Moota Woophwanya Waakhuliwa wa Makoho Anooxankihani

1-2. a) Makoho xeeni akhanle owiiriha arumeyi akina a Yehova waanyiherya? b) Mwaha ola ninrowa othokorerya exeeni?

OOTHEENE AHU, ikwaha sikina ninnikhalana makoho yaawo akhanle oniiriha waanyiheryaa ni onikhulumula. Mwa ntakiheryo, mmuupuwele mmiravo, yoowo ori namalaleerya oohipatisiwa onaanyiherya akhala wiira Yehova onnimuthokorerya. Nto mwaha wa waanyiherya iwo, owo onnoovelela opatisiwa. Ntakiheryo nikina, ti na munna yoowo okathi ari awe mmiravo, aathanlale omuhela Yehova nipuro noopacerya mweekumini mwawe, ohiya ophenta musurukhu. Vano oniphwanya musurukhu vakhaani paahi para okhaliherya emusi awe itthu sinipirisari aya. Nto pooti wiikoha, akhala wiira aahipaka yoothanla yooloka okathi ari awe mmiravo. Nave mmuupuwele murokora oowuuluvala yoowo ohiniwerya ovara miteko sa Yehova ntoko khalai. Owo pooti okhulumuwa okhala wiira khoniwerya ovara miteko ntoko aapaka awe. Niireke mootoko okhalana makoho ntoko ala: ‘Kiireke mwekeekhai Yehova onnikithokorerya? Kiireke wiimananiha waka wiira kimurumeele Yehova yoothanla yoolaka kipanke aka? Kiireke muteko kininvarelaka Yehova wookhalana efaita?

² Vakhala wiira khininrowa ophavela osuwela waakhuliwa wa makoho ntoko ala, waamini wahu pooti ovukuwa ni nnoohiya omurumeela Yehova. Mwaha ola, nnoothokorerya malakiheryo a mbiibiliyani yaawo anrowa onikhaliherya vakhala wiira nookhalana makoho ntoko ala: (1) Kiireke Yehova onnikithokorerya tthiri? (2) Kiireke wiimananiha waka wiira kimurumeele Yehova, yoothanla yooloka kipanke aka? Ni (3) kiireke muteko kininvarelaka Yehova wookhalana efaita?

MOOTA WOOPHWANYA WAAKHULIWA WA MAKOHO AHU

3. Enamuna xeeni ya ophwanya waakhuliwa wa makoho ahu?

³ Omusoma Biibiliya, ti enamuna nikhanle ahu oophwanya waakhuliwa wa makoho ahu. Akhala wiira nnoopaka eyo, nnookhala oolipa, okhalana waataana wooloka ni Yehova nave ninrowa okhala oolikana ene wiira ‘nilipihe waamini wahu’. — 1aKor. 16:13.

4. Ninrowa owerya sai ‘ovarerya itthu sootheene’? (1 aTesaloonika 5:21)

⁴ Mmusome 1 aTesaloonika 5:21. Niireke mooweha wiira Biibiliya onnitumererya ‘ovarerya itthu sootheene’? Eyo eniphavela ohimya exeeni? Eyo eniphavela ohimya wiira nihaana ovarerya itthu sootheene ninkupali ahu wiira ti sa ekeekhai nave nnoowerya opaka eyo, nlikanyihaka itthu ninkupali ahu ni ele Biibiliya onihimya awe. Mwa ntakiheryo, mmuupuwele mmiravo yoowo onuupuwela wiira Muluku khonimuthokorerya. Niireke ohaana weemererya muupuwelo owo ni okupali? Nnaari, owo ohaana ‘ovarerya itthu sootheene’. Onoopaka eyo, vakhala wiira onoosuwela moonelo wa Yehova voohimya sa mwaha owo.

5. Ninrowa onwiriyana sai Yehova aakhulaka makoho annixankiha?

⁵ Okathi nimmusoma ahu Biibiliya, onlikana ni onwiriyana Yehova. Masi wiira niphwanye waakhuliwa wa makoho ahu annixankiha, nihaana wiimananiha vanceene. Wanipacerya, nihaana osoma yoolepa enivarihana ni nikoho nahu. Nyuwo pooti orumeela ikaruma sootheene sinikumiheriwa ni mutthenkeso wa Yehova wiira mutokose mwaha owo. (Mir. 2:3-6) Nave-tho, nihaana onvekela Yehova wiira onikhaliherye okathi nintokosa ahu, wiira niphwanye waakhuliwa wa nikoho ninnixankiha. Nihaana ophavelasa malakiheryo a mbiibiliyani ni myaha sikina sinivarihana ni ele ennixankiha. Ti va miruku, osoma soowiiraneya sa atthu aniromoliwa mbiibiliyani, yaawo yaarina muxankiho mmosa-ru ni wawinyu.

6. Mithukumano sinnikhaliherya sai wiira niphwanye waakhuliwa wa makoho ahu?

⁶ Enamuna ekina ‘nninwiriyana’ ahu Yehova, ori orowela mithukumano. Okathi nihincompela ahu mithukumano, ninnikhalana eparakha ya owiriyana myaha ni ikomentaario sa anna ni arokora seiyo sikhanle owaakhula makoho annixankiha. (Mir. 27:17) Vano nrowe niphwanye waakhuliwa wa makoho nlavunle ahu wanipacerya wa mwaha ola.

KIIREKE YEHOVA ONNIKITHOKORERYA TTHIRI?

7. Nikoho xeeni atthu akina akhanle aya owiikoha?

⁷ Niireke mootoko wiikoha akhala wiira Yehova onnoothokoreryani tthiri? Vakhala wiira vanninivila okupali wiira Yehova onninithokorerya, khivanrowa oweryaneya okhalana waataana wooloka ni Mpattuxa a olumwenku. Vanikhala ntoko wiira Mwene Davidi uupuwela siiso. Owo aahitikinihiwa vanceene, nuumala osuwela wiira Yehova onnimuthokorerya khula mutthu. Nuumala-vo, owo aakonhe so: “Khoo Yehova, pinaatamu ti pani wiira mmuthokoreryeke, nave mwaana a mutthu ti pani wiira mmuthokoreryeke?” (Esal. 144:3) Mwarowa ophwanya woowi waakhuliwa wa nikoho na Davidi?

8. Moovarihana ni 1 Samuweli 16:6, 7, 10-12, etthu xeeni Yehova oniweha awe wa apinaatamu?

⁸ Biibiliya oniixuttiha wiira Yehova, onnaathokorerya atthu yaale aniixoona wiira kharina efaita. Mwa ntakiheryo, Yehova aahimuruma profeta Samuweli orowa etthoko ya Yese, wiira amuthanle mwene a wIsarayeli. Nto Yese, aahiwiitthana anaawe 7, masi mmosa ookiseriwa khaakhanle opuro owo.b Masi mwa anamwane ale 7, khuuvo Yehova aamuthanlale awe. (Mmusome 1 Samuweli 16:6, 7, 10-12.) Yehova aanisuwela oratteene murima wa Davidi, eyo piiyo, okhala mmiravo amphenta vanceene Yehova.

9. Xeeni munreerela anyu okupali wiira Yehova onnoothokoreryani? (Nwehe efootu.)

⁹ Niireke munnuupuwela moota Yehova oowoonihenryaweni wiira onnoophentani? Mwa ntakiheryo, owo ori oolikana ene wiira oovaheeni miruku moovarihana ni itthu sinooxankihani. (Esal. 32:8) Eyo enitaphulela wiira Yehova onnoosuwelani oratteene ni onnisuwela itthu munipirisari anyu. (Esal. 139:1) Akhala wiira munimweettela malakiheryo a Yehova, munooweha moota owo onookhaliheryaweni ni munookupali wiira owo onnoothokoreryani. (1Wah. 28:9; Mit. 17:26, 27) Yehova, onniweha wiimananiha wanyu wiira mmurumeele. Owo onnisuwela mikhalelo sanyu sooloka, tivonto oniphavela awe okhala mpatthani anyu. (Yer. 17:10) Nave-tho, owo oniphavela wiira mweemererye okhala mpatthani awe. — 1Yoh. 4:19.

KIIREKE KOOPAKA SOOTHANLA SOOLOKA?

10. Okathi nnuupuwela ahu soothanla sahu sa khalai, makoho xeeni akhanle ookhumelela?

¹⁰ Ikwaha sikina, mutthu pooti wiikoha akhala wiira soothanla aapanke awe khalai saari sooloka. Woonasa wene, ookhala mutthu okhweihenrye okumi awe wiira omurumeele Yehova, ohiyaka muteko aahiiso nakoso wamphwanyiha musurukhu munceene. Pooti wiira woovira okathi munceene, nave onnaaweha atthu akina sihinaathowa itthu. Nto mutthu owo pooti opaceryaka wiikoha so: ‘Kiireke wiimananiha waka wiira kimurumeele Yehova, yoothanla yooloka kipanke aka? Kiireke kaahaana wiimananiha ovara muteko munceene wiira kikhalane okumi wooloka?’

11. Exeeni yaamuxankiha mulipa-oolepa Esaalimu 73?

¹¹ Akhala wiira mookhalana makoho anooxankihani, muupuwele moonelo wa mulipa-oolepa Esaalimu 73. Owo aaniweha wiira atthu yahaamurumeela Yehova, yaanikhalana okumi wooloka, musurukhu munceene ni khiyaaxankiheya ni khula etthu. (Esal. 73:3-5, 12) Okathi aaweha awe atthu ale akhumelaka saana, owo aanuupuwela wiira wiimananiha wawe omurumeela Yehova, khiwamphwanyiha mureerelo. Mwaha wa miyuupuwelo iyo, owo aanikhulumuwa “nihiku nootheene”. (Esal. 73:13, 14) Exeeni aapanke awe wiira omala-malihe miyuupuwelo iyo soohiloka?

12. Moovarihana ni Esaalimu 73:16-18, mulipa-oolepa Esalimo ela, aaphwanyale sai waakhuliwa wa makoho awe?

¹² Musome Esaalimu 73:16-18. Nasalimo ole, aahikela empa yoowaarya ya Yehova. Ori ene opuro ole woomaaleleya, owo aahiwerya wuupuwela oratteene. Owo aahuupuwela wiira nnaamwi atthu ale yaarina okumi wooloka okathi ole, awo khiyaarina nlipelelo na muhoolo. Nto wuupuwelela eyo, yaahimphwanyiha murettele ni aahoona wiira, omuhela Yehova nipuro noopacerya, yaari yoothanla yootepexa oloka aapanke awe. Okhala wiira aahuupuwelela oratteene mwaha ole, owo aahilakela ohihiya omurumeela Yehova. — Esal. 73:23-28.

13. Munrowa ophwanya sai murettele akhala wiira munnaanyiherya wiira khampanke soothanla sooloka wiira mmurumeele Yehova? (Nwehe efootu.)

¹³ Mukhaliheriwaka ni Nuulumo na Muluku, munoowerya ophwanya murettele. Moota xeeni? Muupuweleke itthu murina anyu, ohela muhina waataana wanyu ni Yehova. Nave muhiliyale wiira atthu ahinimurumeela Yehova, otthuveliwa waya ovahiwa itthu sa olumwenku ola paahi. Atthu awo, anroromela mihakhu arina aya okhala wiira kharina nlipelelo na muhoolo. Olelo-va, Yehova pooti ohoovahani itthu sootheene munipirisari anyu masi muhoolo owo onimoovahani itthu sinceene muhinuupuwela anyu. (Esal. 145:16) Nave ikwaha sikina pooti wuupuwelaka so: Okumi aka waamuturukeya vakhanle wiira kaahipaka soothanla sikina. Masi ekeekhai ti yoowi, akhala wiira moopaka soothanla mwaha womphenta Yehova ni atthu akina, munookhalanaka khula okathi itthu munipirisari anyu wiira muhakalaleke.

KIIREKE MUTEKO KININVARELAKA YEHOVA WOOKHALANA EFAITA?

14. Mixankiho xeeni sinaaphwanya arumeyi a Yehova ni nikoho xeeni aniikoha aya?

¹⁴ Mwaha wa wuuluvala, owereyasiwa ni mixankiho sikina, pooti owiiriha arumeyi akina a Yehova ohiwerya onvarela muteko ntoko khalai. Nave arumeyi akina, pooti waanyiherya akhala wiira Yehova onnivaha efaita muteko anivara aya. Awo pooti wiikoha so: ‘Kiireke kookhalana efaita para Yehova?’

15. Mulipa-oolepa Esaalimu 71, exeeni aakupali awe?

¹⁵ Mulipa-oolepa Esaalimu 71, aahikhalana moonelo mmosa-ru. Owo aavekenle so: “Muhikinyanyale okathi ikuru saka sinrowa aya okimalela”. (Esal. 71:9, 18) Nnaamwi Nasaalimo aarina moonelo owo, aanisuwela wiira Yehova khaarowa omunyanyala aahihiye-ru omurumeela. Nasaalimo ole, aahiixutta wiira Yehova onnihakalala vanceene okathi onaaweha awe arumeyi awe, yiimananihaka wiira amurumeeleke nnaamwi saaphwanyaka mixankiho. — Esal. 37:23-25.

16. Yehova oniwoonela sai anna ni arokora oowuuluvala? (Esaalimu 92:12-15)

¹⁶ Xontte anna oowuuluvala, mukhalaneke moonelo mmosa-ru wa Yehova. Nto nnaamwi muhiweryaka opaka ele mwaaphavela anyu, Yehova onimookhaliheryani wiira mukhalane waataana wooloka ni yena. (Musome Esaalimu 92:12-15.) Tivonto, muhuupuweleke itthu muhiniwerya anyu opaka, ohiya-vo, nwehexexeke itthu muniwerya anyu. Mwa ntakiheryo, pooti waakhaliherya atthu akina olipiha waamini waya, awehaka ntakiheryo nanyu nooloka. Nyuwo pooti waaleela moota Yehova ookhalihenryaweni iyaakha sivinre, ni nlipelelo murina anyu na muhoolo. Ohiya-vo, muhiliyale wiira mavekelo anyu pooti waakhaliherya atthu akina. (1Ped. 3:12) Ekeekhai ti yoowi, moohicikha makhalelo ahu, nnoowerya onvaha Yehova ni waakhaliherya atthu akina ni ele eniwerya ahu.

17. Xeeni nihinreerela ahu wiilikanyiha ni atthu akina?

¹⁷ Niireke munniriipiwa murima, mwaha wa ohiwerya onvarelaka muteko Yehova ntoko khalai? Mukupaliki wiira Yehova onnivaha efaita itthu sootheene muniwerya anyu opaka. Woonasa wene, munnilikanyiha miteko muniwerya anyu ni miteko atthu akina aniwerya aya opaka. Musyakeke okhalana muupuwelo ntoko owo! Mwaha wa xeeni? Mwaha woowi Yehova, khonaalikanyiha atthu. (aKal. 6:4) Mwa ntakiheryo, Maria aahinvaha Yesu makhura a musurukhu munceene. (Yoh. 12:3-5) Muthiyana naamukhweli oothoiwa, aahivaha mutemplo musurukhu waarina efaita vakhaani. (Luka 21:1-4) Masi Yesu, khaalikanyinhe athiyana awo. Ohiya-vo, owo aahiweha etthu yaapanke aya yeeyo yooniherya waamini. Mwa enamuna emosa-ru, Yehova onnivaha efaita itthu sootheene munipaka anyu wiira mooniherye waamini ni omphenta wanyu, hata moonaka wiira khamunipaka itthu sinceene.

18. Exeeni enrowa onikhaliherya ophwanya waakhuliwa wa makoho annixankiha? (Nwehe ekaaxa eni: “Nuulumo na Muluku Pooti Wookhaliheryani Ophwanya Waakhuliwa wa Makoho Anooxankihani”.)

¹⁸ Ikwaha sikina, pooti okhalanaka makoho akhanle onikhulumula. Masi ntoko niixuntte ahu, Nuulumo na Muluku Biibiliya, pooti onikhaliherya ophwanya waakhuliwa wa makoho awo. Tivonto, nihaana opaka sootheene siniwerya ahu wiira niphwanye waakhuliwa wa makoho annixankiha. Nave mukupaliki wiira Yehova onnoothokoreryani. Owo onnixukhurela wiimananiha munipaka anyu, wiira muhele nipuro noopacerya Omwene awe. Nto, owo onimooreelihani. Nikupaliki wiira Yehova onnaaphenta ni waathokorerya arumeyi awe ootheene oororomeleya.