Moota Yehova Oniphavela Awe Wiira Naathokoreryeke Ale Anipaka Etampi Yuulupale

1. Exeeni Yehova oniphavela awe para atthu ootheene?

YEHOVA ohaapattuxa apinaatamu aavahaka etireitu ya othanla etthu aniphavela aya opaka. Owo onnineemererya othanla etthu nimphavela ahu opaka. Khula nihiku hiyo ninnithanla itthu. Etthu yuulupalexa mutthu okhanle awe oothanla, ori wiivahererya wa Yehova ni othanla omukokhorelaka yena vamosa ni anna ni arokora. Yehova oniphavela wiira atthu ootheene amukokhoreleke yena. Mwaha wa xeeni? Mwaha woowi owo onnaaphenta atthu ni oniphavela wiira akhaleke saana. Oniphavela wiira atthu awo akhale apatthani awe ni akhalane okumi ohinimala. — Otum. 30:19, 20; aKal. 6:7, 8.

2. Yehova oniphavela wiira ale apanke etampi yuulupale, masi nlelo ahirukununxe murima aya, apake exeeni? (1 Yohani 2:1)

² Masi, Yehova khonimukhanyererya mutthu wiira omurumeeleke. Owo onnimweemererya khula mutthu othanla ele onrowa awe opaka. Exeeni axitokweene akhanle aya oopaka, akhala wiira mukristau oopatisiwa onnipaka etampi yuulupale? Akhala wiira mutthu owo khonttharuwa, ohaana okumihiwa mmulokoni. (1 aKor. 5:13) Hata okumihiwaka mmulokoni, Yehova onniphavela wiira mutthu owo orukunuxe murima awe ni otthikele waataana ni yena. Mweekeekhai, ti etthu yuulupale emwiirinhe Yehova ovaha mukuttho woowoopola, wiira aalevelele itampi saya ale anirukunuxa murima. (Mmusome 1 Yohani 2:1.) Muluku ahu oophenta, onnaatumererya ale apanke itampi suulupale, orukunuxa murima. — Zak. 1:3; aRom. 2:4; Yak. 4:8.

3. Exeeni ninrowa ahu othokorerya mwaha ola?

³ Yehova onninisuweliha moota onoonela awe etampi ni moota oniwoonela awe ale anipaka etampi yuulupale. Nave owo oniphavela wiira nooneleke siiso. Mwaha ola, nnimwiixutta etthu murummwa Paulo aalenle awe anna a muloko wa oKorinto, nuumala munna mmosa opaka etampi yuulupale. Nuumala-vo, nnooweha etthu murummwa Paulo aalenle awe anna ale, nuumala mulopwana ole orukunuxa murima. Wookiseryani waya, nnooweha moota Yehova oniwoonela awe ale anipaka etampi yuulupale.

ETTHU MURUMMWA PAULO AALENLE AWE MAKRISTAU A OKORINTO NUUMALA OPAKIWA ETAMPI YUULUPALE

4. Etthu xeeni yaakhumelenle khalai muloko wa oKorinto? (1 aKorinto 5:1, 2)

⁴ Mmusome 1 aKorinto 5:1, 2. Ekwaha awe ya neeraru ya omisionaario, murummwa Paulo aahiiwa etthu yoonanara yiiraneyale muloko wa niinaano wa oKorinto. Munna mmosa a oKorinto aanirupihana voohiloka ni mwaara a paapa awe. Etthu eyo yaari yootepa onanara, ‘ovikana ele anipaka aya ale ahinaamini’! Masi muloko wuupuwela wiira khahiyo yaari etthu yootakhala, nave munna ole aahaana okhala mmulokoni. Woonasa wene, atthu akina a mmulokoni yoopuwela wiira yooniherya omoriwa ikharari ntoko Yehova. Masi Yehova khoneemererya wiira arumeyi awe apakeke etampi. Mweettelo wa munna ole waaniwiiriha atthu akina yahaamurumeela Yehova, otikinihiwa vanceene ni waalavulaka arumeyi a Yehova mwa enamuna yoohiloka. Nave-tho, makristau makina, yaawo yaari apatthani awe, yaahipacerya omutakiha. Nto Paulo aahimenrye exeeni anna a muloko ole?

5. Malakiheryo xeeni murummwa Paulo aavanhe awe atthu a muloko wa oKorinto? Nto eyo yaataphulela exeeni? (1 aKorinto 5:13) (Nwehe eteseenyo.)

⁵ Mmusome 1 aKorinto 5:13. Yehova aahimwiiriha murummwa Paulo olepa epaphelo, ohimyaka wiira mulopwana ole aapanke etampi yuulupale ohinaphavela ottharuwa, aahaana okumihiwa mmulokoni. Nto anna a mmulokoni yaarowa omuthokoreryaka sai mutthu ole? Paulo aahaaleela wiira yaahaana ‘ohiya weetta’ ni mutthu owo. Eyo yaataphulela ‘nnakhala ohilya ni mutthu owo’. (1 aKor. 5:11) Okathi ninlya ahu ni mutthu, okhala wene ninnivaanela ni mutthu owo. Nto Paulo aaphavela ohimya wiira atthu a mmulokoni, khiyaakhanle ootthekulaka ni mulopwana owo. Eyo yaamukhaliherya muloko ole ohinanarihiwa ni mweettelo awe woohiloka. (1 aKor. 5:5-7) Nave akhala wiira atthu a mmulokoni yaamuhiya weetta ni mutthu ole, owo aamoona wiira oohiya weettela ephiro ya Yehova. Nave pooti wiira aamoona wiira oopaka etthu yootakhala, nto aamurukunuxa murima awe.

6. Etthu xeeni muloko waapanke aya nuumala waakhela epaphelo ya Paulo? Nave mulopwana ole aatthenke, aapanke exeeni?

⁶ Nuumala Paulo waaroihela epaphelo awe makristau a oKorinto, aanuupuwela vakhala wiira muloko ole waamutthara malakiheryo awe. Nuuvira okathi, Tito aahimuruuhela Paulo ihapari sooreera. Muloko ole waahitthara malakiheryo Paulo aavahale awe. (2 aKor. 7:6, 7) Etthu yootepa ohakalaliha, ti yoowi nuumala muloko otthara malakiheryo ale, mulopwana ole aahirukunuxa murima awe! Aahituruka mweettelo awe ni muupuwelo awe. Nave-tho aahipacerya weettela malamulo a Yehova. (2 aKor. 7:8-11) Vano malakiheryo xeeni makina, Paulo aarowa awe waavaha anna a muloko ole?

MULOKO WAAHAANA OMUTHOKORERYA SAI MULOPWANA OLE AAPANKE ETAMPI YUULUPALE?

7. Mureerelo xeeni waakhumelenle mwaha wa mutthu ole okumihiwa mmulokoni? (2 aKorinto 2:5-8)

⁷ Mmusome 2 aKorinto 2:5-8. Paulo aahimmye wiira: “Vaaphiyerya opwapweliwa wawe mulopwana owo ni atthu anceene”. Ni moolumo makina, mwaha wa mulopwana ole okumihiwa mmulokoni waahikumiherya mureerelo. Sai-sai? Mulopwana ole aahirukunuxa murima awe. — aHeeb. 12:11.

8. Etthu xeeni ekina murummwa Paulo aalenle awe atthu a muloko ole?

⁸ Nto Paulo aahaaleela atthu a muloko ole wiira: “Muhaana omulevelela mulopwana owo ni murima wotheene ni ommaaliha”, nave “mmooniherye wira munnimphenta”. Paulo aaphavela wiira muloko ole opake itthu sikina, ohiya paahi omweemererya mulopwana ole otthikela mmulokoni. Aaphavela wiira anna a muloko ole amooniheryeke mulopwana ole ni moolumo aya ni miteko saya, wiira aamulevelela ni murima wootheene ni annimphenta. Siiso, munna owo aamoonaka wiira anna aahakalala mwaha wa yena otthikela mmulokoni.

9. Xeeni atthu akina yoona aya ovila omulevelela munna ole aarukununxe murima awe?

⁹ Woonasa wene, atthu akina khiyaahakalanle nuumala wiiwa wiira munna ole oottikiheriwa mmulokoni. Xeeni ninhimya ahu siiso? Woonasa wene akina yaahinanariwa mwaha wa mixankiho aakumihenrye awe mmulokoni. Nave akina yaahinyoonyiwa mwaha woowi aahaatthekela. Pooti wiiraka anna akina yaanoona wiira khahiyo waari wa xariya mulopwana ole aapanke itampi suulupale ottikiheriwa mmulokoni, variki anna anceene yiimananiha vanceene wiiwelela malakiheryo a Yehova. (Mulikanyihe ni Luka 15:28-30.) Xeeni vaareerela aya muloko ole omooniherya niphento munna ole aarukununxe murima awe?

10-11. Exeeni yaakhanle ookhumelela, vaakhanle wiira axitokweene yaamukhootta omulevelela munna ole?

¹⁰ Mulopwana ole aarowa woonela sai vaakhanle wiira axitokweene khamweemerenrye otthikela mmulokoni, nuumala yena orukunuxa murima? Aahiiso aarowa woonela sai, vaakhanle wiira nuumala yena otthikela mmulokoni, anna ni arokora khamoonihenrye niphento? Mulopwana owo aamuriipiwa murima vanceene ni aamukhulumuwa. Woonasa wene aamuupuwela wiira khaarowa-tho otthikela mmulokoni. Nto owo aamuhiya olokiherya mweettelo awe wiira otthikele okhalana ompatthani wooloka ni Muluku.

¹¹ Exeeni yaarowa okhumelela vaakhanle wiira anna ni arokora yaamukhootta omulevelela mulopwana ole aarukununxe murima? Awo yaamuhonona waataana waya ni Yehova. Mwaha wa xeeni? Mwaha woowi khiyaarowa otthara ntakiheryo na Yehova na waalevelela ale arukununxe murima. Ohiya-vo, awo yaarowa omutakiha Satana, yoowo ori ootakhala ni ohinimoriwa ikharari. Nave awo yammweemererya Diabo waarumeela wiira amuhiihe mutthu owo omurumeela Yehova. — 2 aKor. 2:10, 11; aEef. 4:27.

12. Muloko ole waarowa omutakiha sai Yehova?

¹² Anna a muloko wa oKorinto yaahitthara ntakiheryo na Yehova, ohiya na Satana. Awo yaahimulevelela mutthu aapanke etampi nuumala orukunuxa murima, ntoko Yehova aamulevelenle awe. Nkawehani etthu alavunle aya ale amulempe Biibiliya, amuhimyaka Yehova. Davidi aahimmye wiira, Muluku ‘tooreera murima, nave okathi wootheene ori oolikana ene wiira olevelele’. (Esal. 86:5) Mikeya aalempe so: “Khavo muluku mukina onlikana ni nyuwo, Apwiya. Nyuwo munnilevelela sottheka, munniliyala ohìwelela wahu”. (Mik. 7:18) Nave Yesaya aahimmye wiira: “Atakhali ehiyeke iphiro saya: alipa-òttheka erukunuxe mirima saya. Etthikeleke w’Apwiya, awo animwamorela ikharari: ehokoloweleke wa Muluku ahu, òwakuva olevelela”. — Yes. 55:7.

13. Xeeni vaari aya vooloka mulopwana ole ottikiheriwa mmulokoni? (Nwehe ekaaxa eni: “Mulopwana Ole a oKorinto Aattikiheriwe Silini Mmulokoni?”)

¹³ Wiira amutakihe Yehova, atthu a muloko wa oKorinto yaahaana omulevelela mutthu ole ni omooniherya wiira yaanimphenta. Paulo aahimmye wiira vaakhanle wiira aamulevelela mutthu ole aarukununxe murima, awo yaamooniherya wiira ‘anniiwelela mwa itthu sootheene’. (2 aKor. 2:9) Nnaamwi mulopwana ole aakumihiwe mmulokoni miyeeri vakhaani paahi, masi owo aahirukunuxa murima. Tivo, axitokweene khiyaapirisari olipelela ovira okathi munceene, ahinatthi omuttikiherya mmulokoni.

NINROWA OTAKIHA SAI EXARIYA YA YEHOVA NI OMORIWA WAWE IKHARARI?

14-15. Exeeni nniixutta ahu ni moota waathokoreriwa aya mwaha waakhumelenle oKorinto? (2 Pedru 3:9) (Nwehe eteseenyo.)

¹⁴ Moota waphukiwe aya mwaha waakhumelenle muloko wa oKorinto, woolempwa mbiibiliyani wiira ‘oniixuttihe etthu’. (aRom. 15:4) Nihiixutta wiira Yehova khoneemererya wiira yaale anipaka etampi yuulupale ni ahinirukunuxa murima aya, nlelo akhaleke mmulokoni. Atthu akina pooti wuupuwelaka wiira mwaha woowi Yehova toomoriwa ikharari, owo onimweemereryaka wiira mutthu ohiniphavela ottharuwa, nlelo okhaleke mmulokoni. Masi khahiyo ti siiso Yehova onooniherya awe omoriwa ikharari. Nnaamwi Yehova ori ene oomoriwa ikharari, owo khoneemererya itthu sootheene. Ele onihimya awe okhala yooreera ni yoonanara kheniturukeya. (Yuda 4) Vaakhanle wiira Yehova onneemererya wiira ale anipaka etampi ahinattharuwa nlelo akhaleke mmulokoni, iwo khahiyo waarowa okhala omoriwa ikharari, maana atthu a mmulokoni yaamuhaawa. — Mir. 13:20; 1 aKor. 15:33.

¹⁵ Yehova khoniphavela wiira opwetexiwe nnakhala mutthu mmosa. Owo oniphavela owoopola atthu, vaaweryaneyaka. Onnaamorela ikharari atthu yaale anirukuxa murima aya ni aniphavela otthikela okhala apatthani awe. (Ezek. 33:11; mmusome 2 Pedru 3:9.) Tivo, okathi mulopwana ole a oKorinto aarukununxe awe murima awe ni aaturunke awe mweettelo awe, Yehova aahaaruma atthu a muloko ole omulevelela ni omwaakhela mmulokoni.

16. Munimoonela sai Yehova nuumala osuwela moota mwaha ole wa oKorinto waaphukiwe aya?

¹⁶ Ntakiheryo na muloko wa oKorinto ninnooniherya wiira Yehova toophenta, ta xariya ni tooreera murima. (Esal. 33:5) Osuwela eyo onniniiriha otepaka omuttottopela Yehova. Hiyo ninnixukhurela osuwela wiira Muluku toomoriwa ikharari, maana ootheene ahu ninnittheka, nnaphavela oleveleliwa. Ninnimuxukhurela vanceene Yehova, onivaha mukuttho woowoopola wiira nileveleliweke itampi sahu. Ti vootepa olipiha osuwela wiira Yehova onnaaphenta vanceene atthu awe ni oniphavela wiira awo ekhaleke saana!

17. Exeeni enrowa othokoreriwa myaha sinittharelana?

¹⁷ Akhala mutthu onipaka etampi yuulupale olelo-va, axitokweene a mmulokoni anitakiha sai ophenta wa Yehova ni animukhaliherya sai mutthu owo orukunuxa murima? Atthu a mmulokoni yooneleke sai okathi axitokweene animukumiha aya mutthu mmulokoni aahiiso animuttikiherya aya? Makoho ala anrowa waakhuliwa myaha sinittharelana.