Murumeeleke Iviidiyu Okathi Muniiriha Anyu Soosoma sa Biibiliya

Itthu sinooneya sinnaavara murima atthu aniweha ni sinnaakhaliherya wiiwexexa ni wuupuwelela ele aixuntte aya. Mwiixuttihi ahu Muulupalexa, Yehova, aahirumeela itthu sinooneya wira aixuttihe myaha sootthuneya. (Map 15:5; Yer 18:1-6) Nave Mwiixuttihi ahu Muulupale, Yesu aahipaka eyo. (Mat 18:2-6; 22:19-21) Enamuna emosa-emosa enikumiherya mireerelo sinceene, ti iviidiyu. Niireke munnirumeela saana iviidiyu okathi munaasomiha anyu Biibiliya anaxikola anyu?

Soolokiheriwa iviidiyu 10 sinnikhaliherya wiixuttiha nirumeelaka soosoma sa ebroxura Ihapari Sooreera Sinikhuma wa Muluku! Nave khula muru wa eviidiyu, onnivarihana ni makoho ooriipihiwa ari mbroxurani. Ebroxura ya mwinternetini yookhalana ilinkhi sinnuupuxerya okathi wowooniherya khula eviidiyu. Nave, iviidiyu sikina sookhalana myaha sinitthokiherya iliivuru soovirikana sinirumeeliwa wira niixuttiheke seiyo siniirela mpantta iliivuru sahu Sinnikhaliherya Wiixuttiha.

Niireke munnithokorerya myaha sa mBiibiliyani simmuxankiha naxikola anyu wiiwexexa? Aahiiso, niireke naxikola anyu ookhalana mixankiho sa mookumini mwawe? Mphaveleke iviidiyu kamosa-kamosa siri esaiti jw.org ni JW Broadcasting wira nwehe eviidiyu ekhanle oomukhaliherya. Woonasa wene nyuwo ni naxikola anyu pooti owehasa hoothe ni othokorerya.

Khula mweeri, sinnikumiheriwa iviidiyu isya. Vaavo muniweha anyu, muupuweleke moota mukhanle anyu oorumeela okathi muniwiixuttiha anyu akina.