Khanikhanle Mekhihu

1-2. a) Xeeni ninreerela ahu okupali wiira khanikhanle mekhihu okathi sinniphwanya aya mixankiho? b) Mwaha ola, ninrowa othokorerya exeeni?

OKATHI sinniphwanya aya mixankiho suulupale, pooti wiixoonaka wiira niri mekhihu, ntoko mutthu orimenle eriyari ya etakhwa ohinoona moota wookhuma. Masi khanikhanle mekhihu. Maana Tiithi ahu a wiirimu, onniweha mixankiho sinniphwanya ni ooleiherya onikhaliherya. Yehova onnaaleiherya arumeyi awe wiira: “Miyo . . . kinnokhaliheryani”. — Yes. 41:10.

² Mwaha ola, nnooweha moota Yehova onnikhaliherya awe 1) oneettihaka, 2) onivahaka itthu sinnithowa, 3) onikhapelelaka ni 4) onimaalihaka. Yehova ooleiherya wiira hata siniphwanyaka mixankiho, owo khonrowa oniliyala. Owo khonrowa oninyanyala. Nave khonrowa onihiya mekhihu.

YEHOVA ONNINEETTIHA

3-4. Yehova onneettiha sai? (Esaalimu 48:14)

³ Musome Esaalimu 48:14. Yehova onnisuwela wiira khaninwerya weettiha mavalo ahu, nto nihaana weettihiwa ni yena. Olelo-va, Yehova oniweettiha sai arumeyi awe? Biibiliya ti enamuna emosa onirumeela awe wiira oneettiheke. (Esal. 119:105) Yehova onnimurumeela Biibiliya wiira onikhaliherye opaka soothanla sooloka, ni otakiha enamuna onipaka awe itthu ni onuupuwela awe. Okathi nneettela ahu ele nniixutta ahu mbiibiliyani, nnoophwanya ohakalala nenna-va ni nlipelelo na okhala mahiku ootheene.a Mwa ntakiheryo, owo onniniixuttiha waalevelela atthu akina, ohipweha mathowa vamurimani, okhala oororomeleya mwa itthu sootheene ni waaphenta atthu akina ni murima ahu wootheene. (Esal. 37:8; aHeeb. 13:18; 1 Ped. 1:22) Okathi nnooniherya ahu mikhalelo iya, nnookhala anamuyari ooloka, mulopwana oothela aahiiso muthiyana ootheliwa ooloka ni apatthani ooloka.

⁴ Mbiibiliyani, Yehova ooruma olempwa soowiiraneya sa atthu eekeekhai, yaawo yaarina mixankiho ni moonelo ntoko wawihu. (1 aKor. 10:13; Yak. 5:17) Okathi ninsoma ahu soowiiraneya iyo ni weettela mookumini mwahu, ninniphwanya mareeliho mwa inamuna piili. Yoopacerya, ninniwerya woona wiira khahiyo hiyo paahi sinniphwanya mixankiho. Atthu akina aatoko okhalana mixankiho simosaru, masi akhaliheriwaka ni Yehova aawerya ovilela. (1 Ped. 5:9) Ya nenli, ninniweha mixankiho sahu ni ohihiya ohakalala. — aRom. 15:4.

5. Tani Yehova onaarumeela awe wiira anivaheke malakiheryo?

⁵ Yehova onnaarumeela anna ni arokora wiira anivaheke malakiheryo.b Mwa ntakiheryo, axitokweene asirkwiitu annixukurya miloko wiira anilipihe. Myaha anilavula aya sinninikhaliherya olipiha waamini wahu, ni ohihiya wiiraana. (Mit. 15:40–16:5) Nave axitokweene anniimananiha vanceene waakhaliherya anamalaleerya olipiha ompatthani aya ni Yehova. (1 Ped. 5:2, 3) Anamuyari anniwiixuttiha anaaya omphenta Yehova, opaka soothanla sooloka ni okhalana mweettelo wooloka. (Mir. 22:6) Axirokora arina waamini woolipa, annaakhaliherya aximwali yaavahaka ntakiheryo nooloka, miruku soovareya muteko ni waalipiha. — Tito 2:3-5.

6. Nipakeke exeeni wiira nittottele mureerelo malakiheryo a Yehova?

⁶ Yehova onninivaha malakiheryo annikhaliherya opaka soothanla sooloka wiira nikhalane okumi woohakalaliha. Ninrowa wooniherya sai oxukhurela mwaha wa itthu sootheene onnivaha awe? Miruku 3:5, 6 onihimya so: “Mmuroromele Yehova ni murima anyu wootheene; muhiroromele osuwela wanyu”. Napaka eyo, owo “onimookolola iphiro” sahu, eyo enooniherya wiira onoonikhaliherya osyaka mixankiho ni okhalana okumi woohakalaliha. Ninnixukhurela vanceene osuwela wiira Yehova onninsuwela oratteene, onniniphenta ni onoonivahaka malakiheryo ni itthu nimpirisari ahu! — Esal. 32:8.

YEHOVA ONNINIVAHA ITTHU SINNITHOWA

7. Mwa inamuna xeeni sikina Yehova onnikhapelela awe? (aFilipi 4:19)

⁷ Mmusome aFilipi 4:19. Ohiya onikhaliherya paahi wiira nikhalane waataana wooloka ni yena, Yehova onnireeliha wiimananiha wahu ovara muteko wiira niphwanyeke eyoolya, ikuwo ni opuro wookhala. (Math. 6:33; 2 aTes. 3:12) Ikwaha sikina khahiyo ti vootthekeya wuupuwelela itthu iyo, masi Yehova khoniphavela wiira nimakeleke oxankela itthu iyo. (Math. 6:25.) Mwaha wa xeeni? Mwaha woowi Tiithi ahu, khonikhala-khala aanyanyalaka arumeyi awe oororomeleya, otepexa wene, okathi woothoiwa. (Math. 6:8; aHeeb. 13:5) Nto nikupaliki ni murima ahu wootheene, wiira owo onoonivahaka itthu sinnithowa.

8. Yehova aamukhalihenrye sai Davidi?

⁸ Nrowe nthokorerye moota Yehova aamukhalihenrye awe Davidi. Okathi aamutthyawa awe mwene Sawuli, Yehova aahinvaha Davidi ni alopwana awe itthu saathowa. Uupuwelelaka moota Yehova aamukhapelenle awe mwa iyaakha sinceene, Davidi olempe so: “Miyo kaari mmiravo, nto vano kihuuluvala; masi nkinamoone naxariya onyanyaliwe ene; nnakhala nkinawoone anaawe avekaka eyoolya”. (Esal. 37:25) Ntoko Davidi, woonasa wene, nyuwo mooweha moota Yehova ookhapelenlyaaweni, ni moota aakhapelenle awe anna ni arokora, okathi wa mixankiho.

9. Olelo-va, Yehova onaakhaliherya sai arumeyi awe okathi sinikhumelela aya ihasara sa ephattu? (Nwehe ifootu.)

⁹ Yehova onnaakhapelela arumeyi awe okathi sinikhumelela aya ihasara sa ephattu. Mwa ntakiheryo, okathi wa arummwa yaahikhumelela etala yuulupale, nto makristau a ilapo soovirikana yaahaakhaliherya anna ni arokora yaavahaka itthu saathowa. (Mit. 11:27-30; aRom. 15:25, 26) Olelo-va, arumeyi a Yehova toovaha, ni annaakhaliherya anna ni arokora okathi wa mixankiho. Okathi enikhumelela aya ehasara ya ephattu, Yehova onniwiiriha arumeyi awe waavaha atthu awo aphwanyiwe ihasara itthu ntoko eyoolya, maasi, ikuwo ni mirette. Nave anna anniivahererya wiira alokiherye ipa sa anna ni arokora ni Ipa sa Omwene sihononeyale. Arumeyi a Yehova anniimananiha waamaaliha ni waalipiha amurumeelaka Biibiliya ale ipa saya sihononeyale aahiiso ale akhweliwe ole yamphenta aya.

10-11. Yoowiiraneya ya Borys, enniixuttiha exeeni?

¹⁰ Yehova onnaavaha itthu sinaathowa hata ale ahinimurumeela. Nimutakihaka Yehova, nihaana waareerela murima hata ale ahinimurumeela Yehova. (aGal. 6:10) Opaka eyo, enoonikhaliherya waalaleerya. Nrowe niwehe yoowiiraneya ya Borys tiretoore a eskola emosa, yoowo onikhala wUcrânia. Nnaamwi Borys ohikhanle Namoona Yehova, khula okathi owo onnaareerela murima anaskola awe Anamoona a Yehova ni onnittittimiha sookupali saya. Mwaha wa ekhotto, owo aahitthyawa muttetthe aakhala awe orowaka muttetthe mukina woovareleleya, nto anna ni arokora yaahimukhaliherya. Muhoolo mwaya, Borys aahirowa oweha muthukumano wa Wuupuwelela Okhwa wa Yesu Kristu. Okathi onuupuwelela awe itthu sootheene anna ni arokora amwiirenle aya, Borys onihimya so: “Anamoona a Yehova, yaahikireerela murima ni yaahikikhapelela vanceene. Kinnaaxukhurela vanceene Anamoona a Yehova”.

¹¹ Hiyo nave, nihaana omutakiha Tiithi ahu a wiirimu oomoriwa ikharari, naaphentaka ale oothoiwa moohicikha vakhala wiira anna aahiiso nnaari. (Luka 6:31, 36) Ninnikupali wiira wiimananiha wahu waaphenta atthu akina, onimwaakhaliherya okhala atthareli a Kristu. (1 Ped. 2:12) Moohicikha akhala wiira atthu anoomurumeela Yehova aahiiso nnaari, nnoohakalalaka mwaha wookhala atthu oovaha. — Mit. 20:35.

YEHOVA ONNINIKHAPELELA

12. Mwa enamuna xeeni Yehova oleihenrye awe waakhapelela arumeyi awe? (Esaalimu 91:1, 2, 14)

¹² Musome Esaalimu 91:1, 2, 14. Olelo-va, Yehova onnileiherya waakhapelela arumeyi awe wiira ehaakhumelele atthu yaarowa ohonona waataana waya ni yena. Owo khonrowa omweemererya Satana, aahiihaka arumeyi a Yehova omukokhorela mwa enamuna oniphavela awe. (Yoh. 17:15) Okathi anrowa aya opacerya ‘maxakha maalupale’, Yehova onoopaka oleihenrye awe wiira onoonikhapelela, ohiya paahi olipihaka waamini wahu, masi-tho onoopolaka. — Wiis. 7:9, 14.

13. Mwa inamuna xeeni Yehova onimukhapelela awe khula mmosa a hiyo?

¹³ Yehova onimukhapelela sai khula mmosa a hiyo? Yehova oonivaha Biibiliya wiira onikhaliheryeke osuwela etthu yooloka ni yoohiloka. (aHeeb. 5:14) Okathi nneettela ahu malakiheryo ari mbiibiliyani, ninnikhapelela waataana wahu ni Yehova, ninnipaka soothanla sooloka ni ninnikhalana okumi woohakalaliha. (Esal. 91:4) Nave Yehova oonivaha anna ni arokora yaawo annikhaliherya ohihiya okhala oororomeleya. (Yes. 32:1, 2) Anna ni arokora annimphenta vanceene Yehova ni annimwiiwelela. Nto oviriha okathi niri ene naawo omithukumanoni, olaleerya ni otthekula hoothe, anonlipiha ni anoonikhaliherya osyaka opaka itthu soohiloka. — Mir. 13:20.

14. a) Xeeni ikwaha sikina Muluku oneemererya awe oniphwanya mixankiho? b) Esaalimu 9:10, ennikupaliha exeeni? (Nwehe enoota.)

¹⁴ Khalai, ikwaha sinceene Yehova aahaakhapelela arumeyi wiira ahiirihiwe etthu yootakhala aahiiso wiiviwa. Masi owo khaapaka eyo okathi wootheene. Okathi mukina sinninikhumelela itthu sootakhala mwaha woowi “oreriwa ni otakhaliwa khunimuthanla mutthu”. (Mus. 9:11) Yehova aaheemererya wiira arumeyi awe akina alupatthiweke nave akina wiiviwa, ophavelaka wooniherya wiira Satana nawoothe. (Yoob. 2:4-6; Math. 23:34) Etthu emosa-ru, enniiraneya olelo-va. Hata Yehova ohimalihaka mixankiho sahu olelo-va, nikupaliki wiira owo khonikhalakhala aanyanyalaka ale onaaphenta awe.c — Esal. 9:10.

YEHOVA ONNINIMAALIHA

15. Moota xeeni ovekela, Biibiliya ni anna ni arokora annimaaliha aya? (2 aKorinto 1:3, 4)

¹⁵ Mmusome 2 aKorinto 1:3, 4. Ikwaha sikina, ninnikhweliwa mutthu namphenta ahu, ninnixanka aahiiso oriipiwa murima. Woonasa wene, ookhala muxankiho muniwanana anyu niinano-va yoowo oniwiirihani wuupuwelaka wiira muri mekhinyu. Niireke ookhala mutthu onisuwela muxankiho anyu? Aayo, Yehova Muluku onnisuwela. Ohiya paahi woona owereya onniphwanya, Yehova ‘onninimaaliha wa khula muxankiho onniphwanya’. Owo onipaka sai eyo? Okathi nninvekela ahu Yehova nimuxonttelaka, owo onninivaha “murettele wa Muluku, yoowo onvikana osuwela wotheene wa apinaatamu”. (aFil. 4:6, 7) Nave-tho ninniphwanya nimaaliho okathi ninsoma ahu moolumo a Yehova ari mbiibiliyani. Maana mbiibiliyani, Yehova onninleela moota onniphenta awe, onniniixuttiha okhala atthu ankhili ni onninivaha nlipelelo. Nave ninniphwanya nimaaliho okathi wa mithukumano, maana ti weiwo nniiwa ahu moolumo oolipiha ari mbiibiliyani nave ninnaaphwanya anna ni arokora, yaawo anniphenta.

16. Yoowiiraneya ya Nathan ni Priscilla, eniwiixuttihani exeeni?

¹⁶ Wiira niwehe moota Yehova onnimaaliha awe ni onilipiha omurumeelaka Biibiliya, nrowe niwehe yoowiiraneya ya Nathan ni Priscilla, yaawo anikhala wEstados Unidos. Iyaakha vakhaani sivinre, awo yaahithanla othaamela muttetthe woothowa anamalaleerya. Nathan onihimya so: “Naaniroromela wiira Yehova aamureeliha wiimananiha wahu”. Nuumala ophiya muttetthe yaarowa aya olaleeryaka, yaahipacerya owereyasiwa ni othoiwa musurukhu. Nuumala-vo, anamathelana ale yaahitthikela owaani masi nlelo yaanithoiwa musurukhu. Nathan uupuwela so: “Kaahipacerya wuupuwela xeeni Muluku ahaanireelinhe awe. Miyo kaahipacerya wuupuwela vakhala wiira kaapanke etthu yoohiloka”. Nuuvira okathi, Nathan ni Priscilla yaahoona wiira Muluku khaanyanyanle okathi ole wa mixankiho. Nathan onnincererya ohimyaka so: “Okathi ole wooxankiha, Biibiliya aari ntoko mpatthani ankhili yoowo aanilipiha ni onivaha malakiheryo. Oweha moota Yehova onikhalihenrye awe ovilela mixankiho ohiya owehexexa mixankiho saaniphwanya, woonikhaliherya woona wiira Yehova onoonikhaliherya ovilela mixankiho sinrowa oniphwanya muhoolo”.

17. Murokora Helga aamaalihinwe sai? (Nwehe efootu.)

¹⁷ Nave anna ni arokora anninimaaliha. Anipaka sai eyo? Nrowe niwehe yoowiiraneya ya Helga, yoowo onikhala oHungria. Mwa iyaakha sinceene, owo saahimphwanya mixankiho seiyo saamukhulumula vanceene ni saamwiiriha wuupuwela wiira khaarina efaita. Masi okathi onuupuwelela awe itthu iye saamwiiranenle, owo onnoona wiira Yehova aanaarumeela anna ni arokora wiira amulipihe. Owo ohimmye so: “Khula okathi Yehova aanikikhaliherya vaavo oona awe wiira kaanitepa okhulumuwa mwaha wa muteko kaavara aka, omukhapelela mwanaka mulopwana aawereiwa ni mixankiho sikina. Khula nihiku mwa iyaakha iye 30 sivinre, Yehova aahimaleliha yoolakela awe ya okimaaliha ni okilipiha. Ikwaha sinceene, owo aanikilipiha okireerelaka murima, okimaalihaka ni moolumo oolipiha a atthu akina. Kaanaakhela mensaxe, ikartau soomaaliha ni ottottopeliwa okathi kaapirisari aka, nto itthu iyo saanikilipiha”.

18. Ninrowa waamaaliha sai atthu akina?

¹⁸ Nookhalana eparakha yoomutakiha Muluku naamaalihaka atthu akina. Ninrowa owerya sai waamaaliha atthu akina? Naawiriyanaka moopixa murima, nilavulaka moolumo oolipiha ni opaka etthu wiira naakhaliherye. (Mir. 3:27) Ninniimananiha waalipiha atthu ootheene anihaawa, waahela muhina ale ahinimurumeela Muluku. Okathi mavisiinyu ahu aniriipiwa aya murima, owereiwa aahiiso oxankiheya, hiyo ninnaaxukurya, waawiriyana ni ephoole ni waaleela moolumo oomaaliha ari mbiibiliyani. Vaavo nimmutakiha ahu Yehova yoowo ori “Muluku onnimaaliha mwa mikhalelo sotheene”, khahiyo paahi ninrowa waakhaliheryaka anna ni arokora ovilela mixankiho. Ohiya-vo, nnimwaakhaliherya ale ahinimurumeela Yehova, ophavela omusuwela ni omurumeela. — Math. 5:16.

OKATHI WOOTHEENE YEHOVA ONOONIKHALIHERYAKA

19. Etthu xeeni Yehova onipaka awe, nave ninrowa omutakiha sai?

¹⁹ Yehova onnaakhapelela oratteene atthu ootheene animphenta. Owo khonikhala-khala onnyanyalaka okathi sinniphwanya aya mixankiho. Ntoko siisaale paapa moophenta onimukhapelela awe mwanawe, nave-tho Yehova onnaakhapelela saana arumeyi awe oororomeleya. Owo onnineettiha, onninivaha itthu sinnithowa, onninikhapelela ni onimaaliha. Ninnimutakiha Tiithi ahu oophenta a wiirimu, okathi nnaakhaliherya ahu ni waalipiha atthu akina okathi wa mixankiho. Olumwenku ola, nnookhalanaka mixankiho masi nikupaliki wiira Yehova ori ni hiyo. Yehova ooleiherya wiira: “Muhové! Miyo kiri ni nyuwo”. (Yes. 41:10) Eyo enninlipiha vanceene! Tthiri khaninkhala-khala nikhalaka mekhihu.