Mwaakhaliherye Ale Anaasomiha Anyu Biibiliya Okhalana ‘Wamini Wolipa’

Ti voohakalaliha woona moota Yehova onireeliha awe muteko woohepha momunepani. Olelo-va, atthu oowiiraka 250.000, annibatiziwa khula mwaakha. (Otum. 28:2) Nuumala obatiziwa ole aasomihiwa Biibiliya, mulipa aamwiixuttiha pooti wuupuwela omuhiya mwaha woowi oniphavela waakhaliheryaka atthu akina. Nave-tho ole onisomihiwa Biibiliya pooti wuupuwelaka wira ohaana ohiya osoma, wira okhalaneke okathi munceene woolaleerya. Masi, ti vootthuneya wira ale anisomihiwa Biibiliya, akhaleke oolipa mwekeekhaini. Awo, ahaana okhalana “mitathari” mwa Kristu ni ‘olipa mowamini’. (aKol. 2:6, 7; 2 Tim. 3:12) Tivonto, nuumala obatiziwa ole onisomihiwa Biibiliya, ohaana ovikaniha yoosoma awe mpakha omaliha iliivuru Biibiliya Oniixuttiha Exeeni? ni “Omphenta Muluku”.​—Nwehe Orummwa Ahu wa Omwene abril 2011, epaaxina 2.