Musyakeke Muupuwelo Ohinvarihana ni Osuwela wa Muluku!

1. Nlopolo xeeni Paulo aavanhe awe maKristau oowoottihiwa?

“MUHITTHAREKÉ”. Awo yaari masu murummwa Paulo aaloponle awe maKristau a eseekulu yoopacerya. Muhitthareke exeeni? “Muhitthareké mwetelo w’atthu a vathí”. (aRom. 12:2) MaKristau yiiwale moolumo ale, yaahiivahererya wa Yehova ni yaahoottihiwa ni munepa wootteela. Nto xeeni Paulo ohalaka waalopola?​—aRom. 1:7.

2-3. (a) Satana oneererya sai onihiiha omurumeela Yehova? (b) Ninrowa owerya sai okumiha miyuupuwelo sahu sinkhala ntoko “solipexa”?

² Paulo ahikhalana mathowa ooloka wira aalopole maKristau ale. Woonasa wene, maKristau makina yaahihapuxiwa ni muupuwelo ni soowiixuttiha sa olumwenku ola wa Satana. (aÉf. 4:17-19) Eyo pooti omwiiraneela khula mmosa a hiyo. Satana, muluku a vathi-va onnipaka itthu sotheene wira oniirihe ohiya omurumeela Yehova. Wira opake eyo, Satana onnirumeela miraakho soovirikana. Mwa ntakiheryo, akhala wira Satana onnoona wira nimphavela okhala atthu oovuwa aahiiso oothaaciri, owo pooti orumeela yoophavela ahu eyo wira onihiihe omurumeela Yehova. Nave Satana pooti orumeela itthu ninsuwela ahu, soolema ni osoma wahu wira oniirihe wuupuwelaka ntoko onuupuwela awe.

³ Miyuupuwelo sikina pooti ovila okumiha mmuruni mwahu. Masi hata miyuupuwelo iyo sikhalaka ntoko “solipexa”, vanniweryaneya okumiha. Moota xeeni? (2 aKor. 10:4) Paulo onaakhula so: “Kinnipwetexa osuwela w’atthu ni wisona wothene atthu aniwananaya osuwela wa Muluku: kinnatthukwa ankhili othene àtthu, wira emwiweleleke Kristu”. (2 aKor. 10:4, 5) Tthiri nikhaliheriwaka ni Yehova, nnoowerya okasoopa oratteene muupuwelo ahu. Nave Nuulumo na Muluku Biibiliya, murette muulupale onrowa onikhaliherya omaliha muupuwelo woohiloka onikumiheriwa ni olumwenku wa Satana.

“MÙLULE OSUWELA WANYU”

4. Marukunuxo xeeni naapanke ahu wira nimurumeeleke Yehova?

⁴ Nkahaya muupuwele okathi mwiixuntte anyu ekeekhai. Nyuwo mwaahipaka marukunuxo wira mbatiziwe. Anamunceene a hiyo, marukunuxo awo yaahela muhina ohiya ovara itthu soohiloka simmunanara Yehova. (1 aKor. 6:9-11) Tthiri ninnimuxukhurela Yehova mwaha woonikhaliherya ohiya ovara itthu iyo soohiloka!

5. Moovarihana ni aRoma 12:2, itthu xeeni piili ninreerela ahu opaka?

⁵ Masi nihuupuweleke wira khanimpaka-tho marukunuxo. Nnaamwi nihiyale ene opaka itampi suulupale seiyo naavara ahu nihinatthi obatiziwa, nihaana wiimananiha wira nihitthikele opaka itampi iyo. Exeeni enrowa onikhaliherya opaka eyo? Paulo onaakhula so: “Muhitthareké mwettelo w’atthu a vathí, masi murukunuxe mukhalelo anyu, mùlule osuwela wanyu”. (aRom. 12:2) Moovarihana ni yoolepa ela, nihaana opaka itthu piili. Yoopacerya, nihaana ohiya “mwettelo w’atthu a vathí”, eyo piiyo, oheemererya ohapuxiwa ni atthu a mulaponi. Ya nenli, nihaana ‘orukunuxa’ muupuwelo ahu.

6. Moolumo a Yesu ari Matheyo 12:43-45, anniixuttiha exeeni?

⁶ Marukunuxo Paulo onilavula awe annivikana orukunuxa moonelo ahu. Marukunuxo awo anihela muhina khula mpantta wa omutthu ahu. (Nwehe ekaaxa eni: “Marukunuxo wala Othatuwa?”) Orukunuxa muupuwelo ahu onitaphulela oturuka moonelo ni soophavela sahu. Tivonto otheene ahu nihaana wiikoha so: ‘Kiireke kinipaka marukunuxo wira kikhale muKristau oloka wala kinimoothererya paahi?’ Ti vooloka woona marukunuxo awo. Eliivuru ya Matheyo 12:43-45, Yesu onnihimya etthu nikhanle ahu oopaka. (Mmusome.) Moolumo ala a Yesu anniniixuttiha ekeekhai ela yuulupale: Khivaniphiyerya paahi ohiya muupuwelo woohiloka, masi nihaana wiimananiha okhalana muupuwelo wa Muluku.

“MUHANA WIKHALIHA ATTHU A NANANO MMIRUKUNI MWANYU NI MUROHONI MWANYU”

7. Marukunuxo xeeni a omutthu ahu ninreerela ahu opaka?

⁷ Niireke vanniweryaneya orukunuxa muupuwelo ni omutthu ahu? Aayo. Biibiliya onihimya so: “Muhana wikhaliha atthu a nanano mmirukuni mwanyu ni murohoni mwanyu, n’unwara mutthu musyá, opattuxiwe alikanyihiwaka ni Muluku, okhalihiwe naxariya, orerihiwe murima n’ikekhai”. (aÉf. 4:23, 24) Tthiri vanniweryaneya orukunuxa omutthu ahu, masi khivanikhweya. Nihaana wiimananiha ohiya paahi osyaka soophavela soohiloka aahiiso ohiya opaka itthu sihimmusivela Yehova. Wira nipake eyo, nihaana orukunuxa ‘miruku sahu’ wala muupuwelo ahu. Eyo enihela muhina oturuka soophavela sahu, mweettelo ahu ni etthu enniiriha opaka etthu eyo. Wira nipake marukunuxo awo maalupale, nihaana wiimananiha vanceene.

8-9. Yowiiraneya ya munna mmosa, enooniherya sai otthuneya waya oturuka omutthu ahu?

⁸ Nkawehani ntakiheryo na munna mmosa. Ohinatthi wiixutta ekeekhai, owo aari oowali ni aari namuhapaliwa. Okathi aapacenrye awe omusoma Biibiliya, aahipaka marukunuxo mpakha ophwanelela obatiziwa. Marukunuxo awo yaahaavaha onamoona atthu a muttetthe aakhala awe. Masi ohiyu omosa, ohivinre okathi munceene nuumala obatiziwa, munna ole aaheehereriwa vanceene. Ohiyu ole namuhapaliwa mmosa aaphavela ommana. Wanipacerya, munna ole aahiwerya wiikasoopa. Masi okathi mulopwana ole aapacenrye awe oveeha nsina na Yehova, munna ole aahinanariwa vanceene mpakha ohiwerya wiikasoopa. Nto munna ole aahipacerya ommana namuhapaliwa ole. Munniwerya woona etthu yaamwiirinhe munna ole opaka eyo? Omusoma Biibiliya waahimukhaliherya munna ole okasoopa owali awe. Masi nlelo ahaana orukunuxa muupuwelo awe, eyo piiyo, aahaana orukunuxa omutthu awe.

⁹ Hata vaari siiso, munna ole khaakhulumunwe. (Mir. 24:16) Okhaliheriwaka ni axitokweene, aahivikaniha okela vahoolo momunepani. Nto muhoolo mwaya khukhala mutokweene. Vano ohiyu omosa, waattamela Empa ya Omwene, munna ole aahikumana yooweeha emosaru aakumanne awe iyaakha vakhaani saavinre. Namuhapaliwa mmosa aphavela ommana mutokweene mukina. Munna ole aapanke exeeni? Moowiiyeviha ni moomaaleleya, aahimmaaliha namuhapaliwa ole ni aahimukhaliherya orowa owannyawe. Vano exeeni yaamukhalihenrye? Munna ole, aahirukunuxa muupuwelo awe, niire so, omutthu awe. Vano munna ole aari mutthu oowiiyeviha ni a murettele. Tthiri eyo yaahinvuwiha Yehova!

10. Nihaana opaka exeeni wira nituruke omutthu ahu?

¹⁰ Khivanikhweya opaka marukunuxo ntoko awo. Hiyo nihaana ‘ophavela n’ikuru sahu sothene’ opaka marukunuxo awo hata siviraka iyaakha sinceene. (2 Ped. 1:5) Marukunuxo awo, khanrowa okhumelela mwaha woowi “niixuntte ekeekhai” khalai. Ohiya-vo, nihaana ovikaniha wiimananiha wira nituruke omutthu ahu. Exeeni enrowa onikhaliherya? Nrowe nthokorerye itthu vakhaani.

ITTHU SINROWA ONIKHALIHERYA OTURUKA MUUPUWELO AHU

11. Nivekelo ninrowa onikhaliherya sai oturuka muupuwelo ahu?

¹¹ Etthu yoopacerya nikhanle ahu oopaka ori ovekela. Nihaana ovekela ntoko nasalimo aavekenle awe oriki: “Muluku! Kivaheni murima woloka: mukiruhele-tho eroho y’ekeekhai”. (Esal. 51:12) Osuwela wira muupuwelo ahu ohaana wuuluuliwa onoonikhaliherya onvekela nikhaliheryo Yehova. Niireke tthiri Yehova onoonikhaliherya opaka marukunuxo? Aayo, onoonikhaliherya! Mwa ntakiheryo, okathi wa profeta Ezekiyeli, aYuda yaari oopisa wiiwa. Masi Yehova aahaaleiherya wira: “Miyo kinimwavaha murima musyá: kinohela mmurimani mwaya eroho esyá. . . . Kinimwavaha murima wa mutthu”. (Ezek. 11:19) Yehova aaniphavela waakhaliherya aIsarayeli orukunuxa murima aya. Nave owo onniphavela onikhaliherya.

12-13. (a) Moovarihana ni Esalimo 119:59, etthu xeeni ninreerela ahu wuupuwelela? (b) Makoho xeeni ninreerela ahu wiikoha?

¹² Etthu ya nenli nikhanle ahu oopaka, ori wuupuwelela. Okathi munimusoma anyu Biibiliya khula nihiku, muhaana waavya okathi wira muupuwelele moota ele musomme anyu enrowa aya wookhaliheryani oturuka moonelo ni muupuwelo anyu. (Musome Esalimo 119:59; aHéb. 4:12; Yak. 1:25) Nwehe akhala wira murima anyu ni muupuwelo anyu khohapuxiwe ni muupuwelo wa mulaponi. Nave mweemereryeke soovonya sanyu ni mwiimananiheke opaka marukunuxo.

¹³ Mwa ntakiheryo, nyuwo pooti wiikoha so: ‘Kiireke okisivela owaapa atthu akina aahiiso ka nanrima?’ (1 Ped. 2:1) ‘Kiireke kinoona wira kookhalana efaita waavikana atthu akina mwaha wa elapo kiyariwe aka, osoma waka aahiiso musurukhu kirina aka?’ (Mir. 16:5) ‘Kiireke kinnaavaha efaita atthu ahirina itthu kirina aka aahiiso a elapo ekina?’ (Yak. 2:2-4) ‘Kiireke okisivela itthu sa olumwenku ola wa Satana?’(1 Yoh. 2:15-17) ‘Kiireke okisivela oweha ifilme sa ikhotto wala sa orupihana woohiloka?’ (Esal. 97:10; 101:3; Am. 5:15) Vaavo munrowa anyu waakhulaka makoho ala munooweha etthu mukhanle anyu oolokiherya. Ekeekhai wira opaka marukunuxo awo pooti okhalaka ntoko wira ‘nimpwanyula’ itthu soolipexa. Nto opaka eyo ennimuhakalaliha Tiithi ihu a wiirimu.​—Esal. 19:15.

14. Xeeni vanireerela aya waathanla apatthani ooloka?

¹⁴ Etthu ya neeraru mukhanle anyu oopaka ori waathanla apatthani ooloka. Okathi mukina pooti woonaka wira apatthani ahu anninihapuxa. (Mir. 13:20) Tthiri oxikola ni omutekoni, ninkhala ni atthu ahinnikhaliherya okhalana muupuwelo oneemereriwa ni Muluku. Masi hata vari siiso, nnoowerya waaphwanya apatthani ooloka mmulokoni. Awo anoonikhaliherya “ophenta n’uvara miteko sorera”.​—aHéb. 10:24, 25.

‘MWILIPIHERYEKE MOWAMININI’

15-16. Satana oneererya sai ohonona muupuwelo ahu?

¹⁵ Muhikhala-khale muliyalaka wira Satana oolakela ohonona muupuwelo ahu. Owo onnirumeela khula enamuna ya sowiixuttiha sowootha wira oniirihe ohoverya ekeekhai eri mBiibiliyani.

¹⁶ Satana onnivikaniha onipakela nikoho aamukonhe awe Eva ejardim ya wEdeni oriki: “Ekekhai wira Muluku . . . ?” (Maph. 3:1) Olumwenku ola onilamuleliwa ni Satana, ninniiwa makoho anniiriha waanyiherya itthu ninkupali ahu. Mwa ntakiheryo atthu pooti onikoha so: ‘Ekeekhai wira Muluku onnikhoottiha othelana alopwanaru aahiiso athiyanaru? Ekeekhai wira Muluku onnikhoottiha ifesta sa Natali ni otthapela nihiku mutthu oyariwe awe? Ekeekhai wira Muluku onnikhoottiha oheleliwa ephome? Ekeekhai wira Muluku oophenta onnikhoottiha waataana ni amusi ni apatthani ahu akumihiwe mmulokoni?’

17. Nihaana opaka exeeni akhala wira ninnaanyiherya sookupali sahu? Moovarihana ni aKolosi 2:6, 7, exeeni enrowa okhumelela?

¹⁷ Otheene ahu nihaana ovarexexa sookupali sahu. Akhala wira ninnivikaniha waanyiherya sookupali sahu, eyo pooti okhala etthu yootakhala. Maana nuuvira okathi waanyiherya wahu pooti ohonona muupuwelo ahu ni waamini wahu. Nto nihaana opaka exeeni? Biibiliya onihimya wira nihaana wuuluula osuwela wahu. Napaka eyo nnoowerya ‘othanla etthu ekhanle yorera, enimusivela Muluku ni ya xariya’. (aRom. 12:2) Omusoma Biibiliya khula nihiku onoonikhaliherya ovarexexa ikeekhai niixuntte ahu. Nave nnimoona wira malamulo a Yehova tooloka. Ntoko mwiri orina mitathaari sowiixerya, hiyo nnoowerya ‘wilipiherya mowaminini’.​—Mmusome aKolosi 2:6, 7.

18. Exeeni enrowa onikhaliherya ohihapuxiwa ni muupuwelo wa olumwenku wa Satana?

¹⁸ Otheene ahu nihaana olipiha waamini wahu. Tivonto, nihaana ovikaniha wuuluula muupuwelo ni osuwela wahu. Wira nipake eyo, nihaana onvekela Yehova wira onikhaliherye onivahaka munepa awe wootteela. Muupuweleleke ele munsoma anyu wira musuwele muupuwelo ni soophavela sanyu. Mwaathanleke apatthani ooloka ni mweetteke ni atthu anrowa wookhaliheryani orukunuxa muupuwelo anyu. Akhala wira munoopaka itthu iyo sotheene, khamunrowa ohapuxiwa ni muupuwelo woohiloka wa olumwenku ola wa Satana ni munoowerya opwetexa “wisona wothene atthu aniwananaya osuwela wa Muluku”.​—2 aKor. 10:5.