MAKHALELO A MAKRISTAU
Olaleerya Muttetthe Onilavuliwa Mattaava Manceene
Ikwaha sinceene okathi atthu anilaleeriwa aya ni nttaava naya yooyareliwa, awo anneemya ihapari sooreera. Waaniheryasa ti maana aya Pentekoositi a 33 Nuumala Kristu Orwa, Yehova aapanke awe mareheryo wira “aYuda anjene, yamwettela Muluku” yiiwe ihapari sooreera ni ‘nttava naya’, nnaamwi awo yaalavula mattaava yaalimaleliwe, ntoko eHeeberi ni eGriki. (Mit 2:5, 8) Olelo-va mapuro anilavuliwa mattaava manceene, miloko sinirumeela mattaava oovirikana pooti olaleeryaka muttetthe mmosaru. Moota xeeni anamalaleerya a miloko iyo anrowa aya wiiwanana wira esyake olaleerya inupa silaleeriwe niinaano ni muloko mukina ni wira asyake waanyoonyiha aahiiso owuukhula atthu?
Okohereryana (Mir 15:22): Axitokweene aniweherya muteko woolaleerya ahaana okohereryana wira yoone enamuna yooreerela olaleerya enrowa okhaliherya miloko saya. Vakhala wira muttetthe onilaleeriwa ni miloko iyo mwaamukhaani, ti vamiruku khula muloko waahaavyaka paahi atthu anilavula nttaava naya. Akhala wira miloko iyo sookhalana muttetthe woorakamela sihinwerya aya omaliha muhina mwa myeeri vakhaani, iyo pooti oweemiherya anna a miloko sa mattaava makina sinilaleerya muttetthe owo wira elaleeryeke inupa sotheene mohaathanla atthu a nttaava naya. Masi anna awo yaaphwanya vale atthu anisiveliwa ekeekhai ni anilavula nttaava na miloko iye sihiniwerya omaliha muttetthe ole, ahaana waaleela anna a miloko iyo. (od 93 etti. 37) Aahiiso miloko iyo sihiniwerya olaleerya muttetthe owo, pooti waavekela anna a miloko sikina wira yaakhaliherye waaphwanya atthu anilavula nttaava na muloko aya elepaka masina aya, opuro anikhala aya, ni nummuru na telefoni aya. (km 7/12 5, Ekaaxa) Muhiliyale wira ikwaha sikina, etthoko emosa pooti olavuliwaka mattaava manceene. Nto vaavo anipakiwa aya mareheryo a olaleerya muttetthe wotheene, ahaana otthariheliwa malamulo a elapo eyo.
Wiiwanana (aÉf 4:16): Mutthareke saana malakiheryo munivahiwa anyu ni mutokweene a muloko anyu oniweherya muteko woolaleerya. Niireke ookhala mutthu onimusomiha anyu Biibiliya masi onisiveliwa osoma ni nttaava na muloko mukina? Nto wira mutthu owo orowe vahoolo mwa omunepani, waanyiheryasa ti vooloka onvekela munna wala murokora a muloko onilavula nttaava nimmusivela mutthu owo wira omusomeke Biibiliya ni yena.
Mwiilokiheryeke: (Mir 15:28; 16:1): Vakhala wira munnivaha ekhoomaala masi munaakheliwa ni mutthu onilavula nttaava na muloko mukina, nyuwo pooti omulaleerya mutthu owo ihapari sooreera. Nto, mwiilokiheryeke vahinatthi wira musuwele mattaava animakela olavuliwa muttetthe anyu, ni muhaana ombaxari muselulareni mwanyu Biibiliya ni iviidiyu sa mattaava awo. Nave, pooti omurumeela aplikativo JW Language wira mwiixutte okoha ihaali ni mattaava awo.