Mwaatakiheke Maprofeta—Yona
1. Mikhalelo xeeni sooloka Yona aarina awe?
1 Exeeni enirwa mmuupuweloni mwanyu vaavo munimutthokelela anyu profeta Yona? Akina pooti omoonaka ntoko mutthu owoova wala ohoona othunku. Masi, owo aahooniherya saana wiiyeviha, olipa murima, ni munepa wowiivahererya. Ninrowa otakiha sai mikhalelo sooloka sa Yona?—Yak. 5:10
2. Ninrowa otakiha sai wiiyeviha wa Yona?
2 Wiiyeviha: Wanipacerya, Yona aahitthyawa orowaka muttetthe woovirikana ni ole aarummwale awe. Eyo khahiyo etthu yootikhina maana atthu a wAsiria yaanisuweliwa okhala ootakhala; nave muttetthe wa oNiinive wiitthaniwa “namwiva”. (Nah. 3:1-3) Masi, Yehova aahimulaka Yona, yoowo oonihenrye wiiyeviha orweela mwa weemya muteko aarummwale awe ekwaha ya nenli. (Mir. 24:32; Yona 3:1-3) Nnaamwi woopaceryani aakhoottale, owo aahipaka yootthuna ya Yehova. (Math. 21:28-31) Niireke nookhalana yoolakela emosaru ya olaleya ihapari sooreera, pooti nipwapweliwe ene wala muttetthe onilaleerya ahu oryeene wooxankiha?
3. Mikhalelo xeeni mmutekoni woolaleerya onitthuneya olipa murima ni wiileva?
3 Olipa Murima ni Wiileva: Okathi Yona aasuwenle awe wira yoothanla awe yoohiloka yaanoopopiha okumi wa ale yeettiha ekalawa, owo aahileva okumi awe wira okhwe. (Yona 1:3, 4, 12) Nave-tho, okathi aavara awe muteko arummwale awe, owo aaheetta epooma yotheene, waaniheryasa aavyaka opuro wooreerela wira olaleye mitthaka soophukela sa Yehova. Opaka eyo, khahiyo waari woova, masi wooniherya okhala profeta oolipa murima a Yehova. (Yona 3:3, 4) Nihimye exeeni sa hiyo olelo-va? Muluku tonnivaha olipa murima wira niweryeke olaleerya mohoova okathi ninlupatthiwa ahu. (Mit. 4:29, 31) Nave, onitthuneya wiileva wira nirumeele okathi ahu ni muhakhu ahu mmutekoni woolaleerya.—Mit. 20:24.
4. Xeeni vanitthuneya ahu wuupuwelelaka matakiheryo ooloka a maprofeta a Yehova?
4 Khula okathi munisoma anyu sowiiraneya sa maprofeta a Yehova, munoottottela mureerelo akhala wira nyuwo munimuupuwelela makhalelo anyu ntoko a profeta owo. Mwiikoheke so: ‘Etthu xeeni kaarowaka opaka? Kinrowa otakiha sai mikhalelo sawe sooloka mookumini mwaka?’ (aHéb. 6:11, 12) Myaha sa muhoolo sa Orummwa Ahu wa Omwene, sinirowa othokorerya sowiixuttiha sikina sa efaita nniixutta ahu sa maprofeta makina a Yehova.