Mukhapelele Yowuupuxerya ya Murima Anyu

1. Tuuvi ori muru wa nihiku na asembeleya a vameekha awe mwaka wa muteko 2013, nto orina yoolakela xeeni?

¹ Khuta nihiku ninniweha itthu sikhanle oowerya onanariha yowuupuxerya ahu ya murima. Tivonto, eprokrama ya nihiku na asembeleya a vameekha awe, mwakha wa muteko 2013 yoowo onipacerya 1 a Setembro 2012, orina awe muru oni: “Mukhapelele Yowuupuxerya ya Murima Anyu”. (1 Tim. 1:19) Eprokrama ela etthokihiwe wira enikhaliherye ovaha ephoole yuulupale moota onirumeela ahu yowuupuxerya ya murima, yeeyo evahiwa ahu ni Mpattuxa.

2. Makoho xeeni ootthuneya anrowa wakhuliwa okathi wa asembeleya a vamekha awe?

² Nwehe Iponto Iya: Eprokrama eyo enrowa waakhula makoho 7 ootthuneya, voohimya sa yowuupuxerya ya murima:

• Etthu xeeni yowoopiha eniwerya ohonona yowuupuxerya ya murima?

• Ninrowa wiixuttiha sai yowuupuxerya ya murima ahu?

• Vanweryaneya sai ohikhalana mulattu wa ephome ya atthu otheene?

• Niireke yowuupuxerya ya murima anyu eneettihiwa tthiri ni malamulo a Biibiliya?

• Nipake exeeni wira nihaakhulumule akina mmyaha sa yowuupuxerya ya murima ya khuta mutthu?

• Amiravo, munrowa opaka exeeni okathi wookhanyereriwa opaka itthu soohiloka?

• Mareeliho xeeni anikhalana aya ale aniphavela otthara yowuupuxerya ya murima eneettihiwa ni munepa wa Muluku?

3. Ninrowa ottottela sai mureerelo eprokrama eyo?

³ Nikhaliheriwaka ni Yehova hiyo nnoophwanya ikuru wira Satana ohihonone yowuupuxerya ya murima ahu. Omurumeelaka Biibiliya ni nikhuuru nawe nootthokiheya, Tiithi ahu ophenta a wiirimu onnileela wira: “Ephiro yorera t’ila: mutthareke yela”. (Yes. 30:21) Eprokrama ela ti enamuna emosa mwa seiye Yehova onirumeela awe wira onilakiherye. Nto mwiimananihe wira murowe ni owiriyana eprokrama yotheene. Mwawiriyane saana, ni wuupuwela moota woovarela muteko malakiheryo awo. Okhaleke ti mwaha woolavula vapuwani vanyu. Ovarihela wahu muteko malakiheryo awo, ononlipiha wira nivikanihe ‘okhalana yowuupuxerya ya murima yooloka’, enirowa onikhaliherya osyaka mweettelo woowoka yoowo onihela muhina soohakalaliha sa erutthu sa olumwenku ola wa Satana.—1 Ped. 3:16.