Munniwerya Ovirikanyiha Itthu sa Ekeekhai ni Itthu sa Ethiru?

1. Munoonela sai mwaha wa wiixutta ekeekhai?

NTOKO arumeyi a Yehova, hiyo ninniphenta vanceene ikeekhai siri mbiibiliyani. Waamini wahu onnilipa mwaha wa ikeekhai iyo. (aRom. 10:17) Nave ninnikupali wiira Yehova oopaka muloko wa ekristau ntoko “epilaari ni alisenso a ekeekhai”. (1 Tim. 3:15) Nto ninnihakalala vanceene owiiwelela ‘ale annihoolela’. Okhala wiira anna awo anninikhaliherya wiiwexexa ikeekhai sa mbiibiliyani nave anninivaha malakiheryo annikhaliherya opaka ele Muluku oniphavela awe. — aHeeb. 13:17.

2. Moovarihana ni Yakobo 5:19, exeeni ekhanle oowiiraneya nuumala wiixutta ekeekhai?

² Masi hata niixuntte ene ekeekhai ni neemerenrye ene weettihiwa ni malakiheryo ninvahiwa ahu ni Yehova, ikwaha sikina pooti okhumelelaka itthu sikhanle oonihapuxa. (Mmusome Yakobo 5:19.) Satana aamuhakalala vanceene vaakhanle wiira noohiya ororomela ikeekhai niixuntte ahu mbiibiliyani aahiiso malakiheryo ninvahiwa ahu ni mutthenkeso wa Muluku. — aEef. 4:14.

3. Xeeni ninreerela ahu ohihiya ororomela ikeekhai? (aEefeso 6:13, 14)

³ Mmusome aEefeso 6:​13, 14. Moohipisa, Diabo onoomwara-mwarya itthu soowoothiwa nave onimwiiriha maloko waalupattha arumeyi a Yehova. (Wiis. 16:​13, 14) Nave ninnisuwela wiira Satana onimwiimananiha vanceene wiira aawoke arumeyi a Yehova. (Wiis. 12:9) Tivonto vari aya va faita okhuma nenla-va, wiixutta ni osuwela ovirikana okhanle ikeekhai ni itthu soowoothiwa sinihimmwa ni Satana, wiira nihihiye weettela ekeekhai. (aRom. 6:17; 1 Ped. 1:22) Nave eyo, ti etthu enrowa onikhaliherya okathi wa maxakha maalupale!

4. Exeeni ninrowa ahu othokorerya mwaha ola?

⁴ Mwaha ola, nnimwiixutta mikhalelo miili ninreerela ahu okhalana, seiyo sinrowa onikhaliherya wiiwexexa ikeekhai sa mbiibiliyani ni weemererya wiira neettihiweke ni malakiheryo a mutthenkeso wa Yehova. Nave nnimwiixutta itthu tthaaru ninreerela ahu ohihiya opaka wiira neetteleke ekeekhai.

MIKHALELO SINROWA ONIKHALIHERYA OSUWELA SAANA EKEEKHAI

5. Omuttittimiha Yehova onrowa onikhaliherya sai osuwela itthu sa ekeekhai?

⁵ Omuttittimiha Yehova. Omuttittimiha Yehova, onitaphulela wiira ninnimphenta vanceene yena, mwa enamuna nihikhanle ahu oopaka etthu ekhanle oomunyoonyiha. Tivonto, nihaana osuwela ovirikana okhanle itthu sooloka ni soohiloka aahiiso itthu sa ekeekhai ni sa ethiru, wiira niwerye omusiveliha Yehova. (Mir. 2:3-6; aHeeb. 5:14) Okhala wene itthu sinaasivela apinaatamu anceene khasinimusivela Yehova. Nto niheemererye wiira owoova atthu oniirihe ohiya omphenta Yehova.

6. Exeeni yaapanke aya maxeefi 10 a aisarayeli mwaha wa owoova atthu?

⁶ Akhala wiira nnoowoova atthu mootepana ovikana omphenta wahu Muluku, eyo pooti oniiriha ohiya weettela ekeekhai. Nrowe nthokorerye matakiheryo a maxeefi 12 yaawo yaaronwe ohottela elapo Yehova aaleihenrye awe waavaha aisarayeli. Masi maxeefi 10 a yaawo, yaaniwoova vanceene akanaani ovikana omphenta waya Yehova. Nto awo yaahaalela aisarayeli ahimyaka so: “Hiyo ninnojela owana n’atthu ale: t’òtupaxa onivikana hiyo”. (Mooth. 13:27-31) Ekeekhai wiira mwa muupuwelo wa apinaatamu, akanaani yaari ootupexa waavikana aisarayeli. Masi ohimya wiira aisarayeli khiyaarowa owerya waaxintta awanani aya, yooniherya ohimuttittimiha Yehova. Nto maxeefi ale 10 yaareerela owehexexaka itthu Yehova aaphavela awe wiira aisarayeli epakeke. Nave awo, yaahaana wuupuwelela etthu Yehova aapakenle awe okathi vakhaani waavinre. Nto eyo yaamwaakhaliherya osuwela wiira akanaani khahiyo yaari ootupa ovikana ikuru sa Yehova, yoowo ori Nanwerya Sootheene. Moovirikana ni maxeefi ale 10, Yoxuwa ni Kalebi yaaphavela wooniherya wiira yaanimuttittimiha Yehova. Awo yaahaaleela atthu ale wiira “Apwiya yanijaliwa vale, anonikeliha mulaponi-mmo, anonivaha elapo eyo”. — Mooth. 14:6-9.

7. Ninrowa olipiha sai omuttittimiha wahu Yehova? (Nwehe efootu.)

⁷ Wiira omuttittimiha wahu Yehova okhale woolipa, nimpirisari wuupuwelelaka moota nikhanle ahu oomuhakalaliha yena khula okathi nimphavela ahu opaka soothanla. (Esal. 16:8) Nto okathi munisoma anyu soowiiraneya sa mbiibiliyani, mwiikoheke so: ‘Kaarowa opaka exeeni vaakhanle wiira muxankiho ola okiphwannye miyo?’ Mwa ntakiheryo, nkuupuwelani vaakhanle wiira munaawiriyana maxeefi ale 10 okathi yaahimya aya moonelo ole woohiloka. Niireke mwaarowa okupali moonelo aya mwaha wa owoova atthu? Aahiiso omuttittimiha wanyu Yehova waarowa okhala wuulupale ovikana ophavelasa waahakalaliha ni owoova atthu? Masi aisarayeli khiyaakupanli wiira Yoxuwa ni Kalebi yaahimya ekeekhai. Nto eyo yaahiwiiriha ohikela Elapo Yooleiheriwa. — Mooth. 14:10, 22, 23.

8. Mukhalelo xeeni ninreerela ahu okhalana, ni mwaha wa xeeni?

⁸ Wiiyeviha. Yehova oniwiixuttiha ekeekhai, atthu yaale paahi oowiiyeviha. (Math. 11:25) Tivonto, hiyo moowiiyeviha niheemererya okhaliheriwa wiira niixutte ekeekhai. (Mit. 8:30, 31) Hata vari siiso, nihaana okhalana ephoole wiira nihikhale atthu oowiixinnuwiha. Nakhala oowiixinnuwiha, hiyo pooti opaceryaka wuupuwela wiira moonelo ahu tori wootepa okhalana efaita, ovikana malakiheryo a mbiibiliyani ni malakiheryo ninvahiwa ahu ni mutthenkeso wa Yehova.

9. Ninrowa owerya sai ohihiya okhala oowiiyeviha?

⁹ Naaphavelaka ohihiya okhala oowiiyeviha, nihaana wuupuwelelaka wiira na atthu acikhaani nailikanyiha ni Yehova. (Esal. 8:3, 4) Nave nihaana onvekela Yehova wiira onikhaliherye okhala oowiiyeviha ni weemererya wiira niixuttihiweke. Yehova, oonivaha Nuulumo nawe, Biibiliya, ni oonivaha mutthenkeso awe. Nto owo onoonikhaliherya wiira nivaheke efaita itthu iyo ovikana moonelo ahu. Okathi munimusoma anyu Biibiliya, mmananiheke osuwela moota Yehova onisiveliwa awe ni atthu oowiiyeviha ni moota onaanyokha awe atthu oowiixinnuwiha ni oowiisoona. Mwiimananiheke okhala oowiiyeviha, otepexa wene okathi yoole munivahiwa anyu yoothanleliwa, atthu akina anoona aya okhala eparakha yuulupale.

NIHIHIYE WEETTELA EKEEKHAI

10. Tani Yehova aarumenle awe wiira yaavaheke malakiheryo arumeyi awe?

¹⁰ Muroromeleke malakiheryo a mutthenkeso wa Yehova. Khalai Yehova aahimurumeela Moise nuumala-vo Yoxuwa, wiira yaavaheke malakiheryo arumeyi awe. (Yoox. 1:16, 17) Aisarayeli yaaniphwanya mareeliho, okathi yaathokorerya aya alopwana awo ntoko atthu yaathanliwe ni Yehova. Nuuvira iyaakha sinceene, vaavo waapakiwa aya muloko wa ekristau, arumeyi a Yehova yaavahiwa malakiheryo ni arummwa 12. (Mit. 8:14, 15) Moottharelana ekurupu eyo yaahinnuwa nto yaanihela muhina axitokweene akina a oYerusalemu. Vaavo atthu yaatthara aya malakiheryo yaavahiwa ni alopwana awo oowaamini, “atthu a mmulokoni yaanitepa olipihiwa waamini waya, nave khula nihiku atthu yaanincerereya”. (Mit. 16:4, 5) Nave olelo-va, ninniphwanya mareeliho, vaavo nintthara ahu malakiheryo ninvahiwa ahu ni mutthenkeso wa Yehova. Munoona wiira Yehova aarowa woonela sai, vaakhanle wiira hiyo khinnaattittimiha aahiiso khinnaaphavela ale aathanlale awe wiira anivaheke malakiheryo? Nnoowerya waakhula nikoho nla, nthokoreryaka etthu yiiraneyale okathi aisarayeli yaarowa aya Elapo Yooleiheriwa.

11. Exeeni yaawiiranenle aisarayeli yaawo yahaamwiiwelela Moise yoowo aathanliwe ni Yehova? (Nwehe efootu.)

¹¹ Okathi aisarayeli yaarowa aya Elapo Yooleiheriwa, alopwana oottittimihiwa yaahimurukunuwela Moise ni okhulupale aavahiwa awe ni Yehova. Awo yaahimmye so: “Atthu othene a nloko nahu [ohiya paahi Moise] t’awaya Apwiya: nave Apwiya anikhala eriyari aya”. (Mooth. 16:1-3) Ekeekhai wiira atthu a nloko nootheene yaari ‘awaya Apwiya’ masi Yehova aamuthanlale Moise wiira oweettiheke arumeyi awe. (Mooth. 16:28) Nto okathi alopwana ale oohiiwelela yamphukela aya Moise, vaalikana ni omphukela Yehova. Awo khiyaawehexaxa itthu Yehova aaphavela awe, masi yaawehexexa itthu awosa yaaphavela aya, ntoko owerya waya ni okhulupale aya. Muluku aahaapwetexa alopwana awo waahela muhina atthu anceene yaakupali. (Mooth. 16:30-35, 41, 49) Mwa enamuna emosa-ru, olelo-va, Yehova khonisiveliwa ni atthu ale ahiniiwelela malakiheryo a mutthenkeso awe.

12. Xeeni khula okathi ninreerela ahu ororomelaka mutthenkeso wa Yehova?

¹² Khula okathi nihaana ororomelaka mutthenkeso wa Yehova. Okathi anikumiheriwa aya marukunuxo a moota nniiwexexa ahu ikeekhai sa mbiibiliyani aahiiso a moota nimmurumeela ahu Yehova, ale anihoolela mutthenkeso owo, annipaka marukunuxo awo moowaakuveya. (Mir. 4:18) Awo annipaka eyo, okhala wiira etthu aniphavelexa aya omuhakalaliha Yehova. Nave anniimananiha opaka soothanla avarihelaka muteko Nuulumo na Muluku. Nto arumeyi ootheene a Yehova, aahaana opaka eyo.

13. a) “Moolumo ooreera”, anitaphulela exeeni? b) Moolumo awo annikhaliherya sai?

¹³ “Muhihiye otthara moolumo ooreera”. (2 Tim. 1:13) “Moolumo ooreera” anitaphulela soowiixuttiha sa makristau siniphwanyaneya mbiibiliyani. (Yoh. 17:17) Nto moolumo awo tanniixuttiha itthu sootheene ninkupali ahu. Tivonto, mutthenkeso wa Yehova onniniixuttiha moota woovarexexa soowiixuttiha iyo. Akhala wiira nnoopaka eyo, nnoophwanya mareeliho.

14. Makristau oopacerya yaahiyale sai “otthara moolumo ooreera”?

¹⁴ Exeeni ekhanle ookhumelela vakhala wiira nnoohiya “otthara moolumo ooreera”? Nrowe nthokorerye ntakiheryo nimosa. Okathi wa makristau oopacerya, akina a yaawo, yaanilaleya itthu soowoothiwa ahimyaka wiira nihiku na Yehova noophiya. Woonasa wene awo yaakhenle ekarta yaahimya siiso, yaakhala wiira yaalempwale ni murummwa Paulo. Nto ehinatthi ovarerya mwaha ole, makristau makina a oTesalonoonika yaahikupali soohimmwa iyo ni enapacerya omwara-mwarya. Masi vaakhanle wiira yaahivarerya saana itthu Paulo aawiixuttinhe awe, awo khiyaarowa owokiwa. (2 aTes. 2:1-5) Paulo aahaaleela anna awo wiira khivaareerela okupali khula etthu yaaleeliwe aya. Ophavelaka waakhaliherya ni itthu saarowa okhumelela muhoolo, Paulo aamalinhe ekarta aalepenle awe atesaloonika ohimyaka so: “Kinlepa makhomaso ala ni ntata naka. Miyo kinlepa siisa ipaphelo saka sotheene”. — 2 aTes. 3:17.

15. Ninrowa owerya sai okhalana ephoole ni soohimmwa sinikhala wiira ti sa ekeekhai? Nvahe ntakiheryo. (Nwehe efootu.)

¹⁵ Exeeni nniixutta ahu ni moolumo Paulo aahimenrye awe atesaloonika? Nniixutta wiira naiwa moolumo ahinivarihana ni itthu niixuntte ahu mbiibiliyani aahiiso naiwa etthu, nihaana ovarerya saana. Okathi wa União Soviética awanani ahu yaahilepa ekarta yaaroihelaka anna, yeeyo yaakhala wiira yaakhuma oseedi ya olumwenku wootheene. Ekarta eyo yaanaatumererya anna wiira epake mutthenkeso aya. Vaakhala ntoko yaahimya itthu sa ekeekhai. Masi anna yaarina waamini woolipa aahiiso yaari oororomeleya khiyaahapuxiwe. Awo yaahoona wiira itthu saahimya aya ekarta ele, khisaavarihana ni itthu yaaixuntte aya mbiibiliyani. Mwa enamuna emosa-ru, olelo-va awanani ahu annimurumeela interneeti ni aredes sociais wiira anivalaanye ni onihapuxa. Nto ohiya waakuva “okuxeya murima aahiiso oxanka” nihaana okhalana ephoole ni ovarerya vakhala wiira itthu nniiwa ahu wala ninsoma ahu, sinnivarihana ni ikeekhai niixuntte ahu. — 2 aTes. 2:2; 1 Yoh. 4:1.

16. Moovarihana ni aRoma 16:17, 18, exeeni nikhanle ahu oopaka akhala wiira mutthu mukina onnihiya weettela ekeekhai?

¹⁶ Muhihiye waataana ni atthu ale animuroromela Yehova. Muluku oniphavela wiira nimurumeeleke yena mwa enamuna yoowiiraana. Nnoowerya opaka eyo, vakhala wiira khannihiya weettela ekeekhai. Mutthu onimwara-mwarya itthu soowoothiwa onnikumiherya okawanyeya mmulokoni. Tivonto Muluku onnilopola awe ahimyaka wiira “muhaataaneke ni atthu awo”. Akhala wiira khannipaka eyo, hiyo pooti opaceryaka okupali itthu soowoothiwa ni ohimuroromela Yehova. — Mmusome aRoma 16:17, 18.

17. Mareeliho xeeni nimphwanya ahu mwaha wa wiixutta ekeekhai ni ohihiya weettela?

¹⁷ Vaavo ninsuwela ahu itthu sa ekeekhai ni nneettela, Eyo enninikhaliherya olipiha waamini wahu ni omwaattamela Yehova. (aEef. 4:15, 16) Ohiya-vo, khaninrowa owokiwa ni soowiixuttiha soohiloka sa Satana. Nave okathi wa maxakha maalupale, khaninrowa ohiya okhala oovareleleya nikhaliheriwaka ni Yehova. Muhihiye weettela ekeekhai, “nto Muluku a murettele, onookhala ni nyuwo”. — aFil. 4:8, 9.