Mukupaliki Wiira Yehova Toolevelela

1-2. Etthu xeeni Yehova onipaka awe okathi mutthu onittharuwa awe ni murima wootheene itampi sawe? (Nwehe vakaapani.)

MWENE Davidi aaniivaha nthowa mwaha wa itampi aapanke awe khalai. (Esal. 40:12; 51:​3, moolumo oopacerya) Owo aahipaka itampi suulupale. Hata vaari siiso, Davidi aahittharuwa ni murima wootheene, nto Yehova aahimulevelela. (2Sam. 12:13) Davidi aahihakalala vanceene nuumala osuwela wiira Yehova aahimulevelela ni murima wootheene. — Esal. 32:1.

² Nimutakihaka Davidi, hiyo nave ninnihakalala okathi nnoona ahu wiira Yehova oonilevelela. Hata nipanke ene etampi yuulupale, ti voolipiha osuwela wiira Yehova onoonilevelela, akhala wiira nnoottharuwa ni murima wootheene, nnonvekela wiira onilevelele, nnimwaaleela axitokweene ni nnoopaka sootheene ninwerya ahu wiira nihitthikele-tho opaka etampi eyo! (Mir. 28:13; Mit 26:20; 1Yoh. 1:9) Nave ti voomaaliha vanceene osuwela wiira Yehova onninlevelela moomalela nnakhala ntoko wiira khanitonko opaka etampi! — Ezek. 33:16.

3-4. Moonelo xeeni murokora mmosa aarina awe nuumala opatisiwa? Mwaha ola, ninrowa othokorerya exeeni?

³ Okathi mukina, atthu akina vannaaxankiha okupali wiira Yehova ohaalevelela. Eyo ti etthu yaamwiiranenle Jennifer, yoowo anamuyari awe yaari Anamoona a Yehova. Okathi aari awe mwali, owo aahipacerya opaka itthu soohiloka ni khaaleela anamuyari awe. Masi nuuvira iyaakha vakhaani, owo aahipaka marukunuxo mookumi mwawe, aahiivahererya wa Yehova ni aahipatisiwa. Owo onihimya so: “Khalai, ikwaha sinceene kaamakela orupihana voohiloka, ohapaliwa, onanariwa ni etthu kaatepexa aka ovaha efaita waari okhalana musurukhu. Miyo kaanisuwela wiira orumeelaka mukuttho woowoopola wa Yesu, Yehova onoonilevelela itampi sahu. Masi hata kaattharunwe ni murima wootheene ni onvekela Yehova wiira okilevelele, miyo nkaakupali wiira Yehova ookilevelela tthiri”.

⁴ Niireke okathi mukina vannooxankihani okupali ni murima wootheene wiira Yehova ohoolevelelani itampi mwaapanke anyu khalai? Masi muhiliyale wiira Yehova aahimmorela ikharari ni omulevelela Davidi. Nto Davidi aanikupali ni murima wootheene wiira aahileveleliwa ni Yehova, maana owo toomoriwa ikharari. Nto mukupaliki wiira Yehova ohoolevelelani. Mwaha ola, nnooweha nthowa naya vari aya vooloka okupali wiira Yehova toolevelela ni etthu enrowa onikhaliherya okupali wiira Yehova toolevelela.

XEENI VARI AYA VOOLOKA OKUPALI WIIRA YEHOVA TOOLEVELELA?

5. Satana oniphavela wiira nikupaliki exeeni? Nvahe ntakiheryo.

⁵ Okathi ninkupali ahu wiira Yehova toolevelela, eyo enninikhaliherya ohimorela muraakho wa Satana. Muhiliyale wiira Satana, oniphavela onihiiha omurumeela Yehova. Nto wiira ophwanye ele oniphavela awe, Satana onniimananiha onikupaliha wiira Yehova khonrowa onilevelela itampi sahu. Nkahaya mmuupuwele mulopwana ole a oKorinto, aakumihiwe mmulokoni mwaha wa orupihana woohiloka. (1aKor. 5:​1, 5, 13) Muhoolo mwaya, owo aahittharuwa ni murima wootheene. Masi Satana aaphavela wiira anna ni arokora a mmulokoni ahimulevelele ni akhootteke omwaakhela mmulokoni. Nave Satana aaphavela wiira mulopwana ole uupuweleke wiira Yehova khaarowa omulevelela. Nto eyo yammwiiriha ‘otepa oriipiwa murima mpakha okhulumuwa’, nave aamuhiya omurumeela Yehova. Eyo ti etthu Satana aaphavela awe. Nave olelo-va, Satana oniphavela wiira nuupuweleke wiira Yehova khonrowa onilevelela ni oniphavela onihiiha omurumeela Yehova. Masi hiyo “khanintikhina itthu siniphavela awe”. — 2aKor. 2:​5-11.

6. Etthu xeeni enrowa onikhaliherya ohiya wiivaha nthowa?

⁶ Okupali wiira Yehova oonilevelela ni murima wootheene, eyo enninikhaliherya ohiivaha nthowa. Okhala wene, okathi ninttheka ahu, hiyo ninniivaha nthowa. (Esal. 51:17) Nto eyo etthu yooloka. Mwaha woowi okathi nnoona ahu wiira noopaka etthu yoohiloka, eyo enninikhaliherya opaka marukunuxo ni opaka itthu sooloka. (2aKor. 7:10) Okathi nintepa ahu wiivaha nthowa nnuupuwela wiira Yehova khonilevelenle itampi sahu, eyo pooti oniiriha ohiya omurumeela. Masi okathi ninkupali ahu ni murima wootheene wiira Yehova oonilevelela, eyo enninikhaliherya ohiya wiivaha nthowa. Nto khaninrowa ohiya omurumeela, okupali wiira onnisiveliwa ni hiyo ni ohakalala ni murima wootheene. Eyo ti etthu Yehova oniphavela awe para hiyo. (aKol. 1:​10, 11; 2Tim. 1:3) Masi etthu xeeni enrowa onikhaliherya okupali ni murima wootheene wiira Yehova oonilevelela?

ETTHU XEENI ENROWA ONIKHALIHERYA WEEMERERYA OLEVELELA WA YEHOVA?

7-8. Etthu xeeni Yehova aamulenle awe Moise voohimya sa yena ni etthu xeeni ninreerela ahu okupali? (Okhuma 34:​6, 7)

⁷ Muupuweleleke moota Yehova oniihimya awe mmansawe. Mwa ntakiheryo, nkahaya nwehe etthu Yehova aamulenle awe Moise omwaako Sinayi.a (Mmusome Okhuma 34:​6, 7.) Nnaamwi Yehova orina ene mikhalelo sinceene sooreera, owo aahithanla omuleela Moise wiira “miyo k’Apwiya, Apwiya Muluku òmoriwa ikharari ni òvilela”. Nto niireke munoona wiira okathi mutthu onimphenta Yehova onipaka awe etampi onattharuwa ni murimwa wootheene, Yehova khonrowa omulevelela? Akhala wiira Yehova khaarowa omulevelela mutthu owo, aarowa wooniherya wiira mutthu ootakhala ni ohinimoriwa ikharari. Masi Yehova khonikhala-khala opakaka eyo!

⁸ Nikupaliki wiira okathi Yehova onihimya awe wiira toomoriwa ikharari, owo onihimya ekeekhai, maana khonootha. (Esal. 31:5) Nto nihaana okupali ele onihimya awe. Vakhala wiira vannooxankihani ohiya wiivaha nthowa mwaha wa itampi mpanke anyu khalai, mwiikoheke so: ‘Kiireke kinnikupali ni murima wootheene wiira Yehova toomoriwa ikharari ni oothunku ni khaarowa okhootta omulevela mutthu opanke etampi ottharuwa ni murima wootheene? Nto kiireke miyo nkikhanle ookupali ni murima wootheene wiira Yehova ookilevelela?’

9. Esaalimu 32:​5, enniixuttiha exeeni sa enamuna Yehova onnilevelela awe?

⁹ Muupuweleleke itthu Yehova onniixuttiha awe mbiibiliyani sa moota onnilevelela awe. Mwa ntakiheryo, nwehe moota Davidi otthokihenrye awe enamuna Yehova onnilevelela awe. (Musome Esaalimu 32:5.) Davidi aahimmye so: “Nyuwo mwaahikilevelela itampi saka”. Nuulumo na eheeberi nitaphuleliwe wiira “mwaahikilevelela”, pooti-tho otaphuleliwa “weemexa”, “okumiha” aahiiso “okuxa”. Okathi Yehova aamulevelenle awe Davidi, vaakhala ntoko wiira Yehova aahikuxa muritti woolemela Davidi aateexale awe. Davidi aahihiya wiivaha nthowa ni aahipacerya ohakalala mwaha woosuwela wiira Yehova aahimulevelela moomalela. (Esal. 32:​2-4) Hiyo nave, nnoowerya ophwanya ohakalala Davidi aaphwannye awe. Okathi ninttharuwa ahu itampi sahu ni murima wotheene, khanimpirisari wiivaha nthowa mwaha wa itampi Yehova okunxe awe onilevelela moomalela.

10-11. Moolumo oowi “muri oolikana ene wiira mulevele”, anooniherya exeeni voohimya sa Yehova? (Esaalimu 86:5)

¹⁰ Musome Esaalimu 86:5. Eveersu ela, Davidi onihimya wiira Yehova ori ‘oolikana ene wiira onilevelele’. Elavulaka sa moolumo awo animuhimya Yehova, eliivuru emosa enimutthokiherya Biibiliya ehimmye so: “Okhala wene, ‘owo toolevelela’”. Xeeni okhalana wene Yehova ori awe mutthu oolevelela? Mpantta wookiserya wa eveersu ela, onitthokiherya so: “Ophenta wanyu woororomeleya, ti wuulupale para atthu ootheene anoovekelani”. Mwaha ovinre, nihiixutta wiira Yehova onniwooniherya ophenta wawe woororomeleya atthu ale animphenta ni khonikhala-khala aanyanyalaka. Nto okathi arumeyi awe awo oororomeleya anittheka aya ni anattharuma ni murima wootheene, Yehova khonihiya owooniherya ophenta wawe woororomeleya ni khonihiya waalevelela. (Yes. 55:7) Vakhala wiira vannooxankihani okupali wiira Yehova ohoolevelelani, mwiikoheke so: ‘Kiireke kinnikupali wiira Yehova Muluku oolevelela, yoowo onaalevelela atthu ootheene anittharu ananvekela wiira aamorele ikharari? Kiireke khivanireerela okupali wiira Yehova ookilevelela okathi kanvekenle aka wiira okimorele ikharari?’

¹¹ Biibiliya onnooniherya wiira Yehova onnisuwela moota nipattuxiwe ahu ni onnisuwela wiira niyariwe nirina ene etampi. Nto eyo, enninimaaliha vanceene. (Esal. 139:​1, 2) Nrowe niwehe etthu Davidi aahimmye awe Esaalimu ekina ni noone moota enrowa aya onikhaliherya, okupali wiira Yehova onniphavela onilevelela.

MUHILIYALE ITTHU YEHOVA ONUUPUWELA AWE

12-13. Moovarihana ni Esaalimu 103:​14, etthu xeeni Yehova onuupuwela awe ni onipaka exeeni?

¹² Musome Esaalimu 103:14. Eveersu ela, Davidi onnihimya wiira Yehova “onnuupuwela wiira hiyo na ntthupi”. Ni moolumo ala, Davidi onnitthokiherya etthu ekina enimwiiriha Yehova okhala oolikana ene wiira aalevelele arumeyi awe oororomeleya. Etthu ene tiila: Yehova khonikhala-khala oliyalaka wiira niyariwe nirina ene etampi. Wiira niiwexexe oratteene moolumo ala a Davidi, nrowe nithokorerye oratteene etthu Davidi aaphavela awe ohimya ni moolumo awo.

¹³ Davidi ohimmye wiira Yehova “onnisuwela oratteene moota nipattuxiwe ahu”. Yehova ampattunxe Adamu orumeelaka “etthaya vakhani ya vathí”. Nto, owo onnisuwela oratteene moota apinaatamu apattuxiwe aya ni itthu anipirisari aya. Mwa ntakiheryo, onnisuwela wiira apinaatamu annipirisari olya, orupa ni omumula. Hata apinaatamu yahaarina etampi, awo yampirisariki itthu iyo. (Maph. 2:7) Masi nuumala Adamu ni Eva ottheka, opattuxiwa wa wapinaatamu erumeeliwaka etthaya, waahikhalana yootaphulela ekina. Moota xeeni? Mwaha woowi, nniyariwa nirina ene etampi ni nihaana wiimananiha wiira nihipakeke itthu soohiloka. Ohiya paahi Yehova osuwela wiira niyariwe nirina ene etampi, Davidi ohimmye wiira Yehova “onnuupuwela”. Nuulumo na eheeberi nirumeeliwe-va, pooti-tho otaphuleliwa opaka etthu yooloka wiira okhaliheriwe mutthu owo. Hiyo pooti olavula mookwasa moolumo a Davidi mwa enamuna ela: Yehova onnisuwela wiira okathi mukina hiyo pooti opakaka etampi. Nto okathi ninttheka ahu nnattharuwa ni murima wootheene, owo onninimorela ikharari ni onninilevelela ni murima wootheene. — Esal. 78:​38, 39.

14. a) Etthu xeeni ekina Davidi aahimmye awe sa enamuna Yehova onnilevelela awe? (Esaalimu 103:12) b) Enamuna Yehova aamulevelenle awe Davidi, enniixuttiha exeeni? (Nwehe ekaaxa eni: “Moota Yehova Onnilevelela Awe ni Oliyala”.)

¹⁴ Etthu xeeni enrowa onikhaliherya okupali wiira Yehova oonilevela? (Musome Esaalimu 103:12.) Davidi ohimmye wiira okathi Yehova onnilevelela awe itampi sahu, owo onnirihela ottaiwene itampi iyo “ntoko siisaale onikhuma nsuwa orakamelanne aya ni onikela nsuwa”. Okhala wene, onikhuma nsuwa khoreere orakamelana ni onikela nsuwa ni mapuro awo khanikhala-khala akumanaka. Eyo enniixuttiha exeeni voohimya sa itampi Yehova onnilevelela awe? Etthokiheryaka eveersu ela, eliivuru emosa ehimmye so: “Muluku onnirihela ottaiwene itampi sahu, ntoko siisaale etthu yoowunkha enimala-mala aya. Nto nikupaliki ni murima wootheene wiira Muluku khonikhala-khala uupuwelaka itampi iyo”. Ikwaha sikina, wunkha wa etthu aahiiso wunkhela wa eyoolya, onniniiriha wuupuwela etthu. Masi okathi Yehova onnilevelela awe, etampi eyo khenihala emunkheryaka, nnakhala khonuupuwela ni khonrowa orumeela wiira onihukhumu. — Ezek. 18:​21, 22; Mit. 3:19.

15. Etthu xeeni nikhanle ahu oopaka akhala wiira ninniivaha nthowa mwaha wa itampi nipanke ahu khalai?

¹⁵ Moolumo a Davidi ari Esaalimu 103, anrowa onikhaliherya sai okupali wiira Yehova oonilevelela? Akhala wiira munniivaha nthowa mwaha wa itampi mwaapanke anyu khalai, mwiikoheke so: ‘Kiireke kirooliyala etthu Yehova onuupuwela awe, kiire so, kiireke kirooliyala wiira Yehova onnisuwela wiira khiyariwe kirina ene etampi ni onnaalevelela anatampi ntoko miyo? Kiireke kirooliyala wiira Yehova onniliyala itampi onilevelela awe ni khonrowa orumeela wiira okihukhumu?’ Muhiliyale wiira Yehova khonimakela wuupuwela itampi mpanke anyu khalai. Ni nyuwo-tho, muhimakeleke wuupuwela itampi Yehova oolevelenlaaweni. (Esal. 130:3) Okathi ninkupali ahu wiira Yehova oonilevelela ni murima wootheene, nnoohiya wiivaha nthowa ni khaninrowa ohiya omurumeela Yehova moohakalala.

16. Nvahe ntakiheryo nnooniherya wiira ti vootakhala wiivaha nthowa mwaha wa itampi nipanke ahu khalai. (Nwehe efootu.)

¹⁶ Nkahaya muupuwele ntakiheryo nla: Omakela wiivaha nthowa, onoolikana ni mutthu oneettiha ekaaro onamakela oweha espeelyu wiira owehe etthu eniiraneya ottuli. Ekeekhai wiira okathi mukina ti vooloka oweha espeelyu, maana eyo ennimukhaliherya mutthu oneettiha ekaaro ohimpaka asitenti mwaha wa itthu sinimutthara ottuli. Masi wiira mutthu eettihe ekaaro moovareleleya, owo ohaana owehexexa ephiro onirowa awe. Mwa enamuna emosa-ru, okathi mukina ti vooloka wuupuwela soovonya naapanke ahu khalai. Mwaha wa xeeni? Mwaha woowi, eyo enoonikhaliherya ohitthikela opaka itthu simosa-ru soohiloka. Masi akhala wiira nimmakela wuupuwela itampi Yehova onilevelenle awe, eyo pooti oniiriha otepa wiivaha nthowa, ohihakalala ni ohimurumeela Yehova ntoko oniphavela awe. Ohiya opaka eyo, nihaana owehexexa ephiro ninvira ahu. Hiyo, nneetta ephiro enrowa onikhaliherya okela elapo esya, eleiheriwe ni Muluku, elapo eyo “itthu sa khalai khasinupuweliwa-tho”. — Yes. 65:17; Mir. 4:25.

MUHIHIYE OKURUNUXA MURIMA ANYU

17. Xeeni ninreerela ahu ohiliyala wiira Yehova toophenta ni toolevelela?

¹⁷ Nihaana wiimananiha okurunuxa murima ahu, wiira nikupali wiira Yehova toophenta ni toolevelela. (1Yoh. 3:19) Mwaha wa xeeni? Mwaha woowi, Satana oniphavela onikupaliha wiira itampi sahu ti suulupalexa vahiniweryaneya aya Yehova oniphenta ni onilevelela. Masi muhiliyale wiira Satana oniphavela onihiiha omurumeela Yehova. Ninnisuwela wiira Satana khonrowa ohiya wiimananiha, maana ohalanne okathi vakhaani paahi. (Wis. 12:12) Masi nihikhala-khale nimuhiyaka onixinttaka!

18. Etthu xeeni mukhanle anyu oopaka wiira mukupali wiira Yehova onnoophentani ni onimoolevelelani?

¹⁸ Wiira mulipihe okupali wanyu wiira Yehova toophenta, muhihiye weettela malakiheryo nithokorenrye ahu mwaha ovinre. Wiira muhihiye okupali wiira Yehova toolevelela, muupuweleleke itthu Yehova oniihimya awe, seiyo nithokorenrye ahu mwaha ola. Nviriheke okathi munceene muupuwelelaka ele Biibiliya onihimya awe sa olevelela wa Yehova. Muhiliyale wiira Yehova onnisuwela wiira niyariwe nirina ene etampi, nto onoonimorelaka ikharari. Nave muhiliyale wiira Yehova onninilevelela moomalela. Mwiira siiso, munoohakalalaka mwaha woosuwela wiira Yehova ohoomorelani ikharari ni munoohimyaka ntoko Davidi aahimmye awe oriki: “Kihooxukhurelani Yehova, mwaha woowi ‘nyuwo mwaahikilevelela itampi saka’!” — Esal. 32:5.