Mwiikasoopeke Okathi Woolaleerya
1. Xeeni vanitthuneya ahu wiikasopaka naalaleeryaka?
1 “Ntoko ipwittipwitthi variyari va mìji”, hiyo ninnilaleerya “eriyari y’atthu òtakhala murima ni òhononeya”. (Math. 10:16; aFil. 2:15) Olelo-va, itthu siniiraneya ti sooripiha murima, nto ikhotto, otakhala wa atthu ni ovariwa ni atthu ootakhala sinnooniherya wira otakhala ‘onovira otepaka’. (2 Tim. 3:13) Malakiheryo xeeni a Biibiliya anrowa onikhaliherya ‘wikasopa’ okathi woolaleerya?—Math. 10:16.
2. Mikhalelo xeeni saarowa oniiriha mwa miruku okhuma muttetthe ninlaleerya ahu khurowa opuro mukina?
2 Mukhaleke a Miruku: Eliivuru ya Miruku 22:3 ennintumererya ‘ohuluwa’ yowoopiha mwa miruku. Nto mwiikasoopeke! Mittetthe nilimalenle ahu okhala soomaaleleya, okathi mukina pooti orukunuwa mowaakuveya. Nto, pooti waaweha mapoliisia axankihen’ye ene wala woona muttitthi wa atthu mustaraatani. Ikwaha sikina mwaneene etthoko pooti woolopolani. Ohiya okhala opuro yoole wira moone eniiraneya, ti vamiruku okhuma mowaakuveya ni orowa opuro mukina.—Mir. 17:14; Yoh. 8:59; 1 aTes. 4:11.
3. Moota xeeni Musuweli 4:9 onivareleya awe muteko naalaleeryaka?
3 Mulaleeryeke ni Anna Akina: Eliivuru ya Musuweli 4:9 eni: “Halali okhala atthu anli ovikana okhala mmosa pahi”. Pooti mulimalenle ene olaleerya mekhinyu moomaaleleya, niireke vano ti vooreerela opaka eyo? Mapuro makina ti vooreerela. Masi mittetthe sikina, khivanireerela murokora wala mmiravo olaleerya mekhawe khuta empa, vanceenexa nsuwa nikenle ene. Sowiiraneya sinooniherya wira olaleerya ni mpatthani ooweha-weha ti wootthuneya. (Mir. 4:10, 12) Nwehaweheke vaavo akhwiinyu anilaleerya aya. Mwaahimeeryeke akina mwaaphavelaka okhuma muttetthe munilaleerya anyu.
4. Nipakeke exeeni wira naakhaliherye otheene mmulokoni?
4 Okhala wira axitokweene aavahiwa muritti ‘wonikhapelela’, ahaana ovaha malakiheryo anivareleya muteko moovarihana ni muttetthe owo. (aHéb. 13:17) Akhala wira ninniiyeveiha ni owiiwelela axitokweene nnimwaakhela mareeliho a Yehova. (Mik. 6:8; 1 aKor. 10:12) Nto otheene ahu nrowe nilaleerye mooreerela mmuttettheni mwahu, niikasoopaka okathi wotheene.