Hiyo Ninnimphenta Vanceene Tiithi Ihu Yehova

1-2. Vaniweryaneya sai otheene ahu wiirela mpantta emusi ya Yehova?

YEHOVA onninlattula otheene ahu wiirela mpantta emusi awe ya atthu animukokhorela. Tthiri nlo nlattulo nookuxa murima! Atthu aniirela mpantta emusi ya Yehova ti yaale yiivaherenrye wa yena ni anaamini mukuttho wa Mwanawe. Hiyo nookhalana okumi woohakalaliha ni ninnilipelela okhalana ekumi yoohimala muhoolo, akina anrowa okhalaka wiirimu akina mParayiisu valaponi.

² Vanniweryaneya wiirela mpantta emusi ya Yehova mwaha woowi onniniphenta vanceene. Masi wira opake eyo, Yehova ooleva etthu yuulupale. (Yoh. 3:16) Otheene ahu ‘nirothummwa n’isisapo emosá’. (1 aKor. 6:20) Mukuttho wowoopola, onninikhaliherya okhalana waataana wooloka ni Yehova. Vanniweryaneya omuhimya Yehova okhala Tiithi ihu, yoowo ori muulupalexa olumwenku wotheene. Ntoko niwenhe ahu mwaha ovinre, Yehova Tiithi ootepexa oloka waavikana axitiithi otheene.

3. Nikoho xeeni nikhanle ahu oowiikoha? (Nwehe ekaaxa eni: “Kiireke Yehova Onnikiweha?”)

³ Ntoko namalepa mmosa a Biibiliya aikonhe awe, hiyo pooti wiikoha so: “Kaxukhuru [kaalive] sai Apwiya mwaha wa sorera sothene sikìrenlyaya?” (Esal. 116:12) Ekeekhai wira khaninkhala-khala niweryaka omuliva Tiithi ihu a wiirimu itthu sotheene sooloka onnivaha awe. Masi, oniphenta wawe Yehova onniniiriha omphenta. Murummwa Yohani aalempe so: “Hiyo ninnimphenta Muluku, okhala wira Muluku t’opajenrye oniphenta”. (1 Yoh. 4:19) Mwa inamuna xeeni nikhanle ahu oomooniherya Tiithi ihu a wiirimu wira ninnimphenta?

MUKHALE MPATTHANI A YEHOVA

4. Moovarihana ni Yakobo 4:8, xeeni vari aya vooloka wiimananiha wira nikhalane waataana wooloka ni Yehova?

⁴ Yehova oniphavela wira nimwaattameleke aahiiso nikhale apatthani awe. Nave oniphavela wira nivaaneleke ni yena. (Mmusome Yakobo 4:8.) Owo onnintumererya wira nihaana ‘olipiherya olompa’ nivilelaka. Niira siiso, okathi wotheene onoowiriyanaka mavekelo ahu. (aRom. 12:12) Owo khonitepa waatteliwa miteko aahiiso okhulumuwa vahinweryaneya aya owiriyana mavekelo ahu. Nto, hiyo ninninwiriyana Yehova vaavo ninsoma ahu Nuulumo nawe ori Biibiliya, iliivuru sinikumiheriwa ni mutthenkeso awe, seiyo sinnikhaliherya omwiiwexexa Biibiliya. Nave ninninwiriyana Yehova, vaavo ninvaha ahu ephoole mithukumano. Ntoko siisaale ovaanela okathi munceene onaakhaliherya aya anamwane okhalana waataana wooloka ni anamuyari aya, ovaanela ikwaha sinceene ni Yehova onninikhaliherya okhalana waataana wooloka ni yena.

5. Mavekelo ahu anrowa okhala sai ooloka vamaithoni va Yehova?

⁵ Vano nkahaya muupuwele enamuna muninvekela anyu Yehova. Owo oniphavela wira nimuleeleke moonelo ni itthu sotheene siri vamurimani vahu. (Esal. 62:9) Ti vooloka wiikoha so: ‘Kiireke mavekelo aka ari ntoko isipo, aahiiso moolumo anikhuma vamurimani vaka?’ Moohaanyiherya, nyuwo munnimphenta vanceene Yehova ni muniphavela olipiha waataana wanyu ni yena. Wira mpake eyo, nyuwo muhaana ovaanela ikwaha sinceene ni Yehova. Ti vootthuneya omuleela isiiri sanyu. Mmuleeleke itthu sinoohakalalihani ni itthu sinooriipihani murima. Muhiliyale wira okathi wotheene nyuwo pooti onvekela nikhaliheryo, owo onimookhaliheryani.

6. Nihaana opaka exeeni wira nikhalane waataana wooloka ni Tiithi ihu a Wiirimu?

⁶ Wira nikhalane waataana wooloka ni Tiithi ahu a wiirimu, okathi wotheene nihaana omuxukhurela. Tthiri moonelo ahu onolikana ni wa nasaalimo aalempe so: “Apwiya, Muluku aka! Sotikiniha ni mirirya sinìrenlyanyu ti sulupale: khavo onlikana ni nyuwo. Kaphavela olaleya n’uvuwiha sothene seiyo: masi sinnikàttela, kihinawerya walikela”. (Esal. 40:6) Ohiya paahi ohimya wira ninnimuxukhurela Yehova, nihaana wooniherya omuxukhurela wahu ni moolumo ni miteko sahu. Eyo ennooniherya wira noovirikana ni atthu anceene a olelo-va. Hiyo ninkhala olumwenku atthu anceene ahinimuxukhurela aya Muluku mwaha wa itthu sotheene onaavaha awe. Tthiri okhala wira atthu anceene toohixukhuru, eyo enooniherya wira ninkhala “okathi wokiserya”. (2 Tim. 3:1, 2) Xontte, nihikhala-khale nikhalanaka moonelo wa atthu awo!

7. Yehova oniphavela wira nipakeke exeeni, ni nthowa xeeni?

⁷ Anamuyari khaniphavela wira anaaya anyakulihaneke aahiiso owana ni atthu akina, masi aniphavela wira yaataaneke saana ni atthu awo. Moolikanasa, Yehova oniphavela wira atthu otheene animukokhorela akhalaneke waataana wooloka mukina ni mukhwaawe. Tthiri, ophentana wahu tonnisuwanyeiha okhala maKristau eekeekhai. (Yoh. 13:35) Moohaanyiherya, hiyo ninneemererya ele nasaalimo olempe awe oriki: “Mòne: ti yorera ni ti yosivela tthiri wira amusi ekhaleke vamosá”. (Esal. 133:1) Vaavo nnaaphenta ahu anna ni arokora, ninnimooniherya Yehova wira ninnimphenta. (1 Yoh. 4:20) Tthiri eparakha yuulupale wiirela mpantta emusi ya anna ni arokora yaawo ari ‘orerela murima n’umoriwa ikharari’.—aÉf. 4:32.

MOONIHERYE OPHENTA WANYU MWIIWELELAKA

8. Moovarihana ni 1 Yohani 5:3, etthu xeeni yuulupale enniiriha omwiiwelela Yehova?

⁸ Yehova oniphavela wira anamwane awiiweleleke anamuyari aya, nave hiyo nimwiiweleleke Yehova. (aÉf. 6:1) Owo onniphwanela wiiweleliwa mwaha woowi tori Mpattuxa ahu, Onninivaha okumi ni ta ankhili waavikana axipaapa. Masi, etthu yuulupale enniiriha omwiiwelela Yehova, mwaha woowi ninnimphenta vanceene. (Mmusome 1 Yohani 5:3.) Nnaamwi akhanle ene mathowa manceene anniiriha omwiiwelela Yehova, owo khonnikhanyererya omwiiwelela. Owo oonivaha eparakha ya othanla ele nimphavela ahu, nto onnihakalala vaavo ninthanla ahu omwiiwelela mwaha woowi ninnimphenta vanceene.

9-10. Xeeni vari aya vooloka osuwela ni wiiwelela malamulo a Yehova?

⁹ Anamuyari aniphavela wira anaaya akhaleke oovareleleya. Eyo enniwiiriha opaka malamulo wira yaakhapelele anaaya. Nto vaavo anamwane aniiwelela aya malamulo ni malakiheryo awo, annooniherya wira annaaroromela anamuyari aya ni annaattittimiha. Tthiri ti vootepa otthuneya osuwela ni wiiwelela khula nihiku malamulo a Tiithi ihu a wiirimu. Vaavo nimpaka ahu eyo, ninnooniherya wira ninnimphenta ni omuttittimiha Yehova. Ohiya-vo, omwiiwelela Yehova onniniphwanyiha mireerelo. (Yes. 48:17, 18) Masi musuweleke wira atthu otheene anikhootta wiiwelela malamulo a Yehova anniikumiherya maxakha.—aGal. 6:7, 8.

¹⁰ Vaavo ninkhala ahu mwa enamuna enimuhakalaliha Yehova, ninnisyaka itthu saarowa onikumiherya mixankiho werutthuni, mmuupuweloni ni itthu saarowa ohonona waataana wahu ni Yehova. Yehova onnisuwela etthu yootepexa oloka. Aurora yoowo onikhala wEstados Unidos ohimmye so: “Koosuwela wira omwiiwelela Yehova, okathi wotheene okumi ahu onnitepa oloka”. Eyo ekeekhai. Ankhi nyuwo, niireke munnuupuwela mareeliho mphwannye anyu mwaha wa wiiwelela malamulo a Yehova?

11. Ovekela onnikhaliherya opaka exeeni?

¹¹ Ovekela onninikhaliherya okhala atthu oowiiwelela, hata vavilaka opaka eyo. Okathi mukina, vannivila omwiiwelela Yehova mwaha woowi na anatampi, hata vari siiso, nihaana wiimananiha vanceene wira nihimutthekele Yehova. Nasalimo mmosa aahimuxonttela Muluku oriki: “Mulipihe murim’aka, mukhalihe” wowiiwelela. (Esal. 51:14) Denise, yoowo ori pioneera ookilaatheya, oni: “Vaavo kinoona aka ovila wiiwelela nlamulo na Yehova, kinninvekela wira okivahe ikuru wira kipake etthu yooloka”. Nikupaliki wira okathi wotheene, Yehova onimwaakhula mavekelo ntoko awo.—Luka 11:9-13.

MWAAKHALIHERYEKE ATTHU AKINA OMPHENTA TIITHI IHU

12. Moovarihana ni aÉfeso 5:1, nihaana opaka exeeni?

¹² Mmusome aÉfeso 5:1. Okhala wira na ‘an’awe òphentiwa’ ninniimananiha omutakiha Tiithi ihu Yehova. Ninnimutakiha Tiithi ihu, vaavo ninkhala ahu atthu oophenta, ooreera murima ni nnaalevelela ahu ni murima wotheene akhwiihu. Vaavo atthu ale ahinimusuwela Muluku anoona aya mweettelo ahu wooloka, pooti owiiriha ophavela omusuwela oratteene Muluku. (1 Ped. 2:12) Anamuyari maKristau ahaana wiimananiha waathokorerya anaaya atakihaka enamuna Yehova onnithokorerya awe. Nto vaavo anamuyari animutakiha aya Yehova, pooti wira anaaya anookhala apatthani a Tiithi ihu oophenta.

13. Nihaana opaka exeeni wira nikhale oolipa murima?

¹³ Okhala wene, anamwane anisiveliwa ni anamuyari aya, annaalavula saana anamuyari aya. Mwa enamuna emosaru, ninnisiveliwa vanceene ni Tiithi ihu a wiirimu Yehova, ni nimphavela wira atthu akina amusuwele. Tthiri moonelo ahu onoolikana ni wa Mwene Davidi, yoowo aalempe so: “Murim’aka onnìttottopa mwaha w’Apwiya”. (Esal. 34:3) Masi, ankhi akhala wira mwa mutthu oowuuliwa muru? Ninrowa owerya sai olipa murima? Ninnilipa murima vaavo nnuupuwela ahu moota Yehova onihakalala awe naalaleeryaka atthu akina voohimya sa yena ni moota atthu akina anittottela aya mureerelo omusuwela Yehova. Muhiliyale wira, Yehova onoonivaha olipa murima nimphavela ahu. Owo aahaakhaliherya maKristau a eseekulu yoopacerya, nave onoonikhaliherya.—1 aTes. 2:2.

14. Mathowa xeeni anniiriha waalaleerya atthu ihapari sooreera?

¹⁴ Yehova khorina nthalu, nto onnihakalala vaavo onnoona awe naaphentaka atthu otheene, moohicikha mikhalelo wala mahuweliwo aya. (Mit. 10:34, 35) Enamuna emosa nnooniherya ahu wira ninnaaphenta atthu, ori waalaleerya ihapari sooreera. (Math. 28:19, 20) Muteko owo onikhaliherya sai? Ale anniwiriyana, annikhalana okumi wooloka ni nlipelelo na okhalana okumi woohimala Mparayiisu muhoolo.—1 Tim. 4:16.

OMPHENTA TIITHI IHU, ONNIHAKALALIHA

15-16. Mathowa xeeni anniiriha ohakalala?

¹⁵ Yehova Tiithi oophenta, nto oniphavela wira emusi awe ehakalaleke. (Yes. 65:14) Hata nikumanaka mixankiho sinceene, nookhalana mathowa manceene anniiriha ohakalala niinaano-va. Mwa ntakiheryo, ninnikupali wira Tiithi ihu a wiirimu onniniphenta vanceene. Hiyo nookhalana osuwela wekeekhai wa Nuulumo na Muluku, Biibiliya. (Yer. 15:16) Nave nniirela mpantta emusi ya vameekhaaya ya atthu otheene animphenta Yehova, aniphenta malamulo awe ni aniphentana vanceene mukina ni mukhwaawe.—Esal. 106:4, 5.

¹⁶ Nnoowerya ovikaniha ohakalala mwaha woowi noosuwela wira muhoolo nnookhalana okumi wootepexa oloka ni woohakalaliha. Nave noosuwela wira moohipisa, Yehova onoomaliha otakhala wotheene ni orumeelaka Omwene awe, onimwiiriha elapo otthikela okhala Eparayiisu. Nave-tho nookhala nlipelelo nookuxa murima, noowi atthu akhwiiye anoohihimuxiwa wira atthikele okhala vamosa ni amusi ni atthu yaaphenta aya. (Yoh. 5:28, 29) Tthiri okathi owo onrowa okhala woohakalaliha! Etthu yootepa otthuneya, okhala wira ninnikupali ni murima wotheene wira moohipisa otheene ale ari wiirimu ni valaponi anrowa onvuwihaka, omukokhorela, omuttottopela ni omutthapela Tiithi ihu oophenta, Yehova.