Mulipihaneke “Mukina ni Mukhwaawe”

1. Moovarihana ni 1 aTesaloonika 5:11, muteko xeeni wa faita ootheene ahu ninreerela ahu okhaliherya?

NIIREKE mootoko orowa oweha mithukumano Empa ya Omwene etekiwe niinaano aahiiso elokiheriwe niinaano? Moohaanyiherya nyuwo mwaahihakalala vanceene okathi owo. Nyuwo mwaahimuxukhurela vanceene Yehova. Woonasa wene mwaahimoriha maithori mwaha woohakalala muhinawerya wiipa saana. Tthiri miteko sootheene, ohela muhina otekiwa wa Ipa sa Omwene, sinninvuwiha Yehova. Masi wookhala-tho muteko mukina oninvuwiha vanceene Yehova. Yehova onnivaha efaita vanceene muteko owo. Muteko owo onihela muhina waalipiha atthu ootheene anrwa oweha mithukumano Empa ya Omwene. Muteko yoowo murummwa Paulo aahimmye awe okathi aalempe awe moolumo ari 1 aTesaloonika 5:11, yaawo aniirela mpantta muru wa yoolepa a mwaha ola. — Mmusome.

2. Exeeni ninrowa ahu othokorerya mwaha ola?

² Murummwa Paulo oovaha ntakiheryo nooloka na moota woowaalipiha anna ni arokora mmulokoni. Owo aaniwerya opaka eyo okhala wira aaniwoonela othunku atthu akina. Mwaha ola, ninrowa othokorerya moota nikhanle ahu oowaakhaliherya anna ni arokora (1) oovilela mixankiho saya, (2) okhalana murettele, ni (3) moota woolipiha omwaamini waya Yehova. Nave nnooweha moota nikhanle ahu oomutakiha murummwa Paulo, ni moota nikhanle ahu oowaalipiha anna ni arokora olelo-va. — 1 aKor. 11:1.

MOOTA WOOWAAKHALIHERYA ANNA OVILELA MIXANKIHO SAYA NIMUTAKIHAKA PAULO

3. Moonelo xeeni murummwa Paulo aarina awe voohimya sa muteko aavara awe wira iikhuurihe, ni muteko woolaleerya?

³ Murummwa Paulo aanaaphenta vanceene axinnawe. Okhala wira murummwa Paulo aahiviriha mixankiho sinceene, eyo yaahimwiiriha waakhaliherya axinna ni arokora yaviriha mixankiho sinceene. Ekwaha emosa, murummwa Paulo aahithoiwa musurukhu wira othume itthu saamuthowa, ni othume itthu saathowa ale aarina awe. (Mit. 20:34) Masi owo aanisuwela opaka itenta. Nuumala ophiya oKorinto, murummwa Paulo aanivara muteko wootumiha itenta ori ene ni Akila ni Prisila. Hata vari siiso, “isaabadu sotheene” owo aanaalaleerya ayuda ni aGriki. Nto okathi Sila ni Timootheyo yaaphiyale aya, “Paulo aahikhalela nthiti wiixuttiha nuulumo na Muluku”. (Mit. 18:2-5) Murummwa Paulo khaatonko oliyala muteko muulupalexa wa mookumini mwawe, omurumeela Yehova. Mwaha wookhala ntakiheryo nooloka noolaleerya ni noovara muteko, murummwa Paulo aahiwerya waalipiha axinnawe. Owo aahiwuupuxerya axinnawe wira mixankiho sa mookumini aahiiso othoiwa musurukhu wira alyihe emusi aya sihiwiirihe ohicalela “itthu sootepa oreerela”, eyo piiyo, omurumeela waya Yehova. — aFil. 1:10.

4. Moota xeeni murummwa Paulo aakhalihenrye awe axinna awe ovilela olupatthiwa? Nto Timootheyo aapanke exeeni?

⁴ Nuumala okhumelela muloko musya oTesaloonika, makristau yaahipacerya olupatthiwa vanceene. Alopwana ootakhala yaahimphavelasa Paulo ni Sila, nuumala ohaaphwanya ‘yaahaapurula anna akina yaaroihaka wa anamalamulela a epooma’, akhuwelaka wira: “Alopwana ala otheene, annivirikanya malamulo a Seesari”. (Mit. 17: 6, 7) Makristau ale a niinaano yoonenle sai nuumala osuwela wira atthu ootheene a epooma ele yaanaanyokha? Woonasa wene, awo yaahipacerya ohiya oluttuweliwa ovara miteko sa Yehova, masi murummwa Paulo khaaphavela wira ele yiiraneye. Nnaamwi Paulo ni Sila yaathaamale muttetthe ole, murummwa Paulo khaahiyale waalipiha anna a muloko ole. Paulo aahaaleela anna a oTesaloonika wira: “Noomuruma Timootheyo, munnihu . . . wira oolipiheni ni oomaaliheni, nave-tho olipihe waamini wanyu, wira ohikhale mutthu aarowa otteettheya mwaha wa mixankiho iya”. (1 aTes. 3:2, 3) Woonasa wene, Timootheyo aahiviriha muxankiho woolupatthiwa elapo yaakhala awe oListra. Nave Timootheyo aahiweha moota Paulo aalipinhe awe makristau a muttetthe ole. Mwaha wowuupuwelela eyo, Timootheyo aanikupali wira nave Yehova ammukhaliherya waalipiha anna ale a niinaano ni arokora a muloko ole.— Mit. 14:8, 19-22; aHeeb. 12:2.

5. Moota xeeni mutokweene mmosa aamukhalihenrye awe Bryant?

⁵ Enamuna xeeni-tho ekina murummwa Paulo aalipinhe awe axinnawe? Okathi Paulo ni Baarnaba yaatthikenle aya oListra, wIkonio ni wAntiyokiya, “yaahaathanla axitokweene khula muloko”. (Mit. 14:21-23) Nto axitokweene ale yaahikhaliherya vanceene miloko iye, ntoko aniira aya axitokweene a mahiku ahu ala. Nwehe etthu aahimmye awe munna Bryant. Owo onihimya so: “Okathi kaarina aka iyaakha 15, paapa aka aahithaama owaani, nave maama aka ahikumihiwa mmulokoni. Kaahiriipiwa murima vanceene, vaakhala ntoko wira kaahinyanyaliwa”. Exeeni yaamukhalihenrye Bryant ovilela muxankiho ole? Owo onihimya so: “Mutokweene mmosa a muloko aka oniitthaniwa Tony, aanivaanela ni miyo omuthukumanoni ni ikwaha sikina. Mutokweene ole, aahikileela matakiheryo a anna yaari oohakalala nnaamwi yaviriha mixankiho. Owo aahisoma Esalimo 27:10. Nuumala-vo, aahiromola ntakiheryo na Ezekiya, yoowo aamurumeela Yehova moororomeleya nnaamwi apapawe yaahaavaha ntakiheryo nooloka”. Wiimananiha wa mutokweene ole waamukhalihenrye sai Bryant? Owo onaakhula so: “Wiimananiha wa mutokweene ole waahikikhaliherya okela muteko wa Muluku wa okathi wootheene”. Xontte nyuwo axitokweene, muhihiye waasuwela amiravo aniviriha mixankiho ntoko wa Bryant, wira nwerye waalipiha ni moolumo anyu. — Mir. 12:25.

6. Exeeni Paulo aarumenle awe wira aalipihe axinnawe?

⁶ Murummwa Paulo aahiwuupuxerya axinnawe wira Yehova aahaakhaliherya “anamoona oowaatta ntoko meeku”, niire so, makristau makina ovilela mixankiho saya. (aHeeb. 12:1) Paulo aanisuwela wira soowiiraneya iye aawuupuxenrye awe makristau ale, saamwaakhaliherya ovilela mixankiho sootheene saarowa waakhumelela, nave saamwaakhaliherya owehexexa “epooma ya Muluku mukumi”. (aHeeb. 12:22) Etthu emosa-ru enniiraneya olelo-va. Ootheene ahu ninnilipihiwa vaavo ninsoma ahu moota Yehova aamukhalihenrye awe Gedeyoni, Baraki, Davidi, Samuweli ni arumeyi akina. (aHeeb. 11:32-35) Nave matakiheryo a atthu anooniherya waamini olelo-va pooti onilipiha. Anna a oseedi ya olumwenku wootheene, ikwaha sikina annaakhela ikarta sa anna ahimyaka moota alipihiwe aya ni soowiiraneya anisoma aya murevistani.

PAULO AAHAVAHA NTAKIHERYO NOOLOKA AXINNAWE NA MOOTA WOOKUMIHERYA MURETTELE

7. Exeeni mwiixuntte anyu ni miruku sa Paulo siri aRoma 14:19-21?

⁷ Ninnaalipiha anna ni arokora vaavo nimpaka ahu itthu sinikumiherya murettele ni wiiraana mmulokoni. Ninniwerya opaka eyo vaavo nihineemya ahu wira miyuupuwelo soovirikana sinivalanye. Ninnikumiherya murettele mmulokoni, vaavo nihinaakhanyererya ahu anna akina otthara moonelo ahu, hata ohivonyolaka malamulo a mBiibiliyani. Mwa ntakiheryo, muloko wa oRoma yaahikhala makristau oovirikana, ntoko ayuda ni amalapo. Nuumala Nlamulo na Moise omala-malihiwa, itthu sikina khaseetteliwa, ntoko olya eyoolya wala okhuura enama. (Mar. 7:19) Nto nuuvira okathi, makristau makina ayuda yaahoona wira yaahaana olya iyoolya iyo. Masi ayuda akina khiyoona okhala vooloka olya iyoolya iyo. Nto mwaha wookhalana miyoonelo soovirikana, muloko ole waahikawanyeya. Murummwa Paulo aanisuwela efaita yaarina aya okhalana murettele mmulokoni. Nto owo aahimmye so: “Fataari ohikhuura enama aahiiso ohiwurya eviinyu, nnakhala opaka etthu enrowa ovukula waamini wa munninyu”. (Mmusome aRoma 14:19-21.) Paulo aahaakhaliherya makristau ale, wira aheemererye okhalana miyuupuwelo soovirikana ohononaka muloko wootheene. Paulo aahipaka itthu sootheene wira aakhaliherye atthu a makhalelo ootheene. (1 aKor. 9:19-22) Mwa enamuna emosa-ru, nnoowerya waalipiha anna akina ni okumiherya murettele vakhala wira khaninrowa waakhanyererya atthu akina otthara moonelo ahu.

8. Okathi waakhumelenle aya ohiiwanana mmulokoni, murummwa Paulo aaphunke sai mwaha owo?

⁸ Tthiri murummwa Paulo oovaha ntakiheryo nooloka na okumiherya murettele okathi onikhumelela aya ohiiwanana. Okathi wa Paulo, ayuda yaanaakhanyererya atthu yahaakhanle ayuda wira yaahaana winnuwihiwa, woonasa wene yaapaka eyo wira ahinyokhiwe. (aGal. 6:12) Ekeekhai wira murummwa Paulo kheemererya muupuwelo ole. Masi owo khaakhanyererya atthu otthara moonelo awe. Ohiya-vo, moowiiyeviha aahaavahererya mwaha ole arummwa ni axitokweene a oYerusalemu. (Mit. 15:1, 2) Enamuna murummwa Paulo aaphunke awe mwaha ole, aahaakhaliherya makristau, ohihiya okhala oohakalala, ni okhalana murettele mmulokoni. — Mit. 15:30, 31.

9. Ninrowa otthara sai ntakiheryo na murummwa Paulo?

⁹ Okathi onikhumelela aya ohiiwanana mmulokoni, nnoowerya okumiherya murettele vakhala wira nnootthara malakiheryo ninvahiwa ahu ni ale Yehova aathanlale awe wira ahooleleke muloko. Nnoowerya ophwanya malakiheryo awo nisomaka iliivuru ninvahiwa ahu, aahiiso malakiheryo nnaakhela ahu mmutthenkesoni mwa Yehova. Vakhala wira nnootthara malakiheryo awo ni osyaka ovarexexa moonelo ahu, nnoowerya okumiherya murettele mmulokoni.

10. Etthu xeeni ekina murummwa Paulo aapanke awe wira okumiherye murettele mmulokoni?

¹⁰ Etthu yaamukhaliherya Paulo okumiherya murettele mmulokoni, waari oweha mikhalelo sooloka sa anna ni arokora, ohiya mikhalelo soohiloka. Mwa ntakiheryo, wanikisa wa ekarta aalepenle awe aRoma, Paulo aahiromola masina manceene a anna ni arokora, ni aahaattottopela mwaha wa mikhalelo saya sooloka. Tthiri hiyo nnoowerya omutakiha murummwa Paulo, vakhala wira nnoowehexexaka mikhalelo sooloka sa anna ni arokora. Vakhala wira nnoopaka eyo, nnimwaakhaliherya anna ni arokora okhalana waataana woolipa ni ophentana mukina ni mukhwaawe.

11. Okathi onikhumelela aya ohiiwanana mmulokoni, etthu xeeni nikhanle ahu oopaka wira nikumiherye murettele?

¹¹ Ikwaha sikina, pooti okhumelelaka ohiiwanana hata ni makristau yaale apacenrye omurumeela Yehova khalai. Ti etthu yiiraneyale ni Paulo ni mpatthani awe Baarnaba. Awo yaahivaanyihanasa mwaha wookhalana miyoonelo soovirikana, vakhala wira vaanireerela omukuxa Marko mukwaha aya wa nenli wa omisionaario. Nuumala-vo, “yaahinyakulihana vanceene, khivalaana”. (Mit. 15:37-39) Muhoolo mwaya, Paulo, Baarnaba vamosa ni Marko, yaahitthikela waataana, yooniheryaka wira yaanivaha efaita murettele ni wiiraana mmulokoni. Okathi mukina, murummwa Paulo aahimulavula saana Baarnaba vamosa ni Marko mukaartani mwawe. (1 aKor. 9:6; aKol. 4:10) Nave hiyo nihaana ophuka mixankiho sinikhumelela mmulokoni, ni oweha mikhalelo sooloka sa axinnihu. Opaka eyo, onoonikhaliherya okumiherya murettele ni wiiraana mmulokoni. — aEef. 4:3.

MURUMMWA PAULO AAHILIPIHA WAAMINI WA AXINNAWE

12. Mixankiho xeeni sikina annihu aniviriha aya olelo-va?

¹² Hiyo nnoowerya waalipiha anna a mmulokoni, akhala wira nnoolipiha omwaamini waya Yehova. Anna akina anniveehiwa ni amusi aya ahikhanle Anamoona aahiiso ale anivarana aya muteko ni ale anisomana aya oxikola. Nave anna akina anniwereiwa vanceene ni akina vannaavila waalevelela atthu akina. Nave-tho makristau makina apacenrye khalai omurumeela Yehova ni annilipelela okathi olumwenku ola onrowa aya opwetexiwa. Nto mixankiho iya sootheene pooti weehererya waamini wahu. Ti vooloka wuupuwela wira makristau a khalai, yaaniviriha mixankiho simosa-ru. Exeeni murummwa Paulo aapanke awe wira olipihe waamini wa axinnawe?

13. Murummwa Paulo aawenrye sai waakhaliherya axinnawe yaaveehiwa mwaha woowaamini waya?

¹³ Paulo aahirumeela soolepa wira olipihe waamini wa axinnawe. Mwa ntakiheryo, ayuda yaari makristau, vanaavila owaakhula amusi aya yaawo yuupuwela wira etiini ya eyuda yaari yuulupalexa aahiiso ya faita ovikana ekristau. Masi ekarta murummwa Paulo aalepenle awe aHeeberi, yahaalipiha vanceene makristau ale. (aHeeb. 1:5, 6; 2:2, 3; 9:24, 25) Nto makristau aarumeelaka epaphelo ele awo yanwerya osuwela moota woowaakhula ale yaaveeha. Etthu emosa-ru enniwiiraneela axinnihu olelo-va. Olelo-va, nnoowerya waakhaliherya anna awo naatthokiheryaka moota woorumeela iliivuru sahu okathi anitthokiherya aya waamini waya. Nave vakhala wira munnihu onniveehiwa oxikola mwaha wookupali wira itthu siropattuxiwa, hiyo pooti omukhaliherya nimutumereryaka osoma ebroxura eni: A Vida — Teve um Criador ni A Origem da Vida — Cinco Perguntas Que Merecem Resposta, wira owerye otthokiherya etthu enimwiiriha okupali eyo.

14. Ohiya paahi olaleerya ni wiixuttiha, etthu xeeni-tho murummwa Paulo aapaka awe?

¹⁴ Murummwa Paulo aahaalipiha axinnawe owooniheryaka “ophenta ni miteko sooreera”. (aHeeb. 10:24) Owo aahaakhaliherya axinnawe ohiya paahi ni moolumo masi ni miteko sawe. Mwa ntakiheryo, okathi yaakhumelenle aya etala oyudeya, Paulo aahaakhaliherya makristau yaakhala oyudeya aavahaka eyoolya ni itthu sikina saathowa. (Mit. 11:27-30) Nnaamwi Paulo aaviriha okathi munceene olaleeryaka ni wiixuttiha, owo aanihaavya okathi wira aakhaliherye anna ale yaathoiwa. (aGal. 2:10) Mwaha wowooniherya niphento, aahiwiiriha axinnawe okupali wira Yehova aamwaakhaliheryaka khula okathi. Mwa enamuna emosa-ru, vaavo ninrumeela ahu okathi ahu, ikuru sahu, ni osuwela wahu opaka itthu wira naakhaliherye anna aphwanyiwe ni ehasara, ninnilipiha waamini waya. Nave nnoowerya waakhaliherya anna awo mwa inamuna sikina: nivahaka misonkheryo sahu wira sikhaliherye muteko onivariwa olumwenku wootheene. Akhala wira nnimwiira siiso, nnimwaakhaliherya anna awo ni arokora, woona wira Yehova onimwaakhapelela khula okathi.

15-16. Ninrowa waakhaliherya sai annihu ahirina waamini woolipa?

¹⁵ Murummwa Paulo khaahiyale waakhaliherya makristau yahaarina waamini woolipa. Paulo aaniwoonela othunku ale yaahaarina waamini woolipa, tivonto aanivaanela naawo mooreerela murima. (aHeeb. 6:9; 10:39) Mwa ntakiheryo, okathi aalepenle awe aheeberi ekarta awe, ikwaha sinceene aahirumeela moolumo oowi “ninrowa” ohiya “munrowa”, ooniheryaka wira malakiheryo aavaha awe makristau ale nave yena anireerela weettela. (aHeeb. 2:1, 3) Sintoko murummwa Paulo, nave hiyo khaninrowa ohiya waakhaliherya anna waamini waya ohilimpe. Enamuna emosa nikhanle ahu oopaka eyo ori owooniherya wira ninnaathokorerya. Opaka eyo, nnimooniherya wira ninnaaphenta anna awo. Enamuna ninvaanela ahu ni anna awo pooti waalipiha.

¹⁶ Murummwa Paulo aahaalipiha axinnawe aaleelaka wira Yehova aaniweha miteko sooreera yaavara aya. (aHeeb. 10:32-34) Mwa enamuna emosa-ru, nnoowerya omutakiha Paulo vakhala wira nnoomukhaliherya munnihu waamini wawe otteettheyale. Hiyo pooti onvekela munna owo wira onitthokiherye moota iixuntte awe ekeekhai aahiiso itthu simukhumelenle sinooniherya wira Yehova aahimukhaliherya. Hiyo pooti orumeela okathi owo wira nimooniherye munna aahiiso murokora, wira Yehova khonliyala miteko ovanre awe khalai seiyo sinooniherya ophenta nsina nawe nave owo khonikhala-khala oninyanyalaka nenna-va ni nnakhala muhoolo. (aHeeb. 6:10; 13:5, 6) Ovaanela siisa enimwaakhaliherya anna ni arokora olipiha waamini waya ni ohihiya omurumeela Yehova.

MULIPIHANEKE “MUKINA NI MUKHWAAWE”

17. Itthu xeeni ninreerela ahu opaka wira naalipihe annihu?

¹⁷ Wira mulipa-ooteka ipa owerye orattela miteko sawe, owo ohaana oviriha okathi munceene ovaraka muteko wooteka. Mwa enamuna emosa-ru hiyo nnoowerya waalipihaka saana anna, vakhala wira nnoopakaka eyo ikwaha sinceene. Mwa ntakiheryo, nnoowerya waakhaliherya annihu aniviriha mixankiho akhala wira nnimwaaleela matakiheryo a anna yaavilenle mixankiho simosa-ru khalai. Nave nnoowerya okumiherya murettele vakhala wira ninnaalavula saana anna akina. Eyo enoonikhaliherya okumiherya murettele vaavo sinkhumelela aya mixankiho mmulokoni. Nave nihaana wiimananiha okumiherya murettele vaavo sinkhumelela aya mixankiho saarowa ohonona wiiraana mmulokoni. Nnoowerya olipiha waamini wa anna ni arokora, vakhala wira nnoowooniherya soolepa sa mBiibiliyani sinrowa waavara murima, nnimwaavaha itthu sinaathowa, ni nnimwaakhaliherya anna arina waamini woohilipa.

18. Etthu xeeni mulakenle anyu opaka?

¹⁸ Anna anivara miteko sooteeka Ipa sa Omwene, annihakalala ni annixukhurela mwaha woovara miteko iyo. Nave hiyo nnookhala oohakalala ni oxukhurela mwaha wowaakhaliherya annihu a mmulokoni ahirina waamini woolipa. Ekeekhai wira muteko wooteka ipa khonikhala wa mahiku ootheene. Masi waalipiha annihu tonikhala mahiku ootheene. Tivonto, nihaana ohihiya ‘olipihanaka ni okhaliheryana mukina ni mukhwaawe’. — 1 aTes. 5:11.