Mweetteke ni Atthu Animphenta Yehova

Xeeni vari aya vooloka ovirihaka okathi niri ene ni atthu animphenta Yehova? Mwaha woowi atthu nneettana ahu pooti oniiriha opaka itthu sooloka wala soohiloka. (Mir 13:20) Mwa ntakiheryo, Mwene Yowasi “ahìra sorera vamaithoni v’Apwiya [Yehova]” okathi wotheene eetta awe ni mulipa a mukuttho Yehoyada. (2 Wa 24:2) Nuumala Yehoyada okhwa, Yowasi aahipacerya weetta ni apatthani oohiloka ni aahimuhiya Yehova.​—2 Wa 24:17-19.

Eseekulu yoopacerya Nuumala Kristu Orwa, murummwa Paulo aahilikanyiha muloko wa eKristau ni empa yuulupale wala ‘etthoko ya thaaciri’, nave ahaalikanyiha atthu a mmulokoni ni “mihasa”, wala mireerelo sa vatthokoni. Ninnivikaniha okhala ntoko “mihasa sottittimiheya” vaavo ninsyaka ahu weetta ni atthu anipaka itthu sihimmusivela Yehova, hata atthu awo ari ene anna wala arokora a mmulokoni. (2 Ti 2:20, 21) Nto nihaana ovikaniha weetta ni atthu animphenta Yehova ni anrowa onikhaliherya omurumeela yena.

NWEHE EVIIDIYU ENI: MUSYAKE OPATTHANI WOOHILOKA, NUUMALA-VO MWAAKHULEKE MAKOHO ALA ANITTHARELANA:

• Inamuna xeeni soovirikana nikhanle ahu oowaapaka apatthani oohiloka?

• Moovarihana ni eviidiyu, exeeni yaakhalihenrye anna ale araru ohiya weetta ni apatthani oohiloka?

• Malakiheryo xeeni a mBiibiliyani anrowa okikhaliherya waathanla mwa miruku apatthani ooloka?