MAKHALELO A MAKRISTAU
Anamuyari — Mwaakhaliheryeke Aniinyu Okhalana Ankhili Anikhuma wa Muluku
Enamuna emosa anamuyari akhanle aya oowaakhaliherya anaaya okhalana ankhili anikhuma wa Yehova, ori waakhaliherya anaaya awo wiixutta etthu ni mithukumano sa ekristau. Itthu amiravo anoona aya, aniiwa aya ni anihimya aya okathi anikomentari aya omuthukumanoni, pooti waakhaliherya wiixutta etthu voohimya sa Yehova ni olipiha ompatthani aya ni yena. (Otum 31:12, 13) Akhala wiira mwa namuyari, munrowa omukhaliherya sai mwaninyu ottottela mureerelo mithukumano?
Mwiimananiheke ohicompela mithukumano Empa ya Omwene. — Esa 22:23
Nvaaneleke ni anna ni arokora Empa ya Omwene sihinatthi ni nuumala mithukumano. — aHe 10:25
Musuweleke akhala wiira khula mutthu a etthoko anyu okhalana eliivuru enirumeeliwa omuthukumanoni, pooti okhala mutelefonini aahiiso yoowimpirimiriwa
Mmukhaliheryeke mwaninyu olokiherya ekomentaario ni moolumo awe. — Mat 21:15, 16
Muttottopeleke mithukumano ni malakiheryo munaakhela anyu omuthukumanoni
Mwaakhaliheryeke aniinyu wiirela mpantta ovara miteko ntoko orattela Empa ya Omwene ni waakhaliherya anna ni arokora oowuuluvala a mmulokoni
Wiira Mwaakhaliherye aniinyu omwaattamela Yehova, muhaana wiimananiha vanceene masi ikwaha sikina pooti okhala vookhulumula. Mukupaliki wiira Yehova onimookhaliheryani. — Yes 40:29.
NWEHE EVIIDIYU ENI: ANAMUYARI MMUROROMELEKE YEHOVA NI IKURU SAWE. NUUMALA-VO MWAAKHULE MAKOHO ALA ANITTHARELANA:
Exeeni yaakhumelela okathi Zack ni Leah yaakhulumuwa aya?
Xeeni anamuyari anireerela aya onvekelaka Yehova ikuru?
Mwa enamuna xeeni Zack ni Leah yoonale aya wiira Yehova aahaakhaliherya?