Inamuna Isya sa Olaleerya Mapuro Otheene Ari Atthu

1. Ntakiheryo xeeni maKristau a eseekulu yoopacerya avahale aya?

¹ MaKristau a eseekulu yoopacerya khiyalaleerya paahi khula empa. Masi yaanilaleerya-tho mapuro otheene yaari atthu. (Mit. 20:20) Mwa ntakiheryo, yaanirowa-tho mpaani mwa Muluku, weiwo yaasuwela aya wira yaamwaaphwanya atthu anci. (Mit. 5:42) Murummwa Paulo oryeene wAthena, aanaalaleerya atthu yaaphwanya awe omerkaatu khula nihiku. (Mit. 17:17) Olelo-va, olaleerya khula empa onnivikaniha okhala enamuna yoopacerya ya muteko ahu. Masi, ninnilaleerya-tho mapuro siniweliwa ikaaro, aniiriwa nakoso, mparkeni, iphiro sowaatta atthu ni mapuro makina aniphwanyaneya atthu. Nnaamwi khuta namalaleerya otumereriwaka olaleerya mapuro otheene ari atthu, masi anamunceene anookhalana eparakha ya wiirela mpantta inamuna piili isya soohakalaliha sa olaleerya mapuro otheene ari atthu.

2. Enamuna xeeni ya olaleerya ya niinano epacenrye mweeri wa Novembro 2011?

² Olaleerya wa Vameekhaaya Mapuro Otheene Ari Atthu Ipooma Suulupale: Ntoko sinooniherya aya Anuário a 2013, ipaaxina 16 ni 17, enamuna emosa ya niinano ya olaleerya mapuro otheene ari atthu, yoopacerya epooma ya oNova York mweeri wa Novembro 2011. Meesa ni ikarinyu sooreera saarina iliivuru mmaattava oovirikana, saahipwehiwa mapuro oosuweliwa anivira atthu anceene. Khula nihiku atthu ikonto sene yaanivira mapuro awo, waahela muhina atthu anikhala inupa sinikhoottihiwa olaleerya ni yaawo anivila waaphwanya mmawannyeya. Atthu anceene yaahisiveliwa ni iliivuru sahu. Mwa ntakiheryo, mweeri mmosa ovinre niinano, saahikaiwa irevista 3.797 ni iliivuru 7.986. Anamunceene yaahivekela yoosoma ya Biibiliya. Okhala wira yoolukama ya enamuna eyo yoolaleerya waari opaceriha soosoma sa Biibiliya, khula enderesu yaavahereriwa ni atthu yaasiveliwa ekeekhai, yaaniroihiwa mowaakuveya muloko wooreerela wira akhaliheriwe atthu awo.

3. Mapuro xeeni enamuna ela ya olaleerya wa niinano, enrowa aya opacerya ovara muteko?

³ Okhala wira enamuna ela ya niinano ya olaleerya yookhumela saana, vano enirowa opacerya ovara muteko olumwenku wotheene ipooma suulupale. Efiliyaali ya khuta elapo tenirowa othanlaka ipooma sene. Ikwaha sinceene, olaleerya nno oniiraneya ipooma suulupale sinivira ikaaro wala mapuro siri ixikiritoorio sinci, aahiiso ipredio sinikhaliwa ni atthu anceene. Nto, efiliyaali enirowa olepela epaphelo miloko sinrowa wiirela mpantta enamuna eyo ya olaleerya ni enoovaha malakiheryo ootthuneya. Ikwaha sinci, anirumeeliwa mapioneero ookilaatheya ni a vameekhaaya, nnaamwi mapuro makina arumeeliwaka mapioneero ookhaliherya.

4. Onivariwa sai muteko woolaleerya mapuro otheene ari atthu ipooma suulupale?

⁴ Moota Woolaleerya: Ale aniirela mpantta olaleerya nno, ikwaha sinci animweemela paahi nto khiyaamulipelela mutthu wira orwe vameesa wala vakarinyuni. Okathi oniphiya awe, onnileeliwa wira pooti okuxa khula eliivuru enimusivela. Vano, mapioneero amurumeelaka Biibiliya annaakhula moohakalala makoho otheene mutthu owo orina awe. Akhala wira mutthu owo onnikuxa eliivuru, mapioneero khaniromola murehereryo wa ovaha musurukhu. Masi, owo aaphavelaka osuwela moota muteko ahu onikhaliheriwa aya, anna awo annimuleela wira musurukhu pooti ovahiwa erumeeliwaka enderesu elempwale muliivuruni-mmo. Vaaweryaneyaka, anna awo annimukoha so: “Munniphavela wira mutthu mukina ooxukuryeni vatthokoni vanyu?”, wala “Munnisuwela wira hiyo ninnivaha soosoma sa Biibiliya moohiliviha etthu?”

5. Moota xeeni olaleerya wa enamuna ela ya niinano omuhakalalinhe aya munna mmosa ni mwaarawe?

⁵ Olaleerya mwa enamuna ela onnihakalaliha vanci. Munna mmosa ni amwaarawe aalempe so: “Weemela vameesa ni khiyaaweha atthu ikonto sene khula nihiku arwaaka vameesa, woovara murima ahu voohimya sa muteko ola muulupale wira alaleeriwe atthu olumwenku wotheene. Waaweha atthu ala anceene ni wuupuwelela moota Yehova onaathokorerya awe atthu otheene, woolipiha murima ahu wira nivikaniheke opaceriha muteko woolaleerya mookumini mwahu. Nto, nnuupuwela wira Yehova onnitokosa mirima sa atthu anirwa vameesa, owaavyaka ale aniphwanelela. Tthiri, ninnoona otepexa onaattamela malaikha yaawo ninvarana ahu muteko hoothe”.

6. (a) Enamuna xeeni ekina ya olaleerya mapuro otheene ari atthu epacenrye otthokihiwa ni miloko sinceene? Nto enivirikana sai ni olaleerya wa vameekhaaya mapuro otheene ari atthu ipooma suulupale?(b) Anna a mmulokoni anrowa wiiwanana sai okathi anilaleerya aya mapuro otheene ari atthu?

⁶ Eprograma ya Olaleerya Mapuro Otheene Ari Atthu Mmuttettheni Mwahu: Moophavela wunnuuherya olaleerya wa vameekhaaya mapuro otheene ari atthu, enamuna ekina ya olaleerya yoopacerya otthokihiwa ni makhuuru manceene a axitokweene mmuttettheni mwaya. Anamalaleerya annirumeela meesa wala ekarinyu mapuro yaale anivira atthu anci mmuttettheni wa muloko aya. Enamuna ela ennivirikana ni olaleerya wa vameekhaaya mapuro otheene ari atthu ipooma suulupale. Maana enamuna ya olaleerya wa ipooma suulupale, efiliyaali tenithanla ipooma sene ni miloko sinrowa olaleerya mapuro awo.​—Nwehe ekaaxa eni: “Wiiwanana Saana Onnitthuneya”.

7. Axitokweene anitthokiha sai olaleerya mapuro otheene ari atthu, mittetthe seiye onireerela aya opaka eyo?

⁷ Axitokweene a mmulokoni ahaana oweha muttetthe wa muloko aya oniphwanyaneya atthu anceene ni oweha akhala wira vannireerela opaka eprograma ya olaleerya mapuro awo. Mapuro anireerela opweha meesa wala ekarinyu taala: Mapuro siniweliwa ikaaro, mphironi, shopping centers, mapuro anikhala asomi a universidade, mapuro aniweliwa eviyau, ni mapuro makina anithukumana atthu anceene khula mwaakha. Onnikhala mureerelo vaavo enipakiwa aya eprograma ya opweha meesa opuro omosaru, mahiku mamosaru, ni okathi omosaru. Nto vahooneya wira meesa animakela opwehiwa oshopping centers, annikhumela saana ohiya ale anipwehiwa opuro ori elooxa emosa yuulupale, weiwo atthu anceene anirowa aya othuma etthu aniphavela aya paahi. Mapuro makina, ntoko mphironi anivira atthu anceene, vanooreerela orumeela ekarinyu yaamukhaani erina iliivuru. Nto axitokweene pooti obaxari malakiheryo a vameekhaaya arumeelaka eWeb saite ahu wa moota woopweha irevista Owehaweha ni Despertai! ni eliivuru Biibiliya Oniixuttiha Exeeni. Malakiheryo ala aalokiheriwa wira arumeeliweke okathi wa olaleerya mapuro otheene ari atthu. Ale aniirela mpantta enamuna ela, ahaana ovara muteko ola ntoko anna anilaleerya mapuro otheene ari atthu ipooma suulupale. Nto ahaana wiiwelelaka malakiheryo a mutokweene oniweherya muteko woolaleerya. Yamphwanya mutthu onisiveliwa ekeekhai ohinikhala mmuttettheni mwaya, mowaakuveya anna awo ahaana omaleliha olepa eformulaario Queira Visitar (S-43) ni onvahererya sakratari a muloko aya.

8. Niireke ehaavo eparakha ya olaleerya mapuro otheene ari atthu akhala wira muloko anyu khorina eprograma ya olaleerya mapuro awo?

⁸ Olaleerya Mapuro Otheene Ari Atthu Murumeelaka Muttetthe Anyu Woolaleerya: Miloko sikina khasirina muttetthe muulupale oniviriwa atthu anceene onireerela opweha meesa wala ekarinyu erina iliivuru. Masi, anamalaleerya a miloko iyo annitumereriwa-tho olaleeryaka mapuro otheene ari atthu. Niireke muttetthe anyu ohaavo opuro oniiriwa nakoso, ephiro eniviriwa atthu anci, wala elooxa enaattiwa atthu? Aahiiso ohaavo opuro oniweliwa ikaaro wala opuro mukina atthu anithukumana aya? Wala opuro atthu anipaka aya ifesta okathi mukina? Akhala ti siiso, nyuwo munoowerya olaleerya mapuro awo.

9. Xeeni nintthuneya ahu wuupuwelelaka voohimya sa waalaleerya atthu khula opuro oniphwanyaneya aya?

⁹ Yehova oniphavela wira “atthu othene yopowe, [ni] esuwele ekekhai”. (1 Tim. 2:4) Tivonto vaniimananiha ahu waalaleerya atthu anceene ihapari sa Omwene ohinatthi ophiya wanikisa. (Math. 24:14) Mapuro manceene onnixankiha waaphwanya atthu mmawannyeya. Hata vari siiso, nnoowerya olavulana atthu awo okathi ohinikhala aya owaani orweela mwa olaleerya mapuro otheene ari atthu. Olaleerya mapuro awo, pooti okhala enamuna yoowi atthu akina aphwanye eparakha ya wiiwa ihapari sooreera. Nto, nrowe nimalelihe saana orummwa ahu orweela mwa waalaleerya atthu khula opuro oniphwanyaneya aya.​—2 Tim. 4:5.

[Ekaaxa epaaxina 5]

Wiiwanana Saana Onnitthuneya

Vannihimmwa wira anna a miloko sowaattamana ikwaha sikina annilaleerya opuro omosaru: ntoko mphironi, mapuro siniweliwa ikaaro, ni opuro oniiriwa anakoso. Anamalaleerya a miloko soovirikana annihiya irevista enupa emosaru, esaala enilipeleliwa atthu, wala opuro oniiriwa nakoso omosaru. Eyo enniwiiriha ale animwiira nakoso ni anamwaattamanani onanariwa, hata anna awo ahilaleeryaka okathi yoowo. Tivonto, okathi ninlaleerya ahu mapuro otheene ari atthu, nihaana orowaka paahi muttetthe wa muloko ahu.

Akhala wira anna aniphavela olaleerya mapuro otheene ari atthu mmuttettheni wa muloko wowaattamela, ahaana omuleela mutokweene aya a muteko woolaleerya. Vano, owo onrowa olavulana mutokweene a muteko woolaleerya a muloko mukina wira weemererye ahinatthi anna opacerya olaleerya. Akhala wira miloko sinilavula nttaava nikina sinnithanleliwa olaleerya muttetthe mmosaru, axitokweene anihoolela muteko woolaleerya ahaana osuwelihana saana wira asyake owiiriha onanariwa atthu a muttetthe owo. Tthiri, wiiwanana saana onookhaliherya wira itthu sotheene “sìriwe ni nttittimiho ni wiwanana”.​—1 aKor. 14:40.