Mukupaliki Wiira Yehova Onnoophentani

1. Etthu xeeni ewiirihaleni wiivahererya wa Yehova? (Nwehe ifootu.)

NIIREKE munnuupuwela okathi mwaivaherenrye anyu wa Yehova? Nyuwo mwaahipaka yoothanla eyo, mwaha woowi munnimusuwela oratteene ni munnimphenta. Mwaahimuleiherya wiira mwaarowa ohelaka ele oniphavela awe, nipuro noopacerya mookumini mwanyu ni khimwaarowa ohiya omphenta ni murima anyu wootheene, okumi anyu wootheene, muupuwelo anyu wootheene ni ikuru sanyu sootheene. (Mar. 12:30) Okhuma okathi ole mwaivaherenrye anyu, nyuwo khamunihiya olipiha omphenta wanyu Yehova. Mwaarowa waakhula sai, vaakhanle wiira mookohiwa so: “Niireke munnimphenta Yehova ni murima anyu wootheene?” Moohoovelela nyuwo mwaamwaakhula wiira: “Miyo kinnimphenta Yehova onvikana mutthu mukina aahiiso etthu ekina!”

2-3. a) Yehova oniphavela wiira nikupaliki exeeni? (Yeremiya 31:3) b) Mwaha ola, ninrowa othokorerya exeeni?

² Ankhi vakhala wiira munookohiwa wiira: “Niireke munnikupali ni murima wootheene wiira, Yehova onnoophentani?” Woonasa wene, nyuwo mwaamuhoverya waakhula, muupuwelaka wiira khamuniphwanela ophentiwa ni Yehova. Murokora mmosa yoowo aarina mixankiho okhuma onamwane awe, ohimmye so: “Miyo kinniphenta Yehova ni murima aka wootheene. Nto kinnikupali eyo. Masi ikwaha sinceene, etthu enaanyiheryaaka tiila: Kiireke Yehova onnikiphenta?” Masi etthu xeeni enrowa wookhaliheryani osuwela moota Yehova oniwoonelaaweni?

³ Yehova oniphavela wiira mukupaliki ni murima anyu wootheene wiira onnoophentani. (Mmusome Yeremiya 31:3.) Nave owo oniphavela wiira mmusuwele oratteene ni mukhale mpatthani awe. Okathi mwaivaherenrye anyu wa Yehova ni opatisiwa, owo aahoovahani etthu ya faita yinceene. Etthu ene tiila: Ophenta wawe woororomeleya. Eyo enitaphulela wiira, owo onnoophentani vanceene ni khonikhala-khala oonyanyalakani. Okhala wiira Yehova onnaavaha efaita vanceene ale animurumeela moororomeleya, owo onnaahimya okhala “atthu awe”, nto eyo enooniherya wiira onnoovahani efaita yinceene. (Mal. 3:17) Yehova oniphavela wiira mukupaliki ni murima anyu wootheene wiira onnoophentani, ntoko siisaale murummwa Paulo aakupali awe wiira aaniphentiwa ni Yehova. Murummwa Paulo aanikupali ni murima awe wootheene wiira aaniphentiwa ni Yehova. Tivonto aalempe awe wiira: “Tthiri, kinnikupali wira nnakhala okhwa, aahiiso okumi, wala malaikha, nnakhala ikuvernu, aahiiso itthu sikhanle vano wala itthu sinrowa okhumelela muhoolo, nnakhala owerya, hata itthu sa musulu, nnakhala itthu sa vathi, aahiiso itthu sikina sipattuxiwe, khasiniwerya onivalaanya ni ophenta wa Muluku”. (aRom. 8:​38, 39) Mwaha ola, ninrowa oweha efaita erina aya okupali ni murima wootheene wiira Yehova onniniphenta ni itthu nikhanle ahu oopaka wiira nitepeke olipiha okupali wahu wiira Yehova onniniphenta.

XEENI NINREERELA AHU OKUPALI WIIRA YEHOVA ONNINIPHENTA?

4. Etthu xeeni Satana oniphavela awe onikupaliha ni ninrowa okhootta sai?

⁴ Akhala wiira nnookupali ni murima wootheene wiira Yehova onniniphenta, nnoowerya “okhootta miteko soolavilavi sa” Satana. (aEef. 6:11) Satana oniphavela wiira nihiye omurumeela Yehova. Owo onnipaka sootheene oniwerya awe, wiira ophwanye ele oniphavela awe: Ori onihiiha omurumeela Yehova. Enamuna emosa onirumeela awe tiila: Oniphavela onikupaliha wiira Yehova khonniphenta. Masi eyo khahiyo ekeekhai. Biibiliya onnimulikanyiha Satana ni kharamu. (1Ped. 5:​8, 9) Akharamu waasivela otuphela inama sitteettheyale ni sihiniwerya wiixaakiha. Mwa enamuna emosa-ru, Satana onnintuphela okathi nintteettheya ahu, ninkhulumuwa ahu aahiiso okathi ninriipiwa ahu murima mwaha wa itthu soohiloka siniiraneelale khalai, mwaha wa mixankiho ninwanana ahu niinaano-va aahiiso okathi nnoova ahu itthu sinrowa wiiraneya muhoolo. (Mir. 24:10) Satana oniphavela onikhulumula mpakha ohiya omurumeela Yehova. Masi, hiyo nnoowerya ‘omukhootta Diabo’ ni miteko sawe sa olavilavi, akhala wiira nnoopaka sootheene ninwerya ahu wiira nikupali wiira Yehova onniniphenta. — Yak. 4:7.

5. Xeeni vari aya vooloka okupali wiira Yehova onnoophentani ni onnoovahani efaita?

⁵ Okupali wiira Yehova onniniphenta, onoonikhaliherya omwaattamela. Etthu xeeni enniiriha ohimya siiso? Yehova onipattunxe wiira niphentiweke ni naaphenteke atthu akina. Okhala wene, okathi mutthu onniphenta awe, hiyo nave ninnimphenta mutthu owo. Nto okathi nnoona ahu wiira Yehova onniniphenta ni onivaha efaita, omphenta wahu onnitepa olipa. (1Yoh. 4:19) Nto okathi nintepa ahu omphenta Yehova, owo nave onnitepa oniphenta. Biibiliya onihimya so: “Mmwaattameleke Muluku, vano owo onoowaattamelani”. (Yak. 4:8) Nto ninrowa olipiha sai okupali wahu wiira Yehova onniniphenta?

ETTHU XEENI ENROWA WOOKHALIHERYANI OKUPALI WIIRA YEHOVA ONNOOPHENTANI?

6. Akhala wiira khamunikupali wiira Yehova onnoophentani, etthu xeeni mukhanle anyu oopaka?

⁶ Nvekeleke mooluluwanya ni muthipeleleke ovekela. (Luka 18:1; aRom. 12:12) Vaareereleka, munvekeleke Yehova ikwaha sinceene khula nihiku, wiira ookhaliheryeni oweha moota oniwoonelaaweni. Ikwaha sikina nyuwo pooti oxanka mpakha woovilani okupali wiira Yehova onnoophentani. Masi muhiliyale wiira Yehova ti muulupalexa ovikana murima anyu. (1Yoh. 3:​19, 20) Yehova onniweha mikhalelo sooloka murina anyu hata muhiweryaka oweha mikhalelo iyo. (1Sam. 16:7; 2Wah. 6:30) Mmuleeleke oratteene itthu “sootheene siri vamurimani vanyu” ni munvekeleke wiira ookhaliheryeni okupali wiira onnoophentani. (Esal. 62:8) Nuumala onvekela Yehova, ti vooloka opaka itthu sinittharelana.

7-8. Isaalimu sinnikhaliherya sai okupali wiira Yehova onniniphenta?

⁷ Mukupaliki ele Yehova onihimya awe. Yehova aahaavaha ikuru sawe soowaarya alopwana yaamulepa Biibiliya. Nto itthu yaalempe aya voohimya sa Yehova ti seekeekhai. Nasaalimu Davidi aahihimya enamuna yooloka Yehova onnikhapelela awe. Owo aalempe so: “Yehova ori vakhiviru va atthu ariipiwe murima; Owo onniwoopola ale akhulumunwe”. (Esal. 34:18) Okathi ninriipiwa ahu murima, hiyo pooti wuupuwelaka wiira niri mekhihu. Masi okathi owo, Yehova onnileiherya wiira onimookhaliheryani mwaha woowi onnoona wiira nyuwo munnipirisari okhaliheriwa. Okathi mukina, Davidi aalempe so: “Muthukumanye maithori aka mmurupani mwanyu mwa esapala”. (Esal. 56:8) Yehova onniweha okathi muniriipiwa anyu murima aahiiso munikhalana anyu mixankiho. Owo onnookhapelelani ni onnoona owereya onoophwanyani. Ntoko siisaale mutthu oneetta moothakoni onivaha awe efaita yinceene maasi ari mmurupani mwa esapala, mwa enamuna emosa-ru, Yehova onnivaha efaita maithori anyu ni onnuupuwela khula okathi munoona anyu owereya ni muninla anyu. Esaalimu 139:​3, enihimya so: “[Yehova] munnisuwela iphiro saka sootheene”. Yehova onnisuwela iphiro sanyu sootheene, masi owo oniwehexexa itthu sooloka munipaka anyu. (aHep. 6:10) Etthu xeeni enniiriha ohimya siiso? Mwaha woowi owo onnivaha efaita wiimananiha wanyu wiira mmuhakalalihe.a

⁸ Yehova onnirumeela soolepa iyo soomaaliha sa mbiibiliyani onakhala ntoko onnileela wiira: “Kiniphavela musuwele wiira kinnoophentani vanceene ni kinnookhapelelani”. Wanipacerya wa mwaha ola, nihiixutta wiira Satana oniphavela onikupaliha wiira Yehova khonniphenta. Akhala wiira ikwaha sikina khamunikupali wiira Yehova onnoophentani, mmuupuweleke ti pani munrowa anyu omukupali. Akhala wiira munrowa omukupali Satana, yoowo ori “nawoothe” aahiiso munrowa omukupali Yehova yoowo ori, “Muluku eekeekhai”. — Yoh. 8:44; Esal. 31:5.

9. Yehova aaleihenrye exeeni atthu ale animphenta? (Okhuma 20:​5, 6)

⁹ Muupuweleke moota Yehova oniwoonela awe atthu ale animphenta. Nrowe niwehe ele Yehova aamulenle awe Moise ni aisarayeli. (Mmusome Okhuma 20:​5, 6.) Yehova aahileiherya wiira khonrowa ohiya owooniherya ophenta wawe woororomeleya atthu ale animphenta. Okhala wiira Yehova toororomeleya, nikupaliki ni murima wootheene wiira owo khonikhala-khala ohiyaka waaphenta atthu ale animphenta. (Neh. 1:5) Akhala wiira okathi mukina munuupuwela wiira Yehova khonoophentani, mwiikoheke so: ‘Kiireke kinnimphenta Yehova?’ Nuumala-vo, muhiliyale ela: Akhala wiira munnimphenta vanceene Yehova ni munniimananiha omusiveliha, mukupaliki ni murima wootheene wiira owo onnoophentani vanceene. (Dan. 9:4; 1 aKor. 8:3) Eyo enitaphulela wiira, vakhala wiira munnikupali ni murima wootheene wiira munnimphenta Yehova, khamunipirisari waanyiherya wiira Yehova onnoophentani. Nave eyo enooniherya wiira okathi wootheene Yehova onrowa woophentakani ni khonikhala-khala oonyanyalakani.

10-11. Yehova oniphavela wiira mooneleke sai mukuttho woowoopola? (aKalaasia 2:20)

¹⁰ Muupuweleleke mukuttho woowoopola. Mukuttho woowoopola wa Yesu Kristu, etthu yuulupale Yehova aavahale awe apinaatamu. (Yoh. 3:16) Nnaamwi Yehova aavahale ene mukuttho woowoopola apinaatamu ootheene, owo oovahaleni nyuwo! Nrowe niwehe ele yaamwiiranenle murummwa Paulo. Muhiliyale wiira ohinatthi okhala mukristau, owo aahipaka itampi suulupale, nave nuumala okhala mukristau owo aahaana owanana soovonya sawe. (aRom. 7:​24, 25; 1Tim. 1:​12-14) Hata vaari siiso, owo aanikupali ni murima wootheene wiira Yehova aahimuruma Yesu wiira ovahe okumi awe mwaha wa Paulo. (Mmusome aKalaasia 2:20.) Musuweleke wiira Yehova taamurumme Paulo olepa moolumo awo mbiibiliyani. Nave khula etthu elempwale mbiibiliyani, elempwale wiira eniixuttiheke. (aRom. 15:4) Moolumo a Paulo, annooniherya wiira, Yehova oniphavela wiira mukupaliki ni murima wootheene wiira mukuttho woowoopola wa Yesu nvahiwe nyuwo. Okathi munikupali anyu wiira mukuttho woowoopola nvahiwe nyuwo, eyo enimookhaliheryani ohaanyiherya wiira Yehova onnoophentani.

¹¹ Ninnimuxukhurela vanceene Yehova mwaha woomuruma Yesu orwa valaponi, wiira okhwe mwaha wa hiyo. Masi etthu ekina yaamwiirihale Yesu orwa valaponi waari waaleela atthu akina ekeekhai voohimya sa Muluku. (Yoh. 18:37) Ekeekhai eyo, enihela muhina enamuna Yehova onaaphenta awe anaawe.

YESU ONIMOOKHALIHERYANI OKUPALI WIIRA YEHOVA ONNOOPHENTANI

12. Etthu xeeni ennikupaliha itthu Yesu aalavunle awe omuhimyaka Yehova?

¹² Okathi Yesu ari awe valaponi, vaanimusivela waaleela atthu akina, mikhalelo sooloka sa Yehova. (Luka 10:22) Nihaana okupali itthu Yesu aalavunle awe omuhimyaka Yehova. Mwaha wa xeeni? Mwaha woowi Yesu aahiviriha okathi munceene okhalaka ni Yehova wiirimu ohinatthi orwa valaponi. (aKol. 1:15) Yesu aanisuwela wiira aaniphentiwa vanceene ni Yehova. Nave aaninweha ophentaka vanceene malaikha oororomeleya ari wiirimu ni aaphentaka apinaatamu oororomeleya ari valaponi. Yesu aakhalihenrye sai atthu akina okupali wiira Yehova onnaaphenta?

13. Yesu oniphavela wiira nimooneleke sai Yehova?

¹³ Yesu oniphavela wiira nisuwele moota Yehova onnoonela awe. Iliivuru sa Ivanxeelyo, Yesu onnimuhimya Yehova okhala “Tiithi”, ikwaha sinivikana 160. Nave okathi aalavula awe ni awiixutti awe, Yesu aahirumeela moolumo oowi “Tiithi inyu” aahiiso “Tiithi inyu ori wiirimu”. (Math. 5:16; 6:26) Ohinatthi Yesu orwa valaponi, arumeyi oororomeleya a Yehova yaanimwiitthana okhala, ‘Muluku Oowerya Sootheene’, ‘Muluku Muulupalexa’, ‘Mpattuxa Muulupale’ ni maihaneliwo makina a nttittimiho. Masi okathi Yesu aari awe valaponi ikwaha sinceene aanimwiitthana Yehova okhala ‘Tiithi’. Moolumo awo anooniherya wiira Yehova oniphavela wiira arumeyi awe akhalane waataana wooloka ni yena, ntoko siisaale mwaana onikhalana awe waataana wooloka ni tiithi awe oophenta. Tthiri Yesu ooniixuttiha wiira Yehova onniniphenta ntoko siisaale paapa ooloka onaaphenta awe anaawe. Nrowe nthokorerye matakiheryo manli Yesu aarumeelale awe moolumo oowi “Tiithi”.

14. Yesu oonihenrye sai wiira Yehova onnivaha efaita khula mmosa a hiyo? (Matheyo 10:​29-31) (Nwehe eteseenyu.)

¹⁴ Wanipacerya nrowe nthokorerye moolumo a Yesu ari Matheyo 10:​29-31. (Mmusome.) Iphera axipalame acikhaani ahinimphenta ni ahinimukokhorela Yehova. Hata vari siiso, Tiithi ahu onnisuwela khula ephera ni opuro eri aya. Akhala wiira Yehova onnivaha efaita iphera sihinimukokhorela, owo onnitepa onvaha efaita khula murumeyi awe oororomeleya yoowo onimukokhorela, onimurumeela ni onimphenta! Nave Yesu aahimmye wiira Tiithi ahu onnisuwela ikharari sootheene siri mmuru mwahu. Okhala wiira Yehova onnisuwela hata itthu saamukhaani nirina ahu, nikupaliki ni murima wootheene wiira owo onninikhapelela. Vannooneya wiira Yesu oniphavela wiira nikupaliki ni murima wootheene wiira Tiithi ihu a wiirimu onniniphenta ni onninvaha efaita khula mmosa a hiyo.

15. Moolumo a Yesu ari Yohani 6:​44, anooniherya exeeni sa Tiithi ahu a wiirimu?

¹⁵ Nrowe niwehe ntakiheryo nikina Yesu aarumenle awe nuulumo noowi “Tiithi”. (Mmusome Yohani 6:44.) Tiithi anyu a wiirimu ohookhaliheryani osuwela ekeekhai wiira mumphenteke. Etthu xeeni emwiirihale opaka eyo? Mwaha woowi, owo ohoona wiira nyuwo mookhalana murima wooloka. (Mit. 13:48) Okathi Yesu aalavunle awe moolumo ari Yohani 6:​44, owo aahimya moolumo a Yehova ari Yeremiya 31:3. Nave Yehova aahaaleela atthu awe wiira: “Mwaha w’ororomeleya waka nkinihiya-tho wophentani”. (Yer. 31:3; mulikanyihe ni Hoseya 11:4) Nkahaya muupuwele ele enitaphulela aya eyo. Tiithi ahu oophenta a wiirimu, okathi wootheene onniweha mikhalelo sooloka murina anyu, hata nyuwo muhisuwelaka.

16. a) Etthu xeeni Yesu iixuttihale awe ni xeeni ninreerela ahu okupali? b) Etthu xeeni enrowa wookhaliheryani okupali wiira Yehova Tiithi ooloka? (Nwehe ekaaxa eni: “Tiithi Ooreera Murima”.)

¹⁶ Okathi Yesu aamuhimmye awe Yehova okhala Tiithi ahu, owo aakhala ntoko wiira aahimya so: “Yehova khahiyo paahi, Tiithi aka, nave-tho owo Tiithi anyu. Kinnikupali ni murima wootheene wiira owo onnookhapelelani ni onnoophentani vanceene”. Akhala wiira okathi mukina khamunikupali wiira Yehova onnoophentani, mwiikoheke so: ‘Kiireke kinnikupali moolumo a mwaana, yoowo onimusuwela oratteene Tiithi ni okathi wootheene aalavula ekeekhai?’ — 1Ped. 2:22.

MUHIHIYE OKUPALI WIIRA YEHOVA ONNOOPHENTANI

17. Xeeni ninreerela ahu olipiha okupali wahu wiira Yehova onniniphenta?

¹⁷ Ootheene ahu, nihihiye okupali wiira Yehova onniniphenta. Muhiliyale wiira Satana onnipaka sootheene oniwerya awe wiira onihiihe omurumeela Yehova. Nave Satana oniphavela onikhulumula. Akhala wiira onoowerya opaka eyo, onoonikupaliha wiira Yehova khonniphenta. Nihikhala-khale nikupaliki wootha iwo wa Satana! — Yoobi 27:5.

18. Etthu xeeni mukhanle anyu oopaka wiira muhihiye okupali wiira Yehova onnoophentani?

¹⁸ Mwaha ola, nihiixutta itthu nikhanle ahu oopaka wiira nikupali wiira Yehova onniniphenta. Nto nihaana onvekela wiira onikhaliherye oweha mikhalelo sooloka, seiyo sinrowa onikhaliherya woona wiira owo onniniphenta. Muupuweleke iversiikulu sa mbiibiliyani sinooniherya wiira Yehova onninikhapelela ni onniniphenta vanceene. Muhiliyale wiira okathi wootheene, Yehova onnaaphenta ale animphenta. Nave muhiliyale wiira Yehova oonivaha mukuttho woowoopola wa mwanawe. Ntoko Yesu aahimyale awe, mukupaliki wiira Yehova ti Tiithi anyu oophenta. Nto akhala wiira munookohiwa so: “Niireke Yehova onnoophentani?” Nyuwo munoowerya waakhula ni murima wootheene wiira: “Aayo, Yehova onnikiphenta! Nave khula nihiku kinoopakaka ele eniwerya aka wiira kimooniherye wiira kinnimphenta!”