Sowiiraneya
◼ Austrália: John, ti mulopwana osomme vanceene. Oryeene mwaana owo aanirowa okerexa, masi nuuvira okathi owo aahihiya “omukupali Muluku”. Nto pioneero mmosa aahinvaha ebroxura eni: A Vida —Teve um Criador? Mukwaha wootthikela oxukurya, aahinvaha ebroxura A Origem da Vida. Pioneero ole aahivikaniha omuxukurya mulopwana ole, onvahaka irevista sa niinano ni ottittimiheryaka myaha saalavula sa opattuxiwa wa olumwenku wala iprofesia sa Biibiliya. Okathi pioneero ole oonale awe wira vaanireerela, aahinvaha John eliivuru eni: A Bíblia—Palavra de Deus ou de Homem? Nuumala osoma eliivuru ele, John aahipacerya okupali vakhaani wira Muluku ookhala. Moottharelana, pioneero aahipaceriha eliivuru Biibiliya Oniixuttiha Exeeni, omooniheryaka John ettima 8 ipaaxina 20-21 ni ittima 13-16 ipaaxina 23-24. Soolepa siromoliwe ipaaxina iyo, saahivara murima wa John mpakha ohimya so: “Kinoona wira kihaana omusoma Biibiliya”.
◼ oMéxico: Mulopwana mmosa aahimuhimeerya munna mmosa wira owo khaakupali wira Biibiliya uupuxeriwe ni Muluku. Namalaleerya aahiivahererya omooniherya mulopwana owo itthu sooniherya wira Biibiliya Nuulumo na Muluku; nto mulopwana owo aaheemererya. Nuumala otokosa vakhaani ele Biibiliya oniixuttiha awe, vanceenexa voohimya sa malamulo a Muluku, mulopwana owo aahipacerya oturuka muupuwelo awe. Nto mulopwana owo aahimuleela namalaleerya wira: “Okathi yoole naapacenrye ahu omusoma Biibiliya, miyo kuupuwela wira owo aari ntoko iliivuru sikina. Masi vano, kinimusoma aka Biibiliya ni woona miruku sawe voohimya sa mweettelo wooloka, nto yowuupuxerya ya murima aka ennikipwapwela”.
◼ wEstados Unidos: Munna mmosa ni mwaarawe, vaavo yiirela aya mpantta olaleerya wa vameekhaaya esidade yuulupale, aahirwa muthiyana a elapo ya oTaiwan. Owo aanikupali wira Muluku ookhala, masi uupuwela wira Biibiliya ta atthu a ilapo sikina sa wAmerika ni wEuropa. Nnaamwi muthiyana ole aari thaaciri, owo aanoona wira okumi awe khiwaarina yoolakela. Owo aahirowa okumana ni anna ale uupuwelaka wira Biibiliya ammukhaliherya ophwanya ohakalala mookumini. Anna ale yaahipacerya omusomiha Biibiliya muthiyana ole arumeelaka eliivuru Biibiliya Oniixuttiha Exeeni, vamosa ni ebroxura Como Ter Verdadeira Paz e Felicidade. Ahinatthi osoma muru 2 wa eliivuru, awo yaahithanla osoma epantte ya ebroxura eni: Um guia prático para beneficiar toda a humanidade. Nuumala othokorerya ittima 6, muthiyana ole aahitikinihiwa vanceene mwaha woowi Biibiliya toovirikana ni iliivuru sotheene sa itiini. Nuumala othokorerya iprofesia sa Biibiliya seiyo siiraneyale, muthiyana owo aahihimya so: “Kinoona wira khiivo eliivuru ekina yekeekhai ohikhanle Biibiliya!”
◼ oJapão: Namalaleerya mmosa aahimphwanya mwaneene etthoko yoowo aahimya wira khaamukupali Muluku. Masi, munna owo aahivikaniha omuxukurya mulopwana owo ni aaninvaha erevista Despertai!, omuthoonyeryaka epantte eni: “Teve um Projeto?” Vakhaani-vakhaani, mulopwana owo aahituruka moonelo awe ni opacerya ohimya wira waaniheryasa ookhala Mpattuxa. Vano owo khonihoverya-tho wira Muluku ohaavo, nto namalaleerya ole onnimusomiha Biibiliya mulopwana owo orumeelaka ebroxura Ihapari Sooreera Sinikhuma wa Muluku!
◼ oCanadá: Murokora mmosa aahinvaha irevista sa niinano muthiyana mmosa yoowo iira okhumaka owannyawe ophavelaka owela ekaaro awe. Okathi murokora owo aatthikenle awe omuxukurya muthiyana ole, aahilipiherya ohimya wira yena khaaphavela wiiwa masu a Muluku ni khaamukupali Muluku. Murokora khaahiyale omuxukurya, nto aahuupuwela onvaha ebroxura eni: Como Ter uma Vida Satisfatória. Vaavo murokora ole aarowale awe omuxukurya muthiyana owo nihiku nikina, aahimuleela wira aanisuwela wira owo khaamukupali Muluku. Masi aanimuupuwela mwaha woowi aanisuwela wira ole aanimuhuwa mwanawe mwaamulopwana mekhawe. Owo aahimooniherya ettima 6, epaaxina 4 ya ebroxura, yeeyo enitthokiherya moota woophwanya miruku sooloka. Nuumala-vo, aahimutumererya osoma malakiheryo ari yoosoma 2 voohimya sa moota wowaahuwa anamwane. Muthiyana ole aahihakalala vanci mwaha woovahiwa ebroxura ele.