biibiliya.

Miyo kaixoona okhala mmaka. Nnaamwi kihitonko ohoverya wira Muluku ookhala, sihaavo itthu saakitikiniha. Kaaniikoha so: ‘Exeeni emwiirinhe Muluku waapattuxa atthu? Xeeni atthu anihaawa aya vanci, nto khiyapahiwa-tho omooroni mahiku otheene?’ Okhala wira atthu yaahimya wira itthu sotheene sinikumiheriwa ni Muluku, kaaniikoha so: ‘Kiireke Muluku vannimusivela waaweha atthu ehaawaka?’

Kirina ene iyaakha 12, kaahipacerya orumeela yoolema ya amaka ya ovekela ikwaha 5 vanihikuni (namaz). Okathi owo, Apaapa yaahiniroiha exikola ya aYuda. Naahiixutta itthu soovirikana ntoko yoolema ya Torá ni nttaava na eHeeberi. Khula nihiku nihinatthi okela musaala, naahaana olompa yoolema ya aYuda. Vaasiisu, kaaninvekela namaz owaani, nto oxikola kaanilompa ni aYuda.

Kaanixankiheya mwaha woohiphwanya waakhuliwa wa makoho aka. Nto kaamakela waakoha oxikola ale yaitthaniwa rabino wira: “Xeeni Muluku ohalaka waapattuxa apinaatamu? Muluku oniwoonela sai apaapa yaawo ari mmaka? Awo tooreera murima, nto xeeni anihimmwa aya okhala mutthu oohiloka? Xeeni Muluku ohalaka waapattuxa?” Moota waakhuliwa aka waari woohikhalela ni woohivara murima.

MOOTA BIIBILIYA ORUKUNUNXE AWE OKUMI AKA: Eyaakha ya 2002, kaahihiya omwaamini Muluku. Yaavinre esumana emosa paahi vaavo naathaamenle ahu wAlemanha, nto apaapa yaahaaphwanya ehasara ya derrame cerebral nto khuviriha okathi munceene ahisuwelaka etthu. Mwa iyaakha sinci kaanivekela wira apaapa avone ni wira emusi ekhaleke saana. Kikupaliki wira Muluku Oowerya sotheene paahi torina owerya voohimya sa okumi ni okhwa, mahiku otheene kaamakela ovekela wira apaapa ahikhwe. Kuupuwela so: ‘Muluku khivanimuxankiha omwaakhula mwaaruusi’. Kaanikupali wira Muluku aamwaakhula mavekelo aka. Masi apaapa yaahikhwa.

Nto kaahixankiheya vanceene maana kuupuwela wira Muluku khiwaakhunle mavekelo aka. Kuupuwela so: ‘Kinvekela mwa enamuna yoohikhalela, wala Muluku khokhanle’. Kaahixanka ni nkaawerya-tho onvekela namaz. Nkaacalela itiini sikina ni, kaahipacerya wuupuwela wira Muluku khokhanle.

Nuuvira myeeri 6, Anamoona a Yehova yaahinixukurya. Okhala wira hiyo khinaattittimiha eKristau, miyo ni muulupale aka naahiphavela owooniherya wira ele yaahimya aya yaari ethiru. Nahaakoha so: “Xeeni maKristau animukokhorela aya Yesu, Maria, mwiikimanyo, ni ilatarato sikina, nnaamwi Sooruma Muloko sikhoottihaka?” Amurumeelaka Biibiliya, awo yaahinooniherya wira maKristau eekeekhai annikhoottiheriwa okokhorela ilatarato, ni nihaana onvekelaka Muluku paahi. Eyo yaahikitikiniha.

Nto naahaakoha so: “Ankhi voohimya sa Amuluku Araru? Akhala wira Yesu Muluku, nto aawenrye sai okhala valaponi ni khwiiviwa?” Amurumeelaka-tho Biibiliya, Anamoona ale yaahinitthokiherya wira Yesu khahiyo Muluku ni khonilikana ni Muluku, nto khiyaakupali yowiixuttiha ya Amuluku Araru. Kaahitikinihiwa ni kinuupuwela so: ‘Ala maKristau oothanyeya’.

Masi nlelo, kaaniphavela osuwela nthowa naya atthu anikhwa aya, ni Muluku oneemererya awe ohaawa. Anamoona awo yaahikooniherya eliivuru eni: Conhecimento Que Conduz à Vida Eterna,a yeeyo yaarina miru saakhula makoho aka. Moohipisa yaahipacerya okiixuttiha Biibiliya.

Wa khula epantte yaasoma ahu, kaaniphwanya soolepa saakhula makoho aka. Kahiixutta wira nsina na Muluku ti Yehova. (Esalimo 83:18, Tradução do Novo Mundo) Mukhalelo awe muulupale ori ophenta. (1 Yohani 4:8) Owo aapattunxe apinaatamu mwaha woowi oniphavela wira ehakalaleke. Kaahiixutta wira nnaamwi Muluku eemereryaka ohaawa, owo khonisiveliwa waaweha atthu ehaawaka nto moohipisa onoomaliha. Kaahiixutta-tho wira ohiiwelela wa Adamu ni Eva onnaakumiherya mixankiho apinaatamu. (aRoma 5:12) Ti maana aya anikhwa aya ale anaaphenta ahu, ohela muhina apaapa. Masi Muluku onoomaliha okhwa elapo esya enaattamela, weiwo alipa ookhwa anirowa aya ohihimuxiwa.​—Miteko 24:15.

Ekeekhai ya Biibiliya yookikhaliherya ophwanya waakhuliwa wa makoho aka. Kaahitthikela-tho omukupali Muluku. Vaavo kaasuwela aka Anamoona a Yehova, kaahoona wira awo ti nikhuuru nootthokiheya na anna a olumwenku wotheene. Kaahitikinihiwa ni moota yaiwanana aya ni ophentana. (Yohani 13:34, 35) Itthu kaixutta aka sa Yehova saahikiiriha ophavela omurumeela, nto moohipisa kaahilakela okhala Namoona a Yehova. Kaahibatiziwa 8 a Janero 2005.

MOOTA OTTOTTENLE AKA MUREERELO: Sowiixuttiha soovara murima sa Biibiliya sooturuka moonelo aka voohimya sa okumi. Iyo sookivaha nlipelelo ni omaaleleya. Koophwanya ohakalala wuulupale mwaha woosuwela wira kinimwaaweha-tho apaapa vaavo anirowa aya ohihimuxiwa ntoko Biibiliya onileiherya awe.​—Yohani 5:28, 29.

Mwa iyaakha 6, khookhalana etthoko yoohakalala ni iyaka Jonathan yoowo ori murumeyi a Muluku. Oowanli ahu nihiixutta wira ekeekhai voohimya sa Muluku ti yookhalela ni yookhweya, ni okathi omosaru eyo eri ntoko muhakhu wa faita. Eyo ti etthu enniiriha waaleela akina sookupali ni nlipelelo nahu noohakalaliha. Vano koosuwela wira Anamoona a Yehova khahiyo “maKristau oothanyeya”, masi awo maKristau eekeekhai.

[Enoota]