Moota Wowiiriha Yoosoma ya Biibiliya Yooloka
1. Muritti xeeni orina ahu voohimya sa ale anaasomiha ahu Biibiliya?
1 Khuuvo onimurumeela Yehova “ahithanliwe” nuuwo. (Yoh. 6:44) Hata vari siiso, hiyo nihaana wiimananiha wira naakhaliherye ale anaasomiha ahu Biibiliya wira amwaattamele Yehova. (Yak. 4:8) Nto wiilokiherya ti vootthuneya. Osoma khula ettima paahi ni makoho oolempwa, khoniphiyerya wira naakhaliherye omwiiwexexa Biibiliya ni orowa vahoolo.
2. Itthu xeeni sinitthuneya wira yoosoma ya Biibiliya ekhale yooloka?
2 Wira niwerye wiiriha soosoma sa Biibiliya sooloka, nihaana waakhaliherya ale anaasomiha ahu (1) wiiwexexa ele Biibiliya oniixuttiha awe, (2) weemya ele Biibiliya oniixuttiha awe, ni (3) weettela ele Biibiliya oniixuttiha awe. (Yoh. 3:16; 17:3; Yak. 2:26) Nto pooti ovira myeeri sinci wira nimukhaliherye mutthu owo ophwanya mavalo ala. Masi khula nivalo, ninthoonyerya epantte ya wunnuuherya wawe wataana ni Yehova ni wiivahererya wa yena.
3. Xeeni anamalaleerya ooloka anipaka aya makoho animwiiriha mutthu owo ohimya moonelo awe?
3 Exeeni Enuupuwela Awe Ole Onimusomiha Anyu? Wiira nisuwele akhala wira ole onimusomiha ahu Biibiliya onniiwexexa ni weemya ele eniixutta awe, nihilavuleke mekhihu, nto ninvekeleke ohimya moonelo awe. (Yak. 1:19) Niireke onniiwexexa ele Biibiliya oniixuttiha awe mmwaha owo? Onniwerya otthokiherya ni moolumo awe? Onoonela sai ele exuntte awe? Onnikupali wira ele Biibiliya oniixuttiha awe ti yookhalela? (1 aTes. 2:13) Onniiwexexa wira ele eniixutta awe ehaana omwiiriha orukunuxa okumi awe? (aKol. 3:10) Nto, nihaana opaka makoho animwiiriha mutthu owo ohimya moonelo awe, nuumala-vo khiyanwiriyana.—Math. 16:13-16.
4. Nipakeke exeeni akhala wira ole onimusomiha ahu onnoona ovila wiiwexexa wala weettela ele enixutta awe mBiibiliyani?
4 Onitthuneya okathi wira nikumihe soolema ni miyuupuwelo soothipeleya vanci. (2 aKor. 10:5) Nto nipakeke exeeni akhala wira ole onimusomiha ahu khoneemya wala khoneettela ele enixutta awe? Nipixeke murima. Eyo enonvaha okathi wira Nuulumo na Muluku ni munepa wootteela orukunuxe murima awe. (1 aKor. 3:6, 7; aHéb. 4:12) Ohiya omukhanyererya, ti vooloka othokorerya mwaha mukina akhala wira vanninvila wiiwexexa wala weettela yowiixuttiha eyo. Nto nivikaniheke omwiixuttiha Biibiliya moopixa murima ni moophenta. Woonasa wene, muhoolo onoopaka marukunuxo.