“Mphaveleke Wiiwanana ni Atthu Otheene”
1. Yoolepa xeeni ya Biibiliya enirowa onikhaliherya namphwanya mwaneene etthoko onanariwe ene?
1 Arumeyi a Yehova anniphenta murettele. Nto muteko ahu woolaleerya onooniherya murettele. (Yes. 52:7) Ikwaha sikina, atthu anninanariwa mwaha woowaxukurya owannya aya. Exeeni enirowa onikhaliherya okhala a murettele okathi owo?—aRom. 12:18.
2. Xeeni okhala a miruku oryaaya wootthuneya?
2 Mukhale a Miruku: Vanaamwi akina ananariwaka mwaha woohiphavela ekeekhai, akina pooti onanariwa mwaha wa mathowa makina, ohiya mwaha wa olaleerya wahu. Waaniheryasa, niphiyale okathi woohireerela. Wala, mutthu owo pooti onanariwa mwaha wa mixankiho sawe. Nave, hata onanariwaka mwaha wa ihapari sooreera, nihaana wuupuwela wira waakhula wawe pooti wira onoowokiwa. (2 aKor. 4:4) Okhala a miruku onoonikhaliherya omaaleleya ni ohuupuwela wira onanariwe ni hiyo.—Mir. 19:11.
3. Ninrowa omuttittimiha sai mwaneene etthoko?
3 Mooniherye Nttittimiho: Anamunceene mmuttettheni, aakhalana sookupali saya aneettela aya. (2 aKor. 10:4) Nto, awo aakhalana ehakhi yoothanla oniiwa wala ohiniiwa. Hiyo khanniphavela oveeha sookupali saya, wala wiixinnuuha. Nto akhala wira onnivekela okhuma owannya awe, nihaana wiiwelela ni nttittimiho.
4. Enitaphulela exeeni olavula mooreerela?
4 Mulavuleke Mooreerela: Hata niveehiwaka, nihaana waakhulaka moomaaleleya ni mooreerela. (aKol. 4:6; 1 Ped. 2:23) Ohiya onyakulihana, nihaana ophavela wiiwanana ni mutthu owo. Vaaweryaneyaka, pooti omukoha ni nttittimiho xeeni ohiniphavela awe wiiwa. Ikwaha sikina, wira nisyake onviruwiha, ti vooloka ohivikaniha ovaanela.—Mir. 9:7; 17:14.
5. Mireerelo xeeni nimphwanya ahu vaavo ninkhala ahu a murettele okathi woolaleerya?
5 Nakhala atthu a murettele, eyo enoomwiiriha mwaneene etthoko wuupuwelela saana mukhalelo ahu, ni pooti owiriyana mukwaha mukina onrowa awe oxukuriwa ni munna mukina. (aRom. 12:20, 21) Hata olipiheryaka okhootta ekeekhai, nihiku nlo owo pooti okhala munnihu. (aGal. 1:13, 14) Nto pooti mutthu owo ohisiveliwaka ekeekhai, okhala a murettele ni omaaleleya, ononvuwiha Yehova ni oreeriha muteko ahu.—2 aKor. 6:3.