Niireke Oreera Murima Onniirela Mpantta Okumi Anyu?

OLAVULAKA etthu yaamukhalihenrye wiixutta ekeekhai, murokora oniihaniwa Lisaa ohimmye so: “Oreera murima wa anna ni arokora tokiirinhe wiixutta ekeekhai”. Eyo ti etthu yaamwiiranenle murokora oniihaniwa Anne. Owo onihimya so: “Etthu yaakikhalihenrye wiixutta ekeekhai waari oreera murima wa anna ni arokora ohiya itthu kiixutta aka”. Oreera murima wa anna ni arokora waahaakhaliherya arokora ala, vano onnaasivela vanceene omusoma Biibiliya ni wuupuwelela itthu aniixutta aya.

Ninrowa wooniherya sai oreera murima wira naalipihe atthu akina? Nrowe nithokorerye inamuna piili sinrowa onikhaliherya. Yoopacerya, ni moolumo ahu. Ya nenli, ni miteko sahu. Nuumala-vo, nnimwaasuwela atthu nikhanle ahu oowaareerela murima.

MOONIHERYEKE OREERA MURIMA OKATHI MUNILAVULA ANYU NI ATTHU AKINA

Muthiyana oowiilipiha onilavuliwa Miruku ekapiitulu 31, aahooniherya ni “moolumo” awe wira aari ooreera murima. (Mir. 31:26) Owo aaheemererya wira oreera murima weettiheke itthu aalavula awe ni moota aalavula awe. Alopwana oothela ahaana wooniherya wira tooreera murina ni moolumo aya. Anamuyari annisuwela wira waalavulela anaaya moolumo oohiloka, eyo enoowiiriha anaaya okhalana moonelo woohiloka ni ohiwiiwelela anamuyari aya. Masi okathi anamuyari anaalavulela aya anaaya moolumo ooreera, awo annaawiriyana ni anniwiiwelela.

Hata muhikhalanne anamwane, munrowa wiixutta sai olavula moolumo ooreerela murima? Moolumo ari Miruku 31:26, animookhaliheryani vanceene. Awo anihimya so: “Molumo awe, molumo a ankhili”. Eyo enihela muhina othanlela saana moolumo ahu ni moota ninlavula ahu. Nto nihaana wiikoha so: ‘Etthu kinrowa aka olavula, kiireke enoowiiriha atthu akina onanariwa aahiiso enookumiherya murettele?’ (Mir. 15:1) Mutthu onipacerya wuupuwela ohinatthi olavula, onnooniherya wira ookhalana ankhili.

Eliivuru ya Miruku 12:18, enihimya so: ‘Okakaruwa mwano tukuthi [aahiiso espaata] envulaliha’. Okathi nnuupuwela ahu moota atthu akina anrowa aya woonela moolumo ahu ni moota ninlavula ahu, eyo enoonikhaliherya okasoopa moolumo ahu. Tthiri olavula mooreerela murima, onoonikhaliherya ohilavula moolumo oohoma ni ooriipiha murima. (aEef. 4:31, 32) Orantteliha moolumo oohiloka ni moolumo ooloka, onoonikhaliherya wooniherya wira naatthu ooreera murima. Eyo ti etthu Yehova aapanke awe okathi aamulipiha awe profeta Eliya. Nlaikha Yehova aarumme awe orowa olavula ni Eliya, naahilavula ni nsu “ntoko epheyo yorera”. (1 Mam. 19:12) Musuweleke wira oreera murima, khahiyo paahi olavula moolumo ooreera. Nihaana wooniherya oreera murima ni miteko sahu. Moota xeeni?

MITEKO SINOONIHERYA OREERA MURIMA SINNAALIPIHA ATTHU AKINA

Nnoowerya omutakiha Yehova, nilavulaka mooreerela murima ni wooniherya oreera wahu murima ni miteko sahu. (aEef. 4:32; 5:1, 2) Olavulaka sa oreera murima wa Anamoona a Yehova, Lisa nimulavunle awe wanipacerya onihimya so: “Okathi emusi aka yaakhanyereriwa aya othaama moowakuveya, anamathelana anli a mmulokoni yaahikumiha ifeeriya omutekoni waya wira anikhaliherye waarumari itthu sahu. Okathi ole kiira kihimusomaka Biibiliya”. Oreera murima wa anna ni arokora waahimukhaliherya Lisa ophavela wiixutta ekeekhai.

Anne, nimulavunle ahu wanipacerya aahoona oreera murima wa Anamoona a Yehova. Owo onihimya so: “Okhala wira atthu anceene olumwenku ola tootakhala murima, eyo yaanikiiriha ohimuroromela mutthu”. Owo onnivikaniha oriki: “Okathi kaasuwenle aka Anamoona a Yehova, miyo nkaaroromela. Miyo kaaniikoha so: ‘Xeeni Anamoona a Yehova anikithokorerya aya saana?’ Murokora aakisomiha Biibiliya aari ooreera murima vanceene. Nto eyo yaahikiiriha omuroromela”. Nto etthu xeeni yaakhumelenle? Owo onihimya so: “Nuuvira okathi, miyo kaahipacerya ovarexexa itthu kiixutta aka”.

Niireke mooweha etthu yanvanre murima Lisa ni Anne? Waari oreera murima wa anna ni arokora ohiya itthu yiixutta aya. Nto eyo yaahaakhaliherya wiixutta ekeekhai. Oreera murima wa anna ni arokora waahaakhaliherya omuroromela Yehova ni arumeyi awe.

MMUTAKIHEKE MULUKU MWAAREERELAKA MURIMA ATTHU AKINA

Mwaha wa moota ahuuwale aya ni soolema sa muttetthe aya, atthu akina okhalana wene annilavula moolumo ooreerela murima ni annitheya. Khahiyo vootakhala atthu awo oreera murima mwaha wa moota ahuuwale aya ni soolema saya. Masi akhala wira mutthu onnooniherya oreera murima mwaha wa soolema ni moota ohuuwale awe, owo khonooniherya oreera murima onikhuma wa Muluku. — Mulikanyihe ni Miteko 28:2.

Oreera murima onikhuma wa Muluku, oniirela mpantta mikhalelo sinikumiheriwa ni munepa woowaarya wa Muluku. (aGal. 5:22, 23) Wira nikhale atthu ooreera murima eekeekhai, nihaana weemererya munepa wa Muluku weettiha enamuna nnuupuwela ahu ni miteko sahu. Akhala wira nnoopaka eyo, nnoowerya omutakiha Yehova ni Yesu. Hiyo makristau eekeekhai ninnaathokorerya saana atthu akina. Etthu enniiriha opaka eyo, omphenta wahu Muluku ni atthu akina. Okathi nimpaka ahu eyo, ninnooniherya wira oreera wahu murima ti weekeekhai ni ninnimusiveliha Muluku.

ATTHU XEENI NIKHANLE AHU OOWAAREERELA MURIMA

Vannikhweya waareerela murima atthu nnaasuwela ahu ni atthu yaatonko onireerela murima. (2 Sam. 2:6) Mwa ntakiheryo, ninnaaxukhurela vanceene atthu awo okathi annipakela aya itthu sooloka. (aKol. 3:15) Masi, ankhi akhala wira ookhala mutthu nnoona ahu wira khonireerela omureerela murima?

Nkahaya muupuwele ela: Yehova oonivaha ntakiheryo nuulupale na owooniherya oreera murima atthu akina hata atthu awo ahireerelaka oreereliwa murima. Mbiibiliyani, Yehova onninooniherya efaita erina aya wooniherya mukhalelo ola muulupale. Moolumo oowi “oreera murima wuulupale” annirumeeliwa vanceene Soolempwa sa Ekereku sa Ekristau. Masi Muluku onnooniherya sai ooreera wawe murima?

Yehova onnaareerela murima apinaatamu ootheene, aavahaka itthu sootheene aniphavela aya wira avikaniheke okhala akumi. (Math. 5:45) Tthiri, hata nihinatthi wiixutta ekeekhai, Yehova aaninreerela murima. (aEef. 2:4, 5, 8) Mwa ntakiheryo, owo oonivaha mwanawe mmoseene wira owoopole apinaatamu ootheene. Murummwa Paulo ohimmye wira Yehova oonivaha mukuttho wowoopola mwaha woowi “oreera murima wa Muluku ti wuulupale”. (aEef. 1:7) Ohiya-vo, Yehova khonihiya onivaha malakiheryo ni oniixuttiha hata niri ene anatampi. Malakiheryo ni moolumo a Yehova ari ntoko “makakhara animorela munyepu”. (Otum. 32:2) Tthiri khaninkhala-khala niweryaka omuliva Yehova mwaha wa onireerela wawe murima. Wahaakhanle oreera murima wa Yehova, khinaarowa okhalana nlipelelo na muhoolo. — Mulikanyihe ni 1 Pedru 1:13.

Tthiri oreera murima wa Yehova, mukhalelo muulupale ninreerela ahu okhalana. Nto ohiya omakela waathanla atthu nikhanle ahu oowaareerela murima, nihaana omutakiha Yehova naareerelaka murima atthu ootheene khula nihiku. (1 aTes. 5:15) Okathi nnaareerela ahu murima atthu akina, ninrowa okhalaka ntoko mooro nihiku nooriirya. Akhala wira nnoopaka eyo, nnoowerya waalipiha atthu a vatthokoni vahu, anna ni arokora, ale ninvara ahu muteko, ninsomana ahu oxikola ni mavisiinyu ahu.

Nkahaya muupuwele moota moolumo ni miteko sanyu sinooniherya oreera murima, sinrowa aya waakhaliherya atthu a etthoko anyu ni anna ni arokora a mmulokoni. Niireke ookhala munna aahiiso murokora a muloko anyu onireerela okhaliheriwa olokiha empa awe, exardim aahiiso ovara miteko sa khula nihiku ntoko orowa othuma mireerelo sawe omerkaatu? Akhala wira ti siiso, vaamuloka omureerela murima, mmukhaliheryaka. Okathi munilaleerya anyu, mwamphwanya mutthu onireerela okhaliheriwa, munoonela sai omukhaliherya mutthu owo?

Nimutakihaka Yehova, okathi wootheene moolumo ahu ni miteko sahu sihaana wooniherya wira naatthu ooreera murima.