Muhihiye ohakalala okathi munuuluvala anyu

1-2. Yehova oniwoonela sai anna ni arokora oowuuluvala? (Esaalimu 92:​12-14; nwehe efootu vakaapani.)

ATTHU a olumwenku wootheene, annikhalana moonelo woovirikana okathi anuuluvala aya. Mwa ntakiheryo, niireke munnuupuwela okathi moonale anyu wiira moopacerya okhalana ipwi? Pooti wiira, mwaahuupuwela waasula wiira atthu akina ahiwehe. Masi mwaahoona wiira hata mwaasulaka, eyo khiyaarowa okhoottiherya omela ipwi sikina. Ntakiheryo nla, nnooniherya wiira wuuluvala onnaaxankiha atthu anceene.

² Ankhi Tiithi ihu a wiirimu, oniwoonela sai anna ni arokora oowuuluvala? (Mir. 16:31) Yehova onihimya wiira anna ni arokora oowuuluvala, ari ntoko miri sooreera siniima mihokorokho sinceene. (Musome Esaalimu 92:​12-14.) Xeeni ohimyaka siiso? Okhala wene, miri siniima mihokorokho sinceene ni sirina ifilori sininkhela, ti seiye sikhanle okhuma khalai. Mwa ntakiheryo, wookhala mwiri mmosa ori oJapão, yoowo onikhala iyaakha sinceene. Miri sikina sa etiipu eyo, sookhalana iyaakha sinivikana 1 000. Moolikanasa ni miri iyo, anna ni arokora oowuuluvala aakhalana efaita yinceene para Yehova. Tthiri Yehova oniweha mikhalelo sa mutthu owo, ohiya oweha ipwi sa mutthu owo. Nave, Yehova onnivaha efaita yinceene mikhalelo sooloka sa anna ni arokora oowuuluvala, eyo piiyo, ovilela ni ororomeleya waya. Nave-tho, Yehova onnuupuwela wiira anna ni arokora oowuuluvala, aaviriha iyaakha sinceene amurumeelaka moororomeleya.

3. Mwaahimye atthu oowuuluvala Yehova aarumme awe wiira apake ele aaphavela awe.

³ Wuuluvala, khonivukula evalore mutthu orina awe para Yehova.a Ikwaha sinceene, Yehova onnaaruma atthu oowuuluvala wiira apake ele oniphavela awe. Mwa ntakiheryo, Sara aarina iyaakha 90 okathi Yehova aamulenle awe wiira aarowa okhala maama a nloko nuulupale ni muhavinre a Mesiya. (Maph. 17:​15-19) Moise, iira uuluvanle ene, okathi Yehova aamuthanlale awe wiira aakumihe aisarayeli wExiitu. (Okhum. 7:​6, 7) Nave, murummwa Yohani aahuuluvala okathi Yehova aamurumme awe olepa iliivuru 5 sa mbiibiliyani.

4. Moovarihana ni Miruku 15:​15, etthu xeeni enrowa waakhaliherya anna ni arokora oowuuluvala ovilela mixankiho sinaaphwanya? (Nwehe efootu.)

⁴ Wuuluvala, onnikumiherya mixankiho sinceene. Otheyaka, murokora mmosa, aahimmye so: “Atthu oolipa, tanuuluvala.” Masi otteeliwa murima,b pooti waakhaliherya atthu oowuuluvala, ovilela mixankiho sinikhumela mwaha wa wuuluvala. (Musome Miruku 15:15.) Mwaha ola, nnooweha itthu akhanle aya oopaka anna ni arokora oowuuluvala wiira ahihiye ohakalala. Nave, nnooweha itthu anna ni arokora a mmulokoni akhanle aya oopaka wiira yaakhaliherye. Masi wanipacerya, nrowe niwehe moota vanixankiha aya ohihiya ohakalala vaavo mutthu onuuluvala awe.

XEENI VANIVILA AYA OHAKALALA OKATHI MUTTHU ONUULUVALA AWE?

5. Xeeni atthu akina oowuuluvala aniriipiwa aya murima?

⁵ Itthu xeeni sikhanle oowooriipihani murima? Woonasa wene, munniriipiwa murima mwaha woowi khamuniwerya ovara itthu mwaavara anyu khalai. Nave, pooti wiira munninkheliwa okathi mwaari anyu mmiravo ni mwaarina anyu ekumi yooloka. (Mus. 7:10) Murokora oniihaniwa Ruby, onihimya so: “Miyo kinniwereyasiwa vanceene ni nkirina ikuru. Vannikixankiha oteexa mwetto wiira kiware imeya. Hata khivanikikhweela owara ekuwo. Matata aka annikuuma ni nkiniwerya orumeela oratteene ikatha saka. Hata vannikivila ovara miteko saamukhaani.” Harold, yoowo aarumeela oBeteli, ohimmye so: “Kinniriipiwa murima mwaha woowi nkiniwerya ovara miteko seiye saakisivela ovara khalai. Okathi kaari aka mmiravo, kaahikhalana ikuru sinceene. Xooku aakisivela omweetta vanceene, aari Beisebol. Atthu akina yaahimya wiira: ‘Munvahererye poola Herold, onoonikhaliherya okanyari.’ Masi mahiku ala, kinoona wiira nkinrowa owerya onvonya poola.”

6. a) Itthu xeeni sikina sikhanle oowiiriha atthu oowuuluvala oriipiwa murima? b) Etthu xeeni enrowa waakhaliherya atthu oowuuluvala oweha akhala wiira pooti ohiya aahiiso nnaari weettiha ekaaro? (Nwehe erevista yeela mwaha oni: “Kiireke kihaana ohiya weettiha ekaaro?”)

⁶ Nyuwo pooti oriipiwa murima mwaha woowi munipirisari okhaliheriwa opaka itthu seiye mwaapaka anyu mekhinyu. Nave, nyuwo pooti oriipiwaka murima, mwaha woowi munipirisari okhapeleliwa ni mutthu mukina aahiiso munipirisari orowa okhalaniwaka ni mwaninyu. Nave-tho, nyuwo pooti oriipiwaka murima mwaha woowi munoowereyasiwa aahiiso khamunoona saana, nto muhinawerya orowa mapuro makina, weettiha ekaaro, omweettiha moota aahiiso pisikeleeta. Nto itthu iyo pooti owiirihani ohihakalala! Masi muhiliyale wiira efaita nirina ahu para Yehova ni atthu akina, khenlipa vakhala wiira ninniwerya wiikhapelela mmansihu, ninkhala mekhihu aahiiso ninniwerya weettiha ekaaro, omweettiha moota aahiiso pisikeleeta. Nave mukupaliki wiira Yehova onnisuwela oratteene moonelo ahu. Nave-tho, onnisuwela wiira ninnimphenta ni ninnaaphenta anna ni arokora. Nto eyo tenimwiiriha Yehova onivaha efaita yinceene. — 1 Sam. 16:7.

7. Etthu xeeni enrowa waakhaliherya atthu anoova okhwa ahiwehale olumwenku ola omalaka?

⁷ Woonasa wene, munniriipiwa murima okathi munuupuwela anyu wiira pooti okhwa muhiwehale omalaka olumwenku ola wootakhala. Akhala wiira munuupuwela siiso, etthu xeeni enrowa wookhaliheryani? Mwiimananiheke wuupuwela wiira moopixa murima, Yehova onnilipelela wiira ophiye okathi onrowa awe omaliha olumwenku ola wootakhala. (Yes. 30:18) Masi etthu xeeni enimwiiriha Yehova opixa murima? Etthu ene tiila: Oniphavela wiira atthu imilyau sinceene akhalane okathi ni eparakha ya omusuwela ni omurumeela. (2 Ped. 3:9) Okathi muniriipiwa anyu murima, muupuweleke wiira opixa murima wa Yehova onimwaakhaliherya atthu anceene woopowa. Woonasa wene, atthu akina anrowa woopowa, amusi anyu.

8. Mixankiho xeeni sikina sinaaphwanya atthu oowuuluvala?

⁸ Okathi nihinkhala ahu saana, moohicikha iyaakha sahu, pooti ohimya aahiiso opaka itthu sinrowa oniiriha oriipiwa murima muhoolo mwaya. (Mus. 7:7; Yak. 3:2) Mwa ntakiheryo, okathi aahaawa awe mulopwana oororomeleya aihaniwa Yoobi, aahilavula “moolumo . . . a ololo”. (Yoobi 6:​1-3) Nave, owereyasiwa pooti omwiiriha mutthu oowuuluvala ohimya aahiiso opaka itthu ahaarowa awe opaka. Ekeekhai wiira khuuvo mutthu aarowa orumeela moolakelela owereyasiwa wiira ohaareereke murima atthu akina aahiiso owuukhula. Nto noona wiira noohimya wala noopaka etthu yoohiloka, moowaakuveya nihaana onvekela mutthu owo wiira onilevelele. — Math. 5:​23, 24.

ITTHU SINROWA WOOKHALIHERYANI OHIHIYA OHAKALALA

9. Xeeni munireerela anyu waahiya atthu akina wiira yookhaliheryeni? (Nwehe ifootu.)

⁹ Mwaahiyeke atthu akina wiira yookhaliheryeni. (Akal. 6:2) Wanipacerya, pooti wooxankihani waahiya atthu akina wiira yookhaliheryeni. Murokora oniihaniwa Gretl, onihimya so: “Ikwaha sikina vannikixankiha waahiya atthu akina wiira akikhaliherye. Mwaha woowi kinoona wiira kinimwaavaha muteko. Waahivira okathi wiira kituruke muupuwelo aka ni moowiiyeviha koone wiira kinnipirisari okhaliheriwa.” Okathi munaahiya anyu atthu akina yookhaliheryakani, munniwiiriha ophwanya ohakalala, weiwo onikhumelela mwaha woovaha. (Mit. 20:35) Nave, munoohakalala oweha wiira atthu akina annoophentani ni aniphavela wookhaliheryani.

10. Xeeni vari aya vooloka waaxukhurela atthu akina? (Nwehe efootu.)

¹⁰ Mwaaxukhureleke atthu akina. (Akol. 3:15; 1 Ates. 5:18) Okathi atthu akina annipakela aya itthu sooreera, hiyo ninnihakalala, masi pooti oliyalaka waaxukhurela. Okathi nintheya ahu ni nnahimya wiira kooxukhuru, atthu awo annoona wiira ninnivaha efaita itthu annipakela aya. Murokora oniihaniwa Leah, yoowo onaakhapelela arokora oowuuluvala oBeteli, onihimya so: “Murokora mmosa onimakela okilepela ikarta okixukhurelaka. Ekeekhai wiira onilepa moolumo vakhaani paahi, masi moolumo awo toovara murima vanceene. Okisivela vanceene ikarta iyo, mwaha woowi kinnisuwela wiira onnivaha efaita muteko kinivara aka.”

11. Munrowa waakhaliherya sai atthu akina? (Nwehe efootu.)

¹¹ Mwiimananiheke waakhaliherya atthu akina. Vaavo muniviriha anyu okathi nwuupuwelaka atthu akina ni wiimananiha waakhaliherya, eyo enimookhaliheryani ohiviriha okathi munceene muupuwelaka mixankiho sanyu paahi. Muhapo mmosa a wÁfrica, onihimya wiira atthu oowuuluvala, ari ntoko ebibilioteeka ehireere iliivuru siniixuttiha itthu sirina efaita yinceene. Masi iliivuru siroopwehiwa paahi khasiniixuttiha etthu ni khasinikontari itthu siiraneyale. Nto okhala wiira nyuwo muri ntoko “ebibilioteeka ekumi”, mwiimananiheke owiixuttiha ni waaleela amiravo itthu siwiiranenleni. Mwaakoheke etthu ni mwaawiriyaneke oratteene okathi anaakhula aya. Nwooniheryeke wiira opaka ele Yehova oniphavela awe, teri etthu yootepa oreera ni okathi wootheene enniniphwanyiha ohakalala weekeekhai. Tthiri nyuwo munoohakalalaka okathi munaamaaliha anyu ni waalipiha apatthani anyu amiravo. — Esal. 71:18.

12. Moovarihana ni Yesaya 46:​4, etthu xeeni Yehova aaleihenrye awe atthu oowuuluvala? (Nwehe efootu.)

¹² Munvekeleke Yehova wiira oovaheeni ikuru. Woonasa wene, erutthu anyu ni muupuwelo anyu pooti okhulumuwa, masi Yehova “khonivela nnakhala khonikhulumuwa.” (Yes. 40:28) Yehova onirumeela sai ikuru sawe sihinimala? Enamuna emosa onirumeela awe ikuru sawe, ori waalipiha arumeyi awe oowuuluvala, yaawo ari oororomeleya. (Yes. 40:​29-31) Mweekeekhai, Yehova onnileiherya waakhaliherya arumeyi awe oowuuluvala. (Mmusome Yesaya 46:4.) Okathi wootheene, Yehova onnipaka itthu onileiherya awe. (Yox. 23:14; Yes. 55:​10, 11) Okathi muninvekela anyu, Yehova onimookhaliheryani itthu munipirisari anyu. Nuumala-vo, munimoona wiira onnoophentani, nto eyo enoowiirihani ohakalalaka.

13. Moovarihana ni 2 Akorinto 4:​16-18, etthu xeeni ninreerela ahu ohiliyala? (Nwehe efootu.)

¹³ Muhiliyale wiira munootthikela okhala mmiravo ni otthikela okhalana ekumi yooloka. Okathi nnuupuwela ahu wiira muxankiho ahu onoomala, eyo enninikhaliherya ovilela. Biibiliya onileiherya wiira muhoolo atthu khanrowa wuuluvalaka, nnakhala owereiwa. (Yoobi 33:25; Yes. 33:24) Tivonto, muhakalaleke mwaha woosuwela wiira itthu sooreera siri ohoolo wanyu, ohiya ottuli wanyu. (Mmusome 2 Akorinto 4:​16-18.) Masi atthu akina anrowa opaka exeeni wiira yookhaliheryeni?

MOOTA ATTHU AKINA ANROWA AYA WOOKHALIHERYANI

14. Xeeni vari aya vooloka waaxukurya aahiiso waalikarela anna ni arokora oowuuluvala?

¹⁴ Mwaaxukuryeke ni mwaalikareleke anna ni arokora oowuuluvala ikwaha sinceene. (Ahep. 13:16) Atthu oowuuluvala pooti woonaka wiira ari mekhaya. Munna mmosa, yoowo ohiniwerya okhuma vate oniihaniwa Camille, onihimya so: “Miyo kinikhala mpaani okhuma voosiisu mpakha wiila. Tivonto, kinniphweeleya. Nto ikwaha sikina kiniixoona ntoko kharamu oowuuluvala owaleliwe munsisini. Nto eyo, ennikiiriha onyoonyiheya ni oxanka.” Okathi nnaaxukurya ahu atthu oowuuluvala, ninnaakhaliherya woona wiira aakhalana efaita para hiyo ni ninnaaphenta. Niireke munnuupuwela okathi mwaaphavela anyu orowa waaxukurya aahiiso omulikarela munna wala murokora oowuuluvala a muloko anyu, masi muliyala? Eyo pooti wiiraneya, okhala wiira ootheene ahu ninnaatteliwa miteko. Etthu xeeni enrowa onikhaliherya “othanla itthu sootepa okhalana efaita”, ohela muhina waaxukurya anna ni arokora oowuuluvala? (Afil. 1:10) Etthu enrowa wookhaliheryani, ori olepa masina, nihiku ni okathi munrowa anyu owinviyarela mensaxe wala waalikarela anna ni arokora oowuuluvala a muloko anyu. Nave-tho, pooti ompaka palano wiira mwaaxukurye.

15. Itthu xeeni amiravo ni atthu oowuuluvala akhanle aya oovara hoothe?

¹⁵ Akhala wiira mwa mmiravo, nyuwo pooti oxankaka mwaha woohisuwela etthu yoolavula aahiiso yoopaka okathi munikhala anyu ni atthu oowuuluvala. Masi nyuwo khamunipirisari oxanka. Mukhaleke mpatthani ooloka. (Mir. 17:17) Nave pooti ovaanela ni anna ni arokora oowuuluvala sihinatthi ni nuumala mithukumano sa mmulokoni. Nyuwo pooti waavekela ohimya soolepa sinaasivela aahiiso olavula itthu saasivela opaka okathi yaari aya mmiravo. Nave pooti waalattula wiira nwehe hoothe eporokaraama ya JW Broadcasting^®. Nave-tho, pooti waakhaliherya anna ni arokora oowuuluvala mpakaka itthu ahiniwerya aya. Mwa ntakiheryo, pooti waakhaliherya omwaatuwalisari komputatoore aahiiso telefoni aya. Nave-tho, pooti waakhaliherya opaxari iliivuru sookiserya sinisommwa mmulokoni. Murokora oniihaniwa Carol, onihimya so: “Mwaalattuleke anna ni arokora oowuuluvala wira mwavare hoothe itthu sinoosivelani, seiyo aniwerya aya. Nnaamwi kuuluvanle ene, nlelo kinniphavela opuha. Okisivela othuma itthu, orowa olya orestaurante ni opasiyari kiwehaka itthu Muluku opattunxe awe.” Murokora oniihaniwa Maira, onihimya so: “Mpatthani aka mmosa, orina iyaakha 90. Miyo kirina iyaakha 33, nto ookivikana iyaakha 57. Okhala wiira ikwaha sinceene ninnitheya hoothe ni ninniweha iviitiyu hoothe, kinniliyala wiira owo toowuuluvala. Nave okathi sinniphwanya aya mixankiho, ninnivekelana miruku mukina ni mukhwaawe.”

16. Xeeni vanireerela aya waahoola ospitaali anna ni arokora oowuuluvala?

¹⁶ Mwaahooleke ospitaali anna ni arokora oowuuluvala. Mwaahooleke ni nweheke akhala wiira totoro aahiiso nfirimeero owo, onnaakhapelela saana ni onnaavaha nikhaliheryo anipirisari aya. (Yes. 1:17) Nave, munimooniherya wiira munnimuthokorerya munna aahiiso murokora oowuuluvala, mulepaka itthu totoro onihimya awe. Murokora oowuuluvala oniihaniwa Ruth, onihimya so: “Okhala wene, okathi kinirowa aka mekhaka ospitaali, mameetiku khanikithokorerya saana. Awo annihimya wiira: ‘Nyuwo khamuniwereiwa. Munimuupuwela paahi wiira munoowereiwa.’ Masi kamukuxa mutthu mukina wiira okihoole, eyo kheniiraneya. Kinnaaxukhurela vanceene anna ni arokora, yaawo aniivaha okathi wiira akihoole ospitaali.”

17. Mwa enamuna xeeni nikhanle ahu oolaleerya hoothe ni anna ni arokora oowuuluvala?

¹⁷ Mulaleeryeke ni anna ni arokora oowuuluvala. Anna ni arokora akina oowuuluvala, khaniwerya orowa olaleerya mmaitthokoni. Niireke mwanwerya omukuxa munna wala murokora oowuuluvala a muloko anyu, wiira mwalaleerye hoothe ni ekarinyu? Nyuwo pooti okuxa ekhatera wiira owo alaleeryeke okilaathale ene. Nave, pooti omulattula munna aahiiso murokora oowuuluvala wiira mwiirihe yoosoma anyu ya Biibiliya. Nave-tho, pooti omukuxa naskola anyu a Biibiliya wiira mwamusomihe owannyawe munna aahiiso murokora owo oowuuluvala. Ohiya-vo, axitokweene pooti ovarerya vakhala wiira vanookhweya munna aahiiso murokora oowuuluvala orowa olaleerya, vakhala wiira muthukumano owo onipakiwa owannyawe. Yehova onnihakalala okathi nniimananiha ahu waathokorerya saana anna ni arokora oowuuluvala. — Mir. 3:27; Arom. 12:10.

18. Mwaha onittharelana, ninrowa othokorerya xeeni?

¹⁸ Mwaha ola, nihiixutta wiira Yehova onnaaphenta ni onnaavaha efaita atthu oowuuluvala. Nave, hiyo nihaana waavaha efaita ni waaphenta anna ni arokora oowuuluvala! Wuuluvala, onnikumiherya mixankiho sinceene. Masi mukhaliheriwaka ni Yehova, munoowerya ohihiya ohakalala. (Esal. 37:25) Musuweleke wiira muhoolo khamunrowa okhalanaka mixankiho ni munrowa ohakalalaka mahiku ootheene! Masi anna ni arokora akina aakhalana mixankiho sikina, ntoko waakhapelela amusi aya oowuuluvala, omukhapelela mwaana oniwereiwa, mpatthani aahiiso atthu akina aniwereiwa. Etthu xeeni enrowa waakhaliherya ohihiya ohakalala? Mwaha onittharelana, nnooweha etthu enrowa waakhaliherya.