Mwiirihe Yoosoma Anyu ya Biibiliya, Okhala Yooloka ni Yoohakalaliha

Yoxuwa osomaka Nlamulo; ixiri sa oYerikho simoraka, masi empa ya Rahabi khiyaamonre; Yoxuwa ottukhulenle ene matata awe wiirimu ovekelaka

YOXUWA aahihoolela nloko na aIsarayeli mpakha okela Elapo Yooleiheriwa. Eyo khahiyo yaari etthu yookhweya. Masi Yehova aahinvaha ikuru ni omulipiha Yoxuwa ohimyaka wira: “Mulipihe murima, mukhalane nthiti”. Nave Yehova aahimuleela Yoxuwa wira, akhala wira aamusoma ni wiiwelela Nlamulo, owo ampakaka soothanla sooloka ni aamukhumela saana.—Yoxuwa 1:7, 8.

Okhala wira ala “mahiku òxanka” ni oovila, tivonto vanixankiha aya okhala. (2 Timótheyo 3:1) Naaphavelaka okhumela saana ntoko Yoxuwa, nihaana otthara malakiheryo Yehova anvanhe awe. Nihaana omusoma Biibiliya khula nihiku ni orumeela ele eniixutta ahu wira nipakeke soothanla sooloka.

Masi akina a hiyo khansuwela moota wowiiriha yoosoma aya okhala yooloka ni yoohakalaliha. Tthiri yoosoma ya omwaneene ti yootepa otthuneya. Nto ekaaxa eni: “Mweererye Malakiheryo Ala”, pooti wookhaliheryani ophwanya malakiheryo anrowa wiiriha yoosoma anyu okhala yooloka ni yoohakalaliha.

Nasaalimo iipale so: “Mukèttiherye ephiro ya ikano sanyu: onkisivela wetta mphironi memmo”. (Esalimo 119:35) Nave nyuwo munoowerya osiveliwa osoma Nuulumo na Muluku. Nto vaavo munivikaniha anyu omusoma Biibiliya munoophwanya soowiixuttiha soovara murima.

Nnaamwi muhihoolelaka nloko ntoko Yoxuwa, masi munoowerya oxintta mixankiho sanyu. Tivonto, ntoko Yoxuwa, musomeke ni mwiiweleleke Nuulumo na Muluku. Mwiira siiso, munoopakaka soothanla sooloka ni okhumela saana.

MWEERERYE MALAKIHERYO ALA

Nvekeleke muhinatthi osoma. Biibiliya ookhalana soowiixuttiha sa Yehova, nto silempwe wira muttotteleke mureerelo. Tivonto, vaavo munimusoma anyu Biibiliya munvekeleke Yehova wira ookhaliheryeni wiiwexexa ele munisoma anyu. Nave muupuweleleke ni murumeeleke okathi onipaka anyu soothanla.—Ézira 7:10.
Mwiikoheke mwaamusomaka Biibiliya ni iliivuru sahu mwiikoheke so: ‘Mpantta ola onkiixuttiha exeeni voohimya sa Yehova? Onivarihana sai ni Omwene wa Muluku? Kinrowa orumeela sai wira kaakhaliherye atthu akina?’
Muupuweleleke ele enisoma anyu. Nuumala osoma mweemeleke vakhaani wira muupuwelele ele musomme anyu. Mwiikoheke so: ‘Kinoonela sai ele esomme aka? Xeeni kinoonela aka siiso? Enivarihana sai ni ele yaakikhumelenle khalai, enikikhumelela vano ni ele enrowa okikhumelela muhoolo? Kinrowa ovarihela sai malakiheryo ni miruku iya sa mBiibiliyani mookumini mwaka?’ (Yobi 23:5; Esalimo 49:4) Vaavo munuupuwelela anyu, nwehe nthowa naamwiiriha Yehova waaleela atthu awe wira asyakeke soolema iyo. Nave muupuweleleke mixankiho saamukhumelenle mutthu mmanle anyu omusoma mwaha woopaka etthu eyo.—Otumererya 32:28, 29.
Murumeeleke muupuwelo anyu okathi onisoma anyu. Mwa ntakiheryo, nkahaya muupuwele etthu yiiraneya vaavo aIximayeli yaamuthuma aya Yosefe. (Maphattuwelo 37:18-28) Niireke munnoona, wiiwa ni wuumurya itthu siiraneya? Mwiihele nipuro na atthu awo. Etthu xeeni yuupuwela aya ni yoonela sai? Vaavo munirumeela anyu muupuwelo anyu, yoosoma anyu enookhala yoohakalaliha.
Murumeeleke ikaruma sinikumiheriwa ni mutthenkeso ahu wira sookhaliheryekeni otokosa. Mwiixutte orumeela ikaruma sikhanle nttaava nanyu, sikhale iye siri onlaine aahiiso soowimpirimiriwa. Muhuuleliweke muru waavekela nikhaliheryo atthu akina wira yookhaliheryeni orumeela saana. Mwa ntakiheryo, Índice das Publicações da Torre de Vigia ni Eliivuru Enaakhaliherya Anamoona a Yehova Otokosa Myaha Sikumiheriwe, pooti wookhaliheryani ophwanya mwaha muniphavela anyu aahiiso otthokiheriwa wa eversiikulu ya mBiibiliyani. Murumeeleke elivirinyu Malakiheryo Anikhaliherya Osoma Nuulumo na Muluku, eyo ennihimya itthu ntoko opuro waakhaliwa, okathi ene, myeeryo, miphimo ni itthu sikina.
Muuluuleke iponto suulupale. Eyo enimookhaliheryani wuupuwela ele musomme anyu. Etthu yootepa otthuneya, mwaaleeleke atthu akina ele mwiixuntte anyu. Niireke etthu mukhanle anyu oorumeela mwaalaleeryaka? Opaka itthu iyo, onimookhaliheryani wuupuwela iponto suulupale ni atthu akina anoottottela mureerelo yoosoma anyu.