Nilokiherye Inamuna Sahu Soolaleerya: Olaleerya Nimurumeelaka Interfone

Otthuneya Waya: Olaleerya nimurumeelaka interfone wala ekampayiinya enikhala vamukhora va enupa, pooti okhala vowoopiha. Nipakeke exeeni wira muxankiho ola ohivukule oluttuweliwa wahu olaleerya? Mittetthe sikina, omurumeela interfone ti enamuna emosa paahi ya waalaleerya atthu. (aRom. 10:14) Mittetthe iyo, olaleerya ni enamuna ela onnikumiherya mureerelo. (Munwehe Anuário a 2011, ipax. 65-66, ni Anuário a 2000, epax. 54, etti. 3.) Muthokorerye malakiheryo anittharelana.

Moota Woolaleerya ni Interfone:

• Mulokiherye olaleerya woohipisa, ni mulepe itthu mukhanle anyu oolavula mmurumeelaka interfone. Eyo pooti owiirihani okhala oororomela. Mwaphiya enupa erina interfone, wanipacerya muhimyeke etthu ewiirinheni omuxukurya mutthu owo. Murumeeleke nsina nawe akhala wira ninnikhumela vamaakinani-vo. Muhinatthi okhuma, mmuleele wira mookhalana efolyeeto wala erevista eniphavela anyu omuhiyerya wala eniphavela anyu opweha vamukhora vawe.

• Mukhaleke oolipiha. Mutheyeke ni mutthariheleke masu ni matata mukhalaka ntoko munimoona yena.

• Mukhaleke ootaphuwa ni musuweleke ovaanela. Mulavuleke moowiiweya, moohaakuviha, masi mooreerela.

• Mukhaleke a miruku. Akhala wira muttetthe owo sihaavo inupa sinci sirina interfone, pooti othanla inupa 3, olepa vapapheloni opuro omalenle anyu, ni khiyakhuma. Axineene itthoko pooti ohaasivela akhala wira munniviriha okathi munceene mmanaka khula enupa.

Mweererye Ela Mweeri Yoola:

• Okathi wa Omulompa Muluku Vatthokoni, mwinsayariki moota woolaleerya ni interfone.