Yehova Ookhalana Owerya

1. Moise oonihenrye sai wiira aanimuroromela Yehova okathi aakumiha awe aisarayeli wExiitu?

ELIIVURU ya aHeeberi, ennaahimya atthu yaamwaamini Yehova. Mmosa a yaawo, aari Moise. (aHeeb. 3:​2-5; 11:​23-25) Owo aahooniherya waamini, okathi eemerenrye awe waakumiha aisarayeli wExiitu. Owo khaamoovale Farawo ni anakhotto awe. Omuroromelaka Yehova, owo aahaalapuxa aisarayeli Ephareya Yooxeerya, ni muhoolo mwaya aahaaviriha moothakoni. (aHeeb. 11:​27-29) Aisarayeli anceene, yaahihiya ororomela wiira Yehova aamwaakhaliheryaka, masi Moise aahivikaniha omuroromela Muluku awe. Moise khaahiyale waamini, okhala wiira aaniweha moota Yehova aakhaliherya awe aisarayeli, aavahaka eyoolya ni maasi moothakoni mme.a — Okhum. 15:​22-25; Esal. 78:​23-25.

2. Xeeni Muluku aamukonhe awe Moise wiira “munona wira owerya waka khumphiyerya?” (Moothakoni 11:​21-23)

² Nuuvira mwaakha mmosa aisarayeli akhumme ene wExiitu, Yehova aahaaleiherya wiira aamwaavaha enama. Masi hata aarina waamini woolipa, Moise aahimukoha Yehova vakhala wiira anwerya opaka ele aaleihenrye awe. Moothakoni mme, yaahikhala atthu anceene ni khiyaakhanle eyoolya, nto eyo yaahimwiiriha opacerya ohoverya vakhala wiira Yehova aamwaavaha enama eniphiyerya. Yehova, aahimukoha Moise iiraka: “Munona wira owerya waka khumphiyerya?” (Mmusome Moothakoni 11:​21-23.) Nuulumo noowi “owerya” nilavuliwe va, onihimya munepa woowaarya wa Muluku aahiiso ikuru Yehova onirumeela awe, wiira opake ele oniphavela awe. Vaakhala ntoko wiira Yehova aamukoha so Moise: ‘Nyuwo munoona wiira miyo nkiniwerya opaka ele eleihenrye aka?’

3. Xeeni ninreerela ahu othokorerya etthu yaamwiiranenle Moise ni aisarayeli?

³ Niireke munnihoverya vakhala wiira Yehova onimookhaliheryani nyuwo ni emusi anyu, oovahakani itthu munipirisari anyu wiira mukhale akumi? Hata muhoveryaka aahiiso nnaari, mwaha ola nnoothokorerya etthu yaamwiirinhe Moise ni aisarayeli, ohoverya vakhala wiira Yehova amwaakhaliherya. Nave nnooweha malakiheryo a mbiibiliyani, yaawo anrowa onikhaliherya olipiha omuroromela wahu Yehova ni annikupaliha wiira khula okathi onoonikhaliheryaka.

ETTHU NNIIXUTTA AHU NI MOISE NI AISARAYELI

4. Xeeni aisarayeli anceene, yaapacenrye aya ohoverya vakhala wiira Yehova aamwaakhaliherya?

⁴ Xeeni aisarayeli anceene, yaapacenrye aya ohoverya vakhala wiira Yehova amwaakhaliherya? Mwaha woowi, yaahikhala “atthu akina anjene” yahaakhanle aisarayeli. Awo yaahitakaahana ni aisarayeli, akhumaka wExiitu arowaka Elapo Yooleiheriwa. (Okhum. 12:38; Otum. 8:15) Ale yahaakhanle aisarayeli, yaahipacerya wiixinliha mwaha woolya emana, nave aisarayeli anceene yaahipacerya waatakiha. (Mooth. 11:​4-6) Atthu ale, yaamakela wuupuwela eyoolya yaalya aya wExiitu. Okhala wiira atthu ale yaanimukhanyererya Moise wiira aavahe enama, owo anuupuwela opaka eyo masi khaasuwela woophwanya enama eyo. — Mooth. 11:​13, 14.

5-6. Aisarayeli yaahapuxinwe sai ni atthu akina, nave ele yaawiiranenle enniixuttiha exeeni?

⁵ Ale yahaakhanle aisarayeli, khiyaaxukhurela itthu sootheene Yehova aavaha awe. Nave aisarayeli anceene, yaahipacerya okhalana muupuwelo mmosa-ru. Etthu emosa-ru, pooti oniiranela. Okathi atthu akina nneettana ahu ahinxukhuru aya, hiyo-tho pooti opacerya wiixinliha ni ohihakalala ni itthu Yehova onnivaha awe. Eyo pooti oniiraneela, vakhala wiira nnimuupuwela vanceene itthu naarina ahu khalai aahiiso okhalela nrima itthu atthu akina arina aya. Moovirikana ni vo, wiira nikhale atthu oohakalala, nihaana oxukhurela khula etthu Yehova onnivaha awe moohicikha makhalelo ahu.

⁶ Aisarayeli yaahaana wuupuwelela itthu Yehova aaleihenrye awe. Owo aahimmye wiira aamwaavaha itthu sooreera nuumala ophiya Elapo Yooleiheriwa, ohiya moothakoni mme yeetta aya. Mwa enamuna emosa-ru, nihaana wuupuwelela itthu sooreera Yehova oleihenrye awe onivaha elapo esya, ohiya wuupuwelela itthu nihirina ahu nenna-va. Nave nihaana wuupuwelela iversiikulu sa mbiibiliyani, seiyo sinrowa onikhaliherya ohihiya omuroromela Yehova.

7. Xeeni ninreerela ahu okupali wiira Yehova khula okathi onoonikhaliherya?

⁷ Ohiya-vo, nyuwo pooti wiikoha exeeni yaamwiirinhe Yehova omukoha Moise wiira: “Munona wira owerya waka khumphiyerya?” Owo aaphavela wiira Moise uupuweleke itthu iya piili: 1) Owerya wawe khonimala ni 2) owerya wawe onniphiya khula opuro. Tivonto, hata aisarayeli ale yaari moothakoni mme, Yehova anwerya waavaha enama yinceene. Muluku aahooniherya owerya wawe, “ni ntata nawe na ikuru ni ookonle ene moono awe”. (Esal. 136:​11, 12) Tivonto, okathi sinniphwanya aya mixankiho, niroromeleke wiira Yehova onoowerya omukhaliherya khula mmosa a hiyo, moohicikha opuro ori awe. — Esal. 138:​6, 7.

8. Etthu xeeni yoohiloka atthu anceene yaapanke aya moothakoni, nave ninrowa osyaka sai ohipaka etthu emosa-ru? (Nwehe eteseenyu.)

⁸ Yehova aahipaka ele aaleihenrye awe, aavahaka atthu awe anapiri anceene. Mooriipiha murima, aisarayeli khiyaaxukhurenle mwiiriirya ole aapakiwe ni Yehova. Ohiya-vo, awo yaahiithukumanyerya anapiri anceene okhala wiira khiyaaphiyeriwa. Yehova ‘aahaaviruwela vanceene atthu a Isarayeli’, mwaha wa ophavela waya itthu sootakhala ni aahaapwetexa. (Mooth. 11:​31-34) Nnoowerya wiixutta etthu ni ntakiheryo na aisarayeli. Nihaana osyaka okhala atthu oohiphiyeriwa. Nikhale athaaciri aahiiso nnaari, nihaana wiithukumanyerya “mihakhu wiirimu”, eyo piiyo, nikhalaneke waataana wooloka ni Yehova vamosa ni Yesu. (Math. 6:​19, 20; Luka 16:9) Napaka eyo, nikupaliki wiira Yehova onoonivaha khula etthu nimpirisari ahu.

9. Tani onireerela ahu omuroromelaka moomalela?

⁹ Olelo-va, Yehova ori oolikana ene wiira aakhaliherye atthu awe. Hata vari siiso, eyo khentaphulela wiira khaninrowa othoiwaka musurukhu aahiiso yoolya.b Masi Yehova, khonikhala-khala oninyanyalaka. Khula okathi, owo onoonivahaka khula etthu nimpirisari ahu moohicikha muxankiho onniphwanya. Ninrowa wooniherya sai omuroromela wahu Yehova wiira onoonivahaka itthu nimpirisari ahu? Nrowe nthokorerye mixankiho miili nikhanle ahu owooniherya eyo: 1) Vaavo nimphavela ahu muteko wiira nikhapeleleke emusi ahu ni 2) vaavo nnuupuwelela ahu moota okumi ahu onrowa awe okhala nuuluvala vale.

OKATHI NIMPHAVELA AHU MUTEKO

10. Mixankiho xeeni sikhanle ooniphwanya?

¹⁰ Vaavo olumwenku ola onaattamela aya wanikisa, makhalelo anrowa otepaka oxankiha. Mixankiho sinrowa otepaka okhumelela, mwaha wa ohiiwanana wa anapoliitika, ikhotto, ihasara sa ephattu ni iretta. Itthu iyo pooti oniiriha oyeleela muteko, itthu nirina ahu ntoko empa ni mireerelo sikina aahiiso othaamela elapo ekina. Nto wiira nihihiye okhapelela emusi ahu, exeeni enrowa onikhaliherya opaka soothanla sinooniherya wiira ninnimuroromela Yehova?

11. Exeeni enrowa wookhaliheryani ovilela mixankiho ntoko othoiwa musurukhu? (Luka 12:​29-31)

¹¹ Etthu yoopacerya munireerela anyu opaka, ori omuroromela Yehova ni omuleela khula etthu enooxankihani. (Mir. 16:3) Munvekeleke Yehova ankhili wiira mpake soothanla sooloka ni wiira ookhaliheryeni okhala oomaaleleya musyakaka “oxanka vanceene”. (Mmusome Luka 12:​29-31.) Muhihiye onvekela Yehova wiira ookhaliheryekeni ohakalala ni itthu murina anyu. (1 Tim. 6:​7, 8) Mutokoseke iliivuru sahu sinimutthokiherya Biibiliya, seiyo sinilavula sa moota woovilela mixankiho wa othowa musurukhu. Atthu anceene, anihimya wiira sihaakhaliherya vanceene iviidiyu ni myaha siri esaiti jw.org, sinilavula sa moota woovilela muxankiho wa othowa musurukhu.

12. Makoho xeeni mutthu onireerela awe wiikoha, okathi onipaka awe yoothanla wiira okhaliherye emusi awe?

¹² Atthu akina yaaheemererya muteko yoowo waawiirinhe okhala ottaiwene ni emusi aya. Masi nuuvira okathi, ahoona wiira yoothanla ele khahiyo yaari ya miruku. Muhinatthi weemererya muteko, muhuupuweleke paahi musurukhu munrowa nyu waakhelaka masi muupuweleke vakhala wiira muteko owo onimookhaliheryani nyuwo ni emusi anyu olipiha waataana wanyu ni Yehova. (Luka 14:28) Mwiikoheke so: ‘Exeeni enrowa omwiiraneela ole othelanne aka kakhala ottaiwene? Kiireke muteko ola onookeemererya orowela mithukumano sootheene, olaleerya ni oviriha okathi kiri ene ni anna ni arokora?’ Vakhala wiira mookhalana anamwane, vaamureerela wiikoha so: ‘Kiireke kinoowerya waakhaliherya anaaka okhalana waataana wooloka ni Yehova ni omwiiwelela?’ (aEef. 6:4) Okathi munipaka anyu soothanla, mutthareke moonelo wa Yehova ohiya otthara miruku sa amusi ni apatthani yaawo ahiniiwelela malakiheryo a mbiibiliyani.c Tony, yoowo onikhala wÁsia, aahileiheriwa waakhelaka musurukhu munceene vakhala wiira aamurowa ovara muteko elapo ekina. Masi nuumala ovekela voohimya sa mwaha owo ni ovaanela ni mwaarawe, owo aahilakela oheemererya muteko ole. Ohiya-vo, awo yaahivaanela moota yaarowa aya okhweiherya okumi aya, wiira arumeeleke musurukhu vakhaani. Mwaha wookhootta muteko ole, Tony onihimya so: “Kaahikhalana eparakha ya waakhaliherya atthu anceene omusuwela Yehova, waahela muhina anaaka yaawo animurumeela Yehova moohakalala. Emusi aka, ehiixutta wiira okathi nneettela ahu miruku sa Yesu siri Matheyo 6:​33, Yehova onoonikhaliheryaka”.

WUUPUWELA MAKHALELO AHU NUULUVALA VALE

13. Itthu xeeni nikhanle ahu oopaka nenna-va seiyo sinrowa onikhaliherya nuuluvala vale?

¹³ Omuroromela wahu Yehova, pooti weehereriwa vakhala wiira ninnuupuwelela moota makhalelo ahu anrowa aya okhala nuuluvala vale. Biibiliya onnintumererya wiira nihikhaleke atthu oonyonyiwa, masi nihaana ovara muteko wiira niikhapelele muhoolo. (Mir. 6:​6-11) Vaaweryaneyaka, ti vamiruku opweha musurukhu wiira nirumeele muhoolo. Ekeekhai wiira musurukhu, pooti onikhaliherya okathi wooxanka. (Mus. 7:12) Masi khanimphavela wiira musurukhu ekhaleke ti etthu ninvaha ahu efaita yuulupale mookumi mwahu.

14. AHeeberi 13:​5, onnikhaliherya sai ohitepa oxanka ni itthu sa muhoolo?

¹⁴ Yesu aahilavula nlikanyiho na mulopwana aithukumanyerya muhakhu, masi ohinapaka ele Yehova oniphavela awe. (Luka 12:​16-21) Khuuvo onsuwela moota okumi awe onrowa aya okhala meelo. (Mir. 23:​4, 5; Yak. 4:​13-15) Ohiya-vo, Yesu aahimmye wiira ootheene yaale aniphavela okhala atthareli awe, ahaana oleva itthu sootheene arina aya. (Luka 14:33) Eyo ti etthu yaawiiranenle makristau a oYudeya okathi wa arummwa. Awo yaari oolikana ene oleva itthu sootheene yaarina aya. (aHeeb. 10:34) Olelo-va, anna ni arokora anceene aahiihiwa muteko yaavara aya, mwaha woohiirela mpantta epartiitu. (Wiis. 13:​16, 17) Exeeni yaakhalihenrye ovilela? Awo annikupali ni anniroromela yooleiherya ya Yehova eni: “Miyo nkinikhala-khala koohiyakani, nave nkinikhala-khala koonyanyalakani”. (Mmusome aHeeberi 13:5.) Tivonto, nipakeke khula etthu eniwerya ahu wiira nikhalane etthu enrowa onikhaliherya nuuluvala vale. Nave nihaana ororomela wiira Yehova onoonikhapelela okathi sinrowa aya okhumelela itthu mootutuxerya.

15. Muritti xeeni anamuyari arina aya? (Nwehe efootu.)

¹⁵ Ilapo sikina, anamathelana annaayara anamwane anceene aphavela wiira anamwane awo aphwanyeke musurukhu wiira yaakhapeleleke anamuyari aya yuuluvala vale. Biibiliya onihimya wiira anamuyari ahaana waasukerya mihakhu anaaya, eyo piiyo, waakhapelela ni waavaha itthu anipirisari aya. (2 aKor. 12:14) Ekeekhai wiira okathi anamuyari anuuluvala aya anoopirisariki nikhaliheryo na anaaya ntoko musurukhu ni itthu sikina. Nave anamwane anceene annihakalala vaavo anaakhaliherya aya anamuyari aya. (1 Tim. 5:4) Masi anamuyari animuroromela Yehova, annihakalala okathi anaakhaliherya aya anaaya okhala arumeyi a Muluku, ohiya waahuwa anamwane yuupuwelaka wiira animwaavahaka musurukhu yuuluvala vale. — 3 Yoh. 4.

16. Anamuyari, anrowa owiixuttiha sai anaaya wiira muhoolo aweryeke wiikhapelela? (aEefeso 4:28)

¹⁶ Okathi muniwiixuttiha anyu aniinyu sa moota akhanle aya owiikhapelela muhoolo, nwooniheryeke wiira munnimuroromela Yehova. Nlelo ari ene amiravo, nwiixuttiheke wiira ovara muteko ni matata aya, etthu erina efaita yuulupale. (Mir. 29:21; mmusome aEefeso 4:28.) Okathi aninnuwa aya, mwaakhaliherye wiixutta etthu oskola. Anamuyari pooti otokosa malakiheryo a mbiibiliyani, moottharelana yaakhaliheryeke anaaya opaka soothanla mwa miruku voohimya sa osoma. Yoolakela ya anamuyari, ori waakhaliherya anaaya ophwanyaka itthu sinaathowa ni wiira akhalaneke okathi woolaleerya aahiiso okhala pioneero.

17. Exeeni ninreerela ahu okupaliki?

¹⁷ Ale animuroromela Yehova, annikupali wiira owo ookhalana owerya ni onimwaavaha itthu anipirisari aya. Vaavo nnaattamela ahu wanikisa wa makhalelo ala ootakhala, nihaana olipiha omuroromela wahu Yehova. Moohicikha mixankiho sinrowa oniphwanya, ninniroromela wiira Yehova onoorumeela ikuru sawe wiira onivahe itthu sinnithowa. Nave moohicikha opuro niri ahu, nikupaliki wiira Yehova onoorumeela ntata nawe na ikuru ni onimookola moono awe wiira onikhaliherye.