“Mukhaleke a Ikharari”
1. Nikhaliheryo xeeni atthu anitthuneya aya olelo-va?
1 Ninkhala okathi atthu anitepa aya otthuneya okhaliheriwa moomoreliwa ikharari. Mwaha wa mikhalelo sintepa otakhala mulaponi, atthu anikhala ooriipiwa murima, ni kharina nlipelelo na okhaliheriwa. Atthu anceene ahaana okhaliheriwa, nto hiyo maKristau nihaana waakhaliherya atthu awo. (Math. 22:39; aGal. 6:10) Nto ninrowa owerya sai waathokorerya atthu awo?
2. Enamuna xeeni yooreerexa enooniherya owoonela wahu atthu othunku?
2 Olaleerya Onnooniherya Wira Muluku Toomoriwa Ikharari: Muluku paahi, toniwerya owoonela othunku atthu mahiku otheene. (2 aKor. 1:3, 4) Yehova onnintumererya wira nimutakiheke nikhalanaka “ikharari”. Nave, oonivaha muteko wowaalaleerya anamwaattamanani ahu ihapari sooreera sa Omwene. (1 Ped. 3:8) Olaleya ihapari sooreera mooluttuweliwa, ti enamuna emosa yooreerexa ya “wakurunuxa murima alipa-òhaxiwa”, maana Omwene wa Muluku paahi tonrowa omaliha mixankiho sa apinaatamu. (Yes. 61:1) Moohipisa, mwaha wa owoonela wawe othunku arumeyi awe, onooruuha elapo esya, ni omaliha otakhala wotheene mulaponi.—2 Ped. 3:13.
3. Ninrowa waathokorerya sai atthu nimutakihaka Yesu?
3 Naathokoreryeke Atthu Nimutakihaka Yesu: Hata okathi yoole aalaleerya awe atthu anceene, Yesu aaniimananiha omuthokorerya khuta mutthu. Owo aanisuwela wira khuta mutthu ohaana wataana ni Yehova. Atthu awo yaalikana ni ipwittipwitthi sihirina makampusi. Nto Yesu aahaamorela ikharari, nto khupacerya owiixuttiha moopixa murima. (Mar. 6:34) Omutakiha Yesu, onooniiriha omoonela othunku khuta mutthu. Nto, moota sinilavula ahu vamosa ni makhalelo ahu otheene yooniheryeke wira nimmutakiha Yesu. Tivonto nihaana ovaha efaita muteko woolaleerya, ni olokiherya saana moolumo ahu wira nimuthokorerye khuta mutthu.—1 aKor. 9:19-23.
4. Xeeni vanitthuneya ahu ovikaniha waamorela ikharari atthu?
4 Muttitthi muulupale wa atthu a maloko otheene, onnakhulela ihapari sooreera vamosa ni ophenta onooniheriwa aya. Nto vaavo vanivikaniha ahu waamorela ikharari atthu, nnomuttittimiha ni omuhakalaliha Muluku ahu Yehova yoowo onaamorela ikharari atthu.—aKol. 3:12.