Nlattulo na Vameekhaaya
1. Enipacerya silini ekampaanya enimulattula kongresu a 2014?
1 Aakhanle wira muniphavela opaka yoolya ya vameekhaaya wira mwaavahe apatthani ni amusi, yeeyo enivekela wiimananiha ni musurukhu munceene wira mulokiherye, waaniheryasa nyuwo mwaamwaalattula atthu moohakalala. Moolikanasa, woovira okathi munceene elokiheriwaka efesta yomunepani enrowa okumiheriwa okongresuni a edistritu ni kongresu anithukumana anna a ilapo sinceene a 2014. Sihalaka isumana 3 wira opacerye kongresu, nnookhalana eparakha ya waalattula atthu. Exeeni enrowa onikhaliherya waalattula atthu moohakalala?
2. Exeeni enrowa oniiriha oluttuweliwa ekampaanya?
2 Wuupuwelela mureerelo oniphwanya ahu mwaha wa efesta yomunepani Yehova onikumiherya awe okongresuni, onooniiriha oluttuweliwa ekampaanya ela. (Yes. 65:13, 14) Nave, nuupuweleke wira ekampaanya ahu ela ya vamwaakhani ennikumiherya mireerelo. Akina ninrowa ahu waalattula animoorwa. Masi, hata arwaaka atthu vakhaani wala anci, oluttuweliwa wahu ekampaanya, ononvuwiha Yehova ni wooniherya ovaha wawe.—Esal. 145:3, 7; Wis. 22:17.
3. Ninrowa okawaka sai ifolyeeto sa nlattulo?
3 Nikhuuru na axitokweene nihaana othanla moota wookawa ikonvite muttetthe wotheene, ohela muhina ipa soohikhala atthu, wala mapuro otheene ari atthu a mmuttettheni, vaareerelaka. Wuumalani wa esumana, ninrowa okawaka-tho irevista, vaareerelaka. Akhala wira eSaabadu yoopacerya ya mweeri enilikanela ni ekampaanya, nihaana oluttuweliwa okawa ifolyeeto sa nlattulo ohiya opaceriha soosoma sa Biibiliya. Moohaaniherya nuumala ekampaanya, nnoohakalala vanci osuwela wira nihiirela mpantta, ni wira nihaalattula atthu anceene wira arweele efesta yomunepani Yehova okumihenrye awe!
[Ekaaxa epaaxina 9]
Nihimyeke Exeeni?
Nuumala omukoha ihaali mutthu owo, pooti ohimya so: “Nniirela mpantta ekampaanya ya olumwenku wotheene yowaalattula atthu wira yawiriyane muthukumano wootepa otthuneya. Mahiku ene ni okathi aya woolempwa mukonviteni-mu”.