Khula Okathi Mmuroromeleke Yehova!

“Mwaroromele Apwiya [Yehova] mahiku othene”.​—ESAL. 62:9.

MWAAROWA WAAKHULA SAI?

Xeeni Yehova ohinaakuvela awe waakhula mavekelo ahu?

Yoomaaliha xeeni enniphwanyiha aya yooleiherya ya Yehova eri va 1 aKorinto 10:13?

Miteko xeeni sinrowa wookhaliheryani olipiha omuroromela ni wataana wanyu Yehova?

1-3. Moota xeeni naalipihiwe aya nroromelo na Paulo wa Yehova? (Nwehe elatarato yoopacerya.)

OLE waari okathi woovila okhala Kristau oRoma. Atthareli a Kristu yaanilupatthiwa vanceene okhala wira yaanootheriwa wira yaahipaha epooma ya aRoma ni wira yaanaanyokha apinaatamu otheene. Vaakhanle wira nyuwo mwaari Kristau okathi ole, nto khula nihiku mwaarowa woovaka ovariwa ni ohasuliwa. Anna ni arokora akina yaahikitthasiwa, okhuuriwa ni inama wala okhomeliwa vamwirini ni opahiwa ari akumi wira apakiwe muthuko ohiyu.

² Tthiri awo ti yaari makhalelo okathi murummwa Paulo aatthukiwe awe oRoma ekwaha ya nenli. Niireke maKristau makina yammukhaliherya? Eyo yaahimuxankiha Paulo wanipacerya, tivo okathi aamulepela awe Timootheyo aahimmye so: “Okathi wapajeryaka wisakiha, khavo okikhalihenrye, atthu othene àkinyanyala. Itthu sene seiya Muluku àlevelele”. Hata vaari siiso, Paulo aanisuwela wira khaakhanle mekhawe. Owo aalempe so: “Apwiya ti yakhanle ni miyo, khukivaha ikuru”. Tthiri Pwiya Yesu aahinvaha ikuru saatthuneya wira Paulo okhumele saana. Nto nikhaliheryo nle na Muluku naavanre muteko xeeni? Nwehe ele yaahimmye awe Paulo oriki: “kokumihiwa mwano mwa kharamu”.​—2 Tim. 4:16, 17.a

³ Wuupuwela yowiiraneya eyo waahimulipiha Paulo, ni waahimukhaliherya yena ororomela wira Yehova aarowa omulipiha wira owerye oxintta mixankiho saarina awe ni iye saarowa omukhumelela muhoolo. Tivonto, moohipisa nuumala ohimya masu awo onnimaliherya so: “Apwiya anokàkiherya sotakhala sothene”. (2 Tim. 4:18) Tthiri Paulo aanisuwela wira hata ohikhaliheriwaka ni apinaatamu, aamukhaliheriwa ni Yehova ni Mwanawe, yaawo akhanle anamakhaliherya a ekeekhai!

EPARAKHA YA ‘OMUROROMELA YEHOVA’

4, 5. (a) Ti pani onrowa owerya wookhaliheryani khula okathi oniphavela anyu nikhaliheryo? (b) Munrowa olipiha sai wataana wanyu ni Yehova?

⁴ Niireke nyuwo mootoko woona wira muri meekhinyu okathi oniwanana anyu muxankiho? Eyo pooti wiiraneya okathi yoole oniyeleela anyu muteko, sookhanyererya sa oxikola, owereyasiwa, wala etthu ekina yooxankiha. Woonasa wene nyuwo pooti waavekela nikhaliheryo anna akina, masi akina pooti woriipihani murima mwaha wa ohiwerya woovahani nikhaliheryo nimphavela anyu. Ohiya-vo, sookhala mixankiho sihiniweryaneya omala-malihiwa ni apinaatamu. Nto okathi owo, niireke sinnivareleya muteko miruku sa mBiibiliyani sini: “Mwaroromeleke Apwiya [Yehova]”? (Mir. 3:5, 6) Niireke tthiri sinnivara muteko? Aayo! Nikhaliheryo na Muluku ti na ekeekhai ntoko sinooniherya aya sowiiraneya sinceene siri mBiibiliyani.

⁵ Ti maana aya, ohiya onyoonyiwaka okathi apinaatamu ahiniwerya aya wookhaliheryani, mmananiheke woona mixankiho iyo okhala okathi wa wooniherya omuroromela wanyu Yehova ni wira mulawihe oreera wawe murima. Eyo enrowa olipiha omuroromela wanyu Yehova ni wiiriha wataana wanyu okhala wekeekhai.

OMUROROMELA MULUKU TONIROWA OLIPIHA WATAANA WAHU NI YENA

6. Xeeni varyaaya voovila ovikaniha omuroromela Yehova okathi wa mixankiho?

⁶ Niireke nyuwo munoowerya ophwanya murettele nuumala omuleela Yehova muxankiho anyu, mwaha wa osuwela wira nyuwo moopaka mpantta anyu ni wira Yehova toniwerya omaliherya mwaha owo? Aayo, vanniweryaneya! (Musome Esalimo 62:9; 1 Pedru 5:7.) Wiixutta wira siiso, ti enamuna yuulupale ennikhaliherya okhalana wataana wooloka ni Yehova. Masi, ororomela wira Yehova onimoovahani khula etthu eniphavela anyu pooti okhala vooxankiha. Nthowa xeeni? Nthowa noopacerya, Yehova pooti ohinikhaliheryaka okathi ene yoole oniphavela ahu.​—Esal. 13:2, 3; 74:10; 89:47; 90:13; aHéb. 1:2.

7. Xeeni Yehova ohinaakuvela awe onaakhula khula okathi oninvekela ahu etthu?

⁷ Xeeni Yehova ohinaakuvela awe onaakhula khula okathi oninvekela ahu etthu? Muupuwele wira owo onnilikanyiha wataana wahu ni yena ntoko tiithi ni mwanawe. (Esal. 103:13) Anamwane annisuwela wira khanirowa ovahiwa khula etthu enaavekela aya anamuyari naananoru. Itthu sikina siniveka aya anamwane pooti okhala etthu yowaakuva oliyaleya. Itthu sikina pooti otthuneyaka waawehererya wunnuwa vanireerela aya ovahiwa etthu eyo. Okathi mukina etthu enivekela awe mwaana pooti okhala etthu ehinirowa omukumiherya mureerelo mwaneene owo wala atthu akina anikhalana awe. Ohiya-vo omakelaka onvaha mwaana khula etthu eniphavela awe onrowa oturuka makhalelo, nto mwaana owo okhaleke pwiya ni anamuyari awe akhaleke arummwa awe. Vamosa-ru, Yehova mooreera murima pooti weemererya ovira okathi ohinatthi waakhula mavekelo ahu. Yoothanla eyo enilipa ni Yehova okhala wira owo tori Mpattuxa ahu a ankhili, Pwiya ahu oophenta ni Tiithi ahu a wiirimu. Nto vakhala wira aarowa onivahaka khula etthu eninvekela ahu, eyo yaamuhonona wataana wahu ni yena.​—Mulikanyihe ni Yesaya 29:16; 45:9.

8. Exeeni Yehova enileiherya awe voohimya sa oxanka wahu?

⁸ Etthu ekina eniiriha ti yoowi Yehova onnisuwela mixankiho sahu. (Esal. 103:15) Ti maana aya, owo khoniphavela wira niwananeke mixankiho mekhihu, nto onninikhaliherya ntoko tiithi ahu oophenta. Tthiri okathi mukina hiyo ninnoona wira khanniwerya-tho ovikaniha mekhihu. Masi Yehova onninroromeliha wira khonirowa weemererya arumeyi awe saakhumelelaka mixankiho sihiniwerya aya oxintta. Tthiri owo ‘onimwavaha ikuru siniweryana aya ovilela’. (Mmusome 1 aKorinto 10:13.) Tivonto, hiyo nookhalana mathowa manceene a ororomela wira ele Yehova eneemererya awe onikhumelela ti yookhalela.

9. Nipakeke exeeni okathi ohinikhaliheriwa ahu naananoru nuumala opaka nivekelo?

⁹ Okathi ohinikhaliheriwa ahu naananoru nuumala opaka nivekelo, nivikanihe onwehererya Ole onisuwela okathi ni etthu yoopaka wira onikhaliherye. Muupuweleke wira hata Yehova onnipixa murima, okhala wira owo onniphavelexa orwa onikhaliherya. “Masi Apwiya annowehereryani wira yoleveleleni, awo animwemela wira yomoreleni ikharari. Tthiri Apwiya [Yehova] ti Muluku òmoriwa ikharari, òreriwa t’ale anetta emuroromelaka Muluku”.​—Yes. 30:18.

“MWANO MWA KHARAMU”

10-12. (a) Moota xeeni vanikhala aya vooxankiha vanceenexa vakhala wira Kristau onnimukhapelela mmusi orina eretta ehinivoniwa? (b) Moota xeeni omuroromela Yehova okathi wa mixankiho onilipiha aya wataana wa mutthu ni yena? Nvahe ntakiheryo.

¹⁰ Okathi onookhumelelaayani mixankiho suulupale, nyuwo pooti woonaka ntoko Paulo, yoowo onihimya wira kaari “mwano mwa kharamu”. Ola okathi yoole omuroromela Yehova oryaaya woovila, masi wootthuneyexa. Mwa ntakiheryo, nkahaya muupuwelele okathi yoole onimukhapelela anyu mmusi orina eretta ehinivoniwa. Woonasa wene nyuwo munnivekela wira nvahiwe ankhili ni ikuru.b Nto nuumala opaka sotheene siniwerya anyu, khamuniphwanya murettele mwaha wa osuwela wira maitho a Yehova ari ni nyuwo ni wira owo onimoovahana khula etthu wira nvilele moororomeleya?​—Esal. 32:8.

¹¹ Okathi mukina annikhumelela makhalelo oxankiha. Nyuwo pooti oleeliwa itthu soovirikana ni mameedico. Wala amusi yaale nyuwo mwaaroromela anyu wira yaarowa wookhaliheryani pooti otepiheryaka muxankiho anyu okhala woovila. Munvekeleke ikuru Yehova. Mutepeke omwaattamela. (Mmusome 1 Samuweli 30:3, 6.) Okathi onrowa awe wookhaliheryani, wataana wanyu onrowa otepa olipa.

¹² Lindac oowerya woona wira masu ala ta ekeekhai nuumala oviriha iyaakha sinceene aakhapelelaka anamuyari awe oowereyasiwa mpakha okhwa waya. Owo onihimya so: “Okathi waarina ahu muxankiho ole, aiyaka, murokoraka ni miyo, khinaasuwela etthu yoowiira. Okathi mukina naaniyeleela nlipelelo nahu. Masi olelo-va, naawehaka ottuli, ninnoona wira Yehova aari ni hiyo. Owo aaninlipiha ni aaninivaha khula etthu naaphavela ahu, hata okathi yoole noona ahu wira khinaawerya-tho ovikaniha”.

13. Moota xeeni omuroromela Yehova omukhalihenrye aya murokora mmosa aarina mixankiho suulupale?

¹³ Omuroromela Yehova moomalela onoonikhaliherya okathi onikhumelela aya ihasara. Okathi aiyawe Rhonda, yaawo ahikhanle Namoona, yaalokiherya aya idukumento wira amwalane, murokorawe aahiphwanyaniwa oretta wa lupus, eretta yoowereya ni yoowiiva. Nuuvira myeeri vakhaani amwaarawe murokorawe ole yaahikhwa. Okathi Rhonda oonaawe wira aahipacerya ovikana muxankiho ole, owo aahikela muteko wa opioneero wookilaatheya. Voohipisa amamawe yaahikhwa. Exeeni yaamukhalihenrye Rhonda oxintta mixankiho iyo? Owo onitthokiherya so: “Miyo kaanimuleela Yehova khula etthu pooti okhala yaamukhaani khula nihiku. Wira siiso waahikiiriha omoonaka Yehova okhala a ekeekhai. Kaahiixutta omuroromela yena, ohiya wiiroromela mmansaka wala atthu akina. Owo aahikivaha nikhaliheryo na ekeekhai, ni aahikivaha khula etthu yaakithowa. Eyo yookooniherya oreera waya weetta ni Yehova khula nihiku”.

14. Nroromelo xeeni nintthuneya awe okhalana Kristau orina mmusi okumihiwe mmulokoni?

¹⁴ Muthokorerye-tho makhalelo ala. Muupuwele vaavo mmusi anyu onikumihiwa awe mmulokoni. Okathi onimusoma anyu Biibiliya, munniphwanya enamuna yooreerela ya waakhapelela atthu akumihiwe mmulokoni. (1 aKor. 5:11; 2 Yoh. 10) Masi, wiiwelela malakiheryo voohimya sa atthu ookumihiwa okathi mukina vanikhala voovila, hata vanikhala ntoko khivaniweryaneya.d Niireke nyuwo munoororomela wira Tiithi anyu a wiirimu onimoovahani ikuru sinitthuneya wira mwiiwelele malakiheryo ari mBiibiliyani voohimya sa atthu ookumihiwa? Munnoona eyo okhala eparakha ya wooniherya wira munniphavela olipiha wataana wanyu ni Yehova?

15. Exeeni yaamwiirinhe Adamu ohiiwelela nlamulo na Yehova wEedeni?

¹⁵ Okathi onithokorerya anyu mwaha ola, mmuupuwele mulopwana oopacerya opattuxiwa, Adamu. Niireke owo aanikupali wira anwerya omutthekela Yehova nto ovikaniheke okhala mukumi? Nnaari, okhala wira Biibiliya onnihimya wira Adamu, ‘khotothiwe’. (1 Tim. 2:14) Nto xeeni ohalaka ohimwiiwelela Muluku? Adamu okhuura wawe muhokorokho waavahiwe awe ni Eva, woonasa wene waari mwaha woosiveliwa ni mwaarawe. Owo aahinwiriyana mwaarawe ohiya oomwiiwelela Muluku awe, Yehova.​—Maph. 3:6, 17.

16. Ti pani onireerela ahu omphenta vanceenexa, ni nthowa xeeni?

¹⁶ Niireke eyo enniixuttiha wira nihaaphenteke amusi ahu? Nnaari! Masi hiyo nihaana omphenta vanceenexa Yehova waahiya amusi ahu. (Mmusome Matheyo 22:37, 38.) Eyo eniireliwa mureerelo wa amusi awo, akhale ale animurumeela Yehova wala nnaari. Nto munnuuheryeke omphenta ni omuroromela wanyu Yehova. Ni vakhala wira munnixankiheya mwaha wa mmusi okumihiwe mmulokoni, mmuleele Yehova muxankiho owo.e (aRom. 12:12; aFil. 4:6, 7) Murumeele okathi owo wooxankiha wira mulipihe wataana wanyu ni Yehova ni mmooneke okhala a ekeekhai. Eyo enimookhaliheryani owehererya nikhaliheryo na Yehova wira mmusi anyu otthikele mmulokoni.

OKATHI ONIWEHERERYA AHU

17. Okathi onikhalela ahu nthiti muteko woolaleya Omwene, nnooniherya sai wira ninnimuroromela Yehova?

¹⁷ Nthowa xeeni niiriinhe Paulo woopoliwa “mwano mwa kharamu”? Owo onihimya so: ‘Siso, kahiwerya olaleya vomalela Ehapari Yorera, amalapo othene àhìwa”. (2 Tim. 4:17) Vakhala wira nnoomutakiha Paulo, nikhalelaka nthiti muteko woolaleerya, nto ninnimuroromela Yehova wira ononivaha “sikina sothene”. (Math. 6:33) Hiyo nri anamalaleerya a Omwene, noovahiwa “olaleya ehapari awe”, ni Yehova oonivaha eparakha ya ovara “vamosá muteko” woolaleerya. (1 aTes. 2:4; 1 aKor. 3:9) Nakhalela nthiti muteko woolaleerya nipakaka sotheene siniwerya ahu mmutekoni wa Muluku, nnimoona waakuva ovira okathi onaalitta ahu woopoliwa.

18. Mwa inamuna xeeni nikhanle ahu oomuroromela Yehova ni olipiha wataana wahu ni yena?

¹⁸ Vano nirumeele okathi orina ahu wira nilipihe wataana wahu ni Yehova. Vakhala wira yookhala etthu ennixankiha, nirumeele etthu eyo wira nimwaattamele Yehova. Tthiri, nasoma oratteene Nuulumo na Muluku, olompa moohihiyererya ni okhalela nthiti miteko sa Muluku, nto nroromeleke wira owo onrowa oniphwanyiha khula etthu ennithowa wira nixintte mixankiho sirina ahu ni iye sikhanle ookhumelela muhoolo.

[Inoota]