MWAHA ONITHOKORERIWA 16
NSIPO 87 Murwe Mulipihiwe
Ti Vooreera Waataana ni Anna ni Arokora!
“Moone! Ti vootepa oreera ni voohakalaliha, axinna okhala vamosa, ari ene oowiiraana!” — ESAL. 133:1.
ELE NINROWA AHU WIIXUTTA
Mwaha ola, nnooweha moota nikhanle ahu oowaathokorerya anna ni arokora ni moota Yehova onnireeliha awe mwaha woopaka eyo.
1-2. Etthu xeeni Yehova onivaha awe efaita, ni onnivekela wiira nipakeke exeeni?
YEHOVA onnivaha efaita yinceene, enamuna nnaathokorerya ahu atthu akina. Yesu ohimmye wiira nihaana omphenta mukhwiihu ntoko siniiphenta ahu. (Math. 22:37-39) Nto eyo, enihela muhina waareerela murima hata atthu yaale ahinimurumeela Yehova. Okathi nnaareerela ahu murima atthu akina, hiyo ninnimutakiha Yehova Muluku, yoowo ‘onaakumiherya nsuwa atthu ootakhala murima ni atthu ooreera murima; nave onnaavaha epula anaxariya ni ale ahikhanle anaxariya’. — Math. 5:45.
2 Nnaamwi Yehova aaphentaka apinaatamu ootheene, owo onnaaphenta vanceenexa, ale animwiiwelela. (Yoh. 14:21) Yehova oniphavela wiira nitthareke ntakiheryo nawe. Owo onnitumererya wiira ‘naaphenteke vanceenexa’ anna ni arokora. (1 Ped. 4:8; aRom. 12:10) Niphento nno ninwooniherya ahu anna ni arokora, nnoolikana ni niphento nimmooniherya ahu mmusi ahu aahiiso mpatthani ahu.
3. Nilavulaka sa ophenta, etthu xeeni ninreerela ahu wuupuwelelaka?
3 Ntoko siisaale vanipirisari aya okhapelela mwiri ori muxarti mwahu wiira wunnuweke, mwa enamuna emosa-ru, nihaana wiimananiha waaphenta atthu akina, wiira ophenta iwo wunnuweke. Murummwa Paulo, aahaaleela makristau wiira: “Muhihiye ophentana wanyu ntoko axinna”. (aHeeb. 13:1) Yehova oniphavela wiira nihihiye waaphenta atthu akina. Mwaha ola, nnooweha moota nikhanle ahu oowaataana ni anna ni arokora, ni itthu nikhanle ahu oopaka wiira nihihiye opaka eyo.
XEENI VARI AYA VOOLOKA WAATAANA NI ATTHU AKINA?
4. Moovarihana ni Esaalimu 133:1, ninrowa ohihiya sai wiiraana ni anna ni arokora? (Nwehe ifootu.)
4 Musome Esaalimu 133:1. Ninnikupali ele nasaalimu aalempe awe wiira “ti vootepa oreera ni voohakalaliha”, okhalana apatthani animphenta Yehova. Ntoko siisaale mutthu ahaarowa awe ovaha efaita mwiri muulupale onoona awe khula nihiku, hiyo-tho pooti opacerya ohivaha efaita wiiraana nirina ahu ni anna ni arokora. Hiyo nimmakela waaweha anna ni arokora, woonasa wene ikwaha sinceene khula esumana. Nto ninrowa ohihiya sai waavaha efaita? Waaphenta wahu anna ni arokora, onimuncerereya vakhala wiira nnimuupuwela efaita erina aya anna ni arokora awo mookumi mwahu ni mmulokoni.
Nihaana wiimananiha olipiha wiiraana wahu (Nwehe ettima 4)
5. Ophentana wahu mukina ni mukhwaawe, onaakhaliherya sai atthu akina?
5 Ale anipacerya oweha mithukumano sahu, annisiveliwa okathi aniweha aya ophentana wahu mukina ni mukhwaawe. Okathi aniweha aya ophentana iwo, awo annikupali wiira aaphwanya ekeekhai. Yesu aahimmye so: “Atthu otheene anoosuwela wira mwa awiixutti aka, mwaaphentanaka mukina ni mukhwaawe”. (Yoh. 13:35) Nwehe yoowiiraneya ya Chaithra, yoowo aapacenrye omusoma Biibiliya ni Anamoona a Yehova okathi aasoma awe wuniversidade. Owo aahilattuliwa omurowela konkresu ni aaheemererya. Nuumala onweha nihiku noopacerya, owo aahimuleela ole aamusomiha Biibiliya wiira: “Anamuyari aka, khatonko okikupaarela. Masi konkresu ola, kookupaareliwa ni atthu 52 nihiku nimosa paahi! Kihoona wiira Yehova ohaaruma atthu awe wiira okooniherye okiphenta wawe. Kimphavela wiirela mpantta ekurupu ela ya atthu a Muluku”. Chaithra khaahiyale omusoma Biibiliya ni opaka marukunuxo mookumini mwawe, nto mwaakha wa 2024 owo aahipatisiwa. Tthiri okathi ale a niinaano anoona aya miteko sahu sooreera, otepexa wene ophentana wahu mukina ni mukhwaawe, eyo enniwiiriha ophavela omurumeela Yehova. — Math. 5:16.
6. Waataana ni anna ni arokora onnikhapelela sai?
6 Waataana wahu ni anna ni arokora, onninikhapelela. Murummwa Paulo, aahaaleela makristau wiira: “Muhihiye olipihana mukina ni mukhwaawe khula nihiku . . . wira ohikhale hata mutthu mmosa a nyuwo onrowa wuumiha murima awe, owokiwaka ni owerya wa etampi”. (aHeeb. 3:13) Akhala wiira ninnikhulumuwa aahiiso noopacerya ohapuwa ephiro ya xariya, Yehova pooti omurumeela munna aahiiso murokora wiira onikhaliherye. (Esal. 73:2, 17, 23) Nto nikhaliheryo nlo, ninninlipiha vanceene.
7. Ophenta onivarihana sai ni wiiraana? (aKolosi 3:13, 14)
7 Nniirela mpantta ekurupu ya atthu aniimananiha vanceene ophentana mukina ni mukhwaawe, nto eyo enniniphwanyiha mareeliho manceene. (1 Yoh. 4:11) Ophenta, onninikhaliherya ‘ovilelana’, ni wiiraana ni anna ni arokora. (Mmusome aKolosi 3:13, 14; aEef. 4:2-6) Okathi wa mithukumano, hiyo ninnihakalala vanceene ni khiivo ekurupu ya etiini enlikana ni hiyo.
MUTTITTIMIHANEKE MUKINA NI MUKHWAAWE
8. Yehova onnikhaliherya sai wiiraana ni anna ni arokora?
8 Wiiraana nirina ahu ni anna ni arokora olumwenku wootheene, onikhumelela mwaha wooreelihiwa ni Yehova. Nto Yehova onnipaka eyo hata ikwaha sikina nifalyariki. (1 aKor. 12:25) Biibiliya onihimya wiira ‘nihiixuttihiwa ni Muluku wiira niphentaneke mukina ni mukhwaawe’. (1 aTes. 4:9) Eyo, enooniherya wiira Yehova onnimurumeela Biibiliya, wiira onooniherye etthu ninreerela ahu opaka wiira naataane mukina ni mukhwaawe. Hiyo nnoowerya ‘wiixuttihiwa ni Muluku’ nisomaka itthu onniixuttiha awe ni weettela mookumi mwahu. (aHeeb. 4:12; Yak. 1:25) Eyo, ti etthu Anamoona a Yehova aniimananiha aya opaka.
9. ARoma 12:9-13, onniixuttiha exeeni voohimya sa wiiraana ni atthu akina?
9 Nuulumo na Muluku, ninniixuttiha sai wiiraana mukina ni mukhwaawe? Nwehe etthu Paulo aalavunle awe voohimya sa mwaha owo, ori aRoma 12:9-13. (Mmusome.) Moone moolumo ala oovara murima ani: “Mphaveleke waattittimiha akina ni murima anyu wotheene”. Moolumo ala, antaphulela exeeni? Antaphulela wiira nihaana opaceriha ‘waaphenta vanceene’ atthu akina mwa inamuna soovirikana ntoko, waalevelela, owaakhela aletto, okhala mutthu oovaha ni waapakela itthu sikina sooreera. (aEef. 4:32) Khanimpirisari waalipelela anna ni arokora opaceriha wiiraana ni hiyo. Hiyo nihaana ‘opaceriha’ waataana naawo. Niira siiso nnoophwanya ele Yesu aahimmye awe oriki: “Ovaha onnitepa ohakalaliha ovikana ovahiwa”. — Mit. 20:35.
10. Ninrowa wooniherya sai wiira ninniimananiha ‘waattittimiha atthu akina’? (Nwehe efootu.)
10 Ti voohakalaliha oweha wiira nuumala onitumererya opaceriha waattittimiha atthu akina, Paulo onnintumererya ‘ovara muteko voowiilipiha, ni nihilosoweke’. Mutthu oowiilipiha, onnikhalela nthiti ovara muteko. Vaavo onivahiwa awe muteko, owo onnivara ni murima awe wootheene ni moowiilipiha. Miruku 3:27, 28 onihimya so: “Mwaaweryaka waakhaliherya atthu akina, muhikhootteke waakhaliherya ale anireerela okhaliheriwa”. Vakhala wiira nonweha mutthu oothoiwa onireerela okhaliheriwa, moowaakuveya nihaana omukhaliherya. Tthiri khivanireerela woovelela opaka etthu ninwerya ahu opaka, aahiiso wuupuwela wiira mutthu mukina onoopaka. — 1 Yoh. 3:17, 18.
Nihaana opaceriha waakhaliherya anna ni arokora oothoiwa (Nwehe ettima 10)
11. Exeeni enrowa onikhaliherya waataana mukina ni mukhwawe?
11 Enamuna ekina enooniherya wiira ninnaattittimiha atthu akina, ori waalevelela moowaakuveya okathi annitthekela aya. aEefeso 4:26 onihimya so: “Muhihiye nsuwa nikelaka nlelo munanariwe ene”. Mwaha wa xeeni? Mwaha woowi, eversiikulu 27 enihimya wiira nathipelela onanariwa, ‘nnonvaha opuro Diabo’. Ikwaha sinceene, Yehova onninleela mbiibiliyani wiira nihaana olevelelana mukina ni mukhwaawe. aKolosi 3:13 onihimya wiira “mulevelelaneke . . . ikwaha sotheene”. Waalevelela atthu akina okathi annitthekela aya, enamuna emosa yootepa oloka ya waataana ni atthu akina. Opaka eyo, onoonikhaliherya “okhalana wiiwanana omosa-ru onikumiheriwa ni munepa woowaarya, ni murettele onikhaliherya wiiraana”. (aEef. 4:3) Vannooneya wiira okathi nnaalevelela ahu atthu akina, ninnikhaliherya mutthenkeso wa Yehova okhala oowiiraana ni wa murettele.
12. Yehova onnikhaliherya sai okhala atthu oolevelela?
12 Ekeekhai wiira ikwaha sikina vannivila waalevelela atthu yaale anitthekenle aahiiso aniriipihale murima. Masi nikhaliheriwaka ni munepa wa Muluku, nnoowerya waalevelela atthu awo. Nuumala onitumererya wiira ‘niphentaneke vanceene ntoko axinna’ ni ‘ovara muteko voowiilipiha’, Biibiliya onnincererya oriki: “Munepa woowaarya woovaheeni ikuru”. Mutthu ‘oowiilipiha’ tuule onikhalela nthiti ovara muteko okhaliheriwaka ni munepa woowaarya. (aRom. 12:11) Munepa wa Muluku, onninikhaliherya ophentana vanceene ni olevelelana ni murima wootheene, nto ti vooloka onvekela Yehova wiira onikhaliherye. — Luka 11:13.
“OHIKHALE OKAWANYEYA ERIYARI ANYU”
13. Itthu xeeni saarowa onikumiherya okawanyeya?
13 Mmulokoni, aakhala “atthu a makhalelo otheene”, ni a mahuweliwo oovirikana. (1 Tim. 2:3, 4) Naahivahe ephoole, makhalelo aahiiso mahuweliwo awo, pooti oniiriha okawanyeya. Eyo pooti wiiraneya ni enamuna ninwara ahu aahiiso wiitthokiha, enamuna yoolooliwa ninthanla ahu aahiiso matthekulelo ahu. (aRom. 14:4; 1 aKor. 1:10) Okhala wiira nihiixuttihiwa ni Muluku wiira niphentaneke mukina ni mukhwaawe, nihaana okhalana ephoole wiira nihithipeleleke moonelo ahu aahiiso wiithokorerya okhalana efaita yinceene waavikana atthu akina. — aFil. 2:3.
14. Etthu xeeni ninreerela ahu wiimananiha opaka, ni mwaha wa xeeni?
14 Nnoowerya osyaka okumiherya okawanyeya mmulokoni, vakhala wiira nnoolipihanaka ni okhaliheryanaka mukina ni mukhwaawe khula okathi. (1 aTes. 5:11) Okathi vakhaani ovinre, atthu anceene yaahiiyale olaleerya ni orowela mithukumano aahiiso yaakumihiwe mmulokoni, aatthikela mmulokoni. Nihaana owaakhela ni murima ahu wootheene! (2 aKor. 2:8) Nrowe niwehe etthu yaamwiiranenle murokora mmosa, yoowo aatthikenle mmulokoni nuumala ovira iyaakha 10 ohiyale ene olaleerya ni orowela mithukumano. Owo onihimya so: “Anna yaahihakalala mwaha wookiweha ni yaahikikupaarela”. (Mit. 3:19) Waakheliwa iwe ni murima wootheene waamukhalihenrye sai? Owo onincererya oriki: “Kaahoona wiira Yehova aanikikhaliherya wiira kitthikele ohakala”. Vakhala wiira nnimwaalipiha atthu ootheene, hiyo pooti orummwa ni Kristu wiira naamaalihe atthu ‘avenle ni alemeliwe’. — Math. 11:28, 29.
15. Enamuna xeeni ekina enrowa onikhaliherya okumiherya wiiraana mmulokoni? (Nwehe efootu.)
15 Enamuna ekina nikhanle ahu ookumiherya murettele, ori enamuna ninlavula ahu. Yoobi 12:11, onihimya so: “Kiira moolumo anlawihiwa ni maaru, siisaale ntoko nlumi ninlawiha aya eyoolya?” Ntoko siisaale mulipa-oorattela waapeya onipacerya awe olawiha eyoolya awe wiira oone yaasinve ene ohinatthi waavaha atthu akina, mwa enamuna emosa-ru, nihaana wuupuwela oratteene nihinatthi opacerya olavula. (Esal. 141:3) Khula okathi nihaana olavulaka moolumo anilipiha, animaaliha ni ‘anaaphwanyiha mureerelo ale anniwiriyana’. — aEef. 4:29.
Muupuweleke oratteene etthu munrowa anyu ohimya muhinatthi olavula (Nwehe ettima 15)
16. Tani otepexa wene anireerela wiimananiha waalipiha atthu akina?
16 Alopwana oothela ni anamuyari, ahaana wiimananiha wiira moolumo aya yaalipiheke atthu akina. (aKol. 3:19, 21; Tito 2:4) Okhala wiira axitokweene amakampusi, ahaana wiimananiha waalipiha anna ni arokora. (Yes. 32:1, 2; aGal. 6:1) Miruku 15:23, onihimya so: “Moolumo anlavuliwa okathi wooreerela, tootepa oreera”.
MPHENTEKE NI “MITEKO NI OKHALEKE WEEKEEKHAI”
17. Ninrowa wooniherya sai wiira waaphenta wahu anna ni arokora ti weekeekhai?
17 Murummwa Yohani, onnintumererya wiira ophenta wahu “ohikhaleke ni moolumo paahi, masi ohaana wooneya ni miteko, ni okhaleke weekeekhai”. (1 Yoh. 3:18) Nimphavela wiira ophenta ninwooniherya ahu anna ni arokora, okhumeke vamurimani. Ninrowa owerya sai opaka eyo? Vaavo nniviriha ahu okathi munceene niri ene ni anna ni arokora, nnootepa waataana ni olipiha ophentana wahu mukina ni mukhwaawe. Mwa ntakiheryo, nookhalana eparakha yinceene ya oviriha okathi niri ene ni anna ni arokora mmithukumanoni ni muteko woolaleerya. Mwaavyeke okathi wiira mwaaxukurye anna ni arokora. Okathi nimpaka ahu eyo, ninnooniherya wiira ‘nihiixuttihiwa ni Muluku wiira niphentaneke mukina ni mukhwaawe’. (1 aTes. 4:9) Niira siiso, nnimoona mmansihu wiira “ti vootepa oreera ni voohakalaliha, axinna okhala vamosa, ari ene oowiiraana!” — Esal. 133:1.
NSIPO 90 Nilipihaneke Mukina ni Mukhwaawe