Muhihiye Olipiha Nroromelo Nanyu

1. Nlipelelo xeeni Yehova onivanhe awe?

YEHOVA oonivaha nlipelelo noohakalaliha na ophwanya okumi woohimala. Atthu akina arina nlipelelo nookhala wiirimu anrowa okhala ntoko malaikha. (1 aKor. 15:50, 53) Masi atthu anceene arina nlipelelo nookhala valaponi anrowa okhalana okumi wooloka ni moohakalala. (Wiis. 21:3, 4) Nlipelelo nahu nookhalana efaita yuulupale hata nirowaka okhala wiirimu aahiiso valaponi.

2. Exeeni ennikupaliha wira itthu sootheene Yehova onileiherya awe sinimwiiraneya?

² Mbiibiliyani nuulumo noowi “nlipelelo” pooti otaphulelaka itthu sooreera ninlipelela ahu sinrowa wiiraneya. Nikupaliki wira itthu ninlipelela ahu muhoolo sinimwiiraneya okhala wira onileiherya ti Yehova. (aRom. 15:13) Ninnisuwela itthu Yehova onileiherya awe nave ninnisuwela wira owo khula okathi onnipaka itthu onileiherya awe. (Moth. 23:19) Ninnikupali wira Yehova onniphavela vanceene ni okhalana owerya woopaka itthu sootheene onihimya awe. Nlipelelo nahu khahiyo etthu yeethiru aahiiso etthu nnuupuwelela ahu ehinrowa wiiraneya masi etthu yeekeekhai.

3. Exeeni ninrowa ahu othokorerya mwaha ola? (Esalimo 27:14)

³ Tiithi ahu a wiirimu onniniphenta nave oniphavela wira nimuroromeleke. (Musome Esalimo 27:14.) Okathi nimmuroromela ahu Yehova ni nlipelelo nahu ninlipa aya, ninniwerya oxintta mixankiho sahu moolipa murima ni moohakalala. Nrowe niwehe moota nlipelelo ninnikhapelela aya. Yoopacerya, ninrowa oweha moota nlipelelo ninlikana aya ni nankura ni moota ninlikana aya ni ekapaseeti. Nuumala-vo nnooweha moota nikhanle ahu oolipiha nroromelo nahu.

NLIPELELO NAHU NINLIKANA NI NANKURA

4. Moota xeeni nlipelelo ninlikana aya ni nankura? (aHeeberi 6:19.)

⁴ Ekarta aalepenle awe aHeeberi murummwa Paulo aahilikanyiha nlipelelo nahu ni nankura. (Mmusome aHeeberi 6:19.) Okathi murummwa Paulo eettawe mikwaha sawe ni pakiti, owo anisuwela wira nankura aanirumeeliwa wira omukhapeleleke pakiti. Ekwaha emosa murummwa Paulo ori ene mpakitini, yaahikhumelela epheyo yuulupale nto owo ahaaweha ale animweettiha pakiti amurihelaka nankura mphareya wira pakiti ole oohimane myala. (Mit. 27:29, 39-41) Ntoko nankura oniwerya awe omulipiha pakiti, nave nlipelelo nahu nnoonikhaliherya okhala oolipa ni omuroromela Yehova okathi sinnikhumelela aya mixankiho. Nave nnoonikhaliherya okhala omaaleleya okathi sinniphwanya aya mixankiho ni okupali wira itthu sinooloka muhoolo. Nihiliyale wira Yesu aahihimya wira naamulupatthiwaka. (Yoh. 15:20.) Wuupuwelela mareeliho ninrowa ahu wakhela muhoolo anoonikhaliherya ohihiya omurumeela Yehova moororomeleya.

5. Nlipelelo naamulipinhe sai Yesu ohinatthi wiiviwa?

⁵ Nrowe niwehe moota nlipelelo naamukhalihenrye aya Yesu ohihiya okhala ororomeleya, nnaamwi asuwela wira aarowa wiiviwa. Nihiku na pentekoositi 33 Nuumala Kristu Orwa, murummwa Pedru aahihimya eprofesia eri eliivuru ya Esalimo. Eprofesia yeeyo yaahimya moota Yesu arowa awe okhala omaaleleya ni oororomeleya, ehimyaka so: “Nave kinrowa okhalaka ni nlipelelo, okhala wira khamunrowa okihiya Mmahiye, nnakhala khamunrowa ohiya yinttaka erutthu ya murumeyi anyu oororomeleya. . . . Munookitteeliha murima vanceene ohoolo wanyu”. (Mit. 2:25-28; Esal. 16:8-11) Nnaamwi Yesu aasuwela wira arowa wiiviwa, owo aanikupali wira Yehova ammuhihimuxa nave amutthikela okhala ni Tiithi awe a wiirimu moohakalala. — aHeeb. 12: 2, 3.

6. Munna mmosa ohimyale exeeni voohimya sa nlipelelo?

⁶ Okhalana nlipelelo ninnaakhaliherya anna anceene ovilela mixankiho. Nrowe niwehe ntakiheryo na munna Leonard Chinn, munna ororomeleya aakhala wInglaterra. Okathi wa ekhotto Yoopacerya ya Olumwenku Wootheene, owo aahitthukweliwa mukhatteya mwaha wookhootta orowa etoropa. Owo aahiviriha miyeeri miili ori ene mukhatteya nuumala-vo aniroohiwa opuro waavariwa miteko sookhanyereriwa. Owo onihimya so: “Etthu ekiiranenle yookiixuttiha wira vannireerela okhalana nlipelelo wira nivilele. Aakhala matakiheryo ooloka nikhanle ahu ootthara ntoko na Yesu, na aarummwa, na maprofeta nave nookhalana sooleiherya sooreera siri mBiibiliyani. Matakiheryo awo anninivaha nlipelelo ni okhalana ikuru wira nivilele mixankiho”. Munna Leonard anoona nlipelelo okhala ntoko nankura naamukhaliherya oovilela, nave hiyo nakhalana nlipelelo nnoonikhaliherya oovilela mixankiho.

7. Mixankiho sinlipiha sai nlipelelo nahu? (Mmusome aRoma 5:3-5; Yakobo 1:12.)

⁷ Okathi ninvilela ahu mixankiho ninnoona moota Yehova onnikhaliherya awe ni eyo ennilipiha nlipelelo nahu. (Mmusome aRoma 5:3-5; Yakobo 1:12.) Nto nlipelelo nahu ninnilipa ovikana wanipacerya niixuntte ahu ekeekhai. Satana oniphavela wira mixankiho sahu sinikhulumule, masi nikhaliheriwaka ni Yehova nnoowerya oxintta mixankiho iyo.

NLIPELELO NAHU NINLIKANA NI EKAPASEETI

8. Nlipelelo nahu ninlikana sai ni ekapaseeti? (1 aTesaloonika 5:8)

⁸ Biibiliya onnilikanyiha nlipelelo nahu ni ekapaseeti. (1 aTesaloonika 5:8.) Ekapaseeti ennikhapelela muru wa nakhotto wira ohivulalihiiwe ni awanani awe. Mwa enamuna emosaru, nihaana okhapelela muupuwelo ahu wira niwerye oxintta ekhotto ninwana ahu ni Satana. Owo oniniituphela orumeelaka sooweha ni miyuupuwelo soovirikana ni soohiloka wira ohonone muupuwelo ahu. Moolikanasa ni ekapaseeti enikhapelela muru wa nakhotto, nlipelelo nahu ninninikhapelela miyuupuwelo sahu wira nihihiye ororomeleya wahu wa Yehova.

9. Exeeni enikhumelela vakhala wira mutthu khorina nlipelelo?

⁹ Nlipelelo nahu na ophwanya okumi woohimala nnoonikhaliherya okhalana ankhili ni opaka soothanla sooloka. Nto vakhala wira nlipelelo nahu nnoohiya ntteettheyaka ni weemererya ohapuxiwa ni miyuupuwelo sa olumwenku, okumi woohimala ninrowa woonaka ntoko etthu eri ottaiwene. Nrowe niwehe ele yaawiiranenle makristau yaakhala epooma ya khalai ya oKorinto. Awo yaahihiya waamini etthu yuulupale Muluku onileiherya awe, eyo piiyo, nlipelelo na ohihimuxiwa. (1 aKor. 15:12) Murummwa Paulo aahihimya wira ale ahinikupali nlipelelo na ohihimuxiwa aniphavela paahi itthu sinaasivela. (1 aKor. 15:32) Anamunceene olelo-va, aniphavelasa paahi opuha khanikupali itthu Muluku oleihenrye awe ni khanuupuwela itthu sinrowa wiiraneya meelo. Masi hiyo noovirikana ni atthu awo. Okhala wira ninnikupali itthu Muluku oleihenrye awe sinrowa wiiraneya muhoolo. Nlipelelo nahu ninlikana ni ekapaseeti maana ninnikhapelela muupuwelo ahu. Nave nnoonikhaliherya ohiisuupuwela mmansihu, okhala wira opaka eyo yaamuhonona ompatthani ahu ni Yehova. — 1 aKor. 15:33, 34.

10. Nlipelelo ninnikhaliherya sai ohihapuxiwa ni miyuupuwelo soohiloka ?

¹⁰ Nave okhalana nlipelelo onoonikhaliherya osyaka muupuwelo woowi khivaniweryaneya omusiveliha Yehova. Mwa ntakiheryo, atthu akina pooti wuupuwelaka so: ‘Miyo kaapani? Nkiphwanelela okhala naale anrowa ophwanya okumi woohimala. Nave nkiniwerya wiiwelela malamulo a Muluku’. Niireke munnimuupuwela ole aamulenle Yobi moolumo siiso? Aari mpatthani awe ohiloka Elifazi. Owo aahimmye so: “T’ani mutthu onkhapela okhala òrera murima?” Elifazi omuhimyaka Muluku owo aahimmye so: “Muluku khonaroromela hatá arumeyi awe wiirimu: nave-tho malaikh’awe owo onniphwanyana mulattu”. (Yobi 15:14, 15) Iwo waari wootha wuulupale! Muupuwelo owo onikumiheriwa ni Satana. Okhala owo wira onnisuwela wira muupuwelaka siiso nlipelelo nanyu nnoottettheya. Nto mukhootteke, miyuupuwelo iwo nave muupuweleke sooleiherya sa Yehova. Mukupaliki wira Yehova oniphavela wira mphwanye okumi woohimala nto owo onimookhaliheryani ophwanya okumi owo. — 1 Tim. 2:3, 4.

MUHIHIYE OLIPIHA NLIPELELO NANYU

11. Xeeni ninreerela ahu okhala oopixa murima nimulipelelaka Yehova okathi onrowa awe waataphula anatiri awe?

¹¹ Ikwaha sikina khivanikhweya olipiha nlipelelo nahu. Okhala wira hiyo pooti otemwaka omulipelela Muluku wira opaka itthu oleihenrye awe. Masi nihaana wuupuwela wira Yehova onikhala moohimala. Nto moota onoona awe ovira wa iyaakha woovirikana ni moonelo wa apinaatamu. (2 Ped. 3:8, 9) Hata ovirikanaka ni moota ninlipelela ahu, Yehova onimwaataphula anatiri awe okathi wooreerela. Exeeni enrowa onikhaliherya ohihiya olipiha nlipelelo nahu, nlipelelaka moopixa murima okathi Yehova onrowa awe waataphula anatiri awe? — Yak. 5:7, 8.

12. Moovarihana ni aHeeberi 11:1, 6 nlipelelo ninlikana sai ni waamini?

¹² Biibiliya onnilikanyiha nlipelelo ni okhalana waamini wira Yehova ookhala, “ni wira onnaatthuvela ale animwaavya ni murima aya wotheene”. (Mmusome aHeeberi 11:1, 6.) Okathi nintepa ahu okupali wira Yehova ookhala, nto nnootepaka okupali wira onoopaka itthu oleihenrye awe. Niira siiso, nnoorowa olipiha nlipelelo nahu vakhala wira khannihiya omwaattamela Yehova, yoowo onileiherya opaka itthu ninlipelela ahu. Vano ittima sinittharelana, ninrowa oweha itthu nikhanle ahu oopaka wira nilipihe waataana ni Yehova. Nto napaka eyo, nnoolipiha nlipelelo nahu.

13. Ninrowa omwaattamela sai Muluku?

¹³ Munvekeleke Yehova ni mmusomeke Biibiliya. Ekeekhai wira khaninwerya omoona Yehova, masi nnoowerya omwaattamela. Nave nnoowerya olavula ni Yehova okathi ninvekela ahu nikupaliki wira onooniwiriyana. (Yer. 29:11, 12) Hiyo nnoowerya onwiriyana Muluku nimusomaka Biibiliya ni wuupuwelela ele ninsoma ahu. Nto nlipelelo nahu ninnitepa olipa vaavo ninsoma ahu moota Yehova aakhapelenlya awe arumeyi awe oororomeleya khalai. Itthu silempwale mBiibiliyani “silepeliwe wira siniixuttihe, nave hiyo nookhalana nlipelelo mwaha wa nuulumo na Muluku, nenlo ninnilipiha ni ninnikhaliherya ovilela”. — aRom. 15:4.

14. Xeeni vari aya vooloka wuupuwelela itthu Yehova aaleihenrye awe ni opaka?

¹⁴ Muupuweleleke moota Yehova aapanke awe itthu aaleihenrye awe khalai. Nkahaya muupuwele ele Muluku ampakenlya awe Abrahamu ni Sara. Awo yaahuuluvala enuupuwela wira khiyaarowa owerya waayara anamwane. Hata vari siiso, awo yaahikhalana mwaana ntoko Yehova aaleihenrye awe. (Maph. 18:10) Masi Muluku aahaaleiherya-tho etthu ekinaku. Biibiliya onihimya wira: “Owo . . . aamukhala tiithi a maloko manceene”. (aRom. 4:18) Nnaamwi Abrahamu ahaasuwela moota Muluku aarowa awe opaka eyo, masi aanikupali wira Yehova ammaliherya yooleiherya awe. Nto ororomela aarina awe Abrahamu khahiyo waari weethiru. (aRom. 4:19-21) Soowiiraneya ntoko iya, sinniniixuttiha wira khula okathi Yehova onnimaliherya sooleiherya sawe, hata noonaka wira khivaniweryaneya.

15. Xeeni ninreerela ahu wuupuwelelaka itthu Yehova opanke awe wira onikhaliherye?

¹⁵ Muupuweleke itthu Yehova opanke awe wira ookhaliheryeni. Muupuweleke sooleiherya siri mBiibiliyani siiranen’ye mookumini mwanyu. Mwa ntakiheryo, Yesu aahileiherya wira Tiithi awe aamoovahani itthu simpirisari anyu wira mukhale mukumi. (Math. 6:32, 33) Yesu aahileiherya wira Yehova aamoovahani munepa awe woowaarya mwanvekela vale. (Luk. 11:13) Nto Yehova onnimaliherya sooleiherya iyo. Woonasa wene, munnuupuwela itthu sikina Yehova opanke awe wira ookhaliheryeni. Owo ooleiherya woolevelelani, woomaalihani ni wuncererya waamini wanyu. (Math. 6:14; 24:45; 2 aKor. 1:3) Wuupuwelela itthu iyo sootheene, onoolipiha nlipelelo nanyu wira itthu Muluku oleihenrye awe muhoolo onoopaka.

MUHAKALALEKE NI NLIPELELO NANYU

16. Xeeni nlipelelo nahu niri aya yoovaha ya efaita yuulupale?

¹⁶ Nlipelelo nahu na ophwanya okumi woohimala yoovaha yuulupale ya Muluku. Ninnilipelela moohakalala itthu sooreera, seiyo ninkupali ahu wira muhoolo sinimwiiraneya. Nlipelelo nahu ninlikana ni nankura, nenlo ninnikhaliherya ovilela mixankiho, ovilela olupatthiwa ni ohoova okhwa. Nave nlipelelo nahu ninnilikana ni ekapaseeti, yeeyo enkhaliherya muupuwelo ahu okhootta itthu soohiloka ni wuupuwelela itthu sooloka. Nlipelelo nahu na mBiibiliyani nnoowerya onikhaliherya omwaattamela Muluku, ni woona moota Muluku onniphenta awe vanceene. Nnoophwanya mareeliho manceene vakhala wira nlipelelo nahu nnookhala noolipa.

17. Xeeni nintteeliwa ahu murima mwaha wa nlipelelo nahu?

¹⁷ Epaphelo murummwa Paulo aalepenlya awe aRoma, owo aahimmye so: “Mutteliweke murima mwaha wa nlipelelo nanyu”. (aRom. 12:12) Paulo khaahiyale otteeliwa murima. Mwaha wa xeeni? Mwaha woowi aanisuwela wira vakhala wira khaarowa ohiya ororomeleya, aamwaakhela okumi woohimala wiirimu. Nave hiyo ninnitteeliwa murima ni nlipelelo nahu okhala wira ninnikupali wira Yehova onoopaka itthu oleihenrye awe. Hiyo ninnikupali itthu iyo, ntoko nasalimo olempe so: “Òreriwa t’ale . . . anaroromela Apwiya Muluku aya, . . . Apwiya t’òroromeleya wa mahiku othene”. — Esal. 146:5, 6.