Munoowerya Okhala Pioneero Ookhaliherya?
1. Xeeni okathi wa Wuupuwelela Okhwa wa Yesu, oryaaya wooreerela wuncererya muteko ahu woolaleerya?
1 Okathi wa Wuupuwelela Okhwa wa Yesu, ti wooreerela wuncererya olaleerya wahu. Owo, okathi ninuupuwelela ahu ophenta wuulupalexa wa Yehova mwaha wonvaha Mwanawe ntoko yowoopola. (Yoh. 3:16) Eyo enniniiriha oxukhurela vanci, wuncererya ophavela wahu waaleela akina sa Yehova ni ele onipaka Awe wa apinaatamu. (Yes. 12:4, 5; Luka 6:45) Nave-tho, okathi owo ninniirela mpantta ekampaanya ya vameekhaaya ya waalattula ale nnasuwela ahu ni atthu akina mmuttettheni, wira arwe Yuupuwelele Okhwa wa Yesu. Nuumala vo, ninnimananiha wunnuuherya osiveliwa waya ekeekhai atthu awo. Niireke munimuncererya olaleerya wanyu mukhalaka pioneero ookhaliherya myeeri sa Marso, Abril, wala Maio?
2. Xeeni Marso oryaawe mweeri wa vameekhaawe wooreera okhala pioneero ookhaliherya?
2 Mweeri wa Marso ta Vameekhaawe: Marso onirowa okhala mweeri wooreera okhala pioneero ookhaliherya. Ale anirowa wiilepiha, pooti othanla okhala pioneero a iwoora 30 wala 50. Nave-tho, akhala wira mutokweene a esirkwitu onirowa oxukurya muloko anyu mweeri yoowo, mapioneero ookhaliherya ahaana owiriyana muthukumano wootheene onirowa okhala ni mapioneero ookilaatheya ni a vameekhaaya. Ekampaanya yookawa ifolyeeto sa olattula Wuupuwela Okhwa wa Yesu, yeeyo enirowa omala namanli, 26 a Marso, 2013, enrowa wuncereriwa mahiku aya ovirikana ni myaakha sivinre; nto enipacerya 1 a Marso. Nave-tho, Marso orina isumana 5 soomalela. Nto, ti vooreerela othokorerya saana wira moone akhala wira munoowerya opaka mweeri wa Marso okhala a vameekhaawe.
3. Ninrowa ompaka sai palano wira ninnuuherye muteko ahu woolaleerya?
3 Mumpake Palano Nenna-va: Ola, okathi wa oweha eprograma anyu wira moone etthu xeeni enireeela anyu olokiherya wira mukhale pioneero. Wiiraana wa emusi onirowa okhala wootthuneya; nto murumeeleke okathi wa Omulompa Muluku vatthokoni, wira nvaanele sa soolukama sa emusi anyu ni ompaka palano. (Mir. 15:22) Akhala wira khamuniwerya okhala pioneero ookhaliherya, muhikhulumuwe! Niireke mookhala ompaka palano wira muvirihe okathi munceene mahiku yaale anirowa anyu olaleerya? Mookhala oorowa olaleerya mahiku makina vasumanani?
4. Mireerelo xeeni ninrowa ahu ophwanya nancererya muteko ahu woolaleerya Marso, Abril, ni Maio?
4 Akhala wira nnimuncererya muteko ahu woolaeerya Marso, Abril, ni Maio, ninrowa otteeliwa murima vanci mwaha woomurumeela Yehova ni waakhaliherya akina. (Yoh. 4:34; Mit. 20:35) Moohaaniherya, wiimananiha wahu olaleerya onirowa omuhakalaliha Yehova.—Mir. 27:11.