Mwaatakiheke Maprofeta—Amosi
1. Xeeni ntakiheryo na Amosi nikhanle aya oonilipiha?
1 Niireke mootoko wuupuwela wira khamuniphwanelela olaleerya mwaha woohisoma vanceene? Akhala ti siiso, ntakiheryo na Amosi nnoowerya woolipihani. Nnaamwi Amosi aari makampusi ni mulimi, Yehova aahimulipiha wira olaleye ihapari sootthuneya. (Am. 1:1; 7:14, 15) Moolikanasa, mahiku ala Yehova onnaarumeela ale ari oowiiyeviha. (1 aKor. 1:27-29) Nto, itthu xeeni sikina nniixutta ahu sa profeta Amosi sinnikhaliherya okathi woolaleerya?
2. Exeeni ennilipiha wira nivikanihe olaleerya okathi woolupatthiwa?
2 Mulipe Okathi Woolupatthiwa: Vaavo Amasiya, mulipa a mukuttho yoowo aamukokhorela mwaanyompe mpantta onikela epheyo a omwene wa mahimo muloko a Isarayeli, aamwiiwale awe profeta Amosi olaleyaka, aahimwaakhula moonanariwa oriki: ‘Mutthikele elapo anyu! Munihiye mekhihu, maana nihaana etiini ahu!’ (Am. 7:12, 13) Amasiya aahootha vaavo aamutumerenrye awe Mwene Yerobowamu omukhoottiherya profeta ole ovara muteko awe. (Am. 7:7-11) Masi Amosi aahilipa murima. Mahiku ala, makhulupale a ikerexa annaarumeela ahooleli a epoliitika wira yaalupatthe atthu a Yehova. Masi, Yehova oninlipiherya wira khiivo eyuuma epakeliwe onilupattha enrowa okhumela saana.—Yes. 54:17.
3. Itthu xeeni piili sirina aya ihapari sinilaleya ahu olelo-va?
3 Mulaleye Ihapari Soophukela sa Muluku ni Mareeliho a Muhoolo: Nnaamwi Amosi aalaleyale wira omwene wa mahimo muloko wa Isarayeli waarowa opwetexiwa, owo aahimaliherya olepa eliivuru awe olavulaka sa yooleiherya ya Yehova ya olokiherya itthu ni mareeliho manceene. (Am. 9:13-15) Moolikanasa, hiyo ninnilaleya voohimya sa nihiku noophukela nnaattamela. Masi ‘ehapari yorera y’omwene’ enilaleya ahu khahiyo opwetexiwa wa atakhali paahi. (2 Ped. 3:7; Math. 24:14) Yehova waapwetexa wawe atakhali wArmagedoni, onirowa olokiherya elapo wira ekhale eparayiisu.—Esal. 37:34.
4. Exeeni enniroromeliha wira nnoowerya opaka yootthuna ya Yehova?
4 Tthiri, olaleya ihapari sooreera mwa olumwenku ola woowaatta anamalupattha, onneehererya wiilipiha wahu okhala moovarihana ni wiivahererya wahu ni opaka yootthuna ya Yehova. (Yoh. 15:19) Masi, ninniroromela wira Yehova onoovikaniha onikhaliherya wira nipakeke yootthuna awe, ntoko aamukhalihenrya awe Amosi.—2 aKor. 3:5.